1. Lamba ditshi diakhalele nadio mupostolo Yone gu gisugishilo gia siekle ya thomo?

GU GISUGISHILO gia siekle ya thomo ya tangua dietu, mupostolo Yone wakhalele mu lamba diakola. Wakhalele muthu wa gukola, wadisuegele ha hongo dia Phatimose mukunda nu usageshi, nu wasalele mupostolo mumoshi’a mumoshi wakhalele nu monyo. (Yat. 1:9) Luko, wavuile egi mbalagaji jiakhalele mulongesa ndaga jia mambo mu mahungu a Uklisto, nu gukhaphumuna Aklisto. Yakhalele mumonega gifua guasalelego luko masugu avula hagula hungu dia giamatshidia ditote.—Yuda 4; Yat. 2:15, 20; 3:1, 17.

2. Hagutadila Yatuwuwe 7:9-14, vizio itshi yawaha yahetele Yone? (Tala gifuanesa gidi holu dia gizula.)

² Hakhalele Yone mu ndaga eyi ya lamba, Nzambi wamuhanele vizio imoshi yawaha yatadila masugu adi muza. Mu vizio yene, muanjelo mumoshi udi muwambela anjelo ako nguana, ha gumagenesa funji ya lamba diakola uu nu tangua ahiga agasue ambiwe maji mu nyuma mbaahagewa njimbu ha mbombo. (Yat. 7:1-3) Ahiga ene adi Aklisto 144 000 anyi mbahinyina nu Yesu mu dilu. (Luka 12:32; Yat. 7:4) Gungima, Yone udi muzuelela athu ako. Athu ene adi avula gubalega, handaga Yone udi muzuela nu gusagumuga egi: “Talenu!” Mbimbi eyi yajiya gumonesa egi, Yone wadihudile muavula ha gumona guvula gua athu ene. Itshi yamonele Yone? ‘Thundu yakoma ya athu yakhalele muthu gajiyilego gutanga, a mu ifutshi yagasue, nu iphuta yagasue nu a mukatshi dia athu agasue, nu a mazuelelo agasue, mumagana gutuama dia mbata nu gutuama dia Mona Gimeme.’ (Tanga Yatuwuwe 7:9-14.) Yone wakhalele nu gusuanguluga ha gujiya egi mu masugu adi muza, mbagukhala nu athu avula mbakombelela Nzambi mu luholo luabonga!

3. (a) Mukunda natshi vizio ya Yone idi naye gukolesa gutshigina guetu? (b) Itshi tuza muzuelela mu longo edi?

 ³ Vizio yene yakolesele lume gutshigina gua Yone. Idi naye gukolesa muavula gutshigina guetu handaga tudi mujinga diago mu masugu idi yene mutagenesewa. Mangino, bamilio a athu asendesele gale gukombelela Yehowa, nu adi nu felela dia guhuluishiwa mu tangua dia lamba diakola ha gujinga ha mavu ivo nu ivo. Mu longo edi, tuza mumona luholo Yehowa gakuatesele akombeledi enji ha gukotelesa muabonga akuatshi adi mukatshi dia thundu yakoma ya athu, ivo gubalega 80 yabalega gale. Gungima, tuza muzuelela ndaga mbadi: (1) thundu yene idi ya athu avula sha, (2) athu ene akatuga mu ifutshi ya ha mavu agasue. Ndaga eji mbajikolesa gutshigina gua athu agasue adi nu felela dia gujinga ha mavu mayilago.

4. Giamatshidia gitshi gidi mu Biblia aklisto a mambo anago gukotelesa? Luholo lutshi Alongogi a Biblia akhalele a gudisha nu aklisto a mambo?

⁴ Aklisto a mambo anago gulongesa giamatshidia gidi muzuela Biblia egi, gudi nu lusugu athu ana gutumagela Nzambi mbaajinga ha mavu mayilago. (2 Kol. 4:3, 4) Mangino, ikombelelo yavula ya aklisto a mambo yana gulongesa egi gula athu abonga afua, ana guya mu dilu. Uvi yakhalelego luholo lumoshi nu thundu yazonda ya Alongogi a Biblia, anyi akhalele muzola Inzo Yaleha ya Mutaledi sendese mu 1879. Akotelesele egi Nzambi mbawuhaga Phaladiso ha mavu, nu bamilio a athu ana gumutumagela mbajinga ha mavu, uvi mu dilu ndo. Uvi, yaazudile tangua diavula ha gukotelesa muabonga gula athu ene akhalele akuatshi.—Mat. 6:10.

