LONGO DIA 39
Gula Muthu Wana Zumba Wabemba Gukombelele Yehowa
‘Mahugo avula . . . amuhanele lamba gu mutshima.’—NGI. 78:40.
LUNGIMBO 102 “Venons en aide aux faibles”
NDAGA JIDI MU LONGO EDI *
1. Luholo lutshi muthu wajiya gudivua gula muenya fami yenji wabemba gukombelela Yehowa?
MUTHU wana zumba wazolewe gale mu hungu ba? Ndaga yene yajiya gugusagesa muavula! Phangi Hilda udi muzuela egi: “Mulumi’ami wakhalele wa gujinginyina gudi Yehowa, wafuile tangua tuataganesele ivo 41 mu ulo wetu. Ngatangijile egi lamba ngataganele nadio diabalega malamba agasue gukola. * Uvi tangua mun’ami wa yala wazolewe mu hungu, wambelele mukaji’enji nu an’enji, diakhalele lamba diakola gubalega malamba agasue ngatagenele nawo.”
Yehowa wana kotelesa luholo wana gudivua gula muthu wana zumba wabemba gumukombelela (Tala paragrafe 2-3) *
2-3. Ha gutadila Ngimbo 78:40, 41, luholo lutshi Yehowa wana gudivua tangua akombeledi enji ana gumutuna?
2 Tangiza gale ndaga eji: Yehowa wavuile gikenene giavula tangua anjelo ako akhalele mu fami yenji amutunyile. (Yuda 6) Wakhalele nji muvua gikenene tangua enya Isalele akhalele gumulumbugila mahugo avula. (Tanga Ngimbo 78:40, 41.) Wajiya diago gusha mutshima egi Sh’etu wa guzumba udi mu dilu wavuile nji gikenene tangua muenya fami yaye wamutunyile. Udi mujiya lamba udi mutagana nadio. Udi gugukotelesa muabonga nu mbawuguhana gikhesa udi nagio funu ha gulandula gukolesela.
3 Mu longo edi tuza mumona ndaga tuajiya gukalagala hagula Yehowa atukuatese gula muthu tuana zumba wazolewa mu hungu. Tuza nji mumona luholo tuajiya gukuatesa aphangi ako mu hungu gula atagana nu lamba dia luholo elu. Uvi tuzuelelenu gale thomo matangi abola tudi naye gutuna.
UKHADIGO MUTANGIZA EGI IDI GUBOLA GUAYE
4. Luholo lutshi mvuaji jiavula jiana gudivua gula mun’awo wabemba gukombelela Yehowa?
4 Mvuaji jiavula jiana tangiza egi idi gubola guawo gula mun’awo wa yala nga wa mukhetu wazolewa mu hungu. Ana tangiza egi nga akalegela yagasue ha gukuatesa mun’awo ha gusala mu giamatshidia. Phangi Luke wavuile nji ngenyi tangua mun’enji wa yala wazolewe mu hungu. Udi muzuela egi: “Ngakhalele mutangiza egi idi gubola guami. Ngakhalele nji mulota nzoji jiabola mukunda nu ndaga yene. Matangua ako ngakhalele muvua gikenene giakola mu mutshima, ngakhalele nji mudila.” Phangi Elizabeth wataganele nji nu ndaga ya luholo lumoshi. Udi muzuela egi: “Matangua ako ngakhalele gudihula egi, gudi nu ndaga iko a mama ako ana kalagala inyi ame ngakalegelego ba? Ngakhalele mutangiza egi ngakalegelego yagasue ha gulongesa mun’ami giamatshidia.”
5. Udi gubola gua nanyi gula muthu wabemba gukombelela Yehowa?
5 Tudi naye gujiya egi Yehowa watuhanele mukut’etu agasue luendu lua guditombela ndaga. Udi mukotelesa egi tuajiya gutomba gumutumagela nga ndo. Mavuala ako akhalelego nu mvuaji jiajiya guahana ifezegeselo yabonga, uvi azudile desizio dia gukombelela Yehowa nu ha gusala agujinginyina gudi muene. Mvuaji jiko jiana kalagala ngolo ha gulongesa an’awo ha guzumba Yehowa, uvi ana ene ana bemba gawo gukombelela Yehowa gula akula. Mukut’etu agasue tudi naye gutomba gula mbatukalegela Yehowa nga ndo. (Yosh. 24:15) Hene, enue mvuaji mudi gudisagesa handaga an’enu abembi gukombelela Yehowa, mukhadigo gudibela, mutangizago nji egi idi gubola guenu!
