1-2. Hagutadila 1 Timote 6:20, itshi ya hanewe Timote?

TUANA bamba ima yetu ya ndando muabonga. Hagufezegesa, tuana bamba mbongo jietu mu banke. Gula tuajimba mu banke, tuana jiya muabonga egi mbajibambewa muabonga, mbajishigo mutota nu mbajikuyiwago (webewago). Tuakotelesa diago funu yaguhana muthu gima ginyi tuana mona egi gidi nu ndando.

² Tanga 1 Timote 6:20. Mupostolo Phaula wawambelele Timote egi, wahetele gima gimoshi gia ndando. Gima giene gidi; ujiyi wa giamatshidia wa felela dia Nzambi mukunda nu athu. Yehowa wahanele Timote luendu lua gulongesa ‘mbimbi yenji’ nu ‘gulongesa lukuma luabonga.’ (2 Tim. 4:2, 5) Phaula wawambelele Timote ha gubamba ndaga jiamuhanewe. Esue nji tuahanewe ima ya ndando gifua Timote. Ima yene idi itshi? Mukunda natshi tudi naye gubamba umonyi Yehowa atuhanele?

3-4. Itshi idi mumonesa egi giamatshidia gia mu Biblia giakhala nu ndando?

³ Yehowa watuhanele luendu lua gujiya ujiyi wa giamatshidia udi mu Mbimbi yenji. Giamatshidia gia mu Biblia gidi nu ndando handaga giana gutulongesa luholo lua gukhala nu ufuta wawaha nu Yehowa nu giana gutukotelesela luholo tuajiya gukhala nu gusuanguluga mu monyo wetu. Gutshigina nu gukalegela giamatshidia giene, guana gutukatula mu uhiga wa malongo a mambo, nu ndaga jia sonyi.—1 Kol. 6:9-11.

⁴ Ndaga iko yana kalagala egi giamatshidia gidi mu Biblia gikhale nu ndando idi egi, Yehowa wayimonesele phamba gudi athu agudibulumuisa, anyi adi nu ‘mitshima yatagana.’  (Makal. 13:48) Athu ene ana tshigina egi Yehowa wana kalegela muhiga wafubidila nu watagana ha gutulongesa giamatshidia giene gia ndando mangino. (Mat. 11:25; 24:45) Tuajiyilego gukotelesa giamatshidia giene esue hakhetu, gukotelesa giamatshidia giene gudi nu ndando yavula gubalega ima iko.—Ish. 3:13, 15.

5. Ndaga itshi iko Yehowa atuhanele?

⁵ Yehowa watuhanele luendu lua gulongesa athu ako giamatshidia giamutadila muene, nu ma felela enji. (Mat. 24:14) Lukuma luabonga tuana gulongesa ludi nu ndando handaga ludi mukuatesa athu ha gubua akombeledi a Yehowa nu ludi guahana luendu lua guheta monyo wa ivo nu ivo. (1 Tim. 4:16) Ikhale tuana kalagala mudimo wagulongesa muavula nga hazonda, mukut’etu agasue, tuana kuatesa ha gukalagala mudimo wabalega ndando. (1 Tim. 2:3, 4) Gukalagala mudimo hamoshi nu Yehowa gudi luendu luakoma!—1 Kol. 3:9.

6. Itshi yabuidile athu anyi akhalele mutangiza egi ndaga jia mu nyuma jishigo nu ndando?

⁶ Mutangua dia Timote, athu ako, asuangulugilego ha gukalagala mudimo hamoshi nu Nzambi. Demase wakhalele muzumba ndaga jia ha mavu awa hene gatunyile genji gukalegela Yehowa mudimo hamoshi nu Phaula. (2 Tim. 4:10) Yajiya gukhala egi Fijele nu Helemogene ambembele mudimo wawo wa gulongesa handaga akhalele muvua woma egi ajiya gumona malamba gifua luholo Phaula gamonele. (2 Tim. 1:15) Himene, Alekisandele, nu Filete abuile ba aposta nu atunyine giamatshidia. (1 Tim. 1:19, 20; 2 Tim. 2:16-18) Athu awa agasue akhalele muzumba Yehowa, uvi akhalelego mutangiza egi ndaga jia ahanewe jiakhalele nu ndando.

