1-2. Mukunda natshi idi nu ndando egi tulonguge lumene lua Samsona?

 ITSHI yana gugujila mu matangi gula wavua jina dia Samsona? Idi naye gukhala egi wana tangiza muthu mumoshi wakhalele nu ngolo jiavula. Idi diago ngenyi. Uvi Samsona wazudile nji desizio dimoshi diabola diamubatele malamba. Ikhale ngenyi, Yehowa wakhalele mutala ndaga jiabonga jiakalegele Samsona ha gumukombelela, wasonegesele nji gifezegeselo gienji mu Biblia ha gutulongesa.

² Yehowa watombele Samsona ha gukalagala ndaga jia gushimana ha gukuatesa athu enji enya Isalele. Ivo yavula gungima dia gufua guenji, nyuma ya Yehowa yakuatesele mupostolo Phaula ha gusonega jina dia Samsona mukatshi dia athu akhalele nu gutshigina guakola. (Heb. 11:32-34) Gifezegeselo gia Samsona giajiya gutukuatesa. Wakhalele mushila Yehowa mutshima ikhale tangua diakhalele muene mutagana nu malamba. Mu longo edi, tuza mumona malongo tuajiya guzula mu gifezegeselo gia Samsona nu luholo gifezegeselo gienji giajiya gutukuatesa.

3. Ginemo gitshi Yehowa wahanele Samsona?

³ Tangua Samsona wavualewe, enya Filistiya akhalele muhinyina enya Isalele, akhalele nji guamonesa lamba. (Manz. 13:1) Enya Isalele amonele malamba avula handaga enya Filistiya akhalele enya khuta. Yehowa watombele Samsona ha ‘guhuluisa enya Isalele ha mago a enya Filistiya.’ (Manz. 13:5) Yakhalele ginemo giakola diago! Samsona wakhalele naye gushila Yehowa mutshima ha gutagenesa ginemo giene.

4. Luholo lutshi Yehowa wakuatesele Samsona ha gubinga enya Filistiya? (Manzuji 15:14-16)

 ⁴ Tutadilenu gifezegeselo gimoshi gidi mumonesa luholo Samsona washile mutshima gudi Yehowa ha gumukuatesa. Lusugu lumoshi, enya Filistiya ajile ha gukuata Samsona gu Lehi; yajiya gukhala egi dimbo diene diakhalele mu mavu a Yuda. Enya Yuda avuile woma, hene ahanele Samsona ha mago a mbalagaji jiawo. Akuaku’a Samsona amujitshigile nu ngonji mbadi jihe-jihe, ayile n’enji gudi enya Filistiya. (Manz. 15:9-13) Uvi ‘nyuma ya Yehowa yamuhanele ngolo’, hene Samsona wabatuile shinga jiene. Gungima ‘wamonele lumbanga lua phunda ya mulume lua gibisu,’ waluzudile, washiyile nalo enya Filistiya 1 000!​—Tanga Manzuji 15:14-16.

5. Luholo lutshi Samsona wamonesele egi wakhalele mushila Yehowa mutshima?

⁵ Mukunda natshi Samsona wakalegele lumbanga lua phunda? Athu akhalelego mukalegela uta wa luholo elu! Idi yadiago egi Samsona wakhalele mujiya egi Yehowa wakhalele naye gumukuatesa ha gubinga enya Filistiya, uvi uta wakhalele nawo muene ndo. Muthu owu wagujinginyina wakalegele ima yakhalele nayo muene ha gukalagala gutshigina gua Yehowa. Idi yadiago egi luholo Samsona washile mutshima gudi Yehowa, Yehowa wamukuatesele ha gubinga mbalagaji jienji!

6. Longo ditshi tuajiya guzula mu gifezegeselo gia Samsona, ha tudi mutagenesa inemo yetu mu ulondegi wa Yehowa?

⁶ Esue nji Yehowa wajiya gutuhana ngolo ha gutaganesa inemo yetu, ikhale inemo yene idi lamba ha gutaganesa. Nzambi wajiya gutukuatesa mu luholo lunu esue hakhetu tuakhalelego mutangiza. Khala musha mutshima egi luholo Yehowa wahanele Samsona ngolo, mbawugukuatesa nji ha gutshita gutshigina guenji gula udi gumushila mutshima.​—Ish. 16:3.

