1-2. (a) Enise wakhalele nanyi, lamba ditshi diataganele nadio muene? (b) Zuelela gifuanesa gidi holu dia gizula.

 BIBLIA yana zuelelago gubatijiwa gua Timote, uvi tudi mutangiza egi gin’enji Enise wakhalele nu gusuanguluga lusugu luene. (Ish. 23:25) Tangiza gusuanguluga guakhalele nago Enise tangua diamonele muene Timote muzoga mu meya. Enise nu Loise khakha wa Timote adiyambele nu gusuanguluga guagasue. Enise wahuiminyine tangua diamonele muene Timote mumbiwa mu meya. Mutshima wamutulugile, wakhalele nu gusuanguluga guavula hene wasendesele gudila. Ngatshima yakhalelego ndaga yaleba, uvi wakuatesele mun’enji ha guzumba Yehowa nu Yesu Klisto. Malamba atshi Enise wataganele nawo tangua diakhalele muene mulongesa mun’enji?

² Mvuaji jia Timote jiakhalele nu ikombelelo ya gudisha. Tata wa Timote wakhalele muenya Greke, uvi gin’enji nu khakha wenji akhalele enya Yuda. (Makal. 16:1) Idi mumonega egi tangua Enise nu Loise abuile Aklisto, Timote wakhalele muvuala. Uvi, sh’enji gabuilego Muklisto. Gikombelelo gitshi Timote wakhadile naye gutomba? Timote wakhalele naye guzula desizio muene hakhenji handaga mutangua diene wakhalele muvuala. Wakhalele naye gutomba gikombelelo gia shi’enji? Nga wakhalele naye gulandula makalegelo a enya Yuda alongugile muene tangua diakhalele muene mona wazonda? Nga ndo wakhalele naye gutshigina gubua mulandudi wa Yesu Klisto?

3. Ha gutadila Ishima 1:8, 9, itshi Yehowa wana tangiza mukunda nu gikhesa amama ana tshita ha gukuatesa an’awo ha gukuata ufuta n’enji?

³ Mangino nji amama adi Aklisto ana zumba fami jiawo.  Ndaga yabalega ndando idi egi, ana tshigina gukuatesa an’awo hagukuata ufuta nu Yehowa. Yehowa wana suanguluga nu gikhesa giawo. (Tanga Ishima 1:8, 9.) Wakuatesele gale amama avula hagula akuatese an’awo ha gujiya giamatshidia.

4. Malamba atshi amama anatagana nawo mangino?

⁴ Matangua ako mama wajiya gudihula gula an’enji mbaatomba gukombelela Yehowa gifua muatshitshile Timote. Mvuaji jiana jiya egi mavu awa a Satana adi aguzala nu ndaga jiavula jiabola, hene yajiya gukhala lamba gudi an’awo ha gukombelela Yehowa. (1 Phet. 5:8) Yanakhala lamba gudi amama avula ha gusansa an’awo gula ashigo nu mala nga ndo gula alumi’awo ashigo Matemue a Yehowa. Ha gufezegesa phangi Christine * udi muzuela egi: “Mulumi’ami wakhalele tata wabonga nu fumu wa fami wabonga. Uvi gakhalelego mutshigina egi ngukuatese an’etu hagubua Matemue a Yehowa. Matangua avula ngakhalele mudila, ngakhalele gudihula gula an’ami mbaakombelela diago Yehowa.”

5. Itshi tuza mumona mu longo edi?

⁵ Gula udi mama, wajiya gukuatesa an’aye ha guzumba nu gukombelela Yehowa gifua muatshitshile Enise. Mu longo edi tuza mumona luholo lutshi wajiya gulandula gifezegeselo gienji ha gulongesa an’aye mu ndaga wana zuela nu wana kalagala. Tuza nji mumona luholo Yehowa mbawugukuatesa.

