1. Mihu itshi athu ajiya gutuhula gu mudimo nga gukhalasa?

 LUHOLO lutshi wana gudivua gula futa diaye wa mudimo nga wa khalasa waguhula mihu yatadila gutshigina guaye? Wana guvua musonyi ba? Athu avula ana gudivua nji ngenyi. Uvi muhu wa luholo elu wajiya gutukuatesa ha gukotelesa matangi a muthu muene nga ndaga jiana tshigina muene, ngenyi yajiya gutukuatesa ha gumulongesa lukuma luabonga. Matangua ako, muthu wajiya gutuhula muhu handaga ganago gutshigina Matemue a Yehowa nga ndo udi mutshigina gutumanesa. Tushigo naye gudihula mukunda nu ndaga yene. Athu ako ana tshita ngenyi handaga avuile ndaga jiabola mukunda nu Matemue a Yehowa. (Makal. 28:22) Tudi nji mujinga mu “masugu a gisugishilo,” mu tangua dinyi athu avula ashigo “gudivua nu athu ako” nu adi “enya khuta.”​—2 Tim. 3:1, 3.

2. Mukunda natshi khadilo dia gutuluga didi nu ndando?

² Wajiya gudihula egi: ‘Luholo lutshi ngajiya gumonesa gisemo nu gutema gula muthu udi gungumanesa mukunda nu gutshigina guami?’ Itshi yajiya gugukuatesa? Khadilo dia gutuluga. Muthu wana khala nu khadilo dia gutuluga ganago gulaba guvua khabu, uvi wana gudikanda gula muthu muko wamukambela milonga nga ndo gula gashigo mujiya mvutu yaguhana gu ndaga imoshi ngenyi. (Ish. 16:32) Idi yadiago egi yana khalago yaleba ha gumonesa khadilo dia gutuluga tangua diagasue. Luholo lutshi wajiya gukudisa khadilo diene? Luholo lutshi wajiya gumonesa khadilo dia gutuluga gula muthu mumoshi udi musha giphapha mukunda nu gutshigina guaye? Gula udi mvuaji, luholo lutshi wajiya gukuatesa an’aye ha gujiya luholo lua guzuelela gutshigina guawo nu gutuluga guagasue? Tutadilenu luholo muajiya guyikalagala.

3. Mukunda natshi tuajiya guzuela egi gukhala nu khadilo dia guhuiminyina gushigo mukotelesa egi tudi athu a guleba? (2 Timote 2:24, 25)

³ Gukhala nu khadilo dia gutuluga gushigo mukotelesa egi udi muthu wa guleba. Yana toga ngolo ha gudikanda gula udi mutagana nu malamba. Khadilo dia gutuluga didi mukatshi dia “mabundu a nyuma ya Nzambi.” (Gal. 5:22, 23) Akhalele mukalegela mbimbi ya Greke yabalumuiwe egi “gutuluga” ha guzuelela gabalu ga mu foto ganyi abuishile gale ga hembo. Tangiza gale ndaga eyi, gabalu ga mu foto gabua gatuluga. Ikhale gana bua gatuluga, uvi gana khala nu ngolo. Luholo lutshi esue nji tuajiya gukudisa khadilo dia gutuluga nu gumonesa ngolo? Tuajiyilego guyitshita gu ngolo jietu hakhetu. Tudi naye gutoga nyuma ya Nzambi mu gisambu, tudi naye nji gumutoga ha gutukuatesa ha gukudisa khadilo edi dia ndando. Gisambu giakuatesele gale athu avula ha gukudisa khadilo dia gutuluga. Matemue a Yehowa avula amonesele khadilo dia gutuluga tangua athu akhalele mukamba guamanesa, ndaga yene yakuatesele athu avula ha gukhala nu matangi abonga mukunda nu Matemue a Yehowa. (Tanga 2 Timote 2:24, 25.) Luholo lutshi wajiya gukudisa khadilo dia gutuluga?

