1-2. Gudivua gutshi gudi mukatshi dia Mulongeshi 11:6 nu mudimo wa gulongesa?

MU IFUTSHI iko athu ana gusuanguluga muavula gutegelela lukuma luabonga. Sendese mualeha ana gukhala diago nu nzala ya gutegelela lukuma luene! Uvi mu ifutshi iko, athu avula ana suangulaga diago guta maga atadila Nzambi nga Biblia. Athu ana suanguluga nu lukuma luabonga ha fundo wana gujinga ba? Ikhale ngenyi nga ndo, Yehowa wana gutshigina egi tulandule gulongesa uu nu tangua mbadizuela muene egi guahui.

² Yehowa watombele gale tangua mbadisugisa muene mudimo wa gulongesa. Gungima “gisugishilo mbagiza.” (Mat. 24:14, 36) Uvi luholo lutshi tuajiya gutumagela mbimbi eji jidi muzuela egi ‘ubembigo egi koko diaye dihuluguge’? *—Tanga Mulongeshi 11:6.

3. Itshi tuza muzuelela mu longo edi?

³ Longo diabalega diatumonesele ndaga nguana tudi naye gutshita ha gubua ‘alowi abonga a athu,’ yakotelesa alongeshi awaha a lukuma luabonga. (Mat. 4:19) Uvi mu longo edi tuza muzuelela maluholo thathu tuajiya gukolesa desizio dietu dia gulongesa, ngatshima tudi mutagana nu malamba. Tuza mumona mukunda natshi idi nu ndando ha (1) gulandula gusha mudimo wa gulongesa ha fundo dia thomo, (2) gumonesa khadilo dia guhuiminyina nu (3) gulandula gukolesa gutshigina guetu.

4. Mukunda natshi tudi naye gulandula gusha mudimo wa gulongesa ha fundo dia thomo?

⁴ Yesu wadiangele guzuelela ndaga mbajimonesa egi tudi mujinga mu masugu a gisugishilo. Wajiyile egi ndaga jiene jiajiya gutuma  alandudi enji ha gubemba gusha mudimo wa gulongesa ha fundo dia thomo. Hene wawambelele alandudi enji ha ‘gulandula gumonesa gutema.’ (Mat. 24:42) Gifua mu masugu a Nowa, mangino nji gudi nu ndaga jiavula jiana wunganesa athu matangi ha gutegelela lukuma luabonga. (Mat. 24:37-39; 2 Phet. 2:5) Gishina giene, tudi naye gulandula gusha mudimo wa gulongesa ha fundo dia thomo handaga Yehowa watuhanele nawo.

5. Ha gutadila mukanda wa Makalegelo 1:6-8 mu luholo lutshi lukuma luabonga ludi naye gulongesewa?

⁵ Mangino, tudi naye diago gusha mudimo wa gulongesa lukuma luabonga lua Ufumu ha fundo dia thomo. Yesu wadiangele guzuela egi gungima dia gufua guenji, alandudi enji mbalandula gulongesa lukuma luabonga muavula gumubalega muene. (Yone 14:12) Hafuile Yesu, alandudi enji ako avutugidile luko gu mudimo wa gulowa jishui. Tangua diafuzumugile Yesu, watshitshile ndaga ya gushimana, wakuatesele alandudi enji ako ha gukuata jishui jiavula. Gungima dia gutshita ndaga yene ya gushimana, Yesu wamonesele egi mudimo wa gulongesa nu gubuisa athu alandudi wakhalele nu ndando yavula gubalega midimo iko yagasue. (Yone 21:15-17) Gutuama egi Yesu aye mu dilu, wawambelele alandudi enji egi mudimo wa gulongesa gasendesele mbawukalegewa mu mafundo agasue a gu Isalele. (Tanga Makalegelo 1:6-8.) Gungima dia ivo, Yesu wahanele mupostolo Yone vizio yakhalele mumonesa ndaga mbajikalegewa “mu lusugu lua Fumu.” * Mukatshi dia ndaga jiene, Yone wamonele muanjelo wakhalele nu “lukuma luabonga lua ivo nu ivo” ha gululongesa gudi “athu a ifutshi yagasue, iphuta yagasue nu mazuelelo agasue.” (Yat. 1:10; 14:6) Yadiago, gutshigina gua Yehowa mangino gudi egi tulongese lukuma luabonga ha mavu agasue uu nu tangua muene mbagazuela egi guahui.