6. Ha gutadila 2 Timote 3:14, 15, luholo lutshi Timote wabuile Muklisto?

⁶ Tangua Timote wakhalele mona wazonda mama wenji watshitshile yagasue ha gumulongesa “mbimbi ya Nzambi,” gifua luholo enya Yuda akhalele guyikotelesa. Uvi mutangua diene Enise gakhalelego mujiya ndaga jiatadila Yesu Klisto. Idi yadiago egi ndaga jia longugile Timote mu mbimbi ya Nzambi jiakhalele naye gumukuatesa hagubua Muklisto. Uvi wabuile Muklisto ba? Wakhadile naye gutomba muene hakhenji gula mbawubua Muklisto. Idi yadiago egi Timote ‘watshiginyile’ giamatshidia giatadila Yesu handaga mama wenji wamukuatesele muavula. (Tanga 2 Timote 3:14, 15.) Enise wakhalele nu gusuanguluga guavula handaga wakuatesele mun’enji ha gujiya Yehowa ngatshima yakhalelego yaleba. Enise watshitshile diago ndaga mugudivua nu jina dienji, handaga jina diene diakhalele mukotesesa “gubinga.”

7. Luholo lutshi Enise walandudile gukuatesa mun’enji gungima dia gubatijiwa?

⁷ Gubatijiwa gua Timote guakhalele ndaga ya ndando mu monyo wenji, uvi ikhale gungima dia gubatijiwa guenji mama wenji wakhalele gudisagesa. Luholo lutshi Timote mbawukalegela monyo wenji gungima dia gubatijiwa? Mbawukuata mafuta abola ba? Mbawuya mungina khalasa gu Atene nu mbawutsthigina ndaga jiana longesa enya filozofi guene ba? Mbawubalegesa tangua dienji nu ngolo jienji ha gukamba gubua muenya umonyi ba? Enise gakhalelego naye guzudila Timote desizio, uvi wakhalele naye gumukuatesa ha guzula ba desizio abonga. Luholo lutshi? Wakhalele naye gulandula gutshita ngolo ha gukuatesa mun’enji ha gukudisa guzumba guenji gudi Yehowa nu guhana mersi mukunda nu ndaga Yesu watshitshile mukunda nu ene. Yana khala ndo lamba ha gusansa ana phamba gudi mvuanji jinyi jiana khala nu ikombelelo ya gudisha. Ngatshima mvuaji jidi mu giamatshidia, yajiya gukhala lamba ha gukuata mitshima ya an’awo adi mavuala hagula abue akombeledi a Yehowa. Longo  ditshi mvuaji jiajiya guzula mu gifezegeselo gia Enise?

8. Luholo lutshi mama wajiya gukuatesa mulumi’enji udi Temue wa Yehowa ha gulongesa an’awo giamatshidia?

⁸ Khala mulonguga Biblia nu an’aye. Aphangi’etu a akhetu, gula alumi’enu adi mu giamatshidia, Yehowa udi mutshigina egi muakuatese ha gulongesa an’enu giamatshidia. Muajiya gutshita ngenyi gula mudi guakuatesa ha gutshita Gukombelela gua mu Fami phoso nu phoso. Zuelela gubonga gua gukombelela gua mu fami nu kamba gujiya ndaga wajiya gutshita hagula gukombelela guene gukalegewe mu gusuanguluga. Wajiya gukuatesa mulumi’aye ha gulondega gutuama ndaga imoshi ya Biblia muajiya guzuelela. Gula idi mutoga egi an’enu ako adi agukula alonguge mukanda Heta Monyo wa Ivo nu Ivo! muajiya gudilondega nu mulumi’aye ha gualongesa.

9. Gui mama munu udi nu yala gashigo mukombeledi wa Yehowa wajiya guheta ukuateshi?

⁹ Amama ako ana longuga Biblia nu an’awo handaga ashigo nu mala nga ndo alumi’awo ashigo akombeledi a Yehowa. Gula idi nji ngenyi mu fami yaye, udi sagesago muavula. Yehowa mbawugukuatesa. Kalegela ikadigilo idi muzola ulondegi wenji ha gulongesa an’aye. Wajiya nji guhula mvuaji jidi nu eksperianse hagula ajiya guguwambela luholo lua gukalegela ikadigilo yene ha gutshita gukombelela gua fami. * (Ish. 11:14) Yehowa wajiya nji gugukuatesa ha guta maga muabonga nu an’aye. Mutoge agukuatese hagujiya matangi nu ndaga jidi mu mitshima ya an’aye. (Ish. 20:5) Wajiya guhula mun’aye egi: ‘Lamba ditshi diakola wana tagana nadio gu khalasa?’ Gutshita ngenyi mbagumikuatesa ha gusendesa guta maga muabonga.

