1. Luholo lutshi alongeshi ako ana gudivua mu ndaga yatadila gulongesa lukuma luabonga gudi athu? (Tala nji gifuanesa.)

 ESUE akombeledi a Yehowa, tuana longesa lukuma luabonga gudi athu ako handaga tuana zumba Yehowa nu tuana tshigina nji guakuatesa ha gumujiya. Alongeshi avula ana suanguluga diago nu mudimo wa gulongesa. Uvi yana khala lamba gudi ako ha gusuanguluga nu mudimo wene. Mukunda natshi? Handaga yajiya gukhala egi ako ana khala enya musonyi nu ana tangiza egi ashigo alongeshi abonga. Alongeshi ako anago gutshigina guya gu jinzo jia athu gula a atamegelego. Ako ajiya guvua woma egi athu ajiya guakaya. Ako ana tshigina ndo gusagesa athu ako. Ikhale aphangi awa ana zumba Yehowa muavula, yana khala lamba gudi ene ha gusuena hehi nu athu ashigo mujiya ha gualongesa lukuma luabonga. Uvi, ana kotelesa egi mudimo wene udi nu ndando yavula hene ana longesa muavula. Yehowa wana suanguluga muavula nu aphangi ene!

2. Gula idi lamba gudi aye ha gukhala nu gusuanguluga mu mudimo wa gulongesa, mukunda natshi ushigo naye guleba muila?

² Matangua ako yana khala nji lamba gudi aye ha gusuanguluga nu mudimo wa gulongesa mukunda nu ndaga eji tuazuelela ba? Gula idi ngenyi, ulebigo muila. Ndaga yene idi mumonesa egi udi muthu wagudibulumuisa, ushigo muthigina gudisunzula nu ushigo nji mutshigina gukamba milonga nu athu ako. Gula muthu udi mutshita ngolo ha gukalegela athu ako ndaga jiabonga ganatshigina ndo guasagesa. Tata waye wa mu dilu udi mujiya muabonga malamba udi mutagana nawo nu udi nji mutshigina gugukuatesa. (Yesh. 41:13) Mu longo edi tuza muzuelela ndaga thano jiajiya gutukuatesa ha gubinga malamba ene nu ha  gukhala nu gusuanguluga mu mudimo wa gulongesa.

MBIMBI YA NZAMBI YAJIYA GUGUHANA GIKHESA

3. Itshi yakuatesele profete Yelemiya ha gulongesa athu ako?

³ Sendese mu tangua dikulu, mbimbi ya Nzambi yahanele akombeledi enji gikhesa tangua ataganele nu malamba. Tuzuelelenu gifezegeselo gia profete Yelemiya. Wavile woma tangua Yehowa wamuhanele ginemo gia gutshita mudimo wagulongesa. Yelemiya wazuelele egi: ‘Ngushigo mujiya guzuela, handaga ngudi muvuala.’ (Yel. 1:6) Itshi yamukuatesele ha gukhala nu gikhesa? Mbimbi ya Nzambi yamuhanele gikhesa. Wazuelele egi: ‘Mbimbi yenji yabuile mu mutshima wami gifua tshuya tudi mukonda, tuathathewa mu ifuwa yami, ngajiyilego gutubamba.’ (Yel. 20:8, 9) Yakhalele lamba gudi Yelemiya ha gulongesa fundo diakhalele muene, uvi lukuma amuhanele ha gulongesa luamuhanele gikhesa ha gutshita mudimo wene.

4. Gubonga gutshi tuajiya guheta gula tudi mutanga Mbimbi ya Nzambi nu guyitangigiza? (Kolosai 1:9, 10)

⁴ Aklisto ana heta ngolo adi najio funu mu Mbimbi ya Nzambi. Tangua mupostolo Phaula wasonegele Aklisto a mu hungu dia gu Kolosai, waawambelele egi gulonguga ndaga jiavula jiatadila Yehowa mbagukuatesa aphangi’enji Aklisto ha gulandula “guzola mbuto mu mudimo wagasue wabonga” ngenyi mbayakuatesa ha “guwenda mu luholo luatagana ludi musuanguluisa diago Yehowa.” (Tanga Kolosai 1:9, 10.) Mukatshi dia midimo yene yabonga, tuajiya gutanga gulongesa lukuma luabonga. Hene gula tudi mutanga Mbimbi ya Nzambi nu gutangigiza mu ndaga tudi mutanga, tuana kolesa gutshigina guetu gudi Yehowa; tuana kotelesa nji mukunda natshi idi nu ndando ha gulongesa lukuma luabonga lua Ufumu.

5. Luholo lutshi tuajiya guheta gubonga mu ndaga tudi mutanga nu gulonguga mu Biblia?

⁵ Ha guheta gubonga mu ndaga tudi mutanga mu Mbimbi ya Nzambi, tushigo naye guyitanga, guyilonguga nga guyitangigiza holu-holu. Uvi tudi naye guzula tangua diavula ha guyikotelesa. Gula udi mutanga verse imoshi wanago gukotelesa muabonga, uyisombologago. Uvi ha guyikotelesa muabonga, kalegela Index des publications des Témoins de Jéhovah nga Guide de recherche pour les Témoins de Jéhovah. Gula udi muzula tangua dia gulonguga Mbimbi ya Nzambi, mbawukotelesa egi malongo enji adi a giamatshidia. (1 Tes. 5:21) Gula udi mutshigina diago ndaga jiene, mbawusuanguluga nji ha gujiwambela athu ako.

 KHALA GUDILONDEGA MUABONGA MUKUNDA NU MUDIMO WA GULONGESA

6. Mukunda natshi tudi naye gudilondega muabonga mukunda nu mudimo wa agulongesa?

⁶ Gula udi gudilondega muabonga, mbayishigo mukhala lamba ha guta maga nu athu. Yesu wakuatesele alandudi enji ha gudilondega gutuama egi a atume mu mudimo wa gulongesa. (Luka 10:1-11) Alandudi akhalele nu gusuanguluga mu ndaga atshitshile handaga alanduile muabonga malongo a Yesu.​—Luka 10:17.

7. Luholo lutshi tuajiya gudilondega ha guya mu mudimo wa gulongesa? (Tala nji gifuanesa.)

⁷ Luholo lutshi tuajiya gudilondega ha guya mu mudimo wa gulongesa? Tudi naye gutangigiza ndaga tudi mutshigina guzuela nu gujizuela mu luholo tuana zuela. Tuajiya nji gutangiza ndaga mbadi nga thathu athu a mu terituare yetu ana zuela nu gukamba luholo tuajiya guahana mvutu mu ndaga jiene. Tangua tudi muta maga nu athu, tukhadigo enya ndaga jiakola-kola uvi tudi naye gualelesa nu gukuata nawo ufuta.

8. Mu luholo lutshi Aklisto adi gifua mabungu a wuma mupostolo Phaula wazuelele mu gifezegeselo gienji?

⁸ Mupostolo Phaula wawambelele aphangi a mala nu akhetu egi: “Tudi nu umonyi owu mu mabungu a wuma.” (2 Kol. 4:7) Umonyi wene udi itshi? Udi lukuma luabonga lua Ufumu ludi muhuluisa mionyo ya athu. (2 Kol. 4:1) Mabungu a wuma adi mumonesa itshi? Adi mumonesa akombeledi a Nzambi ana longesa athu ako lukuma luabonga. Mu masugu a Phaula, athu akhalele mutshita mungenda akhalele mukalegela mabungu a wuma ha gubatela ima ya ndando gifua ima ya gudia, vinyo nu mbongo. Luholo lumoshi nji, Yehowa watuhanele ginemo gia gulongesa lukuma luabonga. Hene udi nu ngolo jia gutukuatesa ha guheta gikhesa tudi nagio funu ha gulandula gulongesa lukuma luene.

KHALA MUTSHITA GISAMBU HA GUHETA GIKHESA

9. Itshi yajiya gutukuatesa ha gutuna guvua woma wa athu? (Tala nji gifuanesa.)

⁹ Matangua ako tuajiya guvua woma wa athu nga gutangiza egi mbaatuna gawo gututegelela. Luholo lutshi tuajiya gubinga woma wene? Tutadile ndaga apostolo akalegele tangua a awambelele ha gubemba gulongesa. Ha fundo dia guvua woma, atshitshile gisambu gudi Yehowa ha gumutoga ukuateshi “hagula alandule gulongesa mbimbi [yenji] woma ndo.” Yehowa wahanele mvutu gu gisambu giawo mu tangua diene.  (Makal. 4:18, 29, 31) Matangua ako, gula tudi muvua woma wa athu, tudi naye nji gutoga ukuateshi gudi Yehowa mu gisambu. Toga Yehowa agukuatese ha gukolesa guzumba guaye mukunda nu athu hagula ukhadigo guavila woma ha gualongesa lukuma luabonga.

10. Luholo lutshi Yehowa wana gutukuatesa ha gutagenesa ginemo giatuhanele muene? (Yeshaya 43:10-12)

¹⁰ Yehowa watutombele ha gubua Matemue enji nu walayele egi mbawutukuatesa ha gukhala nu gikhesa. (Tanga Yeshaya 43:10-12.) Tutadilenu maluholo nguana Yehowa wana kalegela ha gutukuatesa. Thomo, Yesu wana khala nu esue tangua diagasue tuana longesa lukuma luabonga. (Mat. 28:18-20) Ya mbadi, Yehowa watombele anjelo ha gutukuatesa. (Gumo. 14:6) Ya thathu, wana gutuhana nyuma yenji yana gutukuatesa ha guwunguluga ndaga tuana longuga. (Yone 14:25, 26) Ya nguana, Yehowa wana gutuhana aphangi a mala nu a akhetu ha gutukuatesa mu mudimo wa gulongesa. Tuana heta ima yagasue tudi nayo funu ha gukhala nu gikhesa nu gulandula gulongesa, handaga Yehowa nu aphangi etu a ha mavu agasue ana gutukuatesa.

UKHADIGO MUENYA NDAGA JIA KOLA-KOLA MU MUDIMO WA GULONGESA

11. Gula udi mu mudimo wa gulongesa, itshi wajiya gutshita ha gusanga athu avula gu jinzo jiawo? (Tala nji gifuanesa.)

¹¹ Luholo lutshi wana gudivua gula waya mu mudimo wa gulongesa nu gusanga ndo athu gu inzo? Yajiya gugulebesa diago muila; uvi wajiya gudihula egi: ‘Henyaha athu a mu terituare yami adi gui?’ (Makal. 16:13) ‘Adi gu mudimo nga ayi musumba ima?’ Gula idi ngenyi, wajiya gulongesa athu udi mutagana nawo mu njila. