1. Luholo tshi tuajiya gutamega Yehowa?

MUKATSHI dia fami ya akombeledi a Yehowa tudi nu Yesu, udi ‘somi ya ima yagasue yafugiwe’ nu anjelo avula. (Kol. 1:15; Ngi. 103:20) Tangua diakhalele Yesu ha mavu, wakuatesele athu ha gukotelesa egi ajiya gutamega Yehowa egi Sh’awo. Tangua akhalele muta maga nu alandudi enji, watamegele Yehowa egi ‘Sh’ami yago udi nji Sh’enu.’ (Yone 20:17) Tangua tuana gudihana gudi Yehowa nu tuana batijiwa, tuana ngina mu fami ya guzumba ya aphangi’a mala nu a akhetu.—Mako 10:29, 30.

2. Itshi tuza mulonguga mu longo edi?

² Yana khala lamba mukunda nu athu ako ha gumona egi Yehowa udi Sh’awo. Yajiya gukhala egi athu ako anajiya ndo luholo lua gumonesela aphangi’etu a mala nu a akhetu guzumba. Mu longo edi, tuza mumona luholo Yesu udi gutukuatesa ha guzula Yehowa egi udi Sh’etu wa guzumba. Ngenyi, tuajiya gukuata n’enji ufuta. Tuza mumona nji luholo tuajiya gulandula khadilo dia Yehowa nu luholo tuajiya gukalegela aphangi’etu a mala nu a akhetu ndaga.

3. Luholo tshi gisambu gia gifezegeselo giana kolesa ufuta wetu nu Yehowa?

³ Yehowa udi Tata wa guzumba. Yesu wana tshigina egi tukhale mutadila Yehowa gifua luholo muene wana gumutadila. Wana gumuzula egi udi mvuaji wa guzumba, tuajiya nji guta n’enji maga tangua diagasue tuatshigina. Tudi mukotelesa ndaga yene mu gisambu Yesu walongesele alandudi enji. Wasendesele gisambu gia gifezegeselo nu mbimbi eji: ‘Tata wetu.’ (Mat. 6:9) Yesu wakhalele naye nji gutuwambela ha gutamega Yehowa egi “Nzambi wa ngolo jiagasue,” “Mufugi,” nga “Fumu wa ivo nu ivo.” Gukalegela ba titre awa ha gutamega Yehowa ishigo ndaga yabola, handaga Biblia yana guakalegela nji ha gutamega Yehowa. (Gis. 49:25; Yesh. 40:28; 1 Tim. 1:17) Uvi watuwambelele ha gumutamega egi “Tata.”

4. Luholo tshi tudi mujiya egi Yehowa udi mutshigina tukuate nenji ufuta?

 ⁴ Yana khala lamba gudi aye ha gumona egi Yehowa udi tata wa guzumba? Athu ako mukatshi dietu ana mona nji ngenyi. Yajiya gukhala lamba ha gumona egi Yehowa udi tata wa guzumba gula mvuaji jietu jiakhalelego gutukalegela ndaga nu gisemo. Uvi tulebigo muila, handaga Yehowa wana kotelesa muabonga diago luholo tuana gudivua! Udi mutshigina gukhala futa dietu. Gishina giene Mbimbi yenji idi gutuwambela egi: ‘Suenenu hehi nu Nzambi, muene mbawusuena hehi nu enue.’ (Yak. 4:8) Yehowa wana gutuzumba nu udi gutuwambela egi mbawukhala Tata wa gubalega gubonga mukunda nu esue.

5. Ha gutadila Luka 10:22, luholo tshi Yesu wajiya gutukuatesa ha gukuata ufuta nu Yehowa?

⁵ Yesu wajiya gutukuatesa ha gukuata ufuta nu Yehowa. Udi mujiya Yehowa muabonga nu wana landula makalegelo enji mu luholo luatagana. Gishina giene wazuelele egi: ‘Muthu wa ngumona ame, wamona nji Tata.’ (Yone 14:9) Gifua luholo mbuta wana kalagala, Yesu udi gutulongesa luholo tuajiya gunemesa nu gutumagela Sh’etu nu luholo tudi naye gutuna ndaga jidi gumuhana gikenene hagula atutshigine. Uvi Yesu muene hakhenji watukuatesele ha gukotelesa egi, Yehowa udi Nzambi wa guzumba nu wana khala nu khadilo dia gisemo. (Tanga Luka 10:22.) Tutadilenu ndambo ya Ifezegeselo.

