1. Felela ditshi aphangi a gukola ajiya gudishila?

GULA tuakola, tuajiya guvua woma egi mbatushigo mukhala luko nu ndando gu meso a Yehowa. Yajiya gukhala egi mangino tushigo nu ngolo jiavula gifua luholo tuakhalele mavuala, uvi tuajiya gukalegela ndunge tudi najio nu ba eksperianse etu ha gukuatesa mavuala ha gukalagala muabonga mudimo wa Yehowa nu ha guheta inemo yavula. Mukulu mumoshi wazuelele egi: “Ngakhalele mujiya egi ngajiyilego luko gukalagala mudimo muavula handaga ngakola. Uvi ngakhalele nu gusuanguluga handaga ngakhalele mujiya egi tuakhalele nu mavuala a mala akhalele atagana ha gukalagala mudimo.”

2. Itshi tuza mulonguga mu longo edi?

² Mu longo diabalega tuamonele egi, mavuala ana longuga ndaga jiavula gula akuata ufuta nu aphangi agukola. Uvi mu longo edi tuza gumona luholo khadilo dia gudibulumuisa, dia guhana mersi nu khadilo dia guhana diajiya gukuatesa aphangi a gukola ha gukalagala mudimo hamoshi nu mavuala. Gutshita ngenyi mbagukuatesa aphangi agasue mu hungu.

3. Ha gutadila Filiphi 2:3, 4, khadilo dia gudibulumuisa didi itshi? Luholo lutshi diajiya gukuatesa Muklisto?

³ Aphangi a gukola adi naye gukhala nu khadilo dia gudibulumuisa gula adi mutshigina guakuatesa mavuala. Muthu udi nu khadilo dia gudibulumuisa wana mona egi athu ako amubalega. (Tanga Filiphi 2:3, 4.) Aphangi agukola adi nu khadilo dia gudibulumuisa, ana tshigina egi gudi nu maluholo avula a gukalagala ndaga mu gudivua nu malongo a Biblia. Hene  ana kamba ndo egi ndaga yagasue itshitshiwe gifua luholo akhalele guyikalagala tangua akhalele mavuala. (Mulo. 7:10) Ha gukuatesa mavuala, aphangi agukola ajiya guatela ba eksperianse awo. Uvi adi naye gujiya egi ‘milonga ya ha mavu awa idi musombegesa’, ene nji adi naye gulonguga ndaga jihe-jihe.—1 Kol. 7:31.

4. Luholo lutshi atadi awendji ana monesa khadilo dia luholo lumoshi nu enya Levi?

⁴ Aphangi agukola adi nu khadilo dia gudibulumuisa, ana jiya egi ajiyilego luko gukalagala muavula gifua tangua akhalele mavuala. Tutadilenu gifezegeselo gia atadi awendji. Tangua ana tagenesa ivo 70 ana guatoga ha gukalagala midimo iko. Uvi ishigo ndaga yaleba, handaga aphangi ene akhalele musuanguluga nu mudimo wawo wa gukuatesa aphangi. Ana zumba mudimo wawo muavula, anatshigina nji gudihana luko muavula mu mudimo wene. Uvi ana kotelesa egi mavuala adi nu ngolo jia gukalagala mudimo wene. Aphangi ene ana monesa khadilo dia luholo lumoshi nu enya Levi a gu Isalele ikulu. Tangua enya Levi akhalele mutagenesa ivo 50, akhalele mubemba gukalagala mudimo gu inzo ya tenta. Akhalele nu gusuanguluga ha gukalagala midimo yagasue akhalele guahana. Akhalele gudihana muavula mu midimo yene, akhalele nji mukuatesa mavuala ha gutagenesa inemo yawo. (Lutang. 8:25, 26) Mangino, gula atadi awendji atagenesa ivo 70 ana bemba gukalagala mudimo wene, uvi ana guatuma mu hungu dimoshi ha gukuatesa aphangi.

