1. Itshi yajiya gutukuatesa ha gutshita ndaga jiagasue tuajiya gukalagala mukunda nu Yehowa?

 ESUE Aklisto a giamatshidia tuana zumba Yehowa muavula. Tuana tshigina gumukalegela mudimo wabonga diago. Uvi gula tudi mutshigina gutshita ndaga jiagasue tuajiya gukalagala mukunda nu Yehowa, tudi naye gukula mu nyuma. Ha gufezegesa, tudi naye gukudisa makalegelo a Uklisto, gulonguga ndaga jiajiya gutukuatesa ha gukalegela Yehowa, nu gukamba luholo tuajiya gukuatesa athu ako.

2. Mukunda natshi tudi naye gukula mu nyuma?

² Mukunda natshi tudi naye gukamba gukula mu nyuma? Thomo tuana tshigina gusuanguluisa Tata wetu waguzumba udi mu dilu. Yehowa wana suanguluga tangua tuana kalegela ndunge nu ngolo jietu ha gumukalegela muavula. Tuana tshigina nji gukula mu nyuma hagula tuajiya gukuatesa aphangi’etu muavula. (1 Tes. 4:9, 10) Ikhale tuajiyile gale giamatshidia mualeha nga ndo tuajiya gulandula gukula mu nyuma. Tutadilenu luholo tuajiya guyikalagala.

3. Ha gutadila 1 Timote 4:12-16, itshi Phaula wawambelele Timote ha gutshita?

³ Tangua mupostolo Phaula wasonegele Timote mukanda wa thomo, Timote wakhalele wabui gale mukulu ngatshima mu tangua diene wakhalele muvuala. Uvi Phaula wamuhanele gikhesa hagulandula gukula mu nyuma. (Tanga 1 Timote 4:12-16.) Gula tuatala muabonga mbimbi jia Phaula tudi mumona egi wakhalele mutshigina egi Timote akule mu ndaga mbadi: gukudisa makalegelo a Uklisto gifua guzumba, gutshigina nu  mutshima waphelegeta nu gudihana ha gutanga muabonga gutuama dia athu avula, gukolesa athu nu gualongesa. Henyaha tutadilenu luholo gifezegeselo gia Timote giajiya gutukuatesa ha gukula mu nyuma. Tuza nji mumona ndaga jiajiya gutukuatesa ha gudihana muavula mu mudimo wa gulongesa.

4. Ha gutadila Filiphi 2:19-22, itshi yatshitshile egi Yehowa akalegele Timote muavula?

⁴ Itshi yatshitshile egi Yehowa akalegele Timote muavula? Idi makalegelo enji abonga a Uklisto. (Tanga Filiphi 2:19-22.) Hagutadila ndaga jiazuelele Phaula mukunda nu Timote, tudi mumona egi Timote wakhalele muthu wa gudibulumuisa, wakhalele wa gujinginyina gudi Nzambi, muenya gikhesa nu muthu ajiya gushila mutshima. Wakhalele muzumba aphangi nu wakhalele nji guakuatesa muavula. Hene Phaula wakhalele gumuzumba nu wamuhanele inemo yavula. (1 Kol. 4:17) Luholo lumoshi nji, gula tuakudisa makalegelo ana zumba Yehowa, muene mbawutuzumba nu mbawutukalegela muavula mu hungu.—Ngi. 25:9; 138:6.

5. (a) Itshi yajiya gugukuatesa hagujiya khadilo udi mutshigina gukudisa? (b) Gifua luholo tudi guyimona gu gifuanesa, luholo lutshi muvuala wa mukhetu udi mutshita ngolo hagudisha ha fundo dia athu ako?

⁵ Kamba gujiya makalegelo udi mutshigina gukudisa. Tshita gisambu hagula Yehowa wajiya gugukuatesa hagujiya makalegelo udi mutshigina gukudisa. Tomba khadilo udi mutshigina gukudisa. Ha gufezegesa, wajiya gukudisa khadilo dia gudihaga hafundo dia athu ako nu gukudisa nzala ya gukuatesa aphangi’etu Aklisto. Nga ndo wajiya gukudisa khadilo dia guhuiminyina nu gutotesela athu ako. Wajiya guhula futa diaye haguguwambela khadilo wajiya gukudisa.—Ish. 27:6.