6. Luholo lutshi muvuala wajiya gudivua gula tata nga mama wenji wazolewa mu hungu?
6 Matangua ako, tata nga mama wajiya gubemba gukombela Yehowa nu gutuna fami yenji. (Ngi. 27:10) Ndaga eyi yajiya gukhala lamba gudi ana, handaga ana nemesa mvuaji jiawo nu ana landula gifezegeselo giawo. Phangi Esther wavuile gikenene tangua azolele sh’enji mu hungu. Udi muzuela egi: “Ngakhalelego mudila tangua diagasue handaga tata wabembele giamatshidia. Uvi handaga wazudile desizio egi mbaashigo mukombelela luko Yehowa nga hazonda. Ngana zumba tata muavula. Hene, ikhale tangua amuzolele mu hungu, ngakhalele gudisagesa muavula mukunda nu sante yenji. Ngakhalele muvua woma muavula diago.”
7. Luholo lutshi Yehowa wana gudivua mukunda nu mavuala anyi mvuaji jiawo jiazolewe mu hungu?
7 Mavuala, tudi nu gikenene giavula gula mvuaji jienu jiabembele gale gukombelela Yehowa! Jiyenu egi Yehowa yowu mujiya lamba mudi mutagana nadio. Wana gumizumba nu wana khala nu gusuanguluga luholo muana landula gusala ya gujinginyina gudi muene. Aphangi a mu hungu dienu ana khala nji nu gusuanguluga. Jiyenu egi ishigo gubola guenu gula mvuaji jienu jiazula desizio dia gubemba gukombelela Yehowa. Gifua luholo tuayimonyi guthunda, Yehowa wahanele muthu wagasue luendu lua gutomba gula mbawumukalegela nga ndo. Hene, muthu wagasue wadihanele gale gudi Yehowa nu wabatijiwe gale, udi naye ‘gudibatela ginemo gienji.’—Gal. 6:5.
8. Ndaga itshi enya fami ya muthu wazolewa mu hungu ajiya gukalagala ha adi munengenena egi muthu muene avutuge luko gudi Yehowa? (Tala galuanda “ Vutuga Gudi Yehowa.”)
8 Gula muthu wana zumba wazolewa mu hungu, wajiya gusha mutshima egi gudi nu lusugu mbaavutuga gudi Yehowa. Uvi luenyelu itshi wajiya gulandula gukalagala? Wajiya gulandula gukolesa gutshigina guaye. Gula watshita ngenyi, mbawuhana gifezegeselo giabonga gudi enya fami jiko nu gudi muthu wazolewa mu hungu. Mbawukolesela nji mu ndaga jia gikenene udi mutagana najio. Henyaha itshi wajiya gutshita ha gulandula gukolesa gutshigina guaye?
NDAGA JITSHI WAJIYA GUKALAGALA HA GUKOLESA GUTSHIGINA GUAYE?
9. Itshi wajiya gutshita ha gukolesa gutshigina guaye? (Tala galuanda “ Verse Jiajiya Guguhana Gikhesa Gula Muthu Wana Zumba Wabemba Gukombelela Yehowa.”)
9 Khala mukalagala yagasue ha gukolesa gutshigina guaye. Gutshita ngenyi gudi ndando hagula aye nu enya fami yaye mukhale nu gikhesa. Luholo lutshi wajiya guyikalagala? Khala mutanga Mbimbi ya Nzambi lusugu nu lusugu, khala nji mutangigiza ndaga jiene nu guya mu gudibungisa gua mu hungu. Gula watshita ngenyi, Yehowa mbawuguhana ngolo. Phangi Joanna wakhalele nu gikenene giavula tangua sh’enji nu phangi wa mukhetu abembele giamatshidia. Uvi udi muzuela egi: “Tangua ngana tanga lumene lua Abigayile, lua Ester, lua Yobo, lua Yozefe nu lua Yesu, ngana gudivua kiawaha, ngana khala ndo luko nu gikenene. Mene jiene jiana gunguhana gikhesa nu jiana gungukuatesa ha gukhala nu matangi abonga. Ngimbo jietu jiko jiana gunguhana nji gikhesa.”