10. Luholo tshi luko wajiya gukuatesa an’aye ha gulonguga ndaga jiatadila Yehowa?

¹⁰ Khala mukamba maluholo agudisha ha gulongesa an’aye ndaga jiatadila Yehowa. Khala muzuelela ndaga jiatadila Yehowa nu ndaga jiavula jiabonga jiakalegele muene mukunda nu aye. (Mikh. 6:6, 7; Yesh. 63:7) Idi ndaga ya ndando udi naye gukalagala gula wana longuga ndo phoso nu phoso nu an’aye. Phangi Christine, tuazuelela gu thunda udi muzuela egi: “Nganakhalago nu ba okazio avula ha guzuelela ndaga jiatadila Yehowa nu an’ami, hene gula ngaheta okazio ngana guyikalagala. Tangua tuanaya nu guwenda nu an’ami nu tangua tuanaya mubalegesa tangua gu plage, ngana zuelela ima yafugile Nzambi nu ndaga jiko jiajiya guakuatesa hagukuata ufuta n’enji. Tangua akudile, ngakhalele guahana gikhesa ha gulonguga Biblia.” Khala nji muzuela ndaga jiabonga mukunda nu ulondegi wa Yehowa nu mukunda nu aphangi’etu. Ukhadigo mufeta akulu. Ndaga udi muzuela mukunda nu ene jiajiya gukuatesa an’aye ha gukamba ukuateshi gudi ene nga ndo.

11. Ha gutadila Yakoba 3:18, mukunda natshi idi nu ndando ha gukamba guhuima mu fami?

¹¹ Khala mukamba guhuima mu fami yaye. Tangua diagasue khala mumonesa egi wana zumba mulumi’aye nu an’aye. Khala muzuela gudi mulumi’aye nu gisemo nu ginemua. Khala mukuatesa nji an’aye ha gukalagala luholo lumoshi. Gula udi mutshita ngenyi mbayikhala yaleba gudi an’aye ha gulonguga ndaga jiatadila Yehowa. (Tanga Yakoba 3:18.) Tutadilenu gifezegeselo gia phangi Jozsef, wakhalele Pionye spesiale gu Roumanie. Tangua akhalele mukula, yakhalele lamba gudi muene nu gin’enji nu aphangi’enji ha gukombelela  Yehowa handaga sh’enji gakhalelego mutshigina. Phangi Jozsef udi muzuela egi: “Mama wakhalele mutshita yagasue hagula tukhale muguhuima mu fami yetu. Tata wakhalele muenya ndaga jiakola, uvi mama wakhalele muenya gisemo. Gula mama wamona egi tushigo luko munemesa nu gutumagela tata, wakhalele gututangela mukanda wa Efeso 6:1-3. Gungima wakhalele gutuwambela makalegelo abonga a tata nu gutukuatesa ha gukotelesa mukunda natshi tudi naye gumuzumba. Gutshita ngenyi, guatukuatesele hagukhala mu guhuima.”