4. Longo ditshi tuajiya guzula mu khadilo dia gutuluga dia Izake?

⁴ Biblia yana khala nu mene jiavula jiana monesa egi khadilo dia gutuluga diana khala nu ndando. Tutadilenu gifezegeselo gia Izake. Tangua diakhalele muene mu dimbo dia Gelale mu mavu a enya Filistiya, athu akhalele nawo hehi akhalele gumuvuila ginjiongo, ashitshile mawina a meya ahagele enya mudimo a sh’enji. Ha fundo dia gualuisa ha gutambula mawina ene, Izake wakatugile ha fundo diene nu enya fami yenji, wayile muhaga mawina ako. (Gis. 26:12-18) Uvi enya Filistiya azuelele nji egi meya akhalele mu mawina a ha fundo diene akhalele nji awo. Ikhale ngenyi, Izake wakalegele ndaga nu guhuiminyina guagasue. (Gis. 26:19-25) Itshi yamukuatesele ha gumonesa khadilo dia gutuluga ikhale athu ako akhalele gumukambela milonga? Walanduile gifezegeselo gia mvuaji jienji, wazudile malongo mu luholo sh’enji Abalahama wamonesele khadilo dia guhuiminyina nu mu luholo gin’enji Sara wakhalele muthu “watuluga nu wahuiminyina.”​—1 Phet. 3:4-6; Gis. 21:22-34.

5. Gifezegeselo gitshi gidi mumonesa egi mvuaji jidi naye gulongesa ana awo ha gukhala nu khadilo dia gutuluga?

⁵ Mvuaji, muajiya gusha mutshima egi enue nji muajiya gulongesa an’enu malongo a ndando atadila khadilo dia gutuluga. Tutadilenu gifezegeselo gia Maxence udi nu ivo 17. Wakhalele mutagana nu athu ana khala nu khadilo dia guvua khabu gu khalasa nga mu mudimo wa gulongesa. Mvuaji jienji jiamukuatesele nu guhuiminyina guagasue ha gukudisa khadilo dia gutuluga. Adi muzuela egi: “Maxence wakotelesele egi yana toga ngolo ha guhena tedie gula muthu wamukambela milonga ha fundo dia gumuvutudila nu khabu nga nu khuta.” Maxence wana tshita ndaga nu gutuluga guagasue.

6. Luholo lutshi gisambu giajiya gutukuatesa ha gukudisa khadilo dia gutuluga?

⁶ Itshi tuajiya gukalagala gula athu ako adi gutukambela milonga gifua adi muzuela ndaga jiabola mukunda nu jina dia Nzambi nga ndo adi musegulula Biblia? Tudi naye gutoga Yehowa ha gutuhana nyuma yenji nu ndunge jienji ha guhana mvutu nu gutuluga guagasue. Itshi tuajiya gutshita gula tuakotelesa egi tuahenelego mvutu mu luholo tuakhalele mutangiza? Tuajiya gukombelela luko Yehowa mukunda nu ndaga yene nu gutangiza luholo tuajiya guhana mvutu nu gutuluga guagasue. Ngenyi Yehowa mbawutuhana nyuma yenji hagula tuajiya gudikanda nu gumonesa khadilo dia gutuluga.

7. Luholo lutshi gukuata verse jia Biblia mu muto guajiya gutukuatesa ha gudikanda tangua tudi mutagana nu malamba? (Ishima 15:1, 18)

⁷ Verse jiavula jia Biblia jiajiya gutukuatesa ha gudikanda mu mbimbi gula tudi mutagana nu  malamba. Nyuma ya Nzambi yajiya gukutukuatesa ha guwunguluga verse jiene. (Yone 14:26) Ha gufezegesa, malongo adi mu mukanda wa Ishima ajiya gutukuatesa ha gukhala athu atuluga. (Tanga Ishima 15:1, 18.) Mikanda iko ya Biblia yana monesa egi idi nu ndando ha gumonesa khadilo dia gudikanda gula tudi nu malamba.​—Ish. 10:19; 17:27; 21:23; 25:15.