7. Miheto itshi Satana gana gututela hagula tubembe gukombelela Yehowa?

⁷ Luholo lutshi Satana ana gututuma ha gubemba umonyi watuhanele Yehowa? Tutadilenu miheto yana kalegela muene. Wana kalegela saga, video, TV, internet nu mikanda nu makalegelo anyi ajiya gututuma ha gubemba gukombelela Yehowa. Wana kalegela usageshi ha gutuhana woma, hagula tubembe gulongesa. Wana tshigina egi tutegelele ‘malongo a mambo’ a ba aposta, hagula tutune giamatshidia.—1 Tim. 6:20, 21.

8. Longo ditshi tuazula mu eksperianse ya phangi Daniel?

⁸ Gula tuatemelego, tuajiya gutuna giamatshidia mage-mage. Tutadilenu ndaga yataganele nayo phangi Daniel, * yonu wakhalele muzumba saga jia video. Udi muzuela egi:  “Ngasendesele gukalagala saga jiene tangua ngakhalele nu ivo 10. Thomo, ngakhalele mutshita saga jiabonga. Gungima, ngasendesele gukalagala saga jia itumba nu jia wanga.” Lusugu nu lusugu, wakhalele mubalegesa matangua 15 ha gukalagala saga jiene. Daniel udi muzuela luko egi: “Muguzuela guabonga saga ngakhalele mutshita, nu guvula gua matangua ngakhalele mubalegesa gu saga yene, guakhalele mubolesa ufuta wami nu Yehowa. Ngakhalele mutangiza egi ngajiyilego luko gutumagela mikhuala ya Biblia.” Gula tuatemelego, saga jia video jiayiya gututuma ha gutuna giamatshiadia. Gula ndaga ya luholo elu yatubuila, tuajiya gutotesa ima ya ndando yatuhuile Yehowa.

9. Hagutadila 1 Timote 1:18, 19, Phaula wafuanesele Timote nu nanyi?

⁹ Tanga 1 Timote 1:18, 19. Phaula wafuanesele Timote nu suta nu wamutumine ha ‘gulua ita yabonga.’ Ita yene ishigo ya mu muila uvi ya mu nyuma. Mu maluholo atshi Aklisto adi gifua masuta adi mulua ita? Makalegelo atshi tudi naye gukudisa esue masuta a Klisto? Tutadilenu malongo thano tuajiya guzula mu luholo Phaula gafuanesele Timote nu suta. Malongo ene ajiya gutukuatesa ha gubamba giamatshidia.

10. Gujingiyina gudi Nzambi guakotelesa itshi? Mukunda natshi tudi naye gujinginyina?

¹⁰ Kudisa khadilo dia gujinginyina gudi Nzambi. Suta diabonga diana khala dia gujinginyina. Diana lua ha gubamba athu gana zumba, nga ima yenji ya ndando, yakotelesa malongo a Nzambi. Phaula wahanele Timote gikhesa ha gusala yagujinginyina gudi Nzambi. (1 Tim. 4:7) Gula tudi muzumba Nzambi muavula, mbatukudisa nzala ya gusala agujinyina mu giamatshidia.—1 Tim. 4:8-10; 6:6.

11. Mukunda natshi tuakhala nu funu ya gudikanda?

¹¹ Kudisa khadilo dia gukalagala ndaga jiabonga. Suta diagasue diana gudilondega gutuama ha gulua ita. Timote wasalele wagujinginyina mu nyuma handaga walanduile malongo a Phaula, wakalegele ngolo ha gubemba nzala jiabola, wakudishile makalegele abonga nu wakhalele gudibungisa nu aphangi Aklisto. (2 Tim. 2:22) Yana toga gumonesa khadilo dia gudikanda. Tudi naye gudikanda ha gutuna nzala jiabola. (Lomo 7:21-25) Tuana khala nji nu funu ya gudikanda ha gukatula umuthu ukulu, nu gusudiga umuthu uhe-uhe. (Ef. 4:22, 24) Matangua ako, gula tudi yaguhuila mungueze tuana kolesela ha guya mu gudibungisa gua mu hungu.—Heb. 10:24, 25.