6. Luholo lutshi tuajiya gulandula gusha mudimo wa gulongesa ha fundo dia thomo?

⁶ Ha gulandula gusha mudimo wa gulongesa  ha fundo dia thomo, tudi naye gutangigiza ndaga jiagasue Yehowa wana tshita ha gutukuatesa. Ha gufezegesa, wana gutuhana ima yavula ya gudia ya mu nyuma mu njila ya mikanda, audio, video nu mu njila ya JW Télédiffusion. Tangiza gale: Site Internet yetu idi nu mikanda, video, audio nu ndaga jiko mu mazuelelo gubalega 1 000! (Mat. 24:45-47) Athu a ha mavu awa anago gudivua handaga ana gudinginyisa mu ndaga jia politike nu akhala nu ikombelelo yagudisha. Luko anago gudivua handaga ako mukatshi diawo adi nu umonyi uvi ako ndo. Uvi akombeledi a Yehowa gubalega ba milio nage a ha mavu agasue ana gudivua muabonga diago. Ha gufezegesa, mu lusugu lua thano 19 Avril 2019, Matemue a Yehowa a ha mavu agasue adibungishile ha gutshita mukhapho wa lusugu. Mu ngueze ya lusugu luene, athu 20 919 041 adibungishile ha Guwunguluga Gufua gua Yesu. Gutangigiza ndaga eji tuana gutshita nu tuana gumona guana gutukuatesa ha gulandula gusha mudimo wa Ufumu ha fundo dia thomo.

7. Luholo lusthi gifezegeselo gia Yesu gidi gutukuatesa ha gulandula gusha mudimo wa gulongesa ha fundo dia thomo?

⁷ Luholo luko lua gulandula gusha mudimo wa gulongesa ha fundo dia thomo, ludi gulandula gifezegeselo gia Yesu. Gabembelego egi nga gima gimoshi gimukange njila ha gulongesa giamatshidia. (Yone 18:37) Tangua Satana amulezele ‘ufumu wagasue wa ha mavu nu gutumbuga guawo’ Yesu gatshiginyilego nga hazonda.’ Luko, athu akambele nji gumubuisa fumu uvi gatshiginyilego. (Mat. 4:8, 9; Yone 6:15) Yesu gabembelego egi nzala ya gukhala nu ima yavula-vula ya gujingila imuwunganese matangi. Luko, gavuilego woma hataganele muene nu umbalagaji wakola. (Luka 9:58; Yone 8:59) Gula gutshigina guetu gualolewa, tudi naye guwunguluga longo diahanele mupostolo Phaula ha gulandula gusha mudimo wa gulongesa ha fundo dia thomo. Wawambelele Aklisto ha gulandula gifezegeselo gia Yesu hagula ‘alebigo muila nu abembigo’!—Heb. 12:3.

8. Khadilo dia guhuiminyina diakotelesa itshi? Mukunda natshi didi nu ndando mangino?

⁸ Khadilo dia guhuiminyina diana gutukuatesa ha gunengena uu nu tangua ndaga mbajisombegesa. Tudi naye gumonesa khadilo diene ikhale tudi munengena egi ndaga imoshi ya lamba ihue, nga tudi munengena sendese mualeha gutagenesewa gua ndaga imoshi yawaha. Ha gufezegesa, Profete Habakuka wakhalele mutshigina egi ndaga jia khuta jiakhalele mukalegewa gu Yuda jisuge. (Hab. 1:2) Alandudi a Yesu akhalele gudifelela egi Ufumu udi ‘mumonega mu tangua diene’ ha guakatula mu lamba dia uhinyinyi wa enya Roma. (Luka 19:11) Tuana nengena lusugu Ufumu wa Nzambi mbawukatula ndaga jiagasue jiabola nu guhaga mavu ahe-ahe azala nu athu adi mutumagela Nzambi. (2 Phet. 3:13) Uvi, tudi naye gumonesa khadilo dia guhuiminyina nu gunengenena tangua diatombele Yehowa ha gutagenesa ndaga jiene. Henyaha tutadilenu maluholo ako Yehowa wana gutulongesa ha gukhala nu guhuiminyina.

