1. Lamba ditshi Yoase nu Oziase nu Yoziase ataganele nadio?

 LUHOLO lutshi wakhalele naye gudivua gula nga wabuile fumu wa akombeledi a Nzambi tangua wakhalele muvuala? Luholo lutshi wakhalele naye gukalegela ufumu wene? Biblia yana zuelela mavuala avula abuile mafumu gu Yuda. Ha gufezegesa, Yoase wabuile fumu nu ivo 7, Oziase nu ivo 16, Yoziase nu ivo 8. Yakhalele lamba mukunda nu ene! Yakhalelego ndaga yaleba, uvi Yehowa nu athu ako a akuatesele ha gukalagala ndaga jiavula jiabonga.

2. Mukunda natshi tudi naye gulonguga gifezegeselo gia Yoase nu Oziase nu Yoziase?

² Esue tushigo mafumu, uvi tuajiya guheta malongo a ndando mu ifezegeselo ya athu awa thathu. Azudile badesizio abonga, uvi atshitshile nji ndaga jiko jiabola. Gulandula ifezegeselo yawo mbagutukuatesa ha gutomba mafuta abonga, gukhala athu a gudibulumuisa nu gukuata ufuta wakola nu Yehowa.

3. Luholo lutshi gifezegeselo gia Nganga-nzambi Wakoma Yoada giakuatesele fumu Yoase?

³ Khala muzula badesizio abonga gifua Yoase. Tangua Fumu Yoase wakhalele muvuala, wazudile badesizio abonga. Hakhalele muene mona wazonda, sh’enji wafuile. Nganga-nzambi Yoada wamusansele, wamulongesele nji mikhuala ya Yehowa. Yoase wabuile muthu watema handaga wavuile malongo akhalele gumuhana Yoada. Gifezegeselo giabonga gia Yoada giakuatesele Yoase ha gukombelela Yehowa nu ha gukuatesa akombeledi enji. Watshitshile nji yagasue hagula tempelo ya Yehowa ilondewe.​—2 Gudi. 24:1, 2, 4, 13, 14.

4. Gubonga gutshi tuana heta gula tudi muzumba nu mutumagela mikhuala ya Yehowa? (Ishima 2:1, 10-12)

⁴ Gula mvuaji jiaye nga muthu muko adi gugulongesa ha guzumba Yehowa nu ha gutumagela mikhuala yenji, jiya egi idi mukunda  nu gubonga guaye. (Tanga Ishima 2:1, 10-12.) Mvuaji jiajiya gulongesa an’awo mu maluholo avula. Tatudilenu luholo tata wa phangi Katya wamukuatesele ha guzula badesizio abonga. Lusugu nu lusugu, tangua tata wenji wakhalele muya gumubemba gu khalasa, akhalele muzuelela mukhapho wa lusugu. Udi muzuela egi: “Maga ene akhalele gungukuatesa ha gukolesela mu ndaga ngakhalele mutagana najio mu lusugu.” Itshi wajiya gukalagala gula malongo a Biblia ana guguhana mvuaji jiaye ashigo guguhana njila ha gutshita ndaga wana tshigina? Itshi yajiya gugukuatesa ha guatumagela? Phangi Anastasia udi muzuela egi mvuaji jienji jiakhalele muzula tangua dia gumukotelesela gishina akhalele gumuwambela ha gutshita nga ha gutuna gutshita ndaga jiko. Udi muzuela egi: “Gutshita ngenyi guangukuatesele ha gukotelesa egi akhalelego gunguwambela ndaga jiene ha gungumonesa lamba, uvi ha gungubamba handaga akhalele gunguzumba.”

5. Luholo lutshi mvuaji jiaye nu Yehowa mbaadivua gula udi mutumagela malongo a Biblia? (Ishima 22:6; 23:15, 24, 25)

⁵ Gula udi mutumagela malongo a Biblia mvuaji jiaye jiana guguhana, mbawasuanguluisa diago. Ndaga yabalega ndando idi egi mbawusuanguluisa nji Nzambi nu mbawukuata ufuta wakola n’enji. (Tanga Ishima 22:6; 23:15, 24, 25.) Ndaga eyi yajiya gugutuma ha gulandula gifesegeselo gia Yoase hakhalele muene muvuala.

