LONGO DIA 38
Kalegela Tangua Diaye nu Gutema mu Sungi ya Guhuima
‘Gifutshi giakhalele mu guhuima, guakhalelego ita mu masugu enji, handaga Yehowa wamuhanele guhuima.’—2 GUDI. 14:6.
LUNGIMBO 60 Sauver leurs vies
NDAGA JIDI MU LONGO EDI *
1. Tangua ditshi yakhala lamba ha gukalegela Yehowa mudimo?
TANGUA ditshi yakhala lamba ha gukalegela Yehowa mudimo, tangua udi mu malamba nga tangua udi mu guhuima? Tuana khala hehi ha gushila Yehowa mutshima tangua tuana gutagana nu malamba. Uvi itshi tuana gukalagala gula tudi mu sungi ya guhuima? Tuana gubuita mutshima ha gukalegela Yehowa mudimo ba? Yehowa watemesele enya Isalele hagula ndaga ya luholo elu yabuilago.—Mikh. 6:10-12.
Fumu Asa wazudile desizio dia gushiya gikombelelo gia mambo (Tala paragrafe 2) *
2. Gifezegeselo gitshi Fumu Asa wabembele?
2 Fumu Asa udi gifezegeselo giawaha, handaga wakalegele ndaga nu gutema nu washile mutshima wenji wagasue gudi Yehowa. Wakalegele Yehowa mudimo mu tangua dia malamba nu mu tangua dia guhuima. Monyo wenji wagasue, ‘Asa washile mutshima wenji wagasue gudi Yehowa.’ (1 Maf. 15:14) Ha gumonesa egi wakhalele mukalegela Yehowa mudimo nu mutshima wenji wagasue, Asa wakatuile ikombelelo yagasue ya mambo mu Yuda. Biblia idi muzuela egi ‘wakatudile iwotshielo ya ngenji nu mafundo aleha a gukombelela, wamuangele makunji a gijila nu wabuishile isongo ya nzambi jiko.’ (2 Gudi. 14:3, 5) Wakatudile khakha wenji Maka ginemo giagukhala mukhetu wa thomo mu Ufumu. Mukunda natshi? Handaga wakhalele mutuma athu ha gukombelela nzambi ya gisongo.—1 Maf. 15:11-13.
3. Itshi tuza muzuelela mu longo edi?
3 Asa wakatudile gikombelelo gia mambo mu dimbo. Uvi asugilego hananyi, wakuatesele enya Yuda ha gukombelela luko Yehowa. Yehowa wahanele guhuima gudi Asa nu enya Yuda. * Mu ivo kumi ya uhinyinyi wa Fumu Asa, ‘gifutshi giakhalele mu guhuima.’ (2 Gudi. 14:1, 4, 6) Mu longo edi, tuza muzuelela luholo Asa wakalegele tangua mu sungi akhalele mu guhuima. Tuza nji muzuelela gifezegeselo gia Aklisto a mu siekle ya thomo, anyi akalegele tangua diawo mu luholo luabonga mu sungi ya guhuima gifua Asa. Gungima tuza muhana kueteya gu muhu owu: Gula wana gujinga mu gifutshi ginyi mafumu a guvernema atunyishilego mudimo wetu, luholo lutshi wajiya gukalegela tangua diaye mu luholo luabonga mu sungi ya guhuima?
LUHOLO ASA WAKALEGELE TANGUA DIENJI MU SUNGI YA GUHUIMA
4. Ha gutadila 2 Gudilanduluila 14:2, 6, 7, luholo lutshi Asa wakalegele tangua dienji mu sungi ya guhuima?
4 Tanga 2 Gudilanduluila 14:2, 6, 7. Asa wawambelele athu egi Yehowa wahanele ‘guhuima gukhanda jiagasue.’ Asa atangijilego egi sungi ya guhuima yakhalele sungi ya gukena. Uvi muene wasendesele gutunga membo, ibindji (ibayi), jinzo jia misonga nu ijidigo. Wawambelele enya Yuda gamba: ‘Mavu adi ha mago etu.’ Itshi Asa atshiginyile guzuela? Yakotelesa egi guakhalelego nga nu mbalaji wakhalele naye guakanga njila ha guwenda mu gifutshi giawo nga ha gutunga jinzo. Wawambelele athu ha gukalegela muabonga tangua diawo mu sungi ya guhuima.
5. Mukunda natshi Asa wavudishile masuta enji?
5 Mu tangua diene dia guhuima, Asa wakambele nji luholo lua guvudisa masuta enji. (2 Gudi. 14:8) Gutshita ngenyi gudi mukotelesa egi akhalelego mushila Yehowa mutshima ba? Ndo sha. Asa wakhalele mujiya egi idi ginemo gienji gia gulondega athu mukunda nu ndaga jiajiya guabuila mu masugu adi muza. Asa wakhalele nji mujiya egi sungi ya guhuima ya enya Yuda yajiya gusuga nu ndaga yene yakalegewe nji ngenyi.
LUHOLO AKLISTO A MU SIEKLE YA THOMO AKALEGELE TANGUA DIAWO MU SUNGI YA GUHUIMA
6. Luholo lutshi Aklisto a mu siekle ya thomo akalegele tangua diawo mu sungi ya guhuima?
6 Aklisto a mu siekle ya thomo, akhalele mu sungi ya guhuima ngatshima akhalele mutagana nu usageshi. Ndaga itshi akalegele mu sungi yene ya guhuima? Alanduile gulongesa lukuma luabonga. Mukanda wa Makalegelo udi muzuela egi ‘akhalele muvuila Yehowa woma’. Alanduile gulongesa lukuma luabonga, nu ‘adivudishile.’ Yehowa washimbigile mudimo wawo wa gulongesa akalegele nu gikhesa giagasue mu sungi ya guhuima.—Makal. 9:26-31.
7-8. Ndaga itshi mupostolo Phaula nu alandudi ako akalegele tangua ahetele okazio wa gulongesa? Kotelesa.
7 Alandudi a mu siekle ya thomo, akhalele mulongesa lukuma luabonga mu ba okazio agasue akhalele mutagana nawo. Ha gufezegesa, tangua mupostolo Phaula wakhalele gu dimbo dia Efeso, wakotelesele gamba mufulo wakoma wakanguga guene. Hene asalele guene ha gulongesa athu nu guabuisa alandudi a Klisto.—1 Kol. 16:8, 9.
8 Phaula nu Aklisto ako ahetele okozio uko, wa gulongesa lukuma luabonga, tangua akhalele naye guzuelela ndaga yatadila gumbiwa gu mukanda mu givo 49 gia tangua dietu. (Makal. 15:23-29) Phaula nu alandudi ako awambelele mahungu desizio diazudiwe mukunda nu ndaga yene. Gungima akalegele ngolo ha gulongesa ‘lukuma luabonga lua Mbimbi ya Yehowa.’ (Makal. 15:30-35) Mbuto itshi yazolele? Biblia idi muzuela egi ‘mahungu alanduile gudikolesa mu gutshigina nu gudivudisa lusugu nu lusugu.’—Makal. 16:4, 5.
LUHOLO LUA GUKALEGELA TANGUA MU SUNGI YA GUHUIMA MANGINO
9. Luholo lutshi Matemue a Yehowa a mu ifutshi yavula ana longesa mangino? Mihu itshi tuajiya gudihula?
9 Mangino, Matemue a Yehowa a mu ifutshi yavula ana longesa mu guhuima. Mu gifutshi gienu muana longesa mu guhuima ba? Gula idi ngenyi, dihule egi: ‘Luholo lutshi ngana kalegela tangua diami mu sungi ya guhuima?’ Mu masugu awa a gisugishilo, akombeledi a Yehowa adi mukalagala mudimo wa gulongesa nu gumuanga lukuma luabonga ha mavu agasue. (Mako 13:10) Tudi nu ndaga jiavula jia gukalagala mu mudimo wene.
Aphangi avula ahetele ishimbigo yavula luholo ayile mulongesa lukuma luabonga mu ifutshi iko nga ha gulongesa athu ana zuela zuelelo diko (Tala paragrafe 10-12) *
10. Ndaga itshi 2 Timote 4:2 idi gututuma ha gutshita?
10 Luholo lutshi wajiya gukalegela tangua diaye mu sungi ya guhuima? (Tanga 2 Timote 4:2.) Wajiya gutangiza luholo aye nga muenya fami waye muajiya gusombegesa ndaga jiko jia mu lujingu luenu, ha gulongesa muavula nga gubua muvundji wa njila ba? Edi dishigo tangua dia gukamba umonyi wavula-vula handaga mbatuhuluishiwago nu umonyi wene mu tangua dia lamba diakola.—Ish. 11:4; Mat. 6:31-33; 1 Yone 2:15-17.
11. Ndaga itshi athu ako atshitshile ha gulongesa lukuma luabonga gudi athu avula?
11 Alongeshi avula alongugile mbimbi ihe-ihe ha gulongesa nu gumuanga lukuma luabonga. Organizasio wa Nzambi wana guahana mikanda nu jivideo mu mazuelelo avula ha guakuatesa. Ha gufezegesa mu 2010, mikanda yetu yazogele mu mazuelelo gubalega 500. Mangino mikanda yene, idi mu mazuelelo gubalega 1 000!
12. Gubonga gutshi athu ana heta tangua ana tegelela lukuma luabonga lua Ufumu mu zuelelo diawo? Hana gifezegeselo.
12 Luholo lutshi athu ana gudivua tangua ana tegelela lukuma luabonga mu zuelelo diawo? Tutadilenu ndaga yataganele nawo phangi wa mukhetu mumoshi gu asamble a masugu thathu gu dimbo dia Memphis gu État ya Tennessee gu États-Unis. Asamble ene akalegewe mu zuelelo dia Kinyarwanda, zuelelo diana zuelewa gu Rwanda, Congo (Kinshasa), nu Uganda. Gungima dia asamble ene, phangi muene wana zuela Kinyarwanda wazuelele egi: “Sendese ngajile gu États-Unis ivo 17 yabalega gale, uvi mangino ngakotelesa muabonga malongo ana longesewa gu asamble a masugu thathu.” Idi yadiago egi malongo avuile phangi wa mukhetu mu zuelelo dienji, akuatele diago mutshima wenji. Gula luholo ludi guene, wajiya gulonguga zuelelo dihe-dihe ha gulongesa athu mu terituare yaye ba? Wajiya guzula desizio diene, gula athu ako a mu terituare ya hungu dienu ana zuela zuelelo diko ba? Gukalagala ngenyi mbagugusuanguluisa.
13. Luholo lutshi aphangi a gu Russie akalegele tangua diawo mu sungi ya guhuima?
13 Mu ifutshi iko, aphangi’etu ana longesago muguhuima handaga, ba guverma ana tunyisa midimo yetu. Tuzuelelenu gale aphangi’etu a gu Russie. Atagenele nu usageshi wakola, uvi mu Mars 1991 guvernema yaahanele njila ya gukombelela mu guhuima. Mutangua diene, alongeshi a Ufumu gu Russie akhalele 16 000. Gungima dia ivo 20, alongeshi avudile diago, abuile 160 000! Ndaga yene idi mumosesa egi aphangi’etu akalegele ndaga nu gutema mu sungi ya guhuima. Sungi yene yaguhuima yashiphilego. Ngatshima ndaga jiasombegesele mu gifutshi giene, uvi ene alanduile gukombelela Yehowa nu gikhesa giagasue. Ana tshita yagasue ajiya gutshita ha gulandula gukombelela Yehowa.
SUNGI YA GUHUIMA MBAYISHIPHIGO
Tangua Fumu Asa gakombelele nu mutshima umoshi, Yehowa wakuatesele enya gu Yuda ha gubinga mbalagaji jiawo (Tala paragrafe 14-15)
14-15. Luholo lutshi Yehowa amonesele ngolo jienji gudi Asa?
14 Mu masugu a fumu Asa sungi ya guhuima yahetele gugisugishilo. Masuta a gu Etiopia 1 milio ajile gualuisa. Fumu wa masuta ene, jina dienji diakhalele Zela; wakhalele diago mutshigina egi mbawubinga dimbo dia Yuda. Fumu Asa gahagelego mutshima gu guvula gua masuta, uvi wahagele mutshima wenji gudi Yehowa Nzambi. Asa wasambele egi: ‘Oo Yehowa Nzambi wetu, tuana guguhagela mutshima, tudi muluisa thundu eyi yakoma mu jina diaye.’—2 Gudi. 14:11.
15 Ngatshima masuta a gu Etiopia a khalele avula gubalega a gu Yuda, Asa wahagele mutshima wenji gudi Yehowa egi, muene udi nu ngolo jia guhuluisa athu Enji. Yehowa wakhuatesele athu enji, uvi masuta a gu Etiopia abingilego ita.—2 Gudi. 14:8-13.
16. Luholo lutshi tudi mujiya egi sungi ya guhuima mbayiheta gu gisugishilo?
16 Ngatshima tushigo mujiya ndaga jiagasue mbajitubuila mu masugu adi muza, uvi tudi mujiya egi sungi ya guhuima mbayishigo mushipha. Yesu wazuelele gutuama egi, mu masugu a gisugishilo, ‘alandudi enji mbaatunyiwa gudi ifutshi.’ (Mat. 24:9) Luholo lumoshi nji, Phaula wazuelele egi ‘athu agasue ana tumagela Nzambi mu gudibungisa guawo, nu Klisto Yesu mbaamonesewa lamba.’ (2 Tim. 3:12) Satana udi nu “khabu jiabala” hene, idi lamba gudi esue ha gulenga khabu jienji.—Yat. 12:12.
17. Mu maluholo atshi gutshigina guetu guajiya gulolewa?
17 Mu masugu adi muza, mbatutagana nu malamba mbaalola gutshigina guetu. Gualeha ndo lamba diakola mbadiza, sendese gugufugiwa gua mavu ha fugile Nzambi yima yagasue, uu nu luenyelu, khenji guakhalelego ‘lamba diakola ngenyi nu mbadikhadigo luko ngenyi.’ (Mat. 24:21) Mutangua diene enya fami jetu ajiya gututuna, mudimo wetu nji wajiya gukangewa. (Mat. 10:35, 36) Mbatusha mutshima gudi Yehowa gifua muatshitshile Asa ha gumutoga ukuateshi nu ubambi ba?
18. Hagutadila Hebelu 10:38, 39, itshi mbayitukuatesa hagudilonda mukunda nu gisugishilo gia sungi ya guhuima?
18 Yehowa udi gutuhana formasio mangino, ha gukolesa gutshina guetu mukunda nu ndaga mbajitubuila mu masugu adi muza. Udi mutuameza ‘muhiga wafudila nu watema,’ ha gutuhana ‘ima yagudia ya mu nyuma mutangua diabonga’ hagula tukhale nu gutshigina guakola. (Mat. 24:45) Uvi, muthu wagasue mukatshi dietu udi naye gutshita yagasue ha gukhala nu gutshigina guakola gudi Yehowa.—Tanga Hebelu 10:38, 39.
19-20. Ha gutadila 1 Gudilanduluila 28:9, mihu itshi tudi naye gudihula, nu mukunda natshi?
19 Esue nji tudi naye ‘gukamba Yehowa’ gifua muakalegele Fumu Asa. (2 Gudi. 14:4; 15:1, 2) Tuana sendesa gukamba Yehowa tangua tuana gulonguga ndaga jia mutadila, nu tangua tuana gubatijiwa. Tuana kalagala yagasue ha gukolesa guzumba guetu gudi Yehowa. Hene, tuajiya gudihula gamba: ‘Ngana guya mu gudibungisa gua mu hungu matangua agasue ba?’ Mu gudibungisa gua mu hungu tuana heta malongo ajiya gutukuatesa ha gulandula gukalegela Yehowa mudimo; tuana guheta nji gikhesa gudi aphangi a mala nu a akhetu. (Mat. 11:28) Tuajiya nji gudihula egi: ‘Ngana khala nu programe ya gulonguga Biblia hakhami ba?’ Gula wana jinga hamoshi nu fami yaye, wana kalagala gukombelela gua mu fami phoso nu phoso (nga lubingo nu lubingo) ba? Nga ndo, gula wana jinga hakhaye, wana kalagala ndaga gifua wakhalele mukalagala gumbo dienu ba? Wana gudihana muavula mu mudimo wa gulongesa nu gubuisa athu alandudi ba?
20 Mukunda natshi tudi naye gudihula mihu eyi? Biblia idi muzuela egi Yehowa wana tala moshi’a mutshima wetu, wana jiya matangi etu, esue nji tudi naye gukalagala gifua muene. (Tanga 1 Gudilanduluila 28:9.) Gula tuamona egi tudi naye gusombegesa mafelela etu, makalegelo etu, nga matangi etu, tudi naye gutoga ukuateshi gudi Yehowa. Edi tangua diabonga dia gudilondega mukunda nu ndaga mbajitubuila mu masugu adi muza. Ubembigo egi nga gima gimoshi gigukange njila ha gukalegela tangua diaye nu gutema mu sungi ya guhuima!
LUNGIMBO 62 Le chant nouveau
^ par. 5 Mu dimbo dienu, muana gukombelela Yehowa mu guhuima ba? Gula idi ngenyi, luholo lutshi wana gukalegela tangua diaye mu sungi eyi mudi mu guhuima? Longo edi diza gugukuatesa ha gujiya luholo wajiya gulandula gifezegeselo gia Fumu Asa wa gu Yuda, nu Aklisto a mu siekle ya thomo. Akalegele ndaga nu gutema guagasue, tangua akhalele mu guhuima.
^ par. 3 UKOTELESHI WA MBIMBI: Mbimbi eyi gukhala mu “guhuima” ishigo phamba mukotelesa egi tushigo nu ita. Mbimbi ya Hebelu ana gukalegela ha guzuelela guhuima yana kotelesa nji gukhala nu sante ya waha, gukhala mu ubambi nu gusuanguluga.
^ par. 57 UKOTELESHI WA IFUANESA: Fumu Asa wakatudile khakha wenji ginemua gia gukhala mukhetu wa thomo mu ufumu handaga wakhalele mutuma athu ha gukombelela isongo. Athu akhalele mulandula gifezegeselo gia Asa, adi mumuanga isongo.
^ par. 59 UKOTELESHI WA IFUANESA: Phangi mumoshi nu mukanj’enji asombegesa ndaga jiko mu monyo wawo ha guya muhana ukuateshi gu fundo didi nu funu ya ukuateshi.