5. Itshi alongogi a Biblia akotelesele mukunda nu athu 144 000?

⁵ Alongogi a Biblia akotelesele luko egi athu ako azonda ‘mbasumbiwa ha mavu’ ha guhinyina nu Yesu mu dilu. (Yat. 14:3) Athu ene adi naye gukhala guvula 144 000, Aklisto adihanele gudi Nzambi nu amukalegele mudimo ha mavu nu gujinginyina guagasue. Itshi akotelesele giwa mukunda nu thundu yakoma ya athu?

6. Itshi Alongogi a Biblia akotelesele mukunda nu thundu yakoma ya athu?

⁶ Yone wamonele thundu ya athu mu vizio ‘mumagana gutuama dia mbata nu gutuama dia Mona Gimeme.’ (Yat. 7:9) Mbimbi eji jiatumine Alongogi a Biblia ha gukotelesa egi luholo lumoshi nu athu 144 000, thundu yakoma ya athu mbayijinga mu dilu. Henyaha gila athu 144 000 hamoshi nu thundu yakoma ya athu, akhalele naye guya mu dilu, gudisha gutshi giwa gudi mukatshi diawo? Alongogi a Biblia atangijile egi thundu yakoma ya athu idi naye gukhala Aklisto anyi khenji atumagela gale Nzambi mu ndaga jiagasue ha mavu. Ngatshima akhalele mutumagela mikhuala ya Biblia, yajiya gukhala egi ako mukatshi diawo alanduile gukhala mu ikombelelo ya aklisto a mambo. Alongogi a Biblia akotelesele egi athu ene amonesele ndambo ya guzumba mukunda nu Nzambi, uvi guzumba guene guakhalelego diago guavula hagula ajiya guhinyina nu Yesu. Handaga guzumba guawo mukunda nu Nzambi guakhalelego lume guavula, thundu yakoma ya athu mbayiya mu dilu ha gumagana gutuama dia mbata, uvi ndo ha gukhala ha mbata.

7. (a) Ha gutadila matangi a Alongogi a Biblia, akuatshi mbaajinga ha mavu mu Uhunyinyi wa Klisto wa Ivo 1 000? (b) Itshi atangijile mukunda nu akombeledi a Yehowa a muginono?

⁷ Akuatshi giwa mbaajinga ha mavu? Alongogi a Biblia atangijile egi, athu 144 000 nu thundu yakoma ya athu mbaaya mu dilu, uvi bamilio a athu ako mbaheta monyo ha mavu mu Uhinyinyi wa Klisto wa Ivo 1 000. Akotelesele luko egi, bamilio a athu ene mbaakalegelago Yehowa mudimo gutuama egi Uhunyinyi wa Klisto usendese. Uvi atangijile egi, athu ene mbaalonguga ndaga jiatadila Yehowa  mu Uhinyinyi wa Klisto wa Ivo 1 000. Gungima, athu mbaatumagela mikhuala ya Yehowa mbaza muheta monyo wa mayilago ha mavu, uvi athu mbaatuna gawo guyitumagela, mbaashiyiwa. Ene atangijile luko egi giphungu giko, “athu a lutumbu a mu ginono” (akombeledi a Yehowa afuile gutuama egi Klisto avualewe), mbaafuzumuga, nu mbaakhala mukatshi dia athu mbaahinyina gifua “mafumu” mu Uhinyinyi wa Klisto. Ikhale ngenyi nga ndo, athu ene mbaafuzumuga mbaya mujinga mudilu gu gisugishilo gia uhinyinyi wa Klisto wa Ivo 1000—Ngi. 45:16.

