1. Itshi Phetelo wazuelele tangua Yesu waakuatesele ha gukuata jishui mu luholo lua gushimana?

 PHETELO wabalegesele phipha ya mudidi nu gulowa, uvi nu gukuata ndo nga ishui imoshi. Yesu wamuwambelele egi: “Suena ha fundo didi jinga, mbenu mawanda enu ha gukuata jishui.” (Luka 5:4) Ikhale Phetelo washile giphapha egi gajiyilego gukuata nga ishui imoshi uvi wakalegele ndaga jiamuwambelele Yesu. Wanda wasendesele gutawuga handaga akuatele jishui jiavula. Phetelo nu athu akhalele nawo “ashimanele muavula” tangua amonele ndaga yene. Phetelo wazuelele egi: “Fumu, katuga hehi nu ame, handaga ngudi muenya gubola.” (Luka 5:6-9) Yajiya gukhala egi Phetelo watangijile egi gashigo watagana ha gukhala fundo dimoshi nu Yesu.

2. Mukunda natshi idi nu ndando egi tulonguge gifezegeselo gia Phetelo?

² Ndaga ya giamatshidia idi egi Phetelo wakhalele diago “muenya gubola.” Biblia yana monesa egi matangua ako Phetelo wazuelele nu wakalegele ndaga jiamusagesele gungima. Aye nji wana gudivua gifua muene ba? Wana gulua nu khadilo dimoshi diabola sendese mualeha ba? Gula idi ngenyi, gulonguga gifezegeselo gia mupostolo Phetelo guajiya gugukuatesa. Luholo lutshi? Tangiza gale ndaga eyi: Yehowa wakhalele naye gutshita egi asonegago ndaga jiabola jiatshitshile Phetelo mu Bibila. Uvi wasonegesele ndaga jiene mu ukuateshi wa nyuma yenji hagula tuhete malongo. (2 Tim. 3:16, 17) Gulonguga gifezegeselo gia Phetelo yago wakhalele muthu wa guleba nu matangi gifua esue guajiya gutukuatesa ha gukotelesa egi Yehowa ganago gututoga ha gukhala athu atagana. Wana tshigina egi tukolesele ikhale tushigo athu atagana.

3. Mukunda natshi tudi naye gukolesela?

³ Mukunda natshi tudi naye gukolesela? Handaga gula tudi mulandula gukalagala ndaga imoshi ngenyi, mbayitukuatesa ha  guyikalagala muabonga. Ha gufezegesa, gula muthu udi mutshigina gujiya gushiga gitare, yajiya gumuzula ivo yavula ha gugilonguga. Tangua didi muene mulonguga, wajiya gujimbila mbala jiavula, uvi gula udi mulandula gushiga, mbawujiya diago. Ikhale gungima dia gujiya gushiga gitare giene muabonga, matangua ako wajiya nji gujimbila. Uvi mbagashigo mubemba. Mbawulandula gulonguga ha gujiya luko muabonga luholo lua gugishiga. Luholo lumoshi nji, ikhale tuabembele gale khadilo dimoshi diabola, matangua ako tuajiya luko gudivutugila. Uvi tudi naye gulandula gukolesela ha gubemba khadilo diene. Mukut’etu agasue tuana zuela nga ndo tuana tshita ndaga jiana gutusagesa gungima; uvi gula tuakolesela, Yehowa mbawutukuatesa ha gulandula gukalagala ndaga jiabonga. (1 Phet. 5:10) Tutadilenu luholo mupostolo Phetelo wakolesele mu ndaga jiatagenele najio muene. Luholo Yesu wavidile Phetelo khenda, ikhale matangua ako wakalegele ndaga jiabola luajiya gutukuatesa ha gulandula gukombelela Yehowa.

4. Gifua luholo Luka 5:5-10 idi guyimonesa, itshi Phetelo wazuelele mukunda nu muene, uvi itshi Yesu wazuelele?

⁴ Biblia yanago guzuelela gishina Phetelo waditamegele egi wakhalele “muenya gubola,” nga gubola guakhalele muene mutangiza. (Tanga Luka 5:5-10.) Uvi yajiya gukhala egi wakalegele ndaga jiko jiabola diago. Yesu wakhalele mujiya egi Phetelo wakhalele muvua woma, yajiya gukhala egi Phetelo wakhalele mutangiza egi gakhalelego nu ndando. Uvi wakhalele nji mujiya egi Phetelo wajiya nji gusala yagujinginyina. Hene amuwambelele nu gisemo giagasue egi: “Uvuigo woma.” Luholo Yesu wakhalele mushila Phetelo mutshima, yakuatesele Phetelo muavula. Phetelo nu phangi’enji Andre abembele mudimo wa gulowa jishui, alanduile Yesu mu mudimo wa gulongesa. Yehowa waakuatesele nji muavula.​—Mako 1:16-18.