7. Gifezegeselo gitshi gidi mumonesa egi idi nu ndando ha gukamba utuameji wa Yehowa?

⁷ Aphangi avula ana tunga Jinzo jia Ufumu nu mafundo ako tuana kombelela Yehowa, amonesele egi ana shila Yehowa mutshima. Mu ivo yabalega, aphangi akhalele mutunga phamba Jinzo jia Ufumu jihe-jihe nu jinzo jiko. Uvi  luholo athu avula adi mubatijiwa, ulondegi wa Yehowa wasombegesele ndaga jiko. Aphangi ana tuameza midimo yene atogele ukuateshi wa Yehowa mu gisambu, gungima akalegele bametode ahe-ahe gifua gusumba mafundo adi nu jinzo jiatungiwe gale nu gujilondega. Phangi Robert wakhalele mukalagala mudimo wa gutunga Jinzo jia Ufumu ha mavu agasue nu aphangi ako mu ivo yabalega, udi muzuela egi: “Thomo, yakhalelego yaleba gudi aphangi ako ha gukalegela metode ene ahe-ahe. Luholo luene lua gutunga luakhalele lua gudisha nu ndaga tuakhalele mukalagala thomo. Uvi aphangi atshiginyile metode ene, yamonegele diago haphelo egi Yehowa wakhalele mukuatesa midimo yene.” Gifezegeselo egi gidi mumonesa luholo Yehowa wana tuameza akombeledi enji ha gukalagala gutshigina guenji. Mukut’etu agasue tudi naye gukhala nu khadilo dia gudihula egi: ‘Ngana kamba utuameji wa Yehowa ba? Ngajiya nji gusombegesa ndaga jiko ha gumukombelela mu luholo luabonga ba?’

8. Ndaga itshi Samsona watshitshile havuile muene luhungu luakola?

⁸ Yajiya gukhala egi udi muwunguluga ndaga jiko jia gushimana jiakalegele Samsona. Washiyile khoshi imoshi hakhenji, gungima washiyile nji enya Filistiya 30 a mu dimbo dia Asekelone. (Manz. 14:5, 6, 19) Samsona wakhalele mujiya egi gakhalelego naye gukalagala ndaga eji jiagasue gula Yehowa gamukuateselego. Ndaga yene yamonegele diago haphelo tangua diavuile muene luhungu luakola gungima dia gushiya enya Filistiya 1 000. Wakalegele itshi? Ha fundo dia gudikambela meya a gunua, watogele Yehowa ha gumukuatesa.​—Manz. 15:18.

9. Luholo lutshi Yehowa wahanele mvutu mu gisambu gia Samsona? (Manzuji 15:19 nu mbimbi goshi’a diyiji)

⁹ Yehowa wahanele mvutu gu gisambu gia Samsona, wazolele gito gia meya mu luholo lua gushimana. Tangua Samsona wanuile meya ene, ‘wahetele ngolo nu gikhesa.’ (Tanga Manzuji 15:19 nu mbimbi goshi’a diyiji.) Idi naye gukhala egi tangua nyuma ya Nzambi yakuatesele profete Samuele ha gusonega mukanda wa Manzuji, gito giene giakhalele guene. Tangua enya Isalele akhalele mumona gito giene, akhalele muwunguluga egi gula ashila Yehowa mutshima, muene mbawakuatesa.

10. Itshi tudi naye gutshita ha guheta ukuateshi wa Yehowa? (Tala nji gifuanesa.)

¹⁰ Esue nji tudi naye gulandula gutoga ukuateshi gudi Yehowa ikhale tudi nu ndunge nga ndo tuakalegele gale ndaga jiavula mu mudimo wenji. Tudi naye nji gukhala nu khadilo dia gudibulumuisa nu gujiya egi Yehowa wajiya gutukuatesa ha gukalagala ndaga jiagasue gula tuamushila mutshima. Samsona wahetele ngolo tangua dianuile muene meya amuhanele Yehowa. Esue nji tudi naye gutshigina ukuateshi wa Yehowa ha gulandula gukolesa gutshigina guetu gudi muene.​—Mat. 11:28.