8. Mukunda natshi tudi naye gukamba gujiya ndaga yatumi muthu ha gutuhula muhu watadila gutshigina guetu?

⁸ Gukhala nu ndunge guajiya nji gutukuatesa. (Ish. 19:11) Muthu wana khala nu ndunge wana monesa khadilo dia gudikanda gula athu adi musha giphapha mukunda nu gutshigina guenji. Matangua ako gula athu atuhula mihu, anago gutuwambela ndaga yaatumi ha gutuhula mihu yene. Hene ha guhana mvutu, tudi naye gujiya egi tushigo mujiya ndaga yatumi muthu muene ha gutuhula muhu.​—Ish. 16:23.

9. Luholo lutshi Gideona wamonesele ndunge nu khadilo dia gutuluga tangua enya Efrayime amuvuidile khabu?

⁹ Tutadilenu luholo Gideona wahanele enya Efrayime mvutu. Amuhudile nu khabu jiagasue egi mukunda natshi gaatamegelego ha guya muluisa mbalagaji jia enya Isalele. Uvi itshi yaahanele diago khabu? Yajiya gukhala egi akhalele nu lulendo ba? Ikhale ngenyi nga ndo, Gideona  wamonesele ndunge, wakambele gukotelesa gishina akhalele muvuila khabu, gungima waahanele mvutu yatuluga. Itshi yabuile gungima? Biblia idi muzuela egi: ‘Tangua diaawambelele Gideona ngenyi, ahenele tedie.’​—Manz. 8:1-3.

10. Itshi yajiya gutukuatesa ha gujiya luholo la guhana mvutu gudi athu adi gutuhula mihu yatadila gutshigina guetu? (1 Phetelo 3:15)

¹⁰ Yajiya gukhala egi futa dietu wa mudimo nga wa khalasa watuhula muhu ha gujiya mukunda natshi tuana tumagela malongo a Biblia. Tudi naye gutshita ngolo ha gumuhana mvutu ya mihu yenji nu ginemua giagasue. (Tanga 1 Phetelo 3:15.) Idi nu ndando ha gutadila muhu wa muthu muene gifua udi mutshigina gujiya ndaga jiavula ha fundo dia gumona gifua udi mutshigina gusha naye giphapha. Ikhale ndaga itshi yatuma muthu ha gutuhula muhu, tuana tshita muabonga ha gumuhana mvutu nu gisemo nu gutuluga guagasue. Mvutu yetu yajiya gumukuatesa ha gusombegesa matangi enji. Ikhale muthu muene watushingana nga watusegulula, tudi naye gumuhana mvutu nu gisemo giagasue.​—Roma 12:17.

11-12. (a) Ndaga itshi tudi naye gutadila gutuama dia guhana mvutu? (Tala nji gifuanesa.) (b) Hana gifezegeselo gidi mumonesa luholo muhu wahudi muthu wajiya gumikuatesa ha gulandula guta maga.

¹¹ Ha gufezegesa, gula futa dietu wa mudimo watuhula egi, mukunda natshi tuanago gukalalagala wano wa lusugu lua guvualewa, yajiya gukhala egi udi mutshigina gujiya gula esue nji tuana zula tangua dia gudikenesa. Nga ndo wajiya gutangiza egi khadilo dietu diajiya gubolesa khadilo dia athu ako gu mudimo. Tuajiya gumushimana mu luholo ana gudisagesa mukunda nu athu ako gu mudimo nu gumuwambela egi esue nji tuana tshigina gukhala nu gusuanguluga gu mudimo. Gutshita ngenyi guajiya gutuhana okazio wa gumuwambela ndaga Biblia yana zuela mukunda nu lusugu lua guvualewa.