12. Gifua luholo 2 Timote 1:5 idi guyimonesa, gifezegeselo gia Enise giakuatesele Timote ha gutshita itshi?

¹² Tanga 2 Timote 1:5. Enise wahanele Timote gifezegeselo giabonga. Wamukuatesele hagujiya egi gutshigina gua giamatshidia guana monega mu midimo. (Yak. 2:26) Ndaga jiakhalele mukalagala Enise jiakuatesele Timote ha gujiya egi mama wenji wana zumba diago Yehowa. Timote wakotelesele egi mama wenji wakhalele nu gusuanguluga handaga wana kombelela Yehowa. Gifezegeselo gia Enise giakuatesele Timote ha gutshita itshi? Mupostolo Phaula wasonegele egi Timote wakhalele nu gutshigina guakola gifua gua mama wenji. Itshi yakuatesele Timote ha gukhala nu gutshigina guakola? Wamonele ndaga jiakhalele mukalagala gin’enji hene walanduile gifezegeselo gienji. Luholo lumoshi mangino, amama avula akuatesele gale enya fami jiawo ha gukombelela Yehowa “mukunda nu makalegelo” awo abonga. (1 Phet. 3:1, 2) Aye nji wajiya gutshita ngenyi. Luholo lutshi?

13. Mukunda natshi mama udi naye guhaga ufuta wenji nu Yehowa ha fundo dia thomo?

¹³ Khala muhaga ufuta waye nu Yehowa ha fundo dia thomo. (Mikh. 6:5, 6) Gifua amama avula, aye nji wana tshita ndaga jiavula ha gukuatesa fami yaye. Wana kalegela tangua diaye, mbongo, wana batula tulo nu wana tshita nji ndaga jiko ha gukuatesa an’aye nu ima adi nayo funu. Uvi, ushigo naye gubemba egi ndaga jiene jigukange njila ha gukolesa ufuta waye nu Yehowa. Phoso nu phoso khala muzula tangua dia gutshita gisambu, dia gulonguga Biblia hakhaye nu guya mugudibungisa gua mu hungu. Gula watshita ngenyi, mbawukolesa ufuta waye nu Yehowa nu mbawuhana gifezegeselo giabonga gudi enya fami yaye nu gudi aphangi ako.

14-15. Malongo atshi wazula mu gifezegeselo gia Leanne, Maria, nu João?

¹⁴ Tuzuelelenu mavuala anyi ifezegeselo ya amama awo yaakuatesele ha guzumba Yehowa nu gumushila mutshima. Leanne mun’a phangi Christine udi muzuela egi: “Yakhalele lamba ha gulonguga Biblia gula tata udi hene. Uvi, mama wakhalele muya mu gudibungisa gua mu hungu phoso nu phoso. Tuakhalelego mujiya ndaga jiavula mu Biblia, uvi makalegelo enji atukuatesele ha gukolesa gutshigina guetu. Tuakhalele mujiya egi Matemue a Yehowa ana longesa giamatshidia, gutuama egi tusendese guya mu gudibungisa.”

¹⁵ Tata wa Maria, wakhalele guahana ndola gula aya mu gudibungisa gua mu hungu. Maria udi muzuela egi: “Mama udi diago muenya gikhesa. Tangua ngakhalele mona wazonda ngakhalele mutuna gutshita ndaga jiko, handaga ngakhalele muvua woma mukunda nu ndaga athu ajiya guzuela. Uvi gumona gikhesa giakhalele nagio mama nu luholo luakhalele muene muhaga Yehowa ha fundo dia thomo, gua ngukuatesele ha gutuna guvua athu woma.” Tata wa João, waatunyishile haguta maga atadila Yehowa gu inzo. João udi  muzuela egi: “Ndaga yakuatele diago mutshima wami idi gumona luholo mama wakhalele hehi ha gutuna ima iko ha gusuanguluisa tata, uvi gabembelego gukombelela Yehowa.”

