1. Gutuama egi mupostolo Phetelo afue, nyuma ya Nzambi yamukuatesele ha gutshita itshi?

 MUPOSTOLO Phetelo wakhalele mujiya egi gualeha ndo udi mufua genji. Watshitshile ivo yavula mu mudimo wa Yehowa. Wawendele nu Yesu, walongesele mu mafundo anyi athu akhalele khenji ajiya galego lukuma luabonga, wakhalele nji mukatshi dia aphangi a mu hunji dia akulu atuameji. Uvi Phetelo watshitshile nji ndaga jiko. Mu givo hehi nu 62-64 G.Y., wasonegele mukanda wa thomo nu wa mbadi wa Phetelo mu ukuateshi wa nyuma ya Nzambi. Wakhalele musha mutshima egi ikhale wafua genji mikanda yene mbayilandula gukuatesa Aklisto.​—2 Phet. 1:12-15.

2. Mukunda natshi mikanda yasonegele Phetelo yajile mu tangua diatagana?

² Phetelo wasonegele mikanda yene mbadi tangua aphangi akhalele ‘muvua gikenene mukunda nu malamba avula.’ (1 Phet. 1:6) Athu abola akhalele mukamba luholo lua gunginyisa malongo a mambo nu makalegelo abola mu hungu dia Uklisto. (2 Phet. 2:1, 2, 14) Aklisto akhalele mujinga gu Yelusalema akhalele naye gumona “gisugishilo gia ndaga jiagasue,” yakotelesa egi masuta a enya Roma akhalele naye gushiya dimbo dia Yelusalema nu enya Yuda a mu tangua diene. (1 Phet. 4:7) Yadiago, mikanda yasonegele Phetelo yakuatesele Aklisto ha gukolesela mu malamba akhalele mutagana nawo nu ha gudilondega mukunda nu malamba akhalele naye guabuila gungima. b

3. Mukunda natshi tudi naye gulonguga mikanda yasonegele mupostolo Phetelo?

³ Phetelo wasonegele mikanda yene mukunda nu Aklisto a  mu siekle ya thomo, uvi Yehowa watshiginyile egi mikanda yene ikhale mu Biblia. Ngenyi, esue nji tuajiya guheta gubonga gua mikanda yene. (Roma 15:4) Yajiya gukhala lamba ha gukalegela Yehowa, handaga tudi mujinga ha mavu adi azala pha nu ndaga jiabola. Gualeha ndo esue nji mbatutagana nu malamba avula gubalega anyi abuidile enya Yuda mu siekle ya thomo. Mikanda mbadi yasonegele Phetelo idi nu malongo avula a ndando. Malongo ene ajiya gutukuatesa ha gulandula gunengenena lusugu lua Yehowa, ha gutuna guvila athu woma nu guzumba aphangi muavula. Ajiya nji gukuatesa akulu ha gubamba imeme ya Nzambi mu luholo luabonga.

4. Ha gutadila 2 Phetelo 3:3, 4, itshi yajiya gulebesa gutshigina guetu?

⁴ Tudi mujinga nu athu anyi anago gusha gutshigina mu profesi jia Biblia. Mbalagaji jiajiya gutulela handaga tuana zuela sendese mualeha egi gisugishilo gia mavu awa mbagiza. Athu ako ana zuela egi gisugishilo mbagishigo muza. (Tanga 2 Phetelo 3:3, 4.) Gutshigina guetu guajiya guleba, gula tuavua muthu tuana longesa Biblia nga muthu tuana tshita n’enji mudimo nga muenya fami yetu muzuela ndaga jia luholo elu. Phetelo wazuelele ndaga yajiya gutukuatesa.

5. Itshi yajiya gutukuatesa ha gujiya egi Yehowa mbawushiya mavu awa mu tangua diatagana? (2 Phetelo 3:8, 9)

⁵ Athu ako ajiya gutangiza egi Yehowa udi mushipha ha gushiya mavu awa abola. Ndaga jiazuelele Phetelo jiajiya gutukuatesa handaga jidi gutuwunguluisa egi, Yehowa ganago gutadila tangua gifua luholo athu ana guditadila. (Tanga 2 Phetelo 3:8, 9.) Gu meso a Yehowa ivo 1 000 idi gifua lusugu lumoshi. Yehowa wana khala nu guhuiminyina, gana tshiginago egi nga muthu mumoshi afue. Tangua lusugu luenji mbaluza, mbawushiya diago mavu awa abola. Tudi diago nu luendu lua gukalegela tangua diasala ha gulongesa athu a ha mavu agasue lukuma luabonga.