¹² Tuajiya nji gutshita luholo lumoshi gula atuhula mihu yakola. Futa dietu wa khalasa wajiya guzuela egi Matemue a Yehowa adi naye gusombegesa luholo luawo lua gutadila gubungisa muila mala nu mala nga akhetu nu akhetu. Mbimbi jienji jidi mumonesa egi gashigo mujiya ndaga jiavula jiatadila Matemue a Yehowa ba? Nga ndo yajiya gukhala egi udi nu futa dienji nga muenya fami yenji wana bungisa muila nu mala n’ako nga akhetu n’ako ba? Udi mutshigina guzuela egi Matemue a Yehowa anago guzumba athu ana kalagala ndaga jia luholo elu ba? Tuajiya gumuwambela egi tuana zumba athu agasue, tuana jiya nji egi muthu nu muthu udi nu ginemo gia guzula badesizio enji hakhenji. b (1 Phet. 2:17) Gungima, tuajiya giwa gumuwambela ndaga Biblia yana zuela nu gubonga tuajiya guheta gula tudi mukalegela malongo enji.

13. Luholo lutshi wajiya gukuatesa muthu wana segulula athu ana sha gutshigina gudi Nzambi?

¹³ Gula muthu gashigo mutshigina ndaga tudi gumulongesa, tutangizago muphushi egi tudi mujiya gutshigina guenji. (Tito 3:2) Ha gufezegesa, itshi wajiya gutshita gula futa diaye wa khalasa wazuela egi idi ndaga ya musonyi ha gusha gutshigina gudi Nzambi? Mbawutshigina mbala imoshi egi futa diaye wana tshigina longo dia évolution nu udi mujiya ndaga jiavula jiatadila longo diene ba? Yajiya gukhala egi udi muzuela ndaga jiavuile muene gudi athu ako. Ha fundo dia gumana n’enji mukunda nu ndaga yene, wajiya gumubembela muhu wajiya gumutuma ha gutangigiza maga enu gungima. Wajiya gumuwambela luholo lua gungina mu jw.org ha fundo didi muzuelela ima yafugiwe. Gungima futa diaye muene wajiya gutshigina egi muzuelele longo nga video imoshi yamonyi muene guene. Yadiago, gula tuahana muthu muene mvutu nu ginemua, yajiya gumukuatesa ha gukamba gujiya ndaga jiavula jidi mu Biblia.

14. Luholo lutshi phangi Niall wakalegele site Internet yetu ha gukuatesa ana khalasa ha gujiya egi ndaga athu ako ana tangiza mukunda nu Matemue a Yehowa jidi jia mambo?

 ¹⁴ Muvuala mumoshi jina dienji Niall, wakalegele site Internet yetu ha gumonesa egi ndaga athu ako ana tanginza mukunda nu Matemue a Yehowa jidi jia mambo. Udi muzuela egi: “Ana khalasa akhalele gunguwambela tangua diagasue egi ngana tshigina ndo ndaga jia sianse handaga ngana sha gutshigina mu mukanda wa ishima.” Luholo ana khalasa akhelelego gumuhana tangua dia guakotelesela gutshigina guenji, waawambelele ha gungina mu jw.org ha fundo diasonegewa egi “Biblia nu Sianse.” Gungima, Niall wakotelesele egi mona khalasa mumoshi watangele malongo ene nu watshiginyile ha guta n’enji maga akhalele muzuelela luholo monyo wasendesele. Aye nji wajiya gutshita gifua muene.

15. Luholo lutshi mvuaji jiajiya gukuatesa an’awo ha guhana mvutu yatuluga gula mafut’awo a khalasa adi muzuela ndaga jiabola mukunda nu gutshigina guawo?

¹⁵ Mvuaji jiajiya gulongesa an’awo luholo lua guhana mvutu yatuluga gula athu adi muzuela ndaga jiabola mukunda nu gutshigina guawo. (Yak. 3:13) Mvuaji jiko jiana zuelela ndaga yene mu gukombelela guawo gua mu fami. Mu gukombelela guene, ana zuelela ndaga an’awo ajiya gutagana najio gu khalasa, ana guawambela nji luholo lua guhana mvutu yatuluga mu luholo luabonga.​—Tala galuanda “ Gukombelela gua mu Fami Guajiya Gumikuatesa.”

16-17. Luholo lutshi guzuelela ndaga mavuala ana tagana najio guajiya guakuatesa?