5. Malongo atshi wazula mu gifezegeselo gia phangi Dan nu mukaji’enji Katie?

 ⁵ Tutadilenu gifezegeselo gia phangi Dan, wakalegele ivo 23 mu mudimo wa mutadi muwendji. Hatagenesele muene ivo 70, asendesele gukalagala mudimo wa gipionye spesiale nu mukaji’enji Katie. Luholo lutshi ana kalagalagala mudimo wawo? Phangi Dan udi muzuela egi henyaha wakhala nu ndaga jiavula jia gukalagala! Wana tagenesa inemo yenji mu hungu, wana kuatesa aphangi a mala ha gutagenesa ndaga jiana togewa ha gubua akuateshi a mudimo. Wana hana nji aphangi formasio ha gulongesa mu mafundo a athu avula nu mu mabologo. Hene aphangi a gukola ikhale mudi mu mudimo wa tangua diagasue nga ndo, muajiya gukalagala ndaga jiavula ha gukuatesa aphangi ako. Luholo lutshi? Tshitenu yagasue ha gujidila nu usombegeshi muakalagala, dihagelenu mafelela ahe-ahe, khalenu mutangiza phamba ndaga jinyi muajiya gukalagala.

6. Mukunda natshi khadilo dia gudibulumuisa didi nu ndando? Hana gifezegeselo.

⁶ Muthu wana khala nu khadilo dia gudibulumuisa wana jiya egi gudi nu ndaga jinyi ajiyilego gukalagala. (Ish. 11:2) Wana kamba ndo nji gukalagala ndaga jinyi jia mubalega ngolo. Gutshita ngenyi guana gumukuatesa ha gukhala nu gusuanguluga nu ha gulandula gukalagala mudimo muavula. Tuajiya gufuanesa muthu wa gudibulumuisa nu muthu udi muwendesa velo. Gula waheta ha pont ya mitshi wana tuluga holu dia velo hagula azawuge muta. Ikhale udi muzawuga mage-mage, uvi wana mulandula guya gutuama. Luholo lumoshi nji muthu udi nu khadilo dia gudibulumuisa, wana jiya tangua dia ‘gusombegesa nu dia guya mage-mage,’ ha gula alandule gukombelela Yehowa nu alandule gukuatesa athu ako.—Fili. 4:5.

7. Luholo lutshi Barzilayi wamonesele khadilo dia gudibulumuisa?

⁷ Tutadilenu gifezegeselo gia Barzilayi, wakhalele nu ivo 80 tangua fumu Davidi wa mutamegele ha gukhala gumbo dienji. Uvi Barzilayi watunyile nu gudibulumuisa guagasue handaga wakhalele mujiya egi luholo adi muthu wa gukola gudi nu ndaga jiko ajiyilego gukalagala. Hene atogele Davidi ha guzula Kimehame ha fundo dienji handaga wakhalele muvuala. (2 Sam. 19:35-37) Luholo lumoshi nu Barzilayi, a phangi a mala a gukola ana khala nu gusuanguluga ha gubembela mavuala midimo ya gukalagala.

8. Luholo lutshi Davidi wamonesele khadilo dia gudibulumuisa tangua diatshiginyile muene gutunga tempelo?

⁸ Fumu Davidi udi nji gifezegeselo giabonga mu ndaga yatadila gudibulumuisa. Wakhalele mutshigina gutungila Yehowa inzo nu mutshima wenji wagasue. Uvi tangua Yehowa wa muwambelele egi Solomo mbawukalagala mudimo wene, Davidi watshiginyile desizio dia Yehowa, wakalegele nji yagasue ha gukuatesa mudimo wa gutunga tempelo. (1 Gudi. 17:4; 22:5) Davidi watangijilego egi phamba muene udi watagana ha gutunga tempelo handaga Solomo udi ‘muvuala nu ashigo mujiya ndaga jiavula.’ (1 Gudi. 29:1) Wakhalele mujiya egi tempelo mbayitungiwa mu ukuateshi wa Yehowa, uvi ishigo ha gutadila gindongo nga eksperianse ya athu adi mukalagala mudimo wene. Luholo lumoshi nu Davidi, aphangi a gukola ana landula gukalegela Yehowa muavula tangua midimo yawo yana sombegesa. Ana jiya nji egi Yehowa mbawukuatesa mavuala adi mukalagala mudimo ene akhalele mukalagala thomo.

9. Luholo lutshi phangi mumoshi wana kalagala mudimo gu Komite ya Filiale wamonesele khadilo dia gudibulumuisa?

⁹ Tutadilenu gifezegeselo gia gudibulumuisa gia phangi Shigeo. Tangua diakhalele  muene nu ivo 30 mu 1976, amutombele ha gukalagala mudimo gu Komite ya Filiale imoshi. Mu 2004 wabuile mutuameji wa Komite yene. Gungima wakotelesele egi wakhalelego luko nu ngolo jia gutagenesa ginemo gienji. Wakombelele Yehowa mukunda nu ndaga yene, watangijile nji egi idi ndaga yabonga gula phangi muko wa muvuala wabua mutuameji wa Komite ha fundo dienji. Mangino phangi Shigeo gashigo luko mutuameji wa Komite, uvi yowu genji mulandula gukalagala mudimo gu Komite ya Filiale yawo. Gifezegeselo gia Barzilayi, gia Fumu David nu gia phangi Shigeo idi gutumonesa egi muthu udi khadilo dia gudibulumuisa, ana tadila ndo phamba ndaga mavuala adi naye gulonguga, uvi wana tadila nji ndaga mavuala ajiya gale gukalagala. Ngenyi mbatendigo nawo midimo, uvi mbawatadila gifua mafuta a mudimo.—Ish. 20:29.