6. Luholo lutshi tuajiya “gutangiza tangua” diagasue lusugu lua Yehowa? (2 Phetelo 3:11, 12)

⁶ Phetelo udi gututoga ha “gutangiza tangua” diagasue lusugu lua Yehowa. (Tanga 2 Phetelo 3:11, 12.) Luholo lutshi tuajiya guyitshita? Khala mutangigiza lusugu nu lusugu gubonga mbatuheta mu mavu ahe-ahe. Tangiza luholo mbawukhala muzula muhehe wabonga, mudia ima yabonga nu gudiyamba nu athu wana zumba anyi mbaafuzumuga nu luholo mbawulongesa athu anyi afile gale sendese mualeha luholo profesi jia Biblia jiatagenesewe. Gutangigiza ndaga eji, mbagugukuatesa ha gunengenena lusugu lua Yehowa nu nzala yakola nu gusha mutshima egi tudi diago mujinga mu masugu a gisugishilo. Luholo tudi mujiya ndaga mbajitubuila mu masugu adi muza, mbayitukuatesa hagula alongeshi a mambo ‘awunganesago’ matangi’etu.​—2 Phet. 3:17.

7. Woma wa athu wajiya gututuma ha gutshita itshi?

⁷ Gujiya egi lusugu lua Yehowa luasuena hehi, guana gututuma ha gulongesa athu ako lukuma lubonga. Uvi matangua ako, tuajiya guvua woma ha gulongesa lukuma luene. Mukunda natshi? Handaga matangua ako tuajiya gusendesa guvila athu woma. Ndaga yene yabuidile nji Phetelo. Mu phipha ya gisuguishilo gutuama egi Yesu afue, Phetelo wavile woma wa athu, hene wazuelele egi gashigo mulandudi wa Yesu, watunyile nji mbala jiavula egi gashigo gumujiya! (Mat. 26:69-75) Uvi gungima wazuelele nu gikhesa egi: “Muvigo woma wa ndaga idi muvila ene woma, mukhadigo nji gudisagesa.” (1 Phet. 3:14) Mbimbi jia Phetelo  jidi gutukuatesa ha gujiya egi esue nji tuajiya gubemba guvila athu woma.

8. Itshi yajiya gutukuatesa ha gutuna guvila athu woma? (1 Phetelo 3:15)

⁸ Itshi yajiya gutukuatesa ha gutuna guvila athu woma? Phetelo udi muzuela egi: “Nemesenu Klisto gifua Fumu mu mitshima yenu.” (Tanga 1 Phetelo 3:15.) Yakotelesa egi tudi naye gujiya egi Yesu Klisto udi Fumu wetu, udi nji nu ngolo jiavula diago. Gula udi muvua woma tangua waheta okazio wa gulongesa lukuma luabonga, wunguluga Fumu wetu. Tangiza egi Yesu udi muhinyina mu dilu, bamilio a anjelo agumujieta. Wunguluga nji egi, muene udi nu “ufumu wa ndaga jiagasue mu dilu nu ha mavu” nu ‘mbawukhala nu aye masugu agasue uu nu gu gisugishilo gia mavu awa.’ (Mat. 28:18-20) Phetelo udi gututoga ha gukhala ‘tangua diagasue hehi’ ha guzuelela gutshigina guetu. Gula udi mutshigina gulongesa lukuma luabonga gu mudimo, gu khalasa nga fundo diko, tangiza gutuama luholo wajiya guyikalagala. Gungima londega ndaga wajiya guzuela. Toga Yehowa aguhane gikhesa, sha mutshima egi mbawugukuatesa ha gutuna guvila athu woma.​—Makal. 4:29.

9. Ndaga itshi Phetelo wakalegele lusugu lumoshi yamonesele egi gamoneselego aphangi guzumba? (Tala nji gifuanesa.)

⁹ Phetelo walongugile luholo lua gumonesela  athu ako guzumba. Wakhalele hene tangua Yesu wazuelele egi: “Ngudi gumihana mukhuala uhe-uhe egi, khalenu nu guzumba mukatshi dienu. Gifua luholo ngamizumbile, enue nji dizumbenu.” (Yone 13:34) Uvi ikhale ngenyi, Phetelo wavidile athu woma, hene gatunyile gudia hamoshi nu Aklisto anyi akhalelego enya Yuda. Mupostolo Phaula watamegele ndaga jiakalegele Phetelo egi “mambo.” (Gal. 2:11-14) Phetelo watshiginyile lubelo luamuhanele Phaula nu wazudile malongo mu ndaga yene. Wasonegele mu mikanda yenji mbadi egi tushigo naye phamba guzuela egi tuana zumba aphangi’etu uvi tudi naye guamonesela guzumba.