¹⁶ Gukombelela gua mu fami guajiya gukuatesa ana ha gutshigina diago egi malongo a Biblia adi a giamatshidia. Guajiya nji guakuatesa ha gukotelesela athu ako gishina ana tshiginyila malongo ene. Mu jw.org mu gitshinyi “Les jeunes s’interrogent” muana khala nu fiches de réflexion mukunda nu mavuala. Ima eyi yagasue yajiya gukuatesa mavuala ha gukolesa gutshigina guawo, yajiya nji  guakuatesa ha gujiya luholo lua guhana mvutu mu mbimbi jiawo hakhawo. Gulongunga ndaga eji mu fami, mbagukuatesa muthu wagasue ha gujiya luholo lua guzuelela gutshigina guenji nu gutuluga guagasue mu luholo luabonga.

¹⁷ Muvuala mumoshi wa yala jina dienji Matthew, udi mumonesa luholo ndaga akhalele mulonguga mu gukombelela gua mu fami jiamukuatesele. Tangua akhalele mutshita gukombelela gua mu fami, Matthew nu mvuaji jienji akhalele mutshita ba recherche ha guzuelela ndaga jiakhalele mutagana najio muene gu khalasa. Udi muzuela egi: “Tuana tangigiza mihu ajiya gunguhula nu tuana zuelela luholo ngajiya guhana mvutu gu mihu yene mu gudivua nu ba recherche tuakalagala. Gula ngakotelesa ndaga jiana gungutuma ha gusha gutshigina ngana gudivua muabonga, yana khala ndo lamba ha guhana mvutu yatuluga gula athu ako anguhula mihu.”

18. Ndaga jitshi jia ndando Kolosai 4:6 idi muzuelela?

¹⁸ Idi yadiago egi athu agasue ajiyilego gutshigina ndaga tudi gualongesa ikhale tuatshita ngolo ha gukuata mitshima yawo. Uvi gula tudi muzuela mu luholo luabonga nu lua tuluga, ajiya gutshigina. (Tanga Kolosai 4:6.) Tuajiya gufuanesa gulongesa gutshigina guetu nu gusonuena muthu balo. Tuajiya gudisonona nu gisemo giagasue nga ndo gudisonona mangololo. Gula tuadisonona nu gisemo, athu ako ajiya gudikuata nu gulandula guta ndundu. Luholo lumoshi nji gula tudi muzuela mu luholo luabonga nu gutuluga guagasue mu mudimo wa gulongesa, athu mbaatshigina gututegelela nu mbaalandula guta maga nu esue. Uvi gula muthu udi mutshigina gusha giphapha nga gutusegulula mukunda nu gutshigina guetu, tushigo naye gulandula guta n’enji maga. (Ish. 26:4) Athu avula ana sha ndo giphapha gia luholo elu; ajiya gutshigina gututegelela.

19. Itshi yajiya gutukuatesa hagukhala nu khadilo dia gutuluga tangua tudi muzuelela gutshigina guetu?

¹⁹ Yadiago, tuana heta gubonga guavula tangua tuana tshita ngolo ha gukhala athu atuluga. Khala mutoga Yehowa ha guguhana ngolo udi najio funu ha gumonesa khadilo dia gutuluga tangua udi mutshigina guhana mvutu gudi athu adi muzuela ndaga jiabola mukunda nu gutshigina guetu. Jiya egi khadilo diaye dia gutuluga diajiya gugukuatesa ngatshima matangi aye ashigo gudivua nu a muthu udi muta n’enji maga ha gutuna gumana. Khadilo diaye dia gutuluga nu mvutu yaye yaginemua yajiya gukuatesa athu adi gugutegelela ha gusombegesa matangi’awo mukunda nu esue nu giamatshidia gidi mu Biblia. Biblia yana zuela egi khala “tangua diagasue hehi ha guhana mvutu” mukunda nu gutshigina guaye, uvi ‘ikalagale nu gutuluga nu ginemua giagasue.’ (1 Phet. 3:15) Tshita ngolo ha gukhala nu khadilo dia gutuluga!