1. Emvitasio itshi Yesu ahanele alowi a jishui nguana? Itshi mala ene akalegele?

MULANDUDI Phetelo, Andele, Yakoba nu Yone akhalele mulowa jishui ha gusumbisa. Tangiza gale luholo adivuile tangua Yesu gawambelele egi: ‘Ngulandulenu, mbangumibuisa alowi a athu.’ * Itshi alandudi ene akalegele? Biblia idi muzuela egi: “Ene abembele mawanda awo gatshididi amulanduile.” (Mat. 4:18-22) Desizio diene diasombegesele monyo wawo mayilago. Ha fundo dia gukuata jishui, ene akhalele naye ‘gukuata athu nu monyo.’ (Luka 5:10) Mangino, Yesu udi mutamega athu a mitshima yatagana, ana zumba giamatshidia ha gukalagala mudimo wene. (Mat. 28:19, 20) Aye nji watshiginyile emvitasio ya Yesu ya gubua mulowi wa athu ba?

2. Mukunda natshi esue tudi naye guzula desizio dia gubua alowi a athu nu ndando? Ndaga itshi mbayitukuatesa ha guzula desizio diene?

² Yajiya gukhala egi walogugile gale Biblia sendese mualeha, henyaha udi naye guzula desizio gula wajiya gubua mulongeshi wa lukuma luabonga. Gula wana khala nu woma wa gutshigina emvitasio ya Yesu, ulebigo muila. Yajiya gukhala egi wana guvua woma handaga, wajiya gale gamba desizio yene idi nu ndando yavula. Biblia idi muzuela egi Phetelo nu mafut’enji abembele mawanda awo “gatshididi.” Uvi, Phetelo nu phangi’enji azudilego desizio diene mu phushi. Ajile gujiya nu gutshigina gamba Yesu udi Masiya gungima dia mbeji samano. (Yone 1:35-42) Luholo lumoshi, yajiya gukhala egi, aye nji walongugile gale ndaga  jiavula jiatadila Yehowa nu Yesu nu udi mutshigina gulandula gukula mu nyuma. Uvi udi naye gutangigiza muabonga gutuama dia guzula desizio diene. Itshi yakuatesele Phetelo, Andele nu athu ako ha guzula desizio?

3. Makalegelo atshi ajiya guguhana nzala ya gutshigina emvitasio ya Yesu?

³ Alandudi a thomo a Yesu, akhalele mujiya muabonga luholo lua gukalagala mudimo wawo, akhalele nu gikhesa nu akhalele gudihana gu mudimo. Makalegelo awa abonga aakuatesele ha gubua alongeshi awaha a lukuma luabonga. Longo edi diza gutumonesa luholo tuajiya gukudisa makalegelo awa ha gubua alongeshi abonga a lukuma luabonga.

4. Ndaga itshi yakhalele mutuma Phetelo ha gulowa jishui?

⁴ Phetelo wakhalele mulowa jishui ha gukuatesa fami yenji. Gulowa guakhalele nu ndando yavula gu meso enji. Idi mumonega egi Phetelo wakhalele muzumba muavula mudimo wenji wa gulowa. (Yone 21:3, 9-15) Wakhalele nji muzumba gukhala mulowi wa athu. Yehowa wakuatesele Phetelo ha gukalagala mudimo wene kiawaha.—Makal. 2:14, 41.

5. Ha gutadila Luka 5:8-11, mukunda natshi Phetelo wakhalele nu woma? Itshi yajiya gutukuatesa ha gubinga woma wa luholo elu?

⁵ Ndaga ya thomo yana gututuma ha gukalagala mudimo wa gulongesa idi, guzumba guetu mukunda nu Yehowa. Guzumba guene, guajiya gutukuatesa ha gulongesa athu ako ndaga jiamutadila ikhale tudi mutangiza egi tushigo atagana ha gutshita ndaga yene. Tangua Yesu watamegele Phetelo ha gubua mulowi wa athu, wamuwambelele egi: “Ukhadigo nu woma.” (Tanga Luka 5:8-11.) Phetelo avuilego woma wa ndaga yajiya gumubuila gula wabua mulandudi. Phetelo wadihudile luholo  Yesu aakuatesele ha gukuata jishui jiavula mu luholo lua gushimana, hene adivuile egi ashigo watagana ha gukalagala mudimo hamoshi nu Yesu. Aye nji wajiya guvua woma gifua phetelo, yajiya gukhala egi udi muvua woma mukunda nu ndaga mbawukalagala ha gubua mulandudi wa Klisto. Gula idi ngenyi, kolesa guzumba guaye gudi Yehowa, gudi Yesu nu gudi aphangi’aye. Ngenyi mbawukhala hehi ha gutshigina emvitasio ya Yesu ya gubua mulowi wa athu.—Mat. 22:37, 39; Yone 14:15.