11. Luholo lutshi tuajiya gumonesa egi tuana shila Yehowa mutshima? Hana gifezegeselo.

¹¹ Tutadilenu gifezegeselo gia phangi Aleksey wa gu Russie wana kolesela mu usageshi wakola. Itshi yamukuatesele ha gukolesela mu malamba atagenele nawo muene? Muene nu mukaji’enji ana khala nu programe yabonga ya gulonguga Biblia nu gutshita gisambu. Udi muzuela egi: “Ngana tshita yagasue ha gubamba programe yami ya gutanga nu gulonguga Biblia lusugu nu lusugu. Gimenegena giagasue, ame nu mukaji’ami tuana tadila mukhapho wa lusugu, tuana tshita nji gisambu hamoshi.” Ndaga yene idi gutulongesa itshi? Tudi naye gushila Yehowa mutshima ha fundo dia gutshita ndaga mu luholo luetu. Luholo lutshi tuajiya guyikalagala? Tudi naye gutshita ndaga jidi gutukuatesa ha gukolesa gutshigina guetu gifua,  gulonguga Biblia, gutshita gisambu, guya mu gudibungisa gua mu hungu nu mu mudimo wa gulongesa. Ngenyi Yehowa mbawutukuatesa ha gulandula gumukombelela. Luholo Yehowa wakuatesele Samsona, wajiya nji gutukuatesa.

12. Desizio ditshi diabola Samsona wazudile? Luholo lutshi desizio dia guzula Dalila mu ulo diakhalele dia gudisha nu mukhetu wa gu Filistiya?

¹² Samsona gakhalelego muthu watagana, matangua ako wazudile nji badesizio abola. Lusugu lumoshi wazudile desizio dia mubatele malamba. Hakhalele muene nzuji wa enya Isalele, ‘wazumbile mukhetu mumoshi wakhalele mu baba dia Soleke, jina dienji Dalila.’ (Manz. 16:4) Thomo, Samsona wakhalele mutshigina guzula mukhetu mumoshi wa gu Filistiya mu ulo. Yehowa watshiginyile desizio diene handaga ‘wakhalele mukamba luholo lua guluisa enya Filistiya.’ Gungima, Samsona wayile gumbo dia mukhetu mumoshi wa muenya Filistiya gu Gaza. Mutangua diene, Nzambi wahanele Samsona ngolo jia guthuphula mufulo wa dimbo. Dimbo diene diakhalelego luko mu ubambi. (Manz. 14:1-4; 16:1-3) Uvi yajiya gukhala egi Dalila wakhalele muenya Isalele, hene ulo wenji nu Samsona wakhalelego mukunda nu guluisa enya Filistiya.

13. Ndaga itshi Dalila watshitshile yabatele Samsona malamba?

¹³ Dalila watshiginyile mbongo jiavula jiamuhanele enya Filistiya ha guawambela gisuegi gia Samsona. Yajiya gukhala egi luholo Samsona wakhalele gumuzumba muavula, hene gakoteleselego ndaga Dalila wakhalele mutshigina gutshita. Ikhale ngenyi nga ndo, Dalila walanduile gumuhula hagula amuwambele gula ngolo jienji jiakhalele mukatuga gui.  Gungima Samsona wamuwambelele. Ndaga yabola yakalegele Samsona yamutumine ha gutotesa ngolo jienji, Yehowa nji gakhalelego luko gumukuatesa mu tangua dimoshi ngenyi.​—Manz. 16:16-20.

14. Malamba atshi Samsona wataganele nawo luholo luavidile muene Dalila?

¹⁴ Samsona wamonele malamba akola handaga wahagele mutshima gudi Dalila ha fundo dia gushila Yehowa mutshima. Enya Filistiya akuatele Samsona, amutobodiele meso. Amumbile mu bologo gu Gaza, fundo diakatudile muene mufulo wa dimbo. Amubuishile muhiga wa guatuila phupha. Lusugu lumoshi enya Filistiya ayile n’enji fundo akhalele mutshita wano. Akhalele muhana milambu gudi nzambi wawo wa mambo Dagona, handaga akhalele mutangiza egi muene waakuatesele ha gukuata Samsona. Azolele Samsona mu bologo ha guya n’enji fundo dia wano wene ha ‘gualelesa.’​—Manz. 16:21-25.

15. Luholo lutshi Samsona wamonesele luko egi wakhalele mushila Yehowa mutshima? (Manzuji 16:28-30) (Tala gifuanesa holu dia gizula.)