10. Itshi yajiya gutukuatesa ha gumonesa egi “guzumba gua uphangi gushigo nu mambo”? Kotelesa. (1 Phetelo 1:22)

¹⁰ Phetelo wazuelele egi “guzumba gua uphangi gushigo nu mambo.” (Tanga 1 Phetelo 1:22.) Mbatumonesa guzumba guene gula tudi mutumagela ndaga jiagasue tuana longuga mu “giamatshidia.” Mbatutumagela nji ndaga Biblia yana longesa egi, “Nzambi gashigo nu khadilo dia gukhaphumuna.” (Makal. 10:34, 35) Gula tudi muzumba athu ako mu hungu uvi ako ndo, mbayimonesa egi tuana tumagela ndo mukhuala wa Yesu watadila guzumba. Idi yadiago egi, tuajiya guzumba aphangi ako muavula gubalega ako gifua luholo Yesu watshitshile. (Yone 13:23; 20:2) Uvi Phetelo wazuelele egi tudi naye gutshita ngolo ha gumonesela aphangi’etu agasue a mala nu a akhetu “guzumba gua uphangi.”​—1 Phet. 2:17.

11. ‘Guzumba athu ako mangololo nu mutshima umoshi’ gudi mukotelesa itshi?

¹¹ Phetelo udi gututoga ha ‘guzumba athu ako mangololo nu mutshima umoshi.’ Mu 1 Phetelo 1:22, mbimbi ‘guzumba mangololo,’ jidi mukotelesa egi guzumba muthu ngatshima idi lamba ha guyitshita. Ha gufezegesa, itshi tuajiya gutshita gula phangi mumoshi watshita ndaga imoshi yatusagesa nga yatuhana khabu? Tuajiya gukamba gumuvutudila gubola ha fundo dia gumumonesela guzumba. Uvi Yesu walongesele Phetelo egi Nzambi gana tshigina ndo egi tuvutule gubola mu gubola. (Yone 18:10, 11) Phetelo wasonegele egi: “Muvutulago gubola mu gubola, muvutulago nji mashingo mu mashingo. Uvi wambelenu athu ako ndaga mu luholo luabonga.” (1 Phet. 3:9) Gula tudi muzumba aphangi muavula, mbatuakalegela ndaga nu gisemo ikhale athu anyi atukalegela gubola.

12. (a) ‘Guzumba aphangi’etu muavula’ mbagututuma nji ha gutshita itshi? (b) Gifua luholo video Préservons l’unité, un cadeau précieux? idi guyimonesa, itshi udi naye gutshita?

¹² Phetelo wakalegele mbimbi “guzumba muavula” mu mukanda wenji wa thomo. Guzumba guene guana tshuiga ndo phamba gubola guazonda, uvi “guana tshuiga masumu avula.” (1 Phet. 4:8) Yajiya gukhala egi Phetelo wawungulugile malongo amuhanele Yesu ivo yavula gutuama atadila gutotesela. Idi naye gukhala egi, mu tangua diene Phetelo watangijile egi udi muthu wabonga hazuelele muene egi udi naye gutotesela phangi’enji “mbala sambadi.” Uvi Yesu wamulongesele ha gutotesela phangi’enji “mbala 77.” Yakotelesa egi, gashigo naye gutanga. Ndaga yene idi nji gututadila esue mangino. (Mat. 18:21, 22) Gula wamona egi idi lamba ha gukalegela longo edi dia Yesu, ulebigo muila! Matangua ako, yana khala nji lamba gudi akombeledi agasue a Yehowa ha gutotesela athu ako, handaga ashigo athu atagana. Ndaga yabalega ndando idi gutshita ngolo ha gutotesela phangi’aye nu gulondega mulonga wene. c

13. Mukunda natshi yajiya gukhala lamba gudi akulu ha guheta tangua dia gukuatesa aphangi’awo a mala nu a akhetu?

¹³ Phetelo gajimbidilego ndaga jiamuwambelele Yesu hafuzumugile muene. Wamuwambelele egi: “Bamba imeme yami yazonda.” (Yone 21:16) Gula udi mukulu, jiya egi malongo awa adi nji gugutadila aye. Yajiya gukhala lamba gudi mukulu ha guheta tangua dia gutagenesa ginemo egi gia ndando. Akulu adi naye thomo gutagenesa nzala jia enya fami yawo. Guahana ima adi nayo funu, guamonesela guzumba nu guakuatesa ha gukhala nu ufuta wabonga nu Yehowa. Ana hana nji gifezegeselo giabonga tangua ana longesa nu gikhesa, ana londega gudibungisa gua mu hungu nu gutuameza itshinyi iko ya gudibungisa guene nu ba asamble. Akulu ako ana tshita gu Comités de liaison hospitaliers nga gu Service local de développement-construction. Akulu ana khala diago nu midimo yavula ya gutshita!

14. Itshi yajiya gukuatesa akulu ha gubamba muabonga imeme? (1 Phetelo 5:1-4)

¹⁴ Phetelo wawambelele akulu egi: “Bambenu muabonga imeme ya Nzambi.” (Tanga 1 Phetelo 5:1-4.) Gula udi mukulu, tudi mujiya egi wana zumba aphangi a mala nu a akhetu nu wana tshigina guabamba. Uvi matangua ako wajiya gumona egi udi nu ndaga jiavula jia gutshita nga gudivua egi udi yaguhuila ha gutagenesa ginemo giaye. Itshi wajiya gutshita? Wambela Yehowa ndaga yene. Phetelo wasonegele egi: “Gula muthu udi mutshita midimo ha gukuatesa athu ako, ahage mutshima wenji gu ngolo jiana hana Nzambi.” (1 Phet. 4:11) Yajiya gukhala egi aphangi a mala nu a akhetu adi mutagana nu malamba anyi ajiyilego guhua ha mavu awa a Satana. Uvi jiya egi Yesu Klisto “fumu wa abambi a imeme,” wajiya guakuatesa muavula gubalega. Wajiya guakuatesa mangino nu mu mavu ahe-ahe. Nzambi udi mutoga akulu ha guzumba aphangi, ha guabamba nu ha gukhala “ifezegeselo yabonga mukunda nu imeme.”

15. Ndaga itshi mukulu mumoshi wana tshita ha gubamba imeme? (Tala nji gifuanesa.)

¹⁵ Phangi William udi mukulu sendese mualeha, wakotelesele egi mudimo wa gubamba imeme udi nu ndando yavula. Tangua misongo ya coronavirus yasendesele, phoso nu phoso muene nu akulu ako akhalele mutshita ngolo ha guta maga nu phangi wagasue wa hunji diawo dia mudimo wa gulongesa. Wamonesele  ndaga yakhalele guatuma ha gutshita ngenyi. Udi muzuela egi: “Aphangi avula akhalele hakhawo gu jinzo; yajiya gukhala egi yakhalele guatuma ha gutangiza ndaga jiabola.” Gula phangi mumoshi udi mutagana nu malamba, phangi William wakhalele gumutegelela muabonga ha gujiya ndaga jidi gumusagesa. Gungima wakhalele mukamba mikanda nga video mu site yetu ha gumukuatesa. Udi muzuela egi: “Mudimo wa gubamba imeme udi nu ndando yavula mangino gubelega masugu abalega. Tuana tshita ngolo ha gukuatesa athu ha gulonguga ndaga jiatadila Yehowa; tudi naye nji gutshita yagasue ha gukuatesa aphangi a mala nu a akhetu ha gusala yagujinginyina gudi Yehowa.”

16. Luholo lutshi tuajiya gukalegela malongo adi mu mikanda mbadi ya Phetelo?

¹⁶ Tuazuelela phamba malongo azonda mu mikanda mbadi yasonegele Phetelo. Yajiya gukhala egi wamonyi ndaga jiko wajiya gusombegesa mu monyo waye. Ha gufezegesa, wana tangigiza muavula gubonga mbawuheta mu mavu ahe-ahe ba? Watangijile gale gulongesa lukuma luabonga ha fundo dia mudimo, gu khalasa nga fundo diko wajiya gutagana nu muthu ba? Gudi nu maluholo ako wajiya gumonesa egi wana zumba aphangi muavula ba? Akulu, muana gudihana diago ha gubamba imeme ya Yehowa ba? Gula waditala muabonga, wajiya gumona egi gudi nu ndaga jiko wana tshita ndo. Uvi ulebigo muila. Jiya egi “Fumu wana khala nu mutshima wabonga,” muene mbawugukuatesa ha gusombegesa. (1 Phet. 2:3) Mupostolo Phetelo udi gutuwambela egi: “Nzambi . . . mbawumanesela gumihana formasio, mbawumihana gikhesa, mbawumihana ngolo, mbawumikuatesa nji ha gukhala ya gumagana tenyi.”​—1 Phet. 5:10.

17. Gubonga gutshi mbatuheta gula tuakolesela nu tuabemba egi Yehowa atuhane formasio?

¹⁷ Thomo Phetelo wamonele egi gakhalelego watagana ha gukhala fundo dimoshi nu mun’a Nzambi. (Luka 5:8) Uvi Yehowa nu Yesu amukuatesele nu guzumba guagasue. Ndaga yene yakuatesele Phetelo ha gulandula Klisto nu gujinginyina guagasue. Hene Phetelo wahetele luendu lua “gungina mu Ufumu wa mayilago wa Fumu wetu Yesu Klisto, Muhuluishi wetu.” (2 Phet. 1:11) Wahetele diago luendu luakoma! Gula aye nji wakolesela gifua Phetelo, Yehowa mbawuguhana formasio. Ngenyi mbawuheta monyo wa mayilago. Mbawuheta nji ‘lufuto lua gutshigina guaye, lufuto luene ludi guhuluishiwa guaye.’​—1 Phet. 1:9.