6. Ndaga itshi iko yana gututuma ha gulongesa?

⁶ Tutadilenu ndaga jiko jiana gututuma ha gulongesa. Tudi naye gutumagela mukhuala owu wa Yesu udi muzuela egi: ‘Ndenu . . . mubuise athu alandudi.’ (Mat. 28:19, 20) Tuana gulongesa nji handaga athu adi ‘mumona lamba nu adi muwungagana’ nu adi nu funu ya gulonguga giamatshidia giatadila Ufumu. (Mat. 9:36) Yehowa wana tshigina egi athu a maluholo agasue ahete ujiyi wa giamatshidia nu ahuluge.—1 Tim. 2:4.

7. Ha gutadila Lomo 10:13-15, luholo lutshi mudimo wa gulongesa udi nu ndando?

⁷ Tudi naye gulongesa handaga tudi mujiya egi mudimo wene mbawuhuluisa athu. Alowi a jishui ana gukuata jishui ha gusumbisa nga ha gudia. Uvi esue tuana “gukuata” athu ha guahuluisa.—Tanga Lomo 10:13-15; 1 Tim. 4:16.

8-9. Ndaga itshi mulowi wa jishui adi naye gujiya nu mukunda natshi?

⁸ Mu masugu a Yesu, mulowi wa jishui wagasue wakhalele mujiya luholo lua jishui akhalele naye gukuata. (Levi. 11:9-12) Wakhalele naye nji gujiya khanda ajiya gukuata jishui jiene. Jishui jiana zumba gukhala khanda idi nu meya ana gujisuanguluisa, nu khanda idi nu ima ya gudia yavula. Tangua diana tomba mulowi wa jishui ha guya mulowa diakhala nu ndando ba? Ha gujiya gula tangua diene didi nu ndando, tutadilenu ndaga phangi mumoshi wana khala gu île du Pacifique, awambelele misionere mumoshi tangua amutamegele haguya mulowa. Misionere muene wamuwambelele egi: “Mbanguza guguzula hamene mu 9h.” Phangi muene wamuwambelele egi: “Ushigo mukotelesa ndaga udi muzuela. Tudi naye guya mu tangua diawaha ha gukuata jishui, uvi tuajiyelego guya mu tangua dinyi diatubongela esue.”

⁹ Luholo lumoshi nji, alandudi a Yesu a mu siekle ya thomo, anyi abuile “alowi” a athu, akhalele naye guya fundo didi athu nu mu tangua akhalele naye guasanga. Ha gufezegesa, alandudi a Yesu akhalele mulongesa mu tempelo, mu ba sinagoga, inzo nu inzo nu mu mafundo a mazondo (isalo). (Makal. 5:42; 17:17; 18:4) Esue nji, tudi naye gujidila nu makalegelo a athu a mu terituare yetu. Tudi naye gukhala hehi gusombegesa luholo luetu lua gulongesa hagula tujiye fundo nu tangua tuajiya guheta athu.—1 Kol. 9:19-23.

10. Ikadigilo itshi ulondegi wa Yehowa wana gutuhana?

¹⁰ Mulowi wa jishui wakhala nu funu ya ikadigilo yawaha, nu udi naye gujiya luholo lua guyikalegela. Esue nji tudi nu funu ya ikadigilo yawaha mukunda nu mudimo wetu. Tudi naye nji gujiya luholo lua guyikalegela. Yesu walongesele alandudi enji luholo lua gulowa athu. Waawambelele nji ndaga adi naye gukalagala, fundo adi naye gulongesa nu ndaga adi naye guzuela. (Mat. 10:5-7; Luka 10:1-11) Mangino, ulondegi wa Yehowa wana gutuhana Ikadigilo ya Gulongesela Biblia yana gutukuatesa ha gukalagala kiawaha mudimo wa gulongesa. * Yana gutulongesa luholo tuajiya gukadikila ikadigilo yene. Formasio yene yana gutukuatesa ha gukudisa luholo luetu lua gulongesa nu ha gubua alongeshi atagana.—2 Tim. 2:15.

11. Mukunda natshi alowi a athu adi naye gukhala nu gikhesa?

¹¹ Athu anyi ana lowa jishui ha gusumbisa, adi naye gukhala nu gikhesa (ngolo). Matangua ako ana tagana nu ndaga jia lamba mu muta. Matangua ako ana gukalagala mudimo mu phipha, nu ana tagana nu funji yakola mu muta. Alowi a athu adi naye nji gukhala nu gikhesa. Tangua tuana sendesa gulongesa nu guwambela athu ako gamba tudi Matemue a Yehowa, tuajiya gusagesewa mu fami, gushingiwa gudi mafuta, nga athu ako ajiya gutuna gututegelela. Malamba ene ajiya gukhala gifua funji yakola. Uvi tuajiyilego gudihula mukunda nu ndaga yene. Yesu wawambelele alandudi enji gamba, mbaaya mulongesa mukatshi dia mbalagaji jiawo.—Mat. 10:16.