8. Alongogi a Biblia atangijile egi mahunji atshi thathu mbaheta fundo mu Ufumu wa Nzambi?

⁸ Hene, Alongogi a Biblia atangijile egi athu ene adi mu mahunji thathu: (1) athu 144 000, mbahinyina nu Yesu mu dilu; (2) thundu yakoma ya athu akhalele nu guzumba guazonda mukunda nu Nzambi mbamagana gutuama dia mbata ya Yesu mu dilu; nu (3) ba milio a athu mbaalonguga ndaga jiatadila Yehowa ha mavu mu Uhinyinyi wa Klisto wa Ivo 1 000. * Uvi gungima, Yehowa waakuatesele ha gukotelesa muabonga ndaga yatadila thundu yakoma ya athu.—Ish. 4:18.

9. (a) Gumagana gua thundu yakoma ya athu ‘gutuama dia mbata nu gutuama dia Mona Gimeme’ guakotelesa itshi? (b) Mukunda natshi ukoteleshi owu wa Yatuwuwe 7:9 udi watagana?

⁹ Mu 1935, thundu yakoma ya athu yamonele Yone mu vizio yajiyiwe muabonga. Matemue a Yehowa akotelesele egi gumagana gua thundu yakoma ya athu ‘gutuama dia mbata nu gutuama dia Mona Gimeme,’ guakhalelego mukotelesa egi athu ene mbaaya mu dilu. Jiakhalele mbimbi jia gifuanesa. Thundu yakoma ya athu mbayijinga ha mavu. Uvi gumagana guayo ‘gutuama dia mbata,’ gudi mukotelesa egi athu ene ana gutshigina Ufumu wa Yehowa nu ana guwutumagela. (Yesh. 66:1) Luko, gumagana guawo ‘gutuama dia Mona Gimeme’ gudi mukotelesa egi, athu ene adi mumonesa gutshigina guawo mu mulambu wa Yesu. Matayo 25:31, 32 idi muzuela gamba, “ifutshi yagasue mbayibungishiwa guphala” ya mbata ya Yesu ya gutumbuga. Mukatshi dia ifutshi yene, gudi nji nu athu a mitshima yabola. Idi mumonega haphelo egi, ifutshi eyi yagasue mbayikhadigo mu dilu, uvi ha mavu. Ukoteleshi owu udi lume watagana. Idi mumonesa mukunda natshi Biblia yanago guzuela egi thundu yakoma ya athu mbayiya mu dilu. Phamba athu 144 000 mbaheta monyo wa mayilago mu dilu ‘ha guhinyina mavu gifua mafumu’ hamoshi nu Yesu.—Yat. 5:10.

10. Mukunda natshi idi nu ndando egi thundu yakoma ya athu ijiye Yehowa gutuama egi Uhinyinyi wa Klisto wa Ivo 1 000 usendese?

¹⁰ Sendese mu 1935, Matemue a Yehowa akotelesele egi thundu yakoma ya athu yamonele Yone mu vizio, idi Aklisto a giamatshidia adi nu felela dia gujinga mayilago ha mavu. Uvi ha guhuluishiwa mu lamba diakola, athu ene adi naye gujiya Yehowa nu gumukombelela gutuama egi Uhinyinyi wa Klisto wa ivo 1 000 usendese. Luko, adi naye gumonesa gutshigina guakola ha “gubinga gulenga ndaga jiagsue jidi naye gubua.”—Luka 21:34-36, NWT.

11. Mukunda natshi Alongogi a Biblia atangijile egi athu ako mbaya mu dilu gu gisugishilo gia Uhinyinyi wa Klisto wa Ivo 1 000?

¹¹ Itshi tuajiya giwa guzuela mukunda nu matangi a Alongogi a Bilia atadila akombeledi a Yehowa afuile gutuama egi Klisto avualewe? Handaga ene akhalele mutangiza egi athu awa mbaya mu dilu gu gisugishilo gia Uhinyinyi wa Klisto wa Ivo 1 000. Matangi ene azogele mu Inzo Yaleha ya Mutaledi ya 15 février 1913  (ya Anglais). Akhalele gudihula egi: ‘Luholo lutshi akombeledi a Nzambi a mu ginono ajiya gufuzumuga ha gujinga phamba ha mavu, uvi Aklisto akhalele nu guzumba guazonda mukunda nu Nzambi aye mujinga mu dilu?’ Matangi awa akatugile mu ima mbadi ajimbidile: (1) atangijile egi thundu yakoma ya athu mbayiya mu dilu, nu (2) atangijile luko egi thundu yakoma ya athu idi Aklisto adi nu guzumba guazonda mukunda nu Nzambi.

12-13. Aklisto ambiwe maji mu nyuma nu thundu yakoma ya athu, ana gujiya itshi mukunda nu gishimbigo mbaheta?

¹² Gifua luholo tuayimonyi, sendese mu 1935, Matemue a Yehowa akotelesele muabonga egi thundu yakoma ya athu yamonele Yone mu vizio, idi athu anyi mbaahuluishiwa mu ita ya Armaguédon. Athu ene ‘mbazoga mu lamba diakola’ ha mavu, nu “mbalandula guzuela mu mbimbi yakola egi: ‘Guhuluga gudi muza gudi Nzambi wetu udi ha mbata, nu gudi Mona Gimeme.’” (Yat. 7:10, 14, NWT) Luko, Biblia idi mulongesa egi athu anyi mbafuzumuga ha guheta monyo mu dilu adi nu felela diabonga gubalega akombeledi a Nzambi a mu ginono. (Heb. 11:40) Mu tangua diene, aphangi’etu asendesele guwambela athu ha gukombelela Yehowa nu felela dia gujinga mayilago ha mavu.

¹³ Athu adi mukatshi dia thundu yakoma ya athu ana gusuanguluga muavula nu felela diawo. Ana gukotelesa egi Yehowa wana gutomba fundo akombeledi enji adi naye gumukalegela mudimo, ikhale mu dilu nga ha mavu. Aklisto ambiwe maji mu nyuma nu thundu yakoma ya athu, ana gujiya egi gishimbigo mbaheta gidi gabalu ga khenda (ngasa) ya Yehowa mu njila ya mulambu wa Yesu Klisto.—Lomo 3:24.

14. Mu 1935, aphangi avula akhalele gudihula luholo lutshi mbalutaganesewa profesi ya thundu ya koma ya athu. Mukunda natshi?

¹⁴ Mu 1935, akombeledi a Yehowa akotelesele egi thundu yakoma ya athu mbayijinga ha mavu. Uvi avula mukatshi diawo akhalele gudihula, luholo lutshi thundu yene mbayidivudisa. Phangi Ronald Parkin wakhalele nu ivo 12 tangua Alongogi a Biblia akotelesele giamatshidia giatadila thundu yakoma ya athu. Udi muzuela egi: “Mu tangua diene, alongeshi akhalele 56 000 ha mavu agasue. Yajiya gukhala egi, avula mukatshi diawo akhalele Aklisto ambiwe gale maji mu nyuma. Hene, yakhalele mumonega egi athu akhalele nu felela dia gujinga ha mavu akhalele azonda lume.”

15. Luholo lutshi thundu yakoma ya athu yalanduile gudivudisa?

¹⁵ Uvi gungima dia ivo yalanduile, ba misionere atumiwe mu ifutshi yavula ha gulongesa.  Hene, Matemue a Yehowa akhalele muvula. Mu 1968, asendesele gulongesa athu Biblia nu mukanda La vérité qui conduit à la vie éternelle. Mukand’owu wakhalele mukotelesa giamatshidia gia Biblia mu luholo lualeba. Hene, athu avula atshiginyile giamatshidia gubalega thomo. Gungima dia ivo nguana, athu gubalega 500 000 abatijiwe. Gu Amérique latine nu mu ifutshi iko, gikombelelo gia Katolika giakhalelego luko nu ngolo. Mu ifutshi ya gu Europe de l’Est nu ya gu Afrique, mafumu a mbulamatadi ahanele njila egi tulongese lukuma luabonga, hene bamilio a athu abatijiwe. (Yesh. 60:22) Mu ivo yabalega, organizasio wa Yehowa wazolele mikanda yavula ha gukuatesa athu ajiye ndaga jiana gulongesa Biblia. Idi mumonega haphelo egi mangino, thundu yakoma ya athu idi gale nu athu gubalega 8 000 000.

16. Thundu yakoma ya athu idi naye gukatuga gui?

¹⁶ Mu vizio yamonele Yone, wazuelele egi, thundu yakoma ya athu yakhalele naye gukatuga “mu ifutshi yagasue, nu iphuta yagasue, nu mazuelelo agasue.” Profete Zakaliya wadiangele guzuela ndaga ya luholo lumoshi nu eyi. Wazuelele egi: “Mu masugu anyi, athu kumi a mazuelelo agasue a ifutshi mbaaza gudi muenya Yuda mumoshi, mbamukuata ngolo gu songi ya mulele, mbazuela egi: ‘Tuatshigina  guya nenu, handaga tuavuile egi Nzambi udi nu enue.’”—Zak. 8:23, NWT.

17. Itshi idi mukalegewa ha gukuatesa athu a ifutshi nu mazuelelo agasue?

¹⁷ Matemue a Yehowa ana gujiya egi ha gubungisa athu a mazuelelo agasue, lukuma luabonga ludi naye gulongesewa mu mazuelelo avula. Ivo 130 yabalega gale, tuana gubalumuna mikanda nu ima iko ha gulongesa athu Biblia. Uvi henyaha, tudi mukalagala mudimo wakoma udi khenji watshitshiwe galego, wa gubalumuna mikanda mu mazuelelo avula. Yadiago, Yehowa udi mutshita ndaga ya gushimana mangino. Udi mubungisa thundu yakoma ya athu a mu ifutshi yagasue. Luholo Biblia nu mikanda iko idi mu mazuelelo avula, akombeledi a Nzambi adi mukombelela Yehowa hamoshi, ngatshima ene akatuga mu ifutshi ya gudisha ha mavu. Luko, Matemue a Yehowa ana gujiyiwa mukunda nu guzumba guawo gua uphangi nu gudihana guawo mu mudimo wa gulongesa. Ndaga eyi idi mukolesa lume gutshigina guetu!—Mat. 24:14; Yone 13:35.

18. (a) Ha gutadila Yeshaya 46:10, 11, mukunda natshi tuanago gudihula ha gumona egi Yehowa udi mutagenesa profesi yatadila thundu yakoma ya athu? (b) Mukunda natshi athu adi nu felela dia gujinga ha mavu ashigo naye guvua gikenene?

¹⁸ Tuajiya ndaga jiagasue jidi gututuma ha gusuanguluga muavula mukunda nu profesi yatadila thundu yakoma ya athu! Tuanago gudihula ha gumona egi Yehowa udi mutagenesa profesi eyi mu luholo lua gushimana. (Tanga Yeshaya 46:10, 11.) Athu adi mukatshi dia thundu yakoma ya athu ana guhana Yehowa mersi mukunda nu felela diahanele muene. Anago guvua gikenene luholo ambiwego maji mu nyuma ha guhinyina nu Yesu mu dilu. Biblia idi muzuelela mala nu akhetu akhalele nu gutshigina guakola, akhalele mutuamezewa gudi nyuma yabonga. Uvi athu ene ashigo mukatshi dia athu 144 000. Mukatshi diawo, tuajiya gutanga Yone Mubatuiji nu Davidi. (Mat. 11:11; Makal. 2:34) Davidi nu Yone, nu athu ako avula mbafuzumuga ha guheta monyo mu Phaladiso ha mavu. Mukut’awo agasue, hamoshi nu thundu yakoma ya athu, mbaheta luendu lua gumonesa egi adi agujinginyina gudi Yehowa nu gudi Ufumu wenji.

19. Gula tuakotelesa muabonga vizio ya Yone yatadila thundu yakoma ya athu, itshi mbatukalagala?

¹⁹ Gidi giphungu gia thomo Nzambi gabungisa bamilio a athu a ifutshi yagasue ha gumukombelela hamoshi. Ngatshima tudi nu felela dia guya mu dilu nga ndo dia gujinga ha mavu, tudi naye gukuatesa athu avula ha gungina mukatshi dia thundu yakoma ya “imeme iko.” (Yone 10:16) Gualeha ndo, Yehowa mbawubata lamba diakola dialayile muene ha gushiya ba guvernema nu ikombelelo yagasue yanginyishile gale athu mu malamba avula. Athu agasue adi mukatshi dia thundu yakoma ya athu, adi nu luendu luabonga sha, lua gukombelela Yehowa mayilago ha mavu!—Yat. 7:14.