10. Luholo lutshi mukanda wa Ngimbo 32:6-8 udi gutukuatesa ha gukolesela gula tudi muvua gikenene?
10 Khala muwambelela Yehowa ndaga jiagasue jidi gugusagesa. Khala nji gumukombela tangua diagasue udi muvua gikenene giavula. Toga Nzambi wetu wa guzumba ha gugukuatesa ha gutadila ndaga gifua luholo muene wana gujitadila nu ha ‘guguhana ndunge nu gugulongesa njila udi naye gulandula.’ (Tanga Ngimbo 32:6-8.) Yadiago, yajiya gukhala lamba ha guwambela Yehowa luholo udi gudivua. Uvi Yehowa yowu mujiya muabonga gikenene udi nagio gu mutshima. Wana guguzumba muavula nu udi gugutoga ha gumuwambela ndaga jiagasue udi najio mu mutshima.—Guz. 34:6; Ngi. 62:7, 8.
11. Ha gutadila Hebelu 12:11, mukunda natshi tudi naye gusha mutshima mu disipline Yehowa wana hana nu guzumba guagasue? (Tala galuanda “ Guzola Muthu mu Hungu Guana Monesa egi Yehowa Wana Gutuzumba.”)
11 Tshigina desizio dia akulu. Yehowa walondele ndaga hagula muthu wakalagala gubola guakoma azolewe mu hungu. Wana hana disipline nu guzumba guagasue ha gukuatesa muthu wabembi gumukombelela. Disipline diene diana khala nji mukunda nu gubonga gua athu agasue. (Tanga Hebelu 12:11.) Athu ako mu hungu ajiya guzuela egi desizio diazudi akulu ha guhana muthu wakagala gubola disipline dishigo diabonga. Uvi tubuitshigo mutshima egi athu ana zuela ndaga jia luholo elu ana tshigina ndo guzuela gubola muthu muene wakalagala. Esue nji tushigo mujiya ndaga jiagasue. Hene, tudi naye gushila akulu asophesa mulonga wene mutshima, handaga alandula malongo agasue a Biblia nu asophesa ‘mukunda nu Yehowa.’—2 Gudi. 19:6.
12. Mbuto jitshi aphangi ako ahetele luholo atshiginyile disipline dia Yehowa?
12 Gula watshigina desizio diazudi akulu ha guzola muthu wana zumba mu hungu, wajiya gumukuatesa ha guvutuga luko gudi Yehowa. Phangi Elizabeth tuazuelela gu thunda udi muzuela egi: “Yakhalelego yaleba ha gutuna guta maga nu mun’etu wa yala. Uvi tangua diavutugile muene gudi Yehowa, wazuelele egi akulu azudile desizio diabonga luholo amuzolele mu hungu. Gungima wazuelele egi gutshita ngenyi guamukuatesele ha gulonguga malongo avula. Ndaga yene yangukuatesele ha gukotelesa egi tangua diagasue Yehowa wana gutuhana disipline yakhala mukunda nu gubonga guetu.” Mulumi’enji Mark udi muzuela nji egi: “Gungima, mun’etu wa yala wanguwambelele egi, luholo tuakhalele mutuna gudibungisa nenji nga mu ndaga imoshi, guakhalele nji mukatshi dia ndaga jiamutumile ha guvutuga luko gudi Yehowa. Ngudi nu gusuanguluga luholo Yehowa watukuatesele ha gumutumagela.”
13. Itshi yajiya gugukuatesa ha gukolesela gula udi muvua gikenene?
13 Khala muta maga nu mafuta adi mukotelesa luholo udi gudivua. Khala nji mubalegesa tangua nu aphangi a gukula mu nyuma, ajiya gugukuatesa ha gukhala nu matangi abonga. (Ish. 12:25; 17:17) Phangi Joanna tuazuelela gu thunda udi muzuela egi: “Ngakhalele gudivua hakhami. Uvi guta maga nu mafut’ami a mutshima guangukuatesele muavula.” Henyaha itshi wajiya gukalagala gula athu ako mu hungu adi muzuela ndaga jidi gugusagesa?