6. Yoase wategelele malongo a athu a luholo lutshi? Gungima ndaga itshi yabuile? (2 Gudilanduluila 24:17, 18)

⁶ Khala muzula malongo mu badesizio abola azudile Yoase. Gungima dia gufua gua Yoada, Yoase wakuatele mafuta abola. (Tanga 2 Gudilanduluila 24:17-18.) Wategelele malongo amuhanele manene a gu Yuda anyi akhalelego muzumba Yehowa. Yajiya gukhala egi aye nji udi mutangiza egi Yoase wakhalele naye gutuna athu awa abola. (Ish. 1:10) Uvi muene watshiginyile genji ndaga jiamuwambelele mafut’enji ene abola. Tangua gisonyi gienji Zekaliya wamuwambelele egi ndaga jiatshitshile muene jiakhalele jiabola, Yoase wawambelele athu ha gumushiya. (2 Gudi. 24:20, 21; Mat. 23:35) Watshitshile diago ndaga yabola! Thomo Yoase wakhalele genji fumu wabonga, uvi gungima wabuile aposta, washiyile nji athu. Gungima enya mudimo enji amushiyile. (2 Gudi. 24:22-25) Ndaga jiakhalele naye guyila muabonga gula nga Yoase wasalele yagujinginyina gudi Yehowa nu gula nga wategelele ndaga jiamuwambelele akombeledi’enji! Longo ditshi wazula mu gifezegeselo egi?

7. Mafuta a luholo lutshi udi naye gutomba? (Tala nji gifuanesa.)

⁷ Longo tuajiya guzula mu desizio diabola diazudile Yoase didi egi tudi naye gutomba mafuta abonga ana zumba Yehowa nu  ana gumusuanguluisa. Tushigo naye gutomba phamba mafuta anyi tudi nawo gindongo gimoshi. Tujimbilago egi ikhale Yoase nu Yoada akhalele mafuta, uvi Yoase wakhalele galenge. Tangua udi mutomba mafuta, dihule egi: ‘Mafuta ene ana gungukuatesa ha gukolesa gutshigina guami gudi Yehowa ba? Ana gungukuatesa ha gutumagela mikhuala ya Nzambi ba? Ana zuelela ndaga jiatadila Yehowa nu giamatshidia gidi mu Biblia ba? Ana nemesa mikhuala ya Nzambi ba? Ana gunguhana malongo abonga ngudi nawo funu ba?’ (Ish. 27:5, 6, 17) Mu guzuela guabonga, ushigo naye gukuata ufuta nu athu ashigo muzumba Yehowa. Uvi gula udi nu mafuta ana zumba Yehowa, jinginyina gudi ene handaga mbaalandula gugukuatesa ha gukalagala ndaga jiabonga!​—Ish. 13:20.

8. Ndaga itshi tushigo naye gujimbila gula tudi mukalegela Internet?

⁸ Mangino Internet yana gutukuatesa ha guta maga nu enya fami nu mafut’etu. Uvi athu avula ana kalegela Internet ha gudisunzula, ana gumba foto nu video jiana monesa ima adi nayo nga ndaga ana kalagala. Gula udi mukalegela Internet, dihule egi: ‘Ngana kalegela Internet ha gudisunzula ba? Ngana tshigina guwambela athu ako ima yabonga, nga ndo ngana tshigina egi athu ene angumone? Ngana bemba egi ndaga ngudi mumona mu Interntet jibolese luholo luami lua gutangiza, lua guzuela nga lua gutshita ndaga ba?’ Phangi Nathan Knorr wakhalele gu Hunji dia Akulu Atuameji, wazuelele egi: “Ukhadigo mukamba gusuanguluisa athu. Gula udi mutshita ngenyi, mbawusuanguluisago nga muthu mumoshi. Uvi gula udi mukamba gusunguluisa Yehowa, mbawusuanguluisa nji athu ana gumuzumba.”