6. Luholo lutshi wajiya gukudisa khadilo dimoshi udi mutshigina?

⁶ Tshita ngolo ha gutagenesa ndaga udi mutshigina gutshita. Luholo lutshi wajiya guyikalagala? Thomo udi naye gulongunga muabonga khadilo udi mutshigina gukudisa. Tangiza egi udi mutshigina gukudisa khadilo dia gutotelesa athu ako. Wajiya gusendesa gutanga Biblia nu gutangigiza ifezegeselo ya athu anyi akhalele hehi ha gutotelesela athu ako nu anyi akhalelego nu khadilo diene. Tutadilenu gifezegeselo gia Yesu. Wakhalele diago hehi ha gutotesela athu ako. (Luka 7:47, 48)  Gakhalelego phamba mutala gubola gua athu ako, wakhalele mutala makalegelo awo abonga. Uvi Afalese a mu masugu a Yesu “akhalele mumona athu ako gifua athu a githuhu.” (Luka 18:9) Gungima dia gutangigiza ifezegeselo eyi wajiya gudihula egi: ‘Itshi ngana mona gudi athu ako? Makalegelo a luholo lutshi ngana tala gudi athu ako?’ Gula idi lamba gudi aye ha gutotesela muthu, wajiya gusonega makalegelo abonga a muthu muene. Gungima dihule egi: ‘Luholo lutshi Yesu wanatadila muthu muene? Yesu wajiya gumutotesela?’ Gutshita ngenyi guajiya gugukuatesa ha gusombegesa matangi aye. Yajiya gukhala egi tuana tshita ngolo ha gutotesela muthu watutshitshila gubola. Uvi gula tudi mulandula gutshita ngolo ha gukudisa khadilo diene, mbayikhala ndaga yaleba gudi esue hagutotesela athu ako.

7. Mu gudivua nu Ishima 22:29, mu maluholo atshi Yehowa udi mukalegela athu adi mujiya midimo muabonga mangino?

⁷ Wajiya gukamba gulonguga ndaga yajiya gugukuatesa ha gutshitshila Yehowa muavula. Ha gufezegesa, hagutunga ba Betele, Jinzo jia Ufumu nu ba Salles d’assemblées, tuana khala nu funu ya athu avula. Aphangi avula ana gudihana hagutshita mudimo wene, ana longuga ndaga jiavula gudi aphangi anyi adi nu eksperianse mu mudimo wene. Gifua luholo tudi guyimona gu ifuanesa, aphangi a mala nu a akhetu adi mulonguga ndaga jiajiya guakuatesa ha gulondega luko Jinzo jia Ufumu nu ba Salles d’assemblées. Yehowa Nzambi, “Fumu wa ivo nu ivo yonu gajiyilego gufua,” nu Yesu Klisto, “Fumu ya mafumu,” adi mukalegela athu adi mujiya midimo muabonga ha gutagenesa ndaga jiakoma. (1 Tim. 1:17; 6:15; tanga Ishima 22:29.) Tudi mutshigina gutshita ngolo nu gukalegela ndaga tudi mujiya ha gutumbuisa Yehowa, uvi esue ndo.—Yone 8:54.

8. Itshi udi naye gutshita hagujiya ndaga wajiya gukudisa?

⁸ Tomba ndaga udi mutshigina gulonguga. Ndaga itshi udi mutshigina gulonguga? Hula akulu a mu hungu dienu nga ndo mutadi muwendji ndaga adi mumona egi wajiya gukudisa. Ha gufezegesa, gula aguwambela egi udi naye gusombegesa luholo luaye lua guzuela nu gulongesa, wajiya guahula ha gugukuatesa hagujiya ndaga udi naye gutshita. Gungima tshita ngolo ha gusombegesa. Luholo lutshi wajiya guyitshita?

9. Itshi wajiya gutshita ha gukalagala ndaga udi mutshigina gukudisa?

⁹ Tshita ngolo ha gukalagala ndaga udi mutshigina gukudisa. Ha gufezegesa tangiza egi udi mutshigina gukudisa luholo luaye lua gulongesa. Wajiya gulonguga muabonga gamukanda Dihane ha Gutanga nu Gulongesa. Gula aguhana devuare mu gudibungisa gua mukatshi dia phoso, wajiya guhula phangi udi nu eksperianse ha gugutegelela tangua udi mulondega devuare diaye gutuama diaguya mutshita devuare diene. Phangi muene wajiya guguhana malongo ajiya gugukuatesa. Khala mulondega ndaga udi naye gutshita gutuama, ngenyi athu mbaakotelesa egi udi muenya gikhesa nu udi muthu wagushila mutshima.—Ish. 21:5; 2 Kol. 8:22.