12. Mu maluholo atshi tuajiya gukudisa luholo luetu lua gukalegela Biblia muabonga?

¹² Suta diagasue didi naye guzula formasio ha gukalegela iluilo yenji muabonga. Ha guyikalegela muabonga, udi naye guyitshitshila lusugu nu lusugu. Luholo lumoshi nji, tudinaye gujiya gukalegela Mbimbi ya Nzambi muabonga. (2 Tim. 2:15) Tuana longuga luholo lua gukalegela Mbimbi yene mu gudibungisa gua mu hungu. Gula tudi mutanga Biblia muavula mbatukuatesa athu ako ha gujiya egi giamatshidia gidi mu Bilbia giakhala diago nu ndando. Tudi naye gukalegela Biblia ha gukolesa gutshigina guetu. Tushigo naye gusuga phamba mu gutanga Biblia uvi, tudi naye gutagigiza mu ndaga tuana gutanga nu gukalagala ba recherche mu mikanda yetu hagula tukotelese Biblia muabonga nu tukalegele ndaga tudi mutanga. (1 Tim. 4:13-15) Gukalagala ngenyi mbagutukuatesa ha gulongesa athu ako Biblia. Yakotelesa egi tushigo naye phamba guatangela verse jia Biblia. Tudi naye gukamba gukuatesa alongogi a Biblia, ha gukotelesa verse jiene jia Biblia muabonga nu luholo ajiya gujikalegela. Gula tudi mutanga Biblia lusugu nu lusugu,  tuajiya gukudisa luholo luetu lua gulongesa athu ako muabonga.—2 Tim. 3:16, 17.

13. Luholo Hebelu 5:14, idi guyimonesa mukunda natshi tudi naye gukhala nu gutema?

¹³ Khala nu gutema. Suta diatema diana mona gingonza gutuama nu diana kamba luholo lua gulenga gingonza giene. Esue nji tudi naye gujiya gutuama ndaga jiajiya gutubatela malamba nu gujilenga. (Ish. 22:3; tanga Hebelu 5:14.) Ha gufezegesa, tudi naye gutomba saga jia gudikenesela nu gutema guagasue. Ba emision avula ana gubalega gu TV nga ba video, ana gumonesa ndaga jia musonyi. Ndaga jia luholo elu, jiajiya gututuma ha gukalagala gubola, jiana hana nji mutshima wa Nzambi gikenene. Tuana tuna saga jiabola jia gudikenesela, handaga jiajiya gulebesa mage-mage guzumba guetu gudi Nzambi.—Ef. 5:5, 6.

14. Luholo lutshi gutema guakuatesele Daniel?

¹⁴ Daniel munu tuazuelela guthunda wakotelesele egi gutala saga jia gudikenesela jia khuta nu video jia ndaga jia wanga jiakhalele jiabola diago. Wakalegele ba recherche mu Watchtower Library ha guheta malongo ajiya gumukuatesa ha gubinga ndaga yene. Luholo lutshi gutshita ngenyi guamukuatesele? Wabembele gu kalagala saga jiene nu video jiabola jia gudikenesela. Wakatudile saga jiene jiabola jia gudikenesela nu watunyile ha gudibungisa hamoshi nu athu anyi akhalele mukena nawo. Udi muzuela egi: “Ha fundo dia gukalagala saga jiene jiabola nu gutala video jiabola, ngasendele gukalagala ndaga hamoshi nu mafuta ami a mu hungu.” Mangino Daniel udi muvundji wa njila nu udi nji mukulu mu hungu.

15. Mukunda natshi mene jia mambo jiakhala jiabola?

¹⁵ Esue nji tudi naye gumonesa gutema gu malongo a mambo a ba aposta gifua muatshitshile Timote. (1 Tim. 4:1, 7; 2 Tim. 2:16) Ha gufezegesa, ajiya gukamba gutuwambela ndaga jia mambo jiatadila aphangi etu nga gututuma ha gukhala nu badute mukunda nu organizasio wa Yehowa. Ndaga jia luholo elu jiajiya gulebesa gutshina guetu. Tudi naye gutuna gutshigina malongo ene a mambo. Mukunda natshi? Handaga mene jia luholo elu jiana zoga ‘mukatshi dia athu adi nu matangi azangelewa gale nu athu anyi ashigo nu giamatshidia.’ Felela diawo diakhala dia guzola ‘iphapha ya githuhu nu gumana.’ (1 Tim. 6:4, 5) Ana tshigina egi esue tutshigine mambo awo nu tubembe gushila aphangi etu mutshima.

16. Ndaga jitshi jiana wunganesa matangi etu tudi naye gutuna?

 ¹⁶ Uwunganesago matangi aye. Gifua ‘suta diafubidila dia Yesu Klisto,’ Timote wadihanele mu mudimo wa gulongesa ha fundo dia guwunganesa matangi enji gu ima ya ha mavu awa. (2 Tim. 2:3, 4) Gifua Timote esue nji tuajiyilego gubemba egi nzala jia ima ya mavu awa jiwunganese matangi etu. “Guhuiga gua umonyi” guajiya gulebesa guzumba guetu mukunda nu Yehowa, nu gusuanguluga tuana khala nago mukunda nu Biblia nu nzala tuana khala nayo ya guyilongesa gudi athu ako. (Mat. 13:22) Tudi naye gukhala nu lujingu lualeba, gukalegela tangua nu ngolo jietu ha “guhaga . . . Ufumu wa Nzambi a fundo dia thomo.”—Mat. 6:22-25, 33.

17-18. Itshi tuajiya gutshita ha gubamba ufuta wetu nu Yehowa?

¹⁷ Dilondege ha gukalagala ndaga muphushi. Gutuama egi suta diye gu ita, diana gudilondega muabonga ha gudibamba. Gula tudi mubamba ima ya tuhanele Yehowa muabonga mbatukalagala ndaga muphushi gula tuamona gingonza. Itshi yajiya gutukuatesa ha gukalagala ngenyi? Tudi naye gudilondega muabonga gutuama ha gujiya luholo tuajiya gukalagala ndaga gula tuatagana nu malamba.

¹⁸ Tufezegese gale, mukunyi wa mbuto watema, wana tunga ga ngando hehi nu gilanga gienji, hadi sungi ya mvula khenji isendesa ndo. Mukunda natshi? Handaga gula mvula yanoga mu gisagumuisa, wajiya gudisuega muene. Luholo lumoshi nji, tudi naye gudilondega muabonga ha gujiya ndaga tuajiya “gukalagala” gula tuamona mu gisagumuisa ndaga jia musonyi, jia itumba nga ndaga jia ba aposta, tangua tudi mukalegela internet, video nga tangua tudi mutala ba emision mu TV. Gula tudi gudilondega gu ndaga jiajiya gutubuila, tuajiya gukalagala ndaga muphushi, ha gubamba ufuta wetu nu Yehowa nu gusala a phelegeta gu meso enji.—Ngi. 101:3; 1 Tim. 4:12.

19. Ishimbigo itshi mbatuheta gula tudi mubamba ima ya ndando ya tuhanele Yehowa?

¹⁹ Tudi naye gubamba ima ya ndando yatuhanele Yehowa gifua, giamatshidia gia mu Biblia nu luendu lua gulongesa giamatshidia giene gudi athu ako. Gutshita ngenyi mbatukhala nu mutshima wa phelegeta, lujingu luabonga nu gusuaguluga ha gukuatesa athu ako hagujiya Yehowa. Muene mbawutukuatesa ha gubamba ima atuhanele.—1 Tim. 6:12, 19.