6. Hana ifezegeselo idi mumonesa egi Yehowa wategelele isambu ya Yesu.

⁶ Yehowa wana tegelela isambu ya an’enji. Tutadilenu luholo Yehowa wategelele isambu ya mun’enji wa somi. Yehowa wategelele isambu ya mun’enji tangua akhalele ha mavu. (Luka 5:16) Wategelele gisambu gia Yesu tangua diakhalele muene mutshigina guzula desizio dia ndando dia gutomba apostolo enji 12. (Luka 6:12, 13) Yehowa wategelele nji gisambu gia Yesu tangua diakhalele muene nu gikenene. Gutuama egi Yudasa amudige, Yesu wakombelele Sh’enji mukunda nu ndaga jiakhalele naye gumubuila gungima. Yehowa wavile isambu ya Yesu nu watumile muanjelo ha guhana mun’enji wa guzumba gikhesa.—Luka 22:41-44.

7. Luholo tshi tudi mujiya egi Yehowa wana hana mvutu gu isambu yetu?

 ⁷ Mangino Yehowa wana tegelela isambu ya akombeledi enji nu wana hana mvutu mu tangua diatagana nu mu luholo luabonga. (Ngi. 116:1, 2) Tutadilenu gifezegeselo gia phangi mumoshi wa mukhetu gu Inde. Wakhalele gudisagesa muavula mu matangi nu wakombelele Yehowa ha gumukuatesa mukunda nu mulonga wene. Wasonegele egi: “Emisio ya JW Télédifusion ya Mai 2019, yakhalele muzuelela ndaga wajiya gukalagala gula udi gudisagesa mu matangi, ya ngukuatesele diago. Yakhalele diago mvutu gu isambu yami.”

8. Mu maluholo atshi Yehowa wamonesele egi wana zumba Yesu?

⁸ Yehowa wana gutuzumba nu wana gutukuatesa gifua luholo lua zumbile muene Yesu nu wamukuatesele tangua akhalele ha mavu. (Yone 5:20) Wakuatesele Yesu ha gukolesa gutshigina guenji, wamuhanele gikhesa tangua dialebele muene muila nu wamuhanele ima yakhalele nayo funu ha gukhala nu monyo. Yehowa wawambelele nji Yesu egi wana gumuzumba muavula nu wana gumusuanguluisa. (Mat. 3:16, 17) Yesu wakhalele mujiya egi Sh’enji wa guzumba udi mu dilu mbawukhala n’enji tangua diagasue nu mbawumukuatesa. Hene gakhalelego gudivua hakhenji.—Yone 8:16.

9. Ndaga tshi jidi gututshiginyisa egi Yehowa wana gutuzumba?

⁹ Gifua Yesu, mukut’etu agasue tuamonele gale nji guzumba gua Yehowa mu maluholo avula. Tangiza gale: Yehowa watshiginyile egi tukhala mafut’enji, watuhanele aphangi avula ana gutuzumba, ana gutusuanguluisa nu ana gutuhana gikhesa gula tualeba muila. (Yone 6:44) Wana gutuhana nji ima yagasue tudi nayo funu ha gulandula gukolesa gutshigina guetu. Wana gutukuatesa nji ha guheta ima tuana khala nayo funu lusugu nu lusugu ha gukhala nu monyo. (Mat. 6:31, 32) Gula tudi mutangiza luholo Yehowa wana gutumonesela guzumba, mbatumuzumba nji muavula.

10. Luholo Yehowa wana kalegela aphangi’etu a mala nu a akhetu ndaga idi gutulongesa itshi?

¹⁰ Yehowa wana zumba aphangi’etu a mala nu a akhetu. Uvi yajiya gukhala egi ishigo yaleba gudi esue ha guazumba nga ha guamonesela guzumba. Matangua ako yajiya gukhala lamba handaga tuakatuga mu ifutshi ya gudisha, tuakudilego fundo dimoshi nga mukunda nu ndaga tuataganele najio. Mukut’etu agasue tuana jimbila, tuajiya gukalagala ndaga jiajiya guhana athu ako khabu nga guasagesa. Uvi tuajiya gukalagala ngolo ha guzumba aphangi’etu. Luholo tshi? Gula tudi mulandula khadilo dia Sh’etu dia guzumba aphangi’etu. (Ef. 5:1, 2; 1 Yone 4:19) Tutadilenu malongo tuajiya guzula mu gifezegeselo gia Yehowa.

11. Luholo tshi Yesu walanduile khadilo dia Yehowa dia guvila athu ‘khenda jiavula’?

¹¹ Yehowa wana gutuvila ‘khenda jienji jiavula.’ (Luka 1:78) Muenya khenda wana gudisagesa gula wamona egi athu ako adi mumona malamba. Wana kamba luholo lua guakuatesa. Yesu walanduile khadilo dia Yehowa dia khenda mu luholo akhalele mukalegela athu ndaga. (Yone 5:19) Tangua Yesu wamonele athu avula, ‘waavidile khenda handaga ene akhalele mumona lamba nu guwungana gifua imeme ishigo nu mubambi.’ (Mat. 9:36) Yesu gavidilego phamba athu ene khenda uvi wakambele nji luholo lua guakuatesa. Wasagele athu akhalele mukata nu wahanele athu akhalele ‘aguhuila nu akhalele mubata ginemo’ ima ya gudia.—Mat. 11:28-30; 14:14.