9. Mu luholo lutshi Yehowa wakuatesele Oziase? (2 Gudilanduluila 26:1-5)

⁹ Khala muzula malongo mu badesizio abonga azudile Oziase. Fumu Oziase wakhalele nu khadilo dia gudibulumuisa hakhalele muene muvuala. Wakhalele muvuila ‘Nzambi wa giamatshidia woma.’ Oziase wajingile ivo 68; mu ivo yene yagasue, Yehowa wakhalele gumukuatesa. (Tanga 2 Gudilanduluila 26:1-5.) Wabingile mbalagaji jienji mu ifutshi yavula, watshitshile nji yagasue hagula Yelusalema ikhale mu ubambi. (2 Gudi. 26:6-15) Wakhalele nu gusuanguluga mu ndaga jiagasue jiamukuatesele Nzambi ha gukalagala.​—Mulo. 3:12, 13.

10. Ndaga jitshi jiabuidile Oziase?

¹⁰ Khala muzula malongo mu badesizio abola azudile Oziase. Fumu Oziase wakhalele nu khadilo dia guwambela athu ako ndaga jia gutshita. Yajiya gukhala egi gutshita ngenyi guamutumine ha gutangiza egi udi naye gukalagala ndaga yagasue yatshigina muene, uvi gutumagela ndo mikhuala ya Yehowa. Lusugu lumoshi, Oziase wanginyile nu lulendo luagasue mu tempelo ya Yehowa ha guwetshia uhafu ha giwotshielo; ndaga yene yakhalele ginemo gia nganga-nzambi uvi mafumu ndo. (2 Gudi. 26:16-18) Nganga-nzambi Wakoma Azariya wamutunyishile, uvi Oziase wavuile khabu jiavula. Ndaga ya gikenene idi egi Oziase gasalelego yagujinyingisa gudi Yehowa, hene Yehowa wamuhanele ndola ya misongo ya hute. (2 Gudi. 26:19-21) Ndaga jiakhalele naye guyila muabonga gula nga Oziase wabambele khadilo dienji dia gudibulumuisa!

11. Luholo lutshi tuajiya gumonesa egi tudi nu khadilo dia gudibulumuisa? (Tala nji gifuanesa.)

¹¹ Habuile Oziase nu ngolo jiavula, wabuitshile mutshima egi Yehowa wamuhanele ngolo jiene nu umonyi. Longo ditshi tuajiya guzula? Tudi naye gujiya egi ima yagasue yabonga nu inemo yagasue tuana khala nayo yana katuga gudi Yehowa. Ha fundo dia gudisunzula mukunda nu ndaga tuana tshita mu mudimo wa Nzambi, tudi naye guhana lutumbu gudi Yehowa. b (1 Kol. 4:7)  Tudi naye gujiya nu gudibulumuisa guagasue egi tushigo athu atagana, matangua ako tuana khala nji nu funu ya guhanewa ndola. Phangi mumoshi wa yala udi nu ivo hehi nu 60 wasonegele egi: “Ngakotelesele egi ngushigo naye gukhala nu khadilo dia guvua khabu nga guleba muila gula athu ako anguwambela egi ngakalagala ndaga yabola. Gula anguhana ndola mukunda nu ndaga imoshi yabola ngatshitshi, ngana tshita yagasue ha gutuna guvutugila luko ndaga yene nu ha gulandula gukombelela Yehowa.” Gula tudi muvuila Yehowa woma nu tudi nu khadilo dia gudibulumuisa, mbatukhala diago nu gusuanguluga mu monyo wetu.​—Ish. 22:4.