10. Luholo lutshi aphangi agukola adi naye gutadila mavuala mu hungu?

¹⁰ Aphangi agukola ana tadila mavuala gifua kado ya ahanele Yehowa, ana guahana nji mersi mukunda nu ndaga ana kalagala. Luholo aphangi ene ashigo luko nu ngolo jiavula, ana suanguluga muavula tangua ana mona mavuala mudihana ha gukalagala midimo ya mu hungu.

11. Luholo lutshi mukanda wa Luta 4:13-16 udi mumonesa gusuanguluga aphangi agukola ajiya guheta gula adi mutshigina ukuateshi wa mavuala?

¹¹ Tutadile gifezegeselo gia Naomi gidi mu Biblia. Wakhalele mukhetu wa gukola uvi watshiginyile ukuateshi wa muvuala mumoshi nu gusuanguluga guagasue. Tangua mun’ enji wa yala wafuile, Naomi wawambelele giwaji gienji Luta ha guvutuga gumbo diawo. Uvi tangua Luta wamububidile ha  guvutuga nenji gu Betelehema, Naomi wakhalele nu gusuanguluga nu watshiginyile ukuateshi wenji. (Luta 1:7, 8, 18) Yadiago, akhetu ene mbadi ahetele gusuanguluga! (Tanga Luta 4:13-16.) Khadilo dia gudibulumuisa mbadikuatesa aphangi agukola ha gulandula gifezegeselo gia Naomi.

12. Luholo lutshi mupostolo Phaula wamonesele egi wakhalele nu khadilo dia guhana mersi?

¹² Mupostolo Phaula wakhalele nu gusuanguluga guavula luholo aphangi amukuatesele. Ha gufezegesa, wahanele Aklisto a gu Filiphi mersi mukunda nu ima amutumidile. (Fili. 4:16) Wahanele nji Timote mersi avula mukunda nu ukuateshi wenji. (Fili. 2:19-22) Phaula wahanele nji Nzambi mersi mukunda nu aphangi ajile gumukuatesa tangua diakhalele muene muya mu bologo gu Roma. (Makal. 28:15) Phaula wakhalele nu ngolo jiavula, wakalegele nji ba vuayaje mu mafundo avula ha gulongesa lukuma luabonga nu ha gukolesa mahungu. Uvi wakhalele nu khadilo dia gudibulumuisa nu watshiginyile nji ukuateshi wa aphangi.

13. Ndaga tshi aphangi agukola ajiya gukalagala ha gumonesa egi ana hana mavuala mersi?

¹³ Aphangi a gukola, muajiya gumonesa mu maluholo avula egi muana hana mavuala a muhungu dienu mersi. Ha gufezegesa, gula adi mutshigina gumikuatesa ha gumisumbila ima, nga gumikuatesa nu ima iko mudi nayo funu, mudi naye gutshigina ukuateshi wawo nu gusuanguluga guagasue. Jiyenu egi ukuateshi wawo udi mukatshi dia ndaga jiana monesa egi Yehowa wana gumizumba. Muajiya nji gukuata nawo ufuta wakola. Khalenu guakuatesa ha gukula mu nyuma. Khalenu nji guawembela egi muana suanguluga muavula tangua ana gudihana muavula mu midimo ya mu hungu. Khalenu mubalegesa nawo tangua hamoshi nu guawambela ba eksperianse muataganele nawo mu monyo wenu. Gula muatshita ngenyi ‘mbamumonesa egi muana hana Yehowa mersi tangua diagasue’ mu luholo wananele mavuala mu hungu.—Kol. 3:15; Yone 6:44; 1 Tes. 5:18.