14. Mukunda natshi tudi naye ‘gulandula gukanga mutshima mu ndaga jia athu ako nu guditotesela nu mutshima wagasue’?
14 Khala mumonesela aphangi a mu hungu khadilo dia guhuiminyina. Tushigo naye gudifelela egi athu agasue mbaazuela ndaga jiabonga mukunda nu esue. (Yak. 3:2) Mukut’etu agasue tushigo athu atagana. Hene, ushigo naye gudihula gula athu ako ashigo mujiya ndaga ya guguwambela nga ndo azuela ndaga idi gugusagesa ikhale ayizuelelego nu matangi abola. Wunguluga nji longo dia mupostolo Phaula, wazuelele egi: ‘Khalenu mukanga mutshima mu ndaga jia athu ako, khalenu nji guditotesela nu mutshima wagasue, ngatshima gudi nu muthu udi nu mulonga nu muthu muko.’ (Kol. 3:13) Phangi mumoshi wa mukhetu azolele muenya fami yenji mu hungu. Udi muzuela egi: “Yehowa wangukuatesele ha gutotesela aphangi ajile gunguhana gikhesa, ikhale ndaga azuelele jiangusagesela.” Ndaga itshi aphangi a mu hungu ajiya gukalagala ha gukuatesa enya fami ya muthu wazolewa mu hungu?
UKUATESHI WA APHANGI A MU HUNGU
15. Ndaga itshi tuajiya gukalagala ha gukuatesa enya fami ya muthu wazolewa mu hungu?
15 Kuata ufuta nu enya fami ya muthu wazolewa mu hungu, khala nji guamonesela gisemo. Phangi Miriam wakhalele muvua woma ha guya mu gudibungisa tangua azolele phangi’enji wa yala mu hungu. Udi muzuela egi: “Ngakhalele muvua woma mukunda nu ndaga athu ako ajiya guzuela. Uvi aphangi avula a mala nu a akhetu akhalele nji muvua gikenene mukunda nu ndaga yene. Avuilego khabu nga guzuela ndaga jiabola mukunda nu phangi’ami wazolewa mu hungu. Ngudi guahana mersi luholo angubembelego hakhami nu gikenene.” Phangi muko wa mukhetu udi muzuela egi: “Tangua azolele mun’etu wa yala mu hungu, mafut’etu atukuatesele. Ako akhalele gutuwambelela egi ashigo mujiya ndaga ya guzuela. Ako akhalele mudila nu ame, ako nji akhalele gungutumila mikanda ha gunguhana gikhesa. Ndaga akalegele yangukuatesa lume!”
16. Luholo lutshi aphangi a mu hungu ajiya gulandula gukuatesa enya fami ya muthu wazolewa mu hungu?
16 Khala mukuatesa enya fami ya muthu wazolewa mu hungu. Adi nu funu egi wamonesele guzumba nu waahane gikhesa muavula gubalega. (Heb. 10:24, 25) Matangua ako, enya fami ya muthu wazolewa mu hungu ana mona egi aphangi ako mu hungu anago guazuelesa gifua ene enji azolewa mu hungu. Tushigo naye gukalagala ndaga jiajiya gutuma aphangi awa ha gudivua ngenyi! Tudi naye gushimana mavuala anyi mvuaji jiawo jiabembele gale gukombelela Yehowa, tudi naye nji guahana gikhesa. Mulumi’a phangi Maria wazolewe mu hungu, gungima watunyile fami yenji. Phangi Maria muzuela egi: “Mafut’ami ako akhalele muza gumbo diami ha gututelegela ima ya gudia, akhalele nji gungukuatesa ha gulonguga Biblia nu an’ami. Akhalele mukotelesa luholo ngakhalele gudivua, akhalele nji mudila nu ame. Akhalele gungunginyila tangua athu akhalele muzuela ndaga jia mambo mukunda nu ame. Angukuatesele diago ha guheta gikhesa!”—Lomo 12:13, 15.
Aphangi a mu hungu ajiya gukuatesa enya fami ya muthu wazolewa mu hungu nu guzumba guagasue (Tala paragrafe 17) *
17. Itshi akulu adi naye gukalagala ha guhana imeme idi nu gikenene gikhesa?
17 Akulu, kalegelenu ba okazio agasue ha gukolesa enya fami ya muthu wazolewa mu hungu. Mudi nu ginemo gia ndando gia gukuatesa enya fami ya muthu wabembele gale giamatshidia. (1 Tes. 5:14) Khalenu muta nawo maga gutuama nu gungima dia gudibungisa. Khalenu muya guatala gumbo diawo nu gukombelela nawo hamoshi. Khalenu mulongesa nawo hamoshi nga guatamega mu gukombelela guenu gua mu fami. Akulu adi naye gudisagesa mukunda nu imeme ya Yehowa idi nu gikenene. Adi naye nji gudihaga ha fundo diawo nu guazumba.—1 Tes. 2:7, 8.
UTOTESAGO FELELA DIAYE, LANDULA NJI GUSHILA YEHOWA MUTSHIMA
18. Ha gutadila 2 Phetelo 3:9, ndaga itshi Nzambi wana tshigina egi athu abembele gale gumukombelela atshite?
18 Yehowa ‘gana tshiginago egi nga muthu mumoshi afue, uvi wana tshigina egi athu agasue abalumune mutshima.’ (Tanga 2 Phetelo 3:9.) Muthu wajiya gutshita gubola guakoma, uvi monyo wenji wakhala nu ndando gu meso a Nzambi. Tangiza gale, Yehowa wafutshile ndando yakola ha gutukula gu gubola tangua diahanele muene monyo wa Mun’enji wa guzumba mukunda nu esue. Yehowa udi mutshigina gukuatesa athu abembele gale gumukombela nu guzumba guagasue ha guvutuga luko gudi muene. Udi musha mutshima egi mbaadimuvutuga luko gudi muene, gifua luholo Yesu wayizuelele mu gifezegeselo gia mona watotele. (Luka 15:11-32) Athu avula abembele giamatshidia, gungima avutugile luko gudi Tata wawo wa guzumba udi mu dilu. Aphangi a mu hungu a ayambele nu gusuanguluga guagasue. Phangi Elizabeth tuazuelela gu thunda wakhalele nu gusuanguluga guavula tangua mun’enji wa yala wavutugile mu hungu. Udi muzuelela egi: “Ngudi nu gusuanguluga luholo aphangi avula atukuatesele hagula tutotesago felela dietu.”
19. Mukunda natshi tudi naye gulandula gushila Yehowa mutshima?
19 Tuajiya gushila Yehowa mutshima tangua diagasue. Malongo enji ana khala tangua diagasue mukunda nu gubonga guetu. Udi Tata wa khenda nu wana khala nu khadilo dia guhana. Wana zumba muavula athu agasue ana gumuzumba nu ana gumukombelela. Khala musha mutshima egi Yehowa ajiyilego gugubemba mu tangua dia lamba. (Heb. 13:5, 6) Phangi Mark tuazuelela gu thunda udi muzuela egi: “Yehowa watumbelego. Wana khalago gualeha nu esue tangua tuana tagana nu malamba.” Yehowa mbawulandula guguhana ‘ngolo jiabalega ngolo jia athu.’ (2 Kol. 4:7) Hene, wajiya gulandula gukolesa gutshigina guaye nu felela diaye, ikhale muthu wana zumba wabemba gukombelela Yehowa.
LUNGIMBO 44 Prière du petit
^ par. 5 Tuana guvua diago gikenene gula muthu tuana zumba wabemba gukombelela Yehowa! Mu longo edi tuza mumona luholo Nzambi wetu wana gudivua gula ndaga ya luholo elu yakalegewa. Tuza nji gumona ndaga enya fami ya muthu wazolewa mu hungu ajiya gukalagala ha guheta gikhesa nu ha gukolesa gutshigina guawo. Tuza nji mutadila luholo aphangi agasue a mu hungu ajiya guakuatesa.
^ par. 1 Mu longo edi majina ako asombegesewa.
