1. Mukunda natshi tudi naye gutumagela Yehowa?

TUDI naye gutumagela * Yehowa handaga muene udi Mufugi wetu. Ngenyi, muene udi nu ufumu wa gutuwambela ndaga tudi naye gukalagala nu luholo tudi naye gujikalagala. (Yat. 4:11) Uvi, ndaga iko yabonga yana gututuma ha gumutumagela idi egi muene udi mutuameji watagana. Sendese mualeha, athu avula akhala nu ufumu wa gutuameza athu ako. Uvi gula tuafuanesa utuameji wawo nu wa Yehowa, tudi mumona egi Yehowa wana gutuameza athu nu gutema, nu guzumba, nu khenda jiagasue.—Guz. 34:6; Lomo 16:27; 1 Yone 4:8.

2. Ha gutadila Hebelu 12:9-11, ishina itshi tudi nayo ya gutumagela Yehowa?

² Yehowa ganago gutshigina egi tumutumagele handaga tudi gumuvuila woma, uvi wana gutshigina egi tumutumagele handaga tuana gumuzumba nu muene udi Tata wetu wa guzumba. Mu mukanda wa Hebelu, mupostolo Phaula wamonesele egi tudi naye “gutumagela Tata wetu nu mutshima wagasue” handaga muene wana gutulongesa mukunda nu “gubonga guetu.”—Tanga Hebelu 12:9-11, NWT.

3. (a) Luholo lutshi tuana gumonesa egi tudi mutumagela Yehowa? (b) Mihu itshi tuza mutadila?

³ Tuana gumonesa gutumaga guetu gudi Yehowa gula tudi mutshita ndaga jiagasue jidi muene gututoga, nu gula tudi mubemba egi muene hakhenji atuleze ndaga tudi naye gutshita nu eji tushigo naye gutshita. (Ish. 3:5) Gula tuajiya makalegelo abonga a Yehowa, mbayikhadigo lamba ha gumutumagela. Mukunda natshi? Handaga makalegelo enji ene ana gumutuma ha gutshita ndaga jiagasue. (Ngi. 145:9) Gula tuajiya Yehowa muavula, mbatumuzumba nji muavula. Luko, gula tudi muzumba diago Yehowa, tuajiyilego gukamba egi atudijige gama gagasue tudi naye  gutshita nga ndo. Uvi tudi naye gutshita yagasue ha gujiya ndaga jiabonga jiana gutshigina Yehowa, nu gutuna ndaga jiabola. (Ngi. 97:10) Mukunda natshi matangua ako yajiya gukhala lamba egi tutumagele Yehowa? Luholo lutshi akulu, nu atata, nu amama ajiya gulandula gifezegeselo gia Guvernere Nehemiya, nu Fumu Davidi, nu Mariya gin’a Yesu? Longo edi diza muhana mvutu gu mihu eyi.

4-5. Ha gutadila Lomo 7:21-23, mukunda natshi yajiya gukhala lamba ha gutumagela Yehowa?

⁴ Yakhala lamba ha gutumagela Yehowa handaga mukut’etu agasue tuavualewe mu gubola nu tushigo athu atagana. Gishina giene, tuakhala nu khadilo dia gushaga. Tangua Adama nu Eva atunyine gutumagela Nzambi nu adile bundu, adihagele ene hakhawo mikhuala ya ndaga jiawaha nu jiabola. (Gis. 3:22) Mangino, athu avula anago gutumagela Nzambi. Luholo lumoshi nu Adama nu Eva, ana guditombela ene hakhawo ndaga jiabonga nu jiabola.

⁵ Esue tushigo gifua ene handaga tudi mujiya Yehowa nu tuana gumuzumba. Uvi, yakhala lamba ha gutshita ndaga gifua luholo luana gutshigina Nzambi. Mupostolo Phaula nji wataganele nu lamba dia luholo elu. (Tanga Lomo 7:21-23.) Luholo lumoshi nu Phaula, tuana gutshigina gukalagala ndaga jidi jiabonga gu meso a Yehowa. Uvi tudi naye gulua tangua diagasue nu khadilo dia gutshita ndaga jiabola.