12. Luholo lutshi Yoziase wakambele Yehowa hakhalele muene muvuala? (2 Gudilanduluila 34:1-3)

¹² Khala muzula malongo mu badesizio abonga azudile Yoziase. Yoziase wakhalele muvuala tangua diasendesele muene gukamba Yehowa. Wakhalele mulonguga ndaga jiatadila Yehowa nu gutshigina guenji. Uvi luholo luabuile muene fumu nu ulenge wagasue, yakhalelego ndaga yaleba. Mu tangua diene, athu avula akhalele mukombelela nzambi jia mambo, hene Yoziase wakhalele naye gumonesa gikhesa ha guatunyisa ndaga jiene. Wakalegele diago ngenyi! Gutuama egi atagenese ivo 20, Yoziase wasendesele gukatula gikombelelo gia mambo mu gifutshi.​—Tanga 2 Gudilanduluila 34:1-3.

13. Luholo lutshi monyo waye wajiya gusombegesa gula wadihana gudi Yehowa?

¹³ Gula udi muvuala, wajiya gulandula gifezegeselo gia Yoziase gula udi mulonguga ndaga jiavula jiatadila Yehowa nu makalegelo enji. Gutshita ngenyi mbagugukuatesa ha gudihana gudi muene. Luholo lutshi ndaga yene yajiya gugukuatesa mu monyo waye? Phangi Luke wabatijiwe nu ivo 14, udi muzuela egi: “Sendese mangino, mbangukhala muhaga Yehowa ha fundo dia thomo mu monyo wami, mbangutshita nji yagasue ha gumusuanguluisa.” (Mako 12:30) Aye nji wajiya gukhala nu gusuanguluga gula watshigina gutshita gifua phangi Luke!

14. Hana ifezegeselo idi mumonesa luholo mavuala ako ana landula gifezegeselo gia Fumu Yoziase.

¹⁴ Malamba atshi muvuala wana kombelela Yehowa wajiya gutagana nawo? Phangi Johan wabatijiwe nu ivo 12 udi muzuela egi mafut’enji a khalasa akhalele gumushinjiga ha gunua  makaya. Ndaga yamukuatesele ha gutuna gunua makaya idi egi wakotelesele egi makaya ajiya gubolesa sante yenji nu ufuta wenji nu Yehowa. Phangi Rachel wabatijiwe nu ivo 14 udi muzuelela ndaga yamukuatesele ha gubinga usageshi gu khalasa. Udi muzuela egi: “Ngana kamba ndaga jiana gungukuatesa ha gutangigiza Yehowa nu malongo adi mu Biblia. Ha gufezegesa, longo dimoshi diana zuelela ndaga jia mualeha diajiya gunguwunguluisa lumene lumoshi ngenyi lua Biblia nga profesi imoshi. Nga ndo matangua ako gula ngudi muta maga nu muthu gu khalasa, ngana tangiza verse imoshi ya Biblia ngajiya gumutangela.” Malamba udi mutagana nawo ajiya gukhala agudisha nu anyi ataganele nawo Fumu Yoziase, uvi wajiya gumonesa gutema nu gusala yagujingina gudi Yehowa gifua muene. Gula udi mukolesela malamba mu ulenge, mbayigukuatesa ha gukolesela mu malamba ako mbawutagana nawo mu masugu adi muza.

15. Itshi yakuatesele Yoziase ha gukombelela Yehowa nu gujinginyina guagasue? (2 Gudilanduluila 34:14, 18-21)

¹⁵ Tangua Fumu Yoziase wataganesele ivo 26, wasendesele gulondega tempelo ya Yehowa. Mu tangua diene, amonele ‘mukanda wa Mikhuala wa Yehowa wahanele muene gudi Moize.’ Havuile fumu ndaga mukanda wene wakhalele muzuela, wasombegesele ndaga ha gutumagela mikhuala yene. (Tanga 2 Gudilanduluila 34:14, 18-21.) Wana tshigina gutanga Biblia lusugu nu lusugu ba? Yajiya gukhala egi wana tanga gale Biblia, wana suanguluga nu gutanga guene ba? Wana sonega verse jiajiya gugukuatesa ba? Phangi Luke tuazuelela gu thunda wana sonega matangi a ndando ana gumusuanguluisa. Gutshita ndaga ya luholo elu guajiya gugukuatesa ha guwunguluga verse ya Biblia nga malongo a ndando wazudile tangua wakhalele mutanga. Gula udi mutshita ngolo ha gujiya malongo a Biblia nu guazumba, mbayigukuatesa ha gulandula gukombelela Yehowa. Luholo Mbimbi ya Nzambi yakuatesele Fumu Yoziase ha gukalagala ndaga jiabonga, mbayigukuatesa nji.