10. Hana gifezegeselo gidi mumonesa luholo wajiya gukudisa ndaga imoshi ngenyi.

¹⁰ Itshi wajiya gutshita gula ndaga udi mutshigina gukudisa ushigo guyitshita muabonga? Ulebigo muila! Phangi Garry gakhalelego mutanga diago muabonga. Udi muwunguluga egi wakhalele muvua musonyi tangua diakhalele mutshigina muene gutanga mu gudibungisa gua mu hungu. Uvi walanduile  gutshita ngolo ha gulonguga gutanga muabonga. Phangi muene udi muzuela egi formasio yahetele muene yamukuatesele muavula, mangino wana kalagala ba diskur mugudibungisa gua mu hungu nu gu ba asamble.

11. Gifua Timote, itshi yajiya gutukuatesa ha gutagenesa inemo yetu muabonga?

¹¹ Timote wabuile diago mulongeshi wabonga ba? Biblia yana guyizuelela ndo. Uvi tudi mujiya egi Timote watagenesele inemo yenji muabonga diago handaga walanduile malongo amuhanele Phaula. (2 Tim. 3:10) Luholo lumoshi nji, gula tualandula gulonguga ndaga tudi mutshigina gukudisa mbatutagenesa inemo yetu muabonga.

12. Gubonga gutshi wahetele gale mu ukuateshi wa athu ako?

¹² Mukut’etu agasue tuana heta gubonga mu ndaga jianakalagala athu ako. Gula akulu ana tshita gu komite yana gutadila ndaga jia mahatshi (comité de liaison hospitalier) nu akulu ana tshita gu komite yagutala athu adi nu misongo (groupe de visite aux malades) aza gututala tangua tudi gu hopital yana gutusuanguluisa muavula. Gula tuatagana nu malamba mu monyo wetu akulu ana zula tangua diagututegelela nu gutuhana gikhesa, ndaga yene yana gutusuanguluisa. Tangua tuana khala nu funu ya ukuateshi ha gulongesa Biblia, tuana suanguluga gula muvundji wa njila udi nu eksperianse watshigina gututuala ha gulongesa muthu nu watuhana malongo. Aphangi awa agasue ana suanguluga ha gutukuatesa. Tuajiya gukhala nu gusuanguluga gua luholo elu gula tudi mukuatesa aphangi. Yesu wazuelele egi: “Muthu udi muhana wana khala nu gusuanguluga guavula gubalega muthu udi muzula.” (Makal. 20:35) Gula udi mutshigina gukalagala muavula mu mudimo wa Yehowa mu ndaga tuazuelela nga mu ndaga jiko, itshi yajiya gugukuatesa ha guyitshita?

13. Gula udi mutshigina gutagenesa ndaga imoshi ngenyi, itshi udi naye gujiya?

¹³ Udi naye gujiya ndaga udi mutshigina gukalagala. Ha gufezegesa, wajiya guzuela egi, ‘ngudi mutshigina gukalagala muavula mu hungu.’ Uvi yajiya gukhala lamba mukunda nu aye hagujiya luholo lua guyikalagala, nga gujiya tangua wajiya guyitagenesa. Hene tomba ndaga imoshi udi mutshigina gukalagala.  Wajiya gusonega ndaga yene nu luholo wajiya guyitagenesa.

14. Mukunda natshi tudi naye gukhala hehi ha gusombegesa tangua tudi mutshigina gutshita ndaga imoshi?

¹⁴ Tudi naye nji gukhala hehi ha gusombegesa tangua tudi mutshigina gutshita ndaga imoshi. Mukunda natshi? Handaga ndaga jiajiya gusombegesa mu monyo wetu. Ha gufezegesa: Mupostolo Phaula wakuatesele ha gukangula hungu dihe-dihe mu dimbo dia Tesalonike. Idi yadiago egi wakhalele mutshigina gusala guene ha gukuatesa Aklisto ahe-ahe. Uvi mbalagaji jia Phaula jiatshitshile egi akatuge mu dimbo diene gungolo. (Makal. 17:1-5, 10) Gula nga Phaula watunyile gukatuga mu dimbo diene wabendele gumba aphangi’enji mu gingonza. Uvi Phaula galebelego muila. Wakhalele hehi ha gusombegesa mukunda nu ndaga jiabuile. Gungima, watumile Timote ha gukuatesa Aklisto ene ahe-ahe a gu Tesalonike mu nyuma. (1 Tes. 3:1-3) Aklisto a gu Tesalonike asuangulugile muavula luholo Timote wadihanele haguya guakuatesa.

15. Luholo lusthi tuajiya gusombegesa ndaga tudi mutshigina gutshita gula ndaga jiasombegesa mu monyo wetu? Hana gifezegeselo.