12. Luholo lutshi tuajiya gumonesa egi tudi muvuila aphangi’etu khenda?

¹² Gutuama dia guvila aphangi’etu khenda nu gukamba luholo lua guakuatesa, tudi naye gujiya thomo malamba adi mutagana nawo. Ha gufezegesa, yajiya gukhala egi phangi mumoshi wa mukhetu  wana kata misongo yakola, uvi wana zuelela ndo ndaga yene. Ikhale ngenyi, phangi muene wajiya gukhala nu gusuanguluga guavula gula phangi mumoshi wa mukuatesa. Tuajiya gudihula egi: Phangi muene wana tagenesa nzala jia enya fami yenji ba? Tuajiya gumukutesa ha gumutelegela ima ya gudia nga ha gumukombela inzo ba? Gula phangi mumoshi gashigo nu mudimo tuajiya gumukuatesa nu makuta uvi gumuwambela ndo egi makuta ene akatuga gudi esue. Ngenyi makuta ene ajiya gumukuatesa uu nu tangua mbadiheta muene mudimo uko.

13-14. Luholo tshi tuajiya gulandula khadilo dia Yehowa dia guhana?

¹³ Yehowa wakhala nu khadilo dia guhana. (Mat. 5:45) Tushigo naye gunengenena egi aphangi a mala nu a akhetu atutoge ukuateshi hagula tuavile giwa khenda. Gifua Yehowa, esue nji tudi naye gukuatesa aphangi’etu ha fundo dia gunengena egi atutoge ukuateshi. Yehowa wana zola tangua lusugu nu lusugu, ikhale esue tuana gumutoga ndo ha gutshita ngenyi! Muanya wana kuatesa athu agasue, ikhale athu abonga nga abola. Tangua Yehowa wana gutuhana ima tuana khala nayo funu wana gutumonesa egi, wana gutuzumba muavula. Tuana gumuzumba muavula diago handaga wana khala nu gisemo nu khadilo dia guhana!

¹⁴ Aphangi’etu ana landula khadilo dia Sh’etu wa mu dilu tangua ana monesela athu ako khadilo dia guhana. Ha gufezegesa, tangua gikudi giakola (typhon géant Haiyan) giabundjile gu Philipines mu 2013, giabolesele ima yavula. Aphangi’etu avula a mala nu a akhetu atotesele jinzo nu ima yawo. Uvi aphangi’etu a ha mavu a mudidi adibungishile ha guakuatesa muphushi. Aphangi avula ahanele makuta, uvi ako ayile mukuatesa ha gulondega nu gutuna jinzo gubalega 750. Mudimo wene watageneselego nga givo gimoshi! Luko, Matamue a Yehowa akalegele ngolo ha gukuatesa aphangi awo a mala nu akhetu mu tangua dia misongo ya coronavirus. Tangua tuana kuatesa aphangi’etu tuana guamonesa egi tuana guazumba.

15-16. Ha gutadila Luka 6:36, itshi tuajiya gutshita ha gumonesa egi tudi mulandula khadilo dia Sh’etu wa mu dilu?

¹⁵ Yehowa wana vila athu khenda nu wana guatotesela. (Tanga Luka 6:36.) Tuana mona luholo Sh’etu wa mu dilu wana gututotesela lusugu nu lusugu. (Ngi. 103:10-14) Alandudi a Yesu akhalelego athu atagana, uvi Yesu wakhalele guavila  khenda nu guatotesela gubola guawo. Wakhalele hehi ha guhana monyo wenji hagula atutotesele gubola guetu. (1 Yone 2:1, 2) Tudi naye gukuata ufuta nu Yehowa nu Yesu handaga ana gutuvila khenda nu ana gututotesela.

¹⁶ Tuajiya gukolesa guzumba guetu nu aphangi’etu gula tudi ‘guatotesela nu mutshima umoshi.’ (Ef. 4:32) Uvi tudi naye gukalagala ngolo, handaga matangua ako yana khalago yaleba ha gutotesela athu ako. Phangi mumoshi wa mukhetu watangele longo dimoshi diakhalele mu Inzo Yaleha ya Mutaledi, diakhalele muzuela egi: “Pardonnons-nous volontiers les uns aux autres.” * Wasonegele egi: “Longo diene diangukuatesele ha gukotelesa luholo gutotesela athu ako nu mutshima umoshi guajiya gungukuatesa ha gutadila mulonga wene mu luholo luabonga. Longo diene diakhalele muzuela egi, gutotesela athu ako gushigo mukotelesa egi, udi mutangiza egi ndaga akalagala idi yabonga nga ndo ndaga yene ishigo gugusagesa. Uvi gudi mukotelesa gubemba guvuila athu agukalegela gubola khabu nu gukamba gubamba guhuima.” Tangua tuana totesela aphangi’etu nu mutshima umoshi, tuana guamonesa egi tuana guazumba nu tuana landula khadilo dia Yehowa.