16. Mukunda natshi Yoziase wakalegele ndaga yabola? Longo ditshi tuajiya guzula?

¹⁶ Khala muzula malongo mu badesizio abola  azudile Yoziase. Hatagenesele Yoziase ivo hehi nu 39, wakalegele ndaga imoshi yabola yamubatele gu gufua. Ha fundo dia gulandula utuameji wa Yehowa, Yoziase wadishidile mutshima. (2 Gudi. 35:20-25) Longo ditshi tuajiya guzula? Ikhale tudi athu agukula nga ndo, nga tuana longuga gale Biblia sendese mualeha, tudi naye gulandula gukamba utuameji wa Yehowa. Yakotelesa egi tudi naye gutoga utuameji wa Yehowa tangua diagasue mu gisambu, gulonguga Mbimbi yenji nu gutoga malongo gudi Aklisto a gukula mu nyuma. Ngenyi mbatukhala nu gusuanguluga guavula, mbayikhala nji lamba ha guheta ba okazio agukalagala ndaga jiabola.​—Yak. 1:25.

17. Malongo atshi tuajiya guzula mu ifegezegeselo ya mafumu awa thathu a gu Yuda?

¹⁷ Gudi nu ndaga jiavula jiabonga wajiya gutshita tangua udi muvuala. Ndaga jiakalegele Yoase nu Oziase nu Yoziase jidi mumonesa egi mavuala ajiya guzula badesizio abonga nu gusuanguluisa Yehowa mu monyo wawo. Idi yadiago egi gifua luholo tuayimonyi, matangua ako tuajiya guzula badesizio abola. Uvi tuajiya gulandula ndaga jiabonga jiakalegele mafumu awa nu gutuna gutshita ndaga jiabola jiakalegele ene. Ngenyi mbatukhala diago nu gusuanguluga mu monyo wetu.

18. Ifezegeselo itshi idi mu Biblia yana monesa egi aye nji wajiya gukhala nu gusuanguluga? (Tala nji gifuanesa.)

¹⁸ Biblia idi nu mene jia mavuala ako akuatele ufuta wakola nu Yehowa nu ahetele gusuanguluga mu monyo wawo. Davidi udi nji mukatshi dia mavuala ene. Hakhalele muene muvuala wakuatele ufuta wakola nu Nzambi, gungima wabuile fumu wabonga. Davidi wakalegele nji ndaga jiavula jiabola, uvi Nzambi walanduile gumuzumba. (1 Maf. 3:6; 9:4, 5; 14:8) Gula udi mulonguga lumene lua Davidi, wajiya guzula malongo mbaagukuatesa ha gulandula gukombelela Yehowa nu gujinginyina guagasue. Wajiya nji guzula malongo ako avula gula udi mulonguga lumene lua Mako nga lua Timote. Asendesele gukombelela Yehowa tangua akhalele ana azonda, alanduile nji gumukombelela nu gutshigina guagasue. Desizio diene diasuanguluishile Yehowa, ene nji akhalele nu gusuanguluga.

19. Luholo lutshi wajiya gukhala nu gusuanguluga mu monyo waye?

¹⁹ Luholo wana kalagala ndaga mu monyo waye mangino, ludi mumonesa luholo mbawukhala nji mutshita ndaga mu masugu adi muza. Gula udi mushila Yehowa mutshima, mbawugukuatesa ha guzula badesizio abonga. (Ish. 20:24) Ngenyi mbawukhala nu gusuanguluga mu monyo waye. Jiya egi Yehowa wana zula ndaga wana gumukalegela nu ndando. Ndaga yabalega gubonga wajiya gutshita mu monyo waye idi gukombelela Tata waye wa guzumba wa mu dilu.