16. Luholo lutshi gifezegeselo gia mama giajiya gukuatesa athu ako?

¹⁶ Amama, jiyenu egi gifezegeselo gienu giajiya gukuatesa athu ako. Luholo lutshi? Tutadilenu luholo gifezegeselo gia Enise giakuatesele mupostolo Phaula. Wakhalele mujiya egi Timote wakhalele nu gutshigina gua giamatshidia “gunu guakhalele thomo nu . . . Enise.” (2 Tim. 1:5) Gui Phaula wamonele thomo gutshigina gua Enise? Idi mumonega egi muvuayaje yenji ya thomo ya gimisionere adimonele nu Enise nu Loise mu dimbo dia Liseta. Yajiya nji gukhala egi waakuatesele ha gubua Aklisto. (Makal. 14:4-18) Gungima dia ivo 15 Phaula wasonegele Timote mukanda, uvi wakhalele yowu genji muwunguluga gutshigina guakola gua Enise hene wasonegele gifezegeselo gienji hagula tuajiya gulandula. Idi yadiago egi gifezegeselo gia Enise giahanele Phaula gikhesa nu Aklisto avula a mu siekle ya thomo. Gula udi musansa an’aye uvi ushigo nu yala nga ndo mulumi’aye gashigo Temue wa Yehowa, jiya egi gutshigina guaye guakola gudi gifezegeselo giabonga gudi athu ako.

17. Itshi wajiya gutshita gula mun’aye gashigo mutshigina gukombelela Yehowa ngatshima udi mutshita ngolo ha gumulongesa?

¹⁷ Itshi wajiya gutshita gula mun’aye gashigo mutshigina gukombelela Yehowa ngatshima udi mutshita ngolo ha gumulongesa? Jiya  egi gulongesa ana guana zula tangua diavula. Luholo tudi guyimona mu gifuanesa, gula wakuna lumbale matangua ako wajiya gudihula gula mbaluzola mutshi nu gula mutshi wene mbawuhaga mabundu. Ngatshima ushigo mujiya gula mutshi wene mbawudimuzola mabundu, uvi udi naye gulandula guwumbila meya ha guwukuatesa ha gukula muabonga. (Mako 4:26-29) Luholo lumoshi, matangua ako mama wajiya gudihula gula ndaga jidi mutshita muene mbajikuatesa diago an’enji hagubua akombeledi a Yehowa. Wajiyilego gujiya gula desizio ditshi an’aye mbaazula. Uvi gula udi mulandula gutshita yagasue ha gualongesa, mbawudiguakuatesa ha gubua mafuta a Yehowa.—Ish. 22:6.

18. Luholo lutshi Yehowa wajiya gukuatesa an’aye ha gubua mafuta enji?

¹⁸ Sendese mu tangua dikulu, Yehowa wana kuatesa mavuala ha gubua mafuta enji. (Ngi. 22:9, 10) Wajiya nji gukuatesa an’aye ha gukula mu nyuma, gula adi mutshigina. (1 Kol. 3:6, 7) Ngatshima an’aye ashigo gale mukombelela Yehowa muene wana landula guazumba. (Ngi. 11:4) Gula an’aye amonesa egi adi mutshigina gumusuanguluisa, Yehowa mbawukhala hehi ha guakuatesa hagule egi abue mafuta enji. (Makal. 13:48; 2 Gudi. 16:9) Yehowa wajiya gugukuatesa ha guzuela ndaga jiawaha mu tangua diabonga, gula an’aye adi nu funu yagujiya ndaga jiene muavula. (Ish. 15:23) Wajiya gukalegela aphangi mu hungu ha guakuatesa. Ngatshima an’aye akula, Yehowa wajiya guakuatesa ha guwunguluga ndaga waalongesele tangua akhalele ene ana azonda. (Yone 14:26) Gula walandula gulongesa an’aye mu ndaga wana zuela nu ndaga wana kalagala Yehowa mbawudi gugushimbiga.

19. Itshi wajiya gutshita ha gusuanguluisa Yehowa?

¹⁹ Yehowa gana guguzumbago handaga an’aye atombele ha gumukalegela nga ndo. Wana guguzumba handaga aye nji wana gumuzumba. Gula wanasansa ana hakhaye, Yehowa udi mulaya egi muene udi Tata ya an’aye nu Mubambi waye. (Ngi. 68:5) Wajiyilego gutombela an’aye ha gukombelela Yehowa nga ndo. Uvi, gula udi mulandula gusha mutshima mu ukuateshi wa Yehowa nu udi mutshita ngolo ha gulongesa an’aye, Yehowa mbawusuanguluga nu aye.