¹⁵ Samsona watshitshile ndaga yabola, uvi galebelego muila. Wakhalele mukamba okazio ha gushiya enya Filistiya, handaga gutshigina gua Yehowa guakhalele ngenyi. (Tanga Manzuji 16:28-30.) Samsona wabubidile Yehowa egi: ‘Ngukuatese ha guvutula gubola gudi enya Filistiya.’ Nzambi wa giamatshidia wahanele mvutu gu gisambu gienji, wamuhanele luko ngolo jiavula mu luholo lua gushimana. Samsona washiyile enya Filistiya avula mu lusugu lua gufua guenji, gubalega anyi ashiyile muene monyo wenji wagasue.

16. Longo ditshi tuajiya guzula mu ndaga yabola yakalegele Samsona?

¹⁶ Samsona watagenele nu malamba akola mukunda nu desizio diabola diazudile muene, uvi gabembelego gutshita gutshigina gua Yehowa. Gula tuakalagala ndaga imoshi yabola idi mutoga egi atubalele nga ndo tuatotesa ginemo gietu mu hungu, tushigo naye guleba muila. Tudi naye guwunguluga egi Yehowa wana khala hehi ha gututotesela. (Ngi. 103:8-10) Ngatshima tuatshita gubola, Yehowa wajiya gutuhana ngolo jia gukalagala gutshigina guenji gifua luholo luatshitshile muene gudi Samsona.

17-18. Mukunda natshi gifezegeselo gia Michael gidi guguhana gikhesa? (Tala nji gifuanesa.)

¹⁷ Tutadilenu gifezegeselo gia muvuala mumoshi wa yala jina dienji Michael. Wakhalele nu ndaga jiavula jia gutshita mu mudimo wa Yehowa, wakhalele mukuateshi wa mudimo  nu muvundji wa njila wa tangua diagasue. Gungima wakalegele ndaga yabola yatogele egi atotese inemo yenji mu hungu. Udi muzuela egi: “Ngakhalele nu ndaga jiavula jia gukalagala mu mudimo wa Yehowa. Gungima ngasendesele gudivua gifua ngajiyilego luko gutshita nga gima gimoshi mu mudimo wenji. Ngatangijilego egi Yehowa wangubemba, uvi ngakhalele gudihula gula ngana khala diago nu ufuta wakola n’enji gifua luholo ngakhalele thomo; nga ndo ngana gumukombelela luko gifua luholo ngakhalele guyitshita thomo.”

¹⁸ Idi yadiago egi Michael galebelego muila. Udi muzuela luko egi: “Ngakhalele mutshita isambu muavula nu gulonguga guami hakhami nu gutangigiza mu ndaga ngakhalele mulonguga ha gukolesa luko ufuta wami nu Yehowa.” Gungima Michael wahetele luko inemo mu hungu. Mangino udi mukulu, udi nji muvundji wa njila wa tangua diagasue. Udi muzuela egi: “Luholo akulu akhalele ngukuatesa nu gunguhana gikhesa, yangukuatesele ha gujiya egi Yehowa wakhalele gunguzumba. Henyaha ngana gumukombelela luko nu mutshima wa phelegeta. Eksperianse eyi yangulogesele egi Yehowa mbawutotesela muthu wagasue wabalumuna diago mutshima.” Tuajiya gusha mutshima egi Yehowa mbawutukalegela nu mbawutushimbiga ikhale tuakalegele ndaga jiabola. Tudi naye nji gutshita ngolo ha gutuna guvutugila luko ndaga jiene nu gulandula gumushila mutshima.​—Ngi. 86:5; Ish. 28:13.

19. Luholo lutshi gifezegeselo gia Samsona gidi guguhana gikhesa?

¹⁹ Mu longo edi tualonguga phamba ndaga jiazonda Samsona watagenele najio mu monyo wenji. Gakhalelego muthu watagana, uvi gabembelego gukombelela Yehowa ikhale wazudile desizio diabola dia gudizula mu ulo nu Dalila. Yehowa nji gamubembelego. Nzambi wakalegele luko Samsona mu luholo lua gushimana. Walanduile gumutadila gifua muthu wakhalele nu gutshigina guakola, hene gasonegesele jina dienji mukatshi dia athu akhalele nu gutshigina mu mukanda wa Hebelu mukhapho 11. Tudi diago nu gusuanguluga ha gujiya egi tuana kombelela Tata wa guzumba wana khala mu dilu handaga wana gutuhana ngolo gula tudi yaguleba! Hene, tulandulenu gububila Yehowa gifua muazuelele Samsona egi: “Ngutangize, nguhane ngolo.”​—Manz. 16:28.