12. Hagutadila Yoshua 1:7-9, ndaga itshi yajiya gutukuatesa ha gukolesa gikhesa?

¹² Luholo lutshi wajiya gukudisa gikhesa giaye? Thomo, khala nu gutshigina gamba ikhale Yesu udi mu dilu, muene udi mulandula gutuameza mudimo wa gulongesa. (Yone 16:33; Yat. 14:14-16) Ya mbadi, sha mutshima gu felela dia Yehowa diazuelele muene egi mbawugubamba. (Mat. 6:32-34) Gula wakolesa gutshigina guaye, mbawukhala nji nu gikhesa giavula. Phetelo nu mafut’enji amonesele gutshigina guakola; tangua abembele midimo yawo ha gulandula Yesu. Aye nji, wamonesele gutshigina guakola tangua wawambelele mafut’aye nu enya fami yaye gamba; wana gulonguga Biblia nu Matemue a Yehowa nu wana guya mu gudibungisa gua mu hungu! Idi yadiago egi wasombegesele makalegelo ako mu monyo waye ha  gulandula mikhuala yatagana ya Yehowa. Gutshita ngenyi guana gutoga gutshigina guakola nu gikhesa. Gula walandula gukudisa gikhesa giaye, jiya egi ‘Yehowa Nzambi waye mbawukhala n’aye fundo diagasue mbawuya’ —Tanga Yoshua 1:7-9.

13. Luholo lutshi gutangigiza nu gukombelela guajiya gugukuatesa ha gukolesa gikhesa giaye?

¹³ Luholo lutshi luko wajiya gukolesa gikhesa giaye? Kombelela Nzambi aguhane gikhesa. (Makal. 4:29, 31) Yehowa mbawuhana kueteya gu gukombela guaye, muene mbaagumbembigo. Wana khala hehi ha gugukuatesa tangua diagasue. Wajiya nji gutangigiza luholo Yehowa ahuluishile athu ako mu ginono. Tangigiza nji luholo agukuatesele ha gubinga malamba wataganele nawo, nu ngolo aguhanele ha gusombegesa makalegelo aye. Jiya gamba Nzambi munu wakuatesele akombeledi’enji ha guzawuga Kianga gia Benga, mbawugukuatesa nji ha gubua mulandudi wa Klisto. (Guz. 14:13) Wajiya nji gukhala nu gutshigina gudi Yehowa gifua muyimbi wa ngimbo yonu wazuelele gamba: ‘Yehowa udi nu ame, mbanguvuigo woma itshi muthu wajiya gungukalagala?’—Ngi. 118:6.

14. Longo ditshi wazula mu eksperianse ya phangi Masae nu Tomoyo?

¹⁴ Luholo luko tuajiya gukolesa gikhesa gietu ludi; gutangiza luholo Yehowa akuatesele enya sonyi ha guheta gikhesa. Tuzuelelenu gale eksperianse ya phangi wa mukhetu Masae. Wakhalele muenya sonyi nu wakhalele mutangiza egi gajiyilego gulongesa ha fundo dia athu avula. Wakhalele mutangiza gamba; guzuela nu ngenji guakhala guakola, guakhala gifua muthu udi mukanduga gibayi (gibindji) gialeha ginyi muene ajiyilego gukanduga. Wakalegele ngolo jiavula ha guzumba Nzambi muavula nu athu ako. Wakhalele mujiya gamba mudimo wa gulongesa ushigo luko nu tangua diavula hene atogele Yehowa ukuateshi ha gulongesa muavula. Wakatudile woma wenji, nu wasendesele mudimo wa muvundji wa njila wa tangua diagasue. Yehowa wajiya nji gukuatesa alongeshi ahe-ahe, hagukhala nu “gikhesa.” Tutadilenu eksperianse ya phangi wa mukhetu Tomoyo. Hakhalele mulongesa muene inzo nu inzo, mukhetu mumoshi wamuwambelele nu khabu gamba: “Nganago gutshigina guta maga nu Matemue a Yehowa” gungima wakangele gijidigo. Tomoyo avuilego woma uvi wawambelele phangi akhalele n’enji egi: “Wavui ndaga azuedi ba? Ngazuelelego nga gima, uvi muene wangujiyi egi ngudi Temue wa Yehowa. Ngudi nu gusuanguluga lume!” Mangino, Tomoyo udi muvundji wa njila wa tangua diagasue.

15. Gudihana gu mudimo guakotelesa itshi nu mukunda natshi gudi nu ndando gudi Aklisto?

¹⁵ Mulowi wa jishui wana gudihana muavula mu mudimo hagula akuate jishui. Gudihana gu mudimo, gudi mukotelesa ‘gukalagala ndaga muluholo jidi naye gukalegewa.’ Athu ana gukuata jishui ha gusumbisa, ana gukalagala ngolo ha guzuga mu gimenegena, ana kalagala mudimo uu nu gu gisugishilo nu ana kolesela ngatshima atagana nu malamba. Esue nji tudi naye gudihana gu mudimo gula tuatshigina gukolesela nu gumanesela mudimo wetu.—Mat. 10:22.

16. Itshi yajiya gutukuatesa ha gukalagala ndaga jiana gutukolela?

¹⁶ Tuanago guvualewa nu khadilo dia gudihana gu mudimo. Tuana zumba gukalagala ndaga mu luholo lualeba, matangua ako yana khala ndo yaleba ha gukalagala ndaga jia ndando yavula. Hene, tudi naye gudikanda. Tudi naye gukalagala ngolo ha gutshita ndaga jinyi tudi mumona egi jidi jiakola ha gutshita. Yehowa wana gutukuatesa mu njila ya nyuma yenji yawaha.—Gal. 5:22, 23.

17. Hagutadila 1 Kolinto 9:25-27, ndaga itshi Phaula azuelele egi tudi naye gukalagala ha gudihana mu mudimo?

 ¹⁷ Mupostolo Phaula wakhalele gudihana muavula gu mudimo. Uvi wazuelele egi, wakhalele “musagesa” muila wenji ha gukalagala ndaga jiawaha. (Tanga 1 Kolinto 9:25-27.) Wawambelele athu ako ha gudihana ha gukalagala mudimo, nu ha gukalagala ndaga jiagasue nu ‘ginemua nu muluholo luatagana.’ (1 Kol. 14:40) Tudi naye gukalagla ngolo ha gulandula gukombelela Yehowa, hagukalagala ngenyi tudi naye gulongesa nu gumuanga lukuma luabonga.—Makal. 2:46.

18. Ndaga itshi mbayituma Yehowa ha gutumona egi tuabingi?

¹⁸ Muthu wana gulowa jishui ha gusumbisa, wana suanguluga muavula gula wakuata jishui jiavula. Uvi mudimo wetu wa gulongesa wakhala wa gudisha. Guvula gua athu tuakuatesele ha gubua Matemue a Yehowa gushigo guene guana gumonesa gamba tuabingi nga ndo. (Luka 8:11-15) Yehowa mbawutumona gamba tuabingi, gula tualandula gumuanga lukuma luabonga, nu gukalagala mudimo wa gulongesa athu ako. Mukunda natshi tuazuela ngenyi? Handaga tuana landula gukalagala ndaga Yehowa nu mun’enji ana gututoga ha gukalagala.—Mako 13:10; Makal. 5:28, 29.

19-20. Mangino, ndaga itshi ya ndando yana gututuma ha gulongesa?

¹⁹ Mu ifutshi iko, athu anago gulowa jishui mbeji jiagasue. Mu ifutshi yene, alowi a jishui ana tangiza egi adi naye gukuata jishui jiavula gutuama egi sungi ya gulowa ibalege. Esue alowi a athu gudi nu ndaga ya ndando idi gututuma ha gulongesa. Ndaga yene idi egi: Gisugishilo gia mavu awa gia suena hehi! Tangua diasala diazonda dia gumuanga lukuma luabonga lua Yehowa luajiya guhuluisa athu. Ukhadigo munengena gamba ndaga jiagasue jia mu monyo waye jibonge, hagula ukalagale mudimo owu wa ndando wajiya guhuluisa athu.—Mulo. 11:4.

²⁰ Kudisa nzala yaye ya gulongesa, longuga Biblia muavula, kolesa gikhesa giaye nu khala gudihana gu mudimo. Kalagala mudimo hamoshi nu Matemue a Yehowa gubalega 8 milio adi mulongesa lukuma luabonga ha mavu agasue, ngenyi mbawuheta gusuanguluga gua Yehowa. (Neh. 8:10) Zula desizio dia gumuanga lukuma luabonga mangino uu nu tangua Yehowa mbaazuela egi guahui. Longo dialandula mbadizuelela maluholo thathu, ajiya gutukuatesa ha gukolesa desizio dietu dia gulandula gukalagala mudimo wa gulongesa, nu gumuanga lukuma luabonga lua Ufumu.