5. Gubonga gutshi Phetelo wahetele luholo gabembelego egi woma umukange njila ha gulandula Yesu?

⁵ Habuile Phetelo mulandudi wa Klisto, watagenele nu ndaga jiavula jiabonga. Wamonele luholo Yesu wakhalele musaga athu, muzola bademo nu gufuzumuna athu a gufua. b (Mat. 8:14-17; Mako 5:37, 41, 42) Phetelo wamonele nji vizio yakhalele mumonesa luholo Yesu mbawubua Fumu wa Ufumu wa Nzambi. Wabambele ndaga yene mu mutshima. (Mako 9:1-8; 2 Phet. 1:16-18) Yadiago, Phetelo wamonele ndaga jiavula jinyi gakhalelego naye gumona gula nga gabuilego mulandudi wa Yesu. Wasuangulugile  diago muavula luholo gabembelego egi nga gima gimoshi gimukange njila ha guheta gubonga guene!

6. Phetelo wabembele makalegelo abola akhalele nawo muene mu phushi ba? Kotelesa.

⁶ Ikhale Phetelo wamonele nu wavuile ndaga eji jiagasue, uvi matangua ako wakalegele ndaga jiabola. Tutadilenu ifezegeselo eyi yazonda. Tangua Yesu waawambelele egi udi naye gumonesewa lamba nu gushiyiwa ha gutagenesa profesi ya Biblia, Phetelo wamubalediele. (Mako 8:31-33) Phetelo nu apostolo ako akhalele mumana muavula ha gujiya gula nanyi wakhalele wabalega gukoma mukatshi diawo. (Mako 9:33, 34) Mu phipha ya gisugishilo gutuama egi Yesu ashiyiwe, Phetelo wabatudile yala mumoshi kutshi. (Yone 18:10) Mu phipha yene imoshi, watunyine Yesu mbala thathu handaga wakhalele muvua woma wa athu. (Mako 14:66-72) Gungima wadidile mangololo mukunda nu ndaga yene.​—Mat. 26:75.

7. Luendu lutshi Yesu wahanele Phetelo gungima dia gufuzumuga guenji?

⁷ Yesu gatunyilego mupostolo Phetelo luholo galebele muila. Ha fuzumugile muene, wahanele Phetelo okazio wagumonesa egi wakhalele gumuzumba. Yesu wamuwambelele ha gubamba imeme yenji nu gudibulumuisa guagasue. (Yone 21:15-17) Phetelo watshiginyile ginemo giene. Wakhalele gu Yelusalema mu lusugu lua Pantekote, wakhalele nji mukatshi dia athu athomo ambiwe maji mu nyuma.

8. Ndaga itshi yabola Phetelo watshitshile gu Antiokia?

⁸ Ikhale Phetelo wabuile Muklisto wambiwe maji mu nyuma, uvi wakhalele naye gutshita ngolo ha gubemba makalegelo ako abola. Ha gufezegesa, mu givo 36 G.Y., tangua Nzambi wambile Koneliyo munu wakhalelego muenya Yuda maji mu nyuma, Phetelo wakhalele hene. Ndaga yene yamonesele egi, “Nzambi gashigo nu khadilo dia gukhaphumuna;” athu anyi ashigo enya Yuda ajiya nji gungina mu hungu dia Uklisto. (Makal. 10:34, 44, 45) Gungima dia ndaga yene, Phetelo wasendesele gudia nu athu anyi akhalelego enya Yuda. Uvi thomo gakhalelego mudia nawo. (Gal. 2:12) Uvi Aklisto anyi akhalele enya Yuda asendesele gutangiza egi, ashigo naye gudia hamoshi nu athu anyi akhalelego enya Yuda. Tangua Aklisto ako akhalele nu matangi ene ajile gu Antiokia, Phetelo wabembele gudia nu athu akhalelego enya Yuda. Yajiya gukhala egi watshitshile ngenyi handaga wakhalele muvua woma egi, wajiya gubuisa enya Yuda mu gubola. Tangua mupostolo Phaula wamonele ndaga jiakalegele Phetelo, wamubalediele ha meso a athu agasue. (Gal. 2:13, 14) Ikhale Phetelo watshitshile ngenyi, uvi wakolesele. Itshi yamukuatesele?

9. Luholo lutshi Yone 6:68, 69 idi mumonesa egi Phetelo wakhalele yagujinginyina gudi Yesu?

⁹ Phetelo wakhalele yagujinginyina, gambembelego egi nga ndaga imoshi imukange njila ha gulandula Yesu. Ha gufezegesa, Phetelo wamonesele egi wakhalele yagujinginyina tangua Yesu wazuelele ndaga imoshi inyi alandudi akoteleselego. (Tanga Yone 6:68, 69.) Ha fundo dia gunengenena egi, Yesu a akotelesele ndaga yene muabonga, avula mukatshi diawo abembele gumulandula. Uvi Phetelo gatshitshilego ngenyi. Wakhalele mujiya egi phamba Yesu “udi nu mbimbi jia monyo wa ivo nu ivo.”

10. Luholo lutshi Yesu wamonesele egi wakhalele mushila Phetelo mutshima? (Tala nji gifuanesa.)

¹⁰ Yesu gabembelego Phetelo. Mu phipha ya gisugishilo gutuama egi afue, wajiyile egi Phetelo nu alandudi ako mbaamutuna. Uvi wawambelele Phetelo egi, wakhalele musha mutshima egi mbawusombegesa nu mbawusala ya gujinginyina. (Luka 22:31, 32) Yesu wakotelesele egi “nyuma idi yakola, uvi muila udi waleba.” (Mako 14:38) Ikhale Phetelo watunyile egi gakhalelego mujiya Yesu, uvi Yesu gamutunyilego.  Tangua diafuzumugile muene wamonegele gudi Phetelo hakhalele muene hakhenji. (Mako 16:7; Luka 24:34; 1 Kol. 15:5) Idi yadiago egi ndaga yene yahanele diago Phetelo gikhesa!

11. Luholo lutshi Yesu wakuatesele Phetelo ha gusha mutshima egi Yehowa mbawumukuatesa?

¹¹ Yesu wawambelele Phetelo egi Yehowa mbawumukuatesa. Gungima dia gufuzumuga guenji, Yesu wakuatesele Phetelo nu apostolo ako ha gukuata jishui jiavula mu luholo lua gushimana. (Yone 21:4-6) Ndaga yene yakuatesele Phetelo ha gusha mutshima egi Yehowa mbawumuhana ima idi nayo muene funu. Yajiya gukhala egi mupostolo Phetelo wawungulugile mbimbi jiazuelele Yesu egi Yehowa mbawutagenesa nzala jia athu ana “gukamba thomo Ufumu.” (Mat. 6:33) Ndaga jiene jiatumile Phetelo ha guhaga mudimo wa gulongesa ha fundo dia thomo, uvi mudimo wa gulowa ndo. Walongesele nu gikhesa giagasue mu lusugu lua Pantekote ya givo 33 G.Y. athu avula atshiginyile lukuma luabonga. (Makal. 2:14, 37-41) Gungima wakuatesele enya Samaliya nu athu akhalelego enya Yuda ha gubua alandudi a Klisto. (Makal. 8:14-17; 10:44-48) Yehowa wakuatesele Phetelo mu luholo lua gushimana ha gukuatesa athu a maluholo agasue ha gungina mu hungu.

12. Ha gutadila gifezegeselo gia Phetelo, itshi tushigo naye gujimbila gula tuana khala nu khadilo dimoshi diabola sendese mualeha?

¹² Yehowa wajiya gutukuatesa ha gukolesela. Yajiya gukhala lamba ha gubemba khadilo dimoshi diabola gula tuana khala nadio sendese mualeha. Matangua ako, tuajiya gumona egi gubola guetu gudi guavula gubalega gua Phetelo. Uvi Yehowa wajiya gutuhana ngolo jia gukolesela. (Ngi. 94:17-19) Ha gufezegesa, phangi mumoshi wa yala wakhalele mubungisa muila nu mala n’ako ivo yavula gutuama dia gujiya giamatshidia. Wambembele ndaga jiene jiagasue jia musonyi. Uvi, matangua ako nzala jiene jiakhalele luko gumujila. Itshi yamukuatesele ha gukolesela? Udi muzuela egi: “Yehowa wanguhanele ngolo.” Udi muzuela luko egi: “Nyuma ya Yehowa . . . yangukuatesele ha gutumagela mikhuala yenji mu monyo wami . . . Ikhale ngakalegele gubola guavula, Yehowa wana landula gungukalegela nu gunguhana ngolo.”

13. Luholo lutshi tuajiya gulandula gifezegeselo gia Phetelo gifua luholo Makalegelo 4:13, 29, 31 idi guyimonesa? (Tala nji gifuanesa.)

¹³ Gifua luholo tuayimonyi, Phetelo wakalegele ndaga jiko jiabola diago handaga wakhalele muvua woma wa athu. Uvi wahetele gikhesa tangua diakalegele muene gisambu ha gutoga Yehowa ngolo. (Tanga Makalegelo 4:13, 29, 31.)  Esue nji tuajiya guheta ngolo gula tudi muvua woma. Tutadilenu ndaga yabuidile muvuala mumoshi jina dienji Horst, wakhalele mujinga gu Allemagne mu tangua dia Ita ya Mbadi ya ha Mavu Agasue. Mbala jiavula akhalele gumushinjiga gu khalasa ha gumenega athu egi: “Heil Hitler!” yakotelesa egi Hitler mbawutuhuluisa. Matangua ako phangi Horst wakhalele nji muzuela mbimbi jiene. Ha fundo dia gumubalela, mvuaji jienji jiatshitshile n’enji gisambu ha gutoga Yehowa ha gumuhana gikhesa. Phangi Horst wakolesele nu wasalele yagujinginyina handaga mvuaji jienji jia mukuatesele nu washile mutshima gudi Yehowa. Gungima wazuelele egi: “Yehowa gangubembelego nga hazonda.” c

14. Luholo lutshi akulu ajiya gukuatesa athu adi aguleba?

¹⁴ Yehowa nu Yesu mbaashigo gutubemba. Phetelo wakhalele naye guzula desizio dimoshi dia ndando gungima dia gutuna Yesu. Wakhalele naye gubemba genji nga wakhalele naye gulandula gukhala mulandudi wa Klisto? Yesu wabubidile Yehowa ha gukuatesa Phetelo hagula gutshigina guenji gulebigo. Yesu wawambelele Phetelo egi, wakombelele mukunda nu muene nu wakhalele musha mutshima egi Yehowa mbawumuhana ngolo jia gukolesa aphangi enji. (Luka 22:31, 32) Idi naye gukhala egi Phetelo wakhalele muheta diago gikhesa hakhalele muene mutangiza mbimbi jia Yesu! Yehowa wajiya gukalegela akulu ha gutuhana malongo tudi nawo funu ha gusala yagujinginyina gula tudi mutshigina guzula desizio diakoma mu monyo wetu. (Ef. 4:8, 11) Phangi Paul udi gale mukulu sendese mualeha wana tshita ngolo ha gukuatesa aphangi. Wana kuatesa aphangi adi aguleba muila ha gutangiza luko luholo Yehowa waananele mu giamatshidia. Wana guakuatesa nji ha gujiya egi Yehowa mbagashigo guabemba handaga  guzumba guenji gudi gua giamatshidia. Udi muzuela egi: “Ngamonele luholo Yehowa wakuatesele aphangi avula alebele muila ha gukolesela.”

15. Luholo lutshi gifezegeselo gia Phetelo nu phangi Horst idi mumonesa egi ndaga jidi mu Matayo 6:33 jidi jia giamatshidia?

¹⁵ Gifua luholo Yehowa wahanele Phetelo nu apostolo ako ima akhalele nayo funu, mbawutuhana nji ima tudi nayo funu gula tudi muhaga mudimo wenji ha fundo dia thomo mu monyo wetu. (Mat. 6:33) Gungima dia Ita ya Mbadi ya ha Mavu Agasue, phangi Horst tuazuelela gu thunda wabuile muvundji wa njila. Uvi wakhalele diago phutu, gakhalelego nu mbongo jiajiya gumukuatesa ha gulandula gutshita mudimo wa tangua diagasue. Itshi phangi muene watshitshile? Walanduile gutshita mudimo wene ha gutala gula Yehowa mbawumuhana ima adi nayo funu. Walongesele phoso ya mudidi tangua mutadi muwendji wajile mutala hungu diawo. Gu gisugishilo gia phoso wadihudile tangua mutadi muwendji wa muhanele mbongo, uvi gawambelelego phangi Horst muthu wahanele mbongo jiene. Mbongo jiene jiamukuatesele ha gulandula gutshita mudimo wa muvundji wa njila mbeji jiavula. Ndaga yene yakuatesele phangi Horst ha gusha mutshima egi Yehowa mbawulandula gumukuatesa. Walanduile gusha ndaga jia Ufumu wa Nzambi ha fundo dia thomo mu monyo wenji wagasue.​—Mal. 3:10.

16. Mukunda natshi gifezegeselo gia Phetelo nu ndaga jiasonegele muene jidi nu ndando yavula mangino?

¹⁶ Phetelo wasuangulugile diago luholo Yesu gamutunyilego gifua luholo luatogele muene! Klisto walanduile guhana Phetelo formasio ha gukhala yagujinginyina nu ha gukhala gifezegeselo giabonga mukunda nu Aklisto ako. Esue nji tuajiya guheta malongo avula a ndando mu formasio Yesu wahanele Phetelo. Phetelo wazuelediele malongo ako mukatshi dia malongo ene mu mikanda mbadi yasonegele muene mu ngolo jia nyuma ya Nzambi gudi mahungu a mu siekle ya thomo. Longo dialandula mbadizuelela malongo adi mu mikanda yene nu luholo tuajiya guakalegela mangino.