17. Ha gutadila Matayo 5:16, luholo lutshi tuajiya gutumbuisa Sh’etu wa mu dilu?

¹⁷ Idi luendu luakoma ha gukhala mu fami yakoma ya Matemue a Yehowa a ha mavu a mudidi inyi yana gudizumba. Tudi mutshigina egi athu avula adibungise nu esue ha gukombelela Nzambi gula luholo ludi guene. Hene, tushigo naye gukalagala ndaga jiajiya gutuma athu ha gutangiza ndaga jiabola mukunda nu Yehowa nga mukunda nu akombeledi enji. Tudi naye gukalagala ngolo ha gukhala nu makalegelo abonga hagula athu ako ajiya gutshigina lukuma luabonga.—Tanga Matayo 5:16.

18. Itshi yajiya gutukuatesa ha gutuna guvua woma mu mudimo wa gulongesa?

¹⁸ Mangino athu ajiya gututuna nga gutusagesa, handaga tudi mutumagela Sh’etu wa mu dilu. Itshi tuajiya gukalagala gula tudi muvua woma ha gulongesa athu ako lukuma luabonga?  Tuajiya gusha mutshima egi Yehowa nu Mun’enji mbaatukuatesa. Yesu wawambelele alandudi enji egi ashigo naye gudisagesa mukunda nu ndaga jia guzuela nga luholo lua gujizuela. Mukunda natshi? Wazuelele egi: ‘Ndaga mudi naye guzuela mbajimihanewa mu tangua dinyinyi; handaga ishigo phamba enue mbamuzuela, uvi nyuma ya Tata wenu mbayizuela ha fundo dienu.’—Mat. 10:19, 20.

19. Hana gifezegeselo gia phangi mumoshi walongesele nu gikhesa giagasue.

¹⁹ Tutadilenu gifezegeselo gia phangi Robert. Tangua diasendesele muene gulonguga giamatshidia, wakhalele khenji ajiya gale ndo ndaga jiavula jidi mu Biblia. Uvi amutamegele gutuama dia manzuji ha guawambela mukunda natshi adi mutuna gungina mu mudimo wa gisuta. Wawambelele manzuji nu gikhesa giagasue egi, wakhalele mutuna gungina mu mudimo wa gisuta handaga wana zumba aphangi’enji Aklisto. Phangi Robert wakhalele nu gusuanguluga ha gukhala mukatshi dia aphangi a mala nu a akhetu! Uvi nzuji wa muhudile egi: “Aphangi’aye ene akuatshi?” Phangi Robert wakhalelego mutangiza egi ajiya gumuhula muhu wene, uvi wawungulugile mukhapho wa lusugu luene. Wakhalele Matayo 12:50, udi muzuela egi: ‘Muthu wagasue udi mukalagala gutshigina gua Tata wami udi mu dilu, muene phangi’ami wa yala, phangi’ami wa mukhetu nu muene gin’ami.’ Ikhale phangi Robert wakhalelego mujiya ndaga jiavula jidi mu Biblia, uvi nyuma ya Yehowa yamukuatesele ha guhana mvutu ya muhu owu nu ya mihu iko inyi gatangijilego egi ajiya gumuhula. Yehowa wasuangulugile diago nu ndaga jiakalegele phangi Robert! Yehowa wana suanguluga tangua tuana gumushila mutshima ha gulongesa nu gikhesa giagasue mu tangua dia lamba.

20. Desizio ditshi tudi naye guzula? (Yone 17:11, 15)

²⁰ Tuana khala nu gusuanguluga ha gukhala mukatshi dia aphangi a mala nu a akhetu anyi ana gudizumba muavula. Tudi nu Tata mumoshi wabalega atata agasue gubonga, wana gutuzumba muavula diago. Tudi naye gukhala nu gusuanguluga mukunda nu ndaga eji. Satana nu athu enji ana kamba gututshiginyisa egi Sh’etu udi mu dilu anago gutuzumba. Ana kamba nji gubolesa gudivua gudi mukatshi dietu. Uvi Yesu wakombelele mukunda nu esue, watogele Yehowa ha gutubamba hagula tukhale nu gudivua mukatshi dietu. (Tanga Yone 17:11, 15.) Yehowa udi mulandula guhana mvutu ya gisambu giene. Gifua Yesu, tukhale nu gutshigina egi Sh’etu wa mu dilu wana gutuzumba nu mbawutukuatesa. Tuzulenu desizio dia gulandula gukolesa ufuta wetu nu aphangi a mala nu a akhetu.