6-7. Itshi yajiya gututuma luko ha gutuna gutumagela Yehowa? Hana gifezegeselo.

⁶ Gima giko giana gututuma ha gutuna gutumagela Yehowa gidi egi, tuana gulandula makalegelo nu matangi a athu a mu dimbo tuakudile. Athu avula ajiya gutuwambela ha gutshita ndaga jishigo gudivua nu gutshigina gua Yehowa. Hene, tudi naye gukalagala ngolo ha gutuna matangi a athu ashigo gudivua nu felela dia Nzambi. Tutadilenu gifezegeselo gimoshi.

⁷ Mu ifutshi yavula, athu ana gushinjiga mavuala ha gukamba midimo ya falanga jiavula-vula. Phangi mumoshi wa mukhetu mu jina dia Mary * wataganele nu ndaga ya luholo elu. Gutuama dia gujiya Yehowa, phangi muene wanginyine mu université yakoma ya mu gifutshi giawo. Hangima, fami yenji yakhalele gumushinjiga ha gukamba mudimo wajiya gumuhana falanga jiavula nu lukuma. Muene nji wakhalele mutshigina ngenyi. Uvi, tangua diajiyile muene Yehowa nu gasendesele gumuzumba, wasombegesele matangi enji. Uvi yakhalelego ndaga yaleba gudi muene. Udi muzuela egi: “Matangua ako, ngana gumona midimo yawaha ya falanga jiavula, uvi ngana gujiya egi midimo yene yajiyilego gunguhana tangua dia gutshita mudimo wa Yehowa. Ngana gulua uu nu mangino ha gutuna midimo ya luholo elu. Ngana gutoga Yehowa angukuatese ha gutuna muheto wa gutshigina mudimo wajiya gungukanga njila ha gudihana mu mudimo wenji.”—Mat. 6:24.

8. Itshi tuza mutadila henyaha?

⁸ Gifua luholo tuayimona, gutumagela Yehowa gudi ndaga yabonga gudi esue. Uvi athu ako adi nu ufumu, gifua akulu, nu atata, nu amama, adi naye gutumagela Yehowa, handaga adi nu ginemo gia gukuatesa athu ako. Henyaha, tutadilenu ifezegeselo ya athu idi mu Biblia, idi gutumonesa luholo tuajiya gukalegela ufumu wetu mu luholo luajiya gusuanguluisa Yehowa.

9. Milonga itshi yataganele nayo Nehemiya?

⁹ Yehowa wahanele akulu ginemo giakoma gia gubamba akombeledi enji. (1 Phet. 5:2) Ndaga jiatshitshile Nehemiya ha gubamba akombeledi a Yehowa jiajiya gukuatesa akulu gula alandula gifezegeselo gienji. Nehemiya wakhalele guvernere wa Yuda, wakhalele nu ufumu wavula lume. (Neh. 1:11; 2:7, 8; 5:14) Tangiza gale  milonga yataganele nayo Nehemiya. Wavuile egi enya Yuda akhalele mutshita ndaga jiabola mu tempelo ya Yehowa, nu akhalelego muhana enya Levi misomonyi (misomo) gifua luholo luakhalele muzuela Mukhuala. Luko, enya Yuda akhalelego munemesa mukhuala wa Yehowa wa Lusugu lua Guhuluguga. Enya Yuda ako adizudile mu ulo nu akhetu a ifutshi ya aphagano. Itshi yakalegele Guvernere Nehemiya mukunda nu ndaga eyi ya lamba?—Neh. 13:4-30.

10. Itshi yakalegele Nehemiya gu malamba gataganele nawo?

¹⁰ Nehemiya gakadigilego ufumu wenji ha gutuma athu gu ngolo ha gutshigina matangi enji. Uvi, wakambele utuameji wa Yehowa mu gisambu, nu walongesele athu Mukhuala wa Yehowa. (Neh. 1:4-10; 13:1-3) Luko, Nehemiya wadibulumuishile, watshitshile mudimo hamoshi nu aphangi’enji, waakuatesele ha gutunga ibayi (ibindji) ya Yelusalema.—Neh. 4:15.

11. Ha gutadila 1 Tesalonike 2:7, 8, luholo lutshi akulu adi naye gukalegela aphangi a mu hungu ndaga?

¹¹ Akulu ajiyilego gutagana nu milonga ya luholo lumoshi nu Nehemiya. Uvi, ajiya gulandula khadilo dienji mu maluholo avula. Tufezegese gale. Akulu ana gukalagala mudimo wakola ha gukuatesa aphangi’awo a mala nu a akhetu. Anago gubemba egi ufumu wawo watume ha gudivua gifua abalega aphangi ako mu hungu. Uvi, ana gukuatesa aphangi a mu hungu nu gisemo giagasue. (Tanga 1 Tesalonike 2:7, 8.) Guzumba guawo guakola nu khadilo diawo dia gudibulumuisa diana guatuma ha guzuela nu aphangi’awo nu gisemo giagasue. André, udi mukulu ivo yavula yabalega gale. Udi muzuela egi: “Ngakotelesa egi, gula mukulu udi muthu mumoshi wazumba athu, nu muenya gisemo, yana gukuata mitshima ya aphangi a mala nu a akhetu. Makalegelo awa ana gutuma aphangi a mu hungu ha gukhala nu gudivua guawaha nu akulu.” Tony nji udi mukulu ivo yavula. Udi muzuela egi: “Ngana gukalagala ngolo ha gutumagela ndaga jidi mu Filiphi 2:3, nu ha gumona athu ako egi angubalega ame. Yana gungukuatesa hagula ngutumigo aphangi ha gungutumagela gu ngolo.”

12. Mukunda natshi akulu adi naye gukhala athu a gudibulumuisa?

 ¹² Akulu adi naye gukhala athu a gudibulumuisa, gifua Yehowa. Yehowa Nzambi udi Fumu wakoma, uvi “wana gumba meso enji hashi” ha gukatula ‘phutu mu lamba.’ (Ngi. 18:35; 113:6, 7) Biblia idi muzuela egi, Yehowa ganago gutshigina enya lulendo.—Ish. 16:5.

13. Mukunda natshi mukulu udi naye gujiya itshi adi muzuela nu luholo lutshi ajiya guyizuela?

¹³ Mukulu wana gutumagela Yehowa, udi naye gujiya itshi adi muzuela nu luholo lutshi ajiya guyizuela. Mukunda natshi? Handaga wajiya guzuela mbimbi jiabola guphala ya muthu gashigo gumunemesa. (Yak. 1:26; Gal. 5:14, 15) André, yago tuazuelela mu paragrafe 11 udi muzuela egi: “Matangua ako, ngakhalele muvua nzala ya guwambela mbimbi jiabola gudi phangi wa yala nga wa mukhetu gula muene gashigo gungunemesa gifua mukulu. Uvi, ngatangijile ifezegeselo ya akombeledi a Yehowa idi mu Biblia. Yangukuatesele ha gujiya egi gukhala muthu wa gudibulumuisa nu watuluga gudi nu ndando.” Akulu ana gumonesa gutumaga guawo gudi Yehowa gula adi mumonesa guzumba gudi aphangi a mu hungu nu gudi akulu n’ako, nu gula adi guawambela mbimbi jia gisemo.—Kol. 4:6.

14. Ginemo gitshi Yehowa ahanele atata? Wana guaatoga itshi?

¹⁴ Yehowa wahanele yala ginemo gia gukhala fumu wa fami, nu wana gumutoga ha gulongesa, gutuameza nu gubela an’enji. (1 Kol. 11:3; Ef. 6:4) Uvi ishigo mukotelesa egi atata adi naye gukalegela ufumu wawo mu luholo atshigina. Muthu wafugile fami udi Yehowa. Hene, atata adi naye gujiya egi muene mbawaasophesa mukunda nu luholo adi mutuameza fami jiawo. (Ef. 3:14, 15) Atata ana gumonesa gutumaga guawo gudi Yehowa gula adi mukalegela ufumu wawo mu luholo ludi musuanguluisa Nzambi. Ajiya gubinga gula alandula gifezegeselo gia Fumu Davidi.

15. Mukunda natshi Fumu Davidi udi gifezegeselo giawaha gudi atata?

¹⁵ Yehowa watombele Davidi ha gukhala fumu wa fami yenji nu wa gifutshi giagasue gia Isalele. Davidi wakhalele nu ufumu wavula lume. Uvi mu tangua dimoshi ngenyi, Davidi wakadigidile ufumu wenji mu luholo luabola, nu watshitshile ndaga jiabola. (2 Sam. 11:14, 15) Uvi, watumagele Yehowa. Luholo lutshi? Watshiginyile ndola nu lubelo lua Yehowa. Wakombelele Yehowa mu gisambu, wamuwambelele ndaga jiagasue jiakhalele mu mutshima wenji. Wakalegele ngolo ha gutumagela lubelo lua Yehowa. (Ngi. 51:1-4) Luko, Davidi wamonesele khadilo dia gudibulumuisa. Muene gatshiginyilego phamba malongo amuhanele mala, uvi  watshiginyile nji lubelo luamuhanele akhetu. (1 Sam. 19:11, 12; 25:32, 33) Gungima, Davidi wakotelesele diago egi ishigo ndaga yatagana ha gutshita gubola; nu wadihanele mu mudimo wa Yehowa monyo wenji wagasue.

16. Luholo lutshi atata ajiya gulandula gifezegeselo gia Davidi?

¹⁶ Henyaha tutalenu luholo atata ajiya gulandula gifezegeselo gia Fumu Davidi. Enue atata, mukadigilago ufumu wamihanele Yehowa mu luholo luabola. Khala mutshigina gubola guaye, tshigina nji lubelo lua Biblia ludi guguhana athu. Gula watshita ngenyi, enya fami yaye mbagunemesa mukunda nu gudibulumuisa guaye. Tangua udi mukombelela hamoshi nu enya fami yaye, wambela Yehowa milonga yagasue idi mu mutshima waye. Ngenyi enya fami yaye mbakotelesa egi udi diago nu funu ya ukuateshi nu utuameji wa Yehowa. Ndaga yabalega ndando idi egi, haga mudimo wa Yehowa ha fundo dia thomo mu monyo waye. (Mikh. 6:6-9) Gifezegeselo giaye giabonga gidi kado ga ndando yavula wajiya guhana enya fami yaye.

17. Ginemo gitshi Yehowa gahanele amama?

¹⁷ Yehowa wahanele amama ginemo giakoma mu fami, nu waahanele ndambo ya ufumu gudi an’awo. (Ish. 6:20) Ndaga jiana guzuela amama nu eji ana gutshita, jiajiya gukuatesa an’awo monyo wawo wagasue. (Ish. 22:6) Henyaha, tutalenu luholo amama ajiya gulandula gifezegeselo gia Mariya, gin’a Yesu.

18-19. Luholo lutshi amama ajiya gulandula gifezegeselo gia Mariya?

¹⁸ Mariya wakhalele mujiya mbimbi ya Nzambi kiawaha lume. Mariya wakhalele munemesa Yehowa muavula diago, nu wakhalele nu ufuta wabonga nu Nzambi. Wakhalele hehi ha gutumagela Yehowa, nga yakhalele mutoga egi lujingu luenji lusombegese.—Luka 1:35-38, 46-55.

¹⁹ Amama ajiya gulandula gifezegeselo gia Mariya mu ndaga jiavula. Luholo lutshi? Thomo, adi naye gukhala nu ufuta wakola nu Yehowa. Ha guyitshita, adi naye gulonguga Biblia nu gukombelela Yehowa mu gisambu hakhawo. Luko, adi naye gutshigina gusombegesa ndaga jiawo jiko ha gusuanguluisa Yehowa. Tufezegese gale: Yajiya gukhala egi mu fami wakudile, mvuaji jiaye jiakhalele enya khabu nu akhalele muwambela an’awo mbimbi jiabola. Hene, wajiya gutangiza egi idi luholo luabonga lua gusansa an’aye. Gungima dia gujiya mikhuala ya Yehowa yatadila luholo lua gusansa ana, wajiya gumona egi idi lamba ha gukhala nu guhuiminyina gudi an’aye, muavula gula udi waguhuila nu ene ashigo gugutumagela. (Ef. 4:31) Gula wadivua ngenyi, toga Yehowa mu gisambu agukuatese. Mama mumoshi mu jina dia  Lydia udi muzuela egi: “Matangua ako, ngana gukombelela muavula Yehowa hagula nguwambelago mun’ami mbimbi jiabola gula muene watuna gungutumagela. Matangua ako, ngana gubemba guzuela, ngukalagala gisambu mu mutshima ha gutoga ukuateshi wa Yehowa. Gukalagala gisambu guana gungukuatesa ha gukhala nu gutuluga.”—Ngi. 37:5.

20. Lamba ditshi amama ako ana gutagana nadio? Luholo lutshi ajiya gubinga lamba diene?

²⁰ Lamba diko amama ako ana gutagana nadio didi egi, yana guaakolela ha guwambela an’awo egi ana guaazumba. (Tito 2:3, 4) Mu fami jiakudile amama ako, mvuaji jiawo jiakhalelego gudivua kiawaha nu an’awo. Gula aye wakudile mu fami ya luholo elu, ulandulago khadilo diabola dia mvuaji jiaye. Amama ana gutumagela Yehowa, adi naye gukamba gujiya luholo lua gumonesa guzumba gudi an’awo. Yajiya gukhala lamba egi asombegese luholo luawo lua gutangiza, lua gudivua nu lua gukalagala ndaga. Uvi ajiya gubinga ha gusombegesa. Mbayasuanguluisa nu mbayisuanguluisa nji fami jiawo.

21-22. Ha gutadila Yeshaya 65:13, 14, gubonga gutshi tuana guheta gula tudi mutumagela Yehowa?

²¹ Fumu Davidi wajiyile egi gutumagela Yehowa guana gubata gubonga. Wazuelele egi: ‘Mikhuala ya Yehowa idi yatagana, yana gusuanguluisa mutshima. Mbimbi jia Yehowa jidi jia giamatshidia, jiana guhenyesa meso. Jiana gunguhana ame muenya mudimo waye ndunge. Gujitumagela guana gungubatela gubonga.’ (Ngi. 19:8, 11) Mangino, tuajiya gumona gudisha gudi mukatshi dia athu ana gutumagela Yehowa nu anyi anago gumutumagela. Uvi athu ana gutumagela Yehowa, ‘mbayimba jingimbo jia gusuanguluga handaga mitshima yawo mbayikhala yabonga.’—Tanga Yeshaya 65:13, 14.

²² Gula akulu, nu atata, nu amama, adi mutumagela Yehowa nu mutshima wagasue, ene mbakhala nu gusuanguluga. Fami jiawo mbajikhala nu gusuanguluga. Aphangi agasue a mu hungu mbakhala nji nu gudivua guawaha mukatshi diawo. Ndaga yabalega ndando idi egi, mbasuanguluisa mutshima wa Yehowa. (Ish. 27:11) Yadiago, mbatukhala lume nu gusuanguluga guavula.