9. Ifezegeselo itshi idi mumonesa egi Yehowa wakhala nu khadilo dia guhuiminyina?

⁹ Yehowa udi gifezegeselo giatagana giatadila khadilo dia guhuiminyina. Wahanele Nowa tangua diavula ha gutunga masuwa. Wamuhanele nji ginemo gia ‘gulongesa ndaga jiabonga.’ (2 Phet. 2:5; 1 Phet. 3:20) Tangua Abalahama wakhalele muhula Yehowa mihu yatadila desizio dienji dia gushiya athu abola akhalele mujinga gu Sodoma nu gu Gomola, Yehowa wamutegelele nu guhuiminyina guagasue. (Gis. 18:20-33) Enya Isalele akhalego agujinginyina gudi Yehowa, uvi muene waamonesele khadilo dia guhuiminyina ivo yavula. (Neh. 9:30, 31) Mangino tuana gumona khadilo dia Yehowa dia guhuiminyina, luholo ana gubembela athu agasue gana gunana gudi muene tangua “ha gubalumuna mitshima  yawo.” (2 Phet. 3:9; Yone 6:44; 1 Tim. 2:3, 4) Gifezegeselo gia Yehowa giana gutukuatesa ha gumonesa khadilo dia guhuiminyina, tangua tudi mulandula gulongesa nu gumuanga lukuma luabonga. Mu Biblia nji mudi nu ifezegeselo idi gutulongesa ha gumonesa khadilo diene.

10. Gifezegeselo gia mukunyi wa mbuto gidi mu Yakoba 5:7, 8 gidi gutulongesa itshi?

¹⁰ Tanga Yakoba 5:7, 8. Gifezegeselo gia mukunyi wa mbuto gidi gutulongesa ha gukhala nu guhuiminyina. Idi yadiago egi mbuto jiko jiana kula muphushi. Uvi mitshi yavula mukatshi dia mitshi yana guhaga mabundu a gudia, yana guzula tangua diavula hagula mabundu ene akole. Hagufezegesa, gu Isalele hagula mabundu akole akhalele naye gutshita mbeji samano. Mukunyi wa mbuto wakhalele mukuna mbuto tangua mvula ya thomo yakhalele munoga nu wakhalele mumuna mbuto jiene hakhalele munoga mvula ya gisugishilo ya sungi ya mvula (printemps). (Mako 4:28) Mbatumonesa gutema gula tualandula khadilo dia guhuiminyina dia mukunyi wa mbuto. Uvi yakhala lamba ha gumonesa khadilo diene.

11. Luholo lutshi gudibulumuisa guana gutukuatesa mu mudimo wa gulongesa?

¹¹ Luholo tushigo athu atagana, tuana tshigina guheta mbuto jia midimo yetu mbala imoshi. Uvi, gula tudi mutshigina egi mbuto jiene jikule muabonga tudi naye gukatula mayiji abola, nu gujimbila meya. Luholo lumoshi nji ha gubuisa athu alandudi, guana toga mudimo wakola. Yana toga tangua diavula ha gukuatesa athu tuana longesa Biblia, ha gubemba khadilo dia gukhaphumuna nu gukudisa khadilo dia guzumba. Khadilo dietu dia guhuiminyina mbaditukuatesa hagula tulebigo muila, gula athu adi mutuna gututegelela. Gula athu ako atshigina gututegelela, tudi naye gumonesa khadilo dia guhuiminyina. Tushigigo naye gushinjiga athu tuana longesa Biblia ha gukula mu nyuma. Matangua ako, alandudi a Yesu nji akhalelego mukotelesa muabonga ndaga muene wakhalele gualongesa. (Yone 14:9) Tudi naye gujiya egi tuana kuna mbuto nu  gujimbila meya, uvi Nzambi wana gujikudisa.—1 Kol. 3:6.

12. Luholo lutshi tuajiya gumonesa guhuiminyina tangua tudi mulongesa enya fami yetu anyi ashigo Matemue a Yehowa?

¹² Yajiya nji gukhala lamba ha gumonesa khadilo dia guhuiminyina, tangua tudi mulongesa enya fami yetu anyi ashigo Matemue a Yehowa. Longo didi mu Mulongeshi 3:1, 7 diajiya gutukuatesa. Didi muzuela egi: ‘Gudi . . . nu tangua dia guhuena tedie nu tangua dia guzuela.’ Makalegelo etu abonga ajiya gukuatesa enya fami yetu ha gutshigina lukuma luabonga. Hene, tudi naye gukhala hehi ha gualongesa giamatshidia giatadila Yehowa. (1 Phet. 3:1, 2) Tudi naye gulongesa nu gikhesa giagasue, gumonesa nji khadilo dia guhuiminyina gudi athu agasue nu gudi enya fami yetu.

13-14. Ifezegeselo itshi ya athu amonesele guhuiminyina tuajiya gulandula?

¹³ Tuajiya guheta malongo adi mumonesa khadilo dia guhuiminyina mu ifezegeselo ya akombeledi a Yehowa a gujinginyina a mu masugu etu idi mu Biblia. Habakuka wakhadile mutshigina egi ndaga jiabola jihue. Uvi wazuelele nu mutshima wenji wagasue egi: ‘Mbangunengenena gifua mutaledi.’ (Hab. 2:1) Mupostolo Paula wazuelele egi wakhalele mutshigina gumanesela mudimo wenji. Uvi walandudile gukalagala mudimo nu guhuiminyina “ha gulongesa lukuma luabonga.”—Makal. 20:24.

¹⁴ Tutadile gifezegeselo gia phangi mumoshi nu mukaji’enji. Gungima dia khalasa dia Galade a atumine gu gifutshi ginyi giakhalelego nu Matemue a Yehowa avula. Fundo diene nji diakhalelego nu Aklisto avula. Athu phamba azonda atshiginyile gulonguga Biblia. Uvi ana khalasa a Galade ako atumiwe mu ifutshi iko, awambelele egi athu agasue akhalele mulongesa ene Biblia mu mafundo akhalele abuile Matemue a Yehowa. Ikhale athu avula mu terituare yene akhalelego guategelela, uvi phangi muene nu mukaji’enji amonesele khadilo dia guhuiminyina nu alandudile gulongesa. Ivo nage gungima dia gulongesa mu terituare yene, athu phamba azonda akhalele mutshigina giamatshidia. Asuangulugile luholo muthu mumoshi mukatshi dia athu anyi akhalele mulongesa Biblia wabatijiwe. Ifezegeselo eyi ya mu tangua dikulu nu ya mu masugu etu idi gutulongesa itshi? Athu awa a gujinginyina alandudile gumonesa gikhesa nu abembelego egi koko diayo dihuluguge. Hene Yehowa waashimbigile mukunda nu khadilo diawo dia guhuiminyina. Tuajiya “gubua atetshi a athu adi nu gutshigina nu guhuiminyina ha guheta yatendelele Nzambi.”—Heb. 6:10-12.

15. Muluholo lutshi gutshigina guana gukolesa desizio dietu dia gulongesa?

¹⁵ Tuakhala nu gutshigina mu ndaga tuana longesa, hene tuana gujiwambela athu avula gula luholo ludi guene. Tuana gusha gutshigina mu ndaga jialayele Nzambi jidi mu Biblia. (Ngi. 119:42; Yesh. 40:8) Tuana gumona nji gutagenesewa gua profesi jia Biblia mangino. Tuana gumona luholo athu ana gusombegesa makalegele awo tuangua ana sendesa gutumagela malongo a Biblia. Usombegeshi athu ana gukalagala wana gututshiginyisa egi athu agasue adi nu funu ya gutegelela lukuma luabonga lua Ufumu.

16. Luholo lutshi Ngimbo 46:1-3 idi gutukuatesa ha gujiya egi gusha gutshigina gudi Yehowa nu gudi Yesu mbagukolesa desizio dietu dia gulongesa?

¹⁶ Tuana tshigina egi Yehowa udi ha gishina gia lukuma luabonga tuana longesa, nu gudi Yesu yonu Yehowa ahagele Fumu mu Ufumu wenji. (Yone 14:1) Yadiago nga tuatagana nu malamba a luholo lutshi, Yehowa mbawulandula gukhala fundo dietu dia gulengela nu muene mbawutuhana ngolo. (Tanga Ngimbo 46:1-3.) Luko, tudi musha mutshima egi Yesu wana gukalegela ngolo nu Ufumu Yehowa wamuhanele ha gulandula gutuameza mudimo wa gulongesa sendese mu dilu.—Mat. 28:18-20.

17. Hana gifezegeselo gidi mumonesa funu ya gulandula gulongesa.

 ¹⁷ Gukhala nu gutshigina mbagutukuatesa ha gusha mutshima egi Yehowa mbawushimbiga gikhesa gietu, matangua ako mu maluholo anyi tuakhalelego mutangiza. (Mulo. 11:6) Ha gufezegesa, lusugu nu lusugu athu avula ana mona mikanda yetu gutuama dia présentoir mobile nu gu table d’exposition. Yakhala metode awaha diago ba? Ayi! Mudimo Wa Ufumu wa novembre 2014 wa Français, wakhalele muzuelela muvuala wa mukhetu mumoshi wakhalele gu université. Muvuala muene watombele sujet ya dissertation yakhalele muzuelela Mathemue a Yehowa. Gamonelego Inzo ya Ufumu, uvi wahetele ndaga jiajiya gumukuatesa ha gusonega sujet yenji gu table d’exposition imoshi ya Matemue a Yehowa yakhalele hehi nu université yawo. Gungima wabatijiwe, mangino udi muvundji wa njila wa tangua diagasue. Gifezegeselo egi gidi gutukuatesa ha gulandula gulongesa, handaga uu nu mangino gudi nu athu adi nu funu ya gujiya lukuma luabonga lua Ufumu.

18. Mukunda natshi tudi nu gutshigina egi mudimo wa gulongesa lukuma luabonga lua Ufumu mbawutagana mu gutshigina gua Yehowa?

¹⁸ Tudi naye gusha mutshima egi mudimo wa gulongesa lukuma lua Ufumu mbawusuga mu tangua diatagana. Tuzuelele ndaga yabuile mu masugu a Nowa. Yehowa wamonesele diago egi wana gutshita ndaga mu tangua diatagana. Ivo hehi nu 120 gutuama, Yehowa wakhalele watombi gale tangua mvula Yakola mbayisendesa gunoga. Ivo yavula gungima, Yehowa wawambelele Nowa ha gutunga masuwa. Yajiya gukhala ivo 40 nga 50 gutuama egi mvula Yakola isendese gunoga, uvi Nowa walandudile gutunga masuwa. Ikhale athu atunyile gumutegelela, uvi muene walandudile gualongesa uu nu tangua Yehowa wazuelele egi tangua diagunginyisa shitu mu masuwa diatagana. Hataganele tangua, ‘Yehowa wakangele mufulo wa masuwa.’—Gis. 6:3; 7:1, 2, 16.

19. Gula tushigo mutshigina egi koko dietu dihuluguge, itshi tudi naye gulandula gutshita?

¹⁹ Gualeha ndo, Yehowa mbawusugisa mudimo wa gulongesa lukuma luabonga lua Ufumu; ‘mbawukanga mufulo’ gu ndaga jiagasue jiabola jia ha mavu awa a Satana. Mbawuhana mavu ahe-ahe gudi athu abonga. Gutuama egi ndaga jiene jize, tulandulenu gifezegeselo gia Nowa, Habakuka, nu athu ako anyi abembelego egi koko diawo dihuluguge. Tulandulenu gusha mudimo wa gulongesa ha fundo dia thomo, tukhalenu ahuiminyina, tukhalenu nji nu gutshigina guakola gudi Yehowa nu gu mafelela enji.