14. Luholo lutshi Fumu Davidi wamonesele khadilo dia guhana?

¹⁴ Fumu Davidi wamonesele khadilo dimoshi dia ndando dinyi aphangi a gukola adi naye gulandula. Khadilo diene didi khadilo dia guhana. Wahanele makuta avula nu ima iko ha gukuatesa mu mudimo wa gutunga tempelo. (1 Gudi 22:11-16; 29:3, 4) Davidi wakalegele ndaga eji jiagasue, ikhale wakhalele mujiya egi tempelo mbaditamegewa mu jina dia mun’enji Solomo. Gula tushigo luko nu ngolo ha gudihana muavula mu mudimo wa gutunga, tuajiya guhana misomonyi ha gutadila uhetelo wetu ha gukuatesa mudimo wene. Tuajiya nji gukuatesa mavuala gula tudi guawambela ba eskperianse tuahetele mu mudimo wa Yehowa.

15. Ndaga tshi jia ndando mupostolo Phaula wahanele Timote?

¹⁵ Mukunda nu khadilo dia guhana, tutadilenu gifezegeselo gia mupostolo Phaula. Wamonesele khadilo dia guhana tangua diatamegele muene Timote ha guya nenji mu mudimo wa gimisionere nu luholo wamulongesele ba metode enji a gulongesa nu a gumuanga lukuma luabonga. (Makal. 16:1-3) Formasio yahanele Phaula gudi Timote ya mukuatesele ha gukhala mulongeshi wabonga. (1 Kol. 4:17) Gungima, Timote wakalegele ba metode ene ha guhana athu ako formasio.

16. Mukunda natshi phangi Shigeo wana hana aphangi ako formasio?

¹⁶ Aphangi a gukola ashigo naye guvua woma egi gula ahana mavuala formasio ha gukalagala mudimo akhalele mukalagala mu hungu mbashigo luko mukhala nu ndando.  Ha gufezegesa, phangi Shigeo tuazuelela guthunda, wakhalele muhana mavuala akhalele mukalagala gu Komite ya Filiale formasio. Wakhalele mutshita ngenyi ha gukuatesa mu mudimo wa Ufumu mu gifutshi giakhalele muene mujinga. Gutshita ngenyi guamukuatesele diago, handaga tangua akhalelego luko nu ngolo phangi muko wa muvuala wabuile mutuameji wa Komite ya Filiale ha fundo dienji. Phangi Shigeo wana kalagala mudimo gu Komite ya Filiale ivo 45 yabalega gale. Wana landula nji gukalegela ndaga alongugile ha gukuatesa mavuala a mala. Yadiago aphangi a gukola anyi adi gifua phangi Shigeo ana kuatesa diago akombeledi a Nzambi!

17. Ha gutadila Luka 6:38, tshi aphangi agukola ajiya guhana athu ako?

¹⁷ Aphangi a mala nu akhetu agukola muana monesa mu makalegelo enu egi, gusala ya gujinginyina gudi Yehowa nu gukhala nu gutshigina guakola gudi muene, idi ndaga ya gubalega ndando mu monyo wenu. Ifezegeselo yenu yana gutumonesa nji egi gulonguga malongo a Biblia nu guakalegela idi ndaga ya gubalega ndando mu monyo wetu. Mudi mujiya muabonga luholo ndaga jiakhalele mukalegewa mu masugu abalega, uvi muana kalagala usombegeshi ha gutadila ndaga mudi mutagana najio. Aphangi a gukola muakatuga gubatijiwa, muajiya nji gukuatesa athu ako mu maluholo avula. Muajiya guawambela luholo gujiya Yehowa guamikuatesele ha gukhala nu gusuanguluga mu monyo wenu. Mavuala mbakhala nu gusuanguluga ha gutegelela ba eksperianse enu nu malongo muazudile. Gula mudi mukalegela malongo mualongugile mu ba eksperianse enu ha guhana aphangi ako formasio mbamumonesa egi mudi nu ‘khadilo dia guhana.’ Ngenyi Yehowa mbawumihana nji ima yavula.—Tanga Luka 6:38.

18. Luholo tshi aphangi a gukola nu mavuala ajiya gudikolesa?

¹⁸ Aphangi a gukola jiyenu egi, tangua muana kuata ufuta nu mavuala muana gudikolesa diago. (Lomo 1:12) Muthu wagasue mukatshi dienu udi nu ndaga imoshi ya ndando. Ha gufezegesa aphangi a gukola adi nu ndunge nu ba eksperianse avula ahetele mu monyo wawo. Uvi mavuala ana khala nu ngolo. Tangua mavuala nu aphangi a gukola ana kalagala hamoshi, ana suanguluisa Sh’etu wa guzumba udi mu dilu nu ana kuatesa aphangi agasue mu hungu.