¹⁵ Tuajiya guzula longo mu ndaga Phaula watagenele najio gu Tesalonike. Yajiya gukhala egi tudi mutshigina gukalagala ndaga imoshi uvi gungima ndaga jiasombegesa nu jiatukanga njila ha gukalagala ndaga yene. (Mulo. 9:11) Gula ndaga ya luholo elu yagubuila, wajiya gukamba ndaga iko wajiya gukalagala. Phangi Ted nu mukaji’enji Hiedi atshitshile nji ngenyi. Azogele gu Betele mukunda nu misongo. Uvi, guzumba guawo gudi Yehowa guakuatesele ha gukamba luholo lua gukalagala muavula mudimo wagulongesa. Thomo, asendesele mudimo wa muvundji wa njila. Gungima, a atumile ba pionye spesiale, phangi Ted wahetele formasio ha gubua mutadi muwendji suppléant. Tangua abuile athu agukula abembelele mudimo wa mutadi muwendji. Muene nu mukaji’enji akotelesele egi ajiyilego luko gukalagala mudimo wene. Ngatshima ndaga yene yaasagesele, uvi akotelesele egi ajiya gukalegela Yehowa mu luholo luko. Phangi Ted udi muzuela egi: “Tuakotelesele egi tuajiya gukalegela Yehowa mu maluholo avula.”

16. Longo ditshi tuajiya guzula mu mukanda wa Galatiya 6:4?

¹⁶ Tuajiyilego gujiya ndaga jiagasue jiajiya gutubuila mu monyo wetu. Hene tushigo naye gutangiza egi tudi nu ndando mukunda nu inemo tudi naye nga gufuanesa ndaga tudi mukalagala nu jinyi athu ako ana kalagala. Phangi Hiedi udi muzuela egi: “Gula udi gudifuanesa nu athu ako wajiyilego gukhala nu gusuanguluga.” (Tanga Galatiya 6:4.) Idi  nu ndando ha gukamba luholo lua gukuatesa athu ako nu gukalegela Yehowa. *

17. Itshi tudi naye gutshita ha gutagenesa ndaga tudi mutshigina gutshita mu masugu adi muza?

¹⁷ Yajiya gukhala yaleba ha gutshita muavula mudimo wa Yehowa gula udi nu lujingu lualeba nu udi mutuna gulaba guzula mikudi. Khala mutshita ndaga jiazonda-zonda jinyi jiajiya gugukuatesa ha gutagenesa ndaga jiakoma udi mutshigina gukalagala. Ha gufezegesa gula udi mutshigina gubua muvundji wa njila wa tangua diagasue, wajiya gusendesa thomo nu mudimo wa muvundji wa njila wa tangua diazonda. Gula udi mutshigina gubua mukuateshi wa mudimo, wajiya guzula desizio dia gutshita muavula mudimo wa gulongesa, guya mutala athu adi mukata nu aphangi agukola a mu hungu dienu. Eksperianse udi muheta yajiya gugukuatesa ha guheta inemo iko mu masugu adi muza. Tshita ngolo ha gutagenesa muabonga ginemo giagasue giaguhanewa.—Roma 12:11.

18. Gifua luholo tudi guyimona gu gifuanesa, luholo lutshi tuajiya gulandula gifezegeselo gia phangi Beverley?

¹⁸ Mukut’etu agasue tuajiya gulandula gukamba ndaga jia mu nyuma tuajiya gukalagala nu gujitagenesa. Tutadilenu gifezegeselo gia phangi wa mukhetu Beverley udi nu ivo 75. Wakhalele nu misongo yakhalele gumusagesa ha guwenda. Uvi wakhalele nu funu ya gutshita muavula mu kampanye ga guhana emvitasio ya Guwunguluga Gufua Gua Yesu. Hene wakambele gujiya ndaga jiajiya gutshita muene. Tangua diatagenesele muene ndaga jiakhalele mutshigina muene mukunda nu kampanye wasuangulugile muavula. Gifezegeselo gienji giatumile aphangi ako ha gutshita muavula mudimo wa gulongesa. Yehowa wana suanguluga nu ndaga aphangi’etu a mala nu a akhetu agukola ana tshita, ikhale ashigo luko nu luholo luagutshita muavula.—Ngi. 71:17, 18.

19. Ndaga jitshi jia mu nyuma wajiya gutagenesa?

¹⁹ Kamba gujiya ndaga jia mu nyuma wajiya gutagenesa. Kudisa makalegelo ana suanguluisa Yehowa. Longuga ndaga yajiya gugukuatesa ha gukalagala muavula mukunda nu Nzambi nu ulondegi wenji. Kamba maluholo a gukuatesa muavula aphangi a mala nu a akhetu. * Gifua Timote, Yehowa wajiya gugukuatesa hagula ‘athu agasue mbaamone diago egi udi mukula mu nyuma.’—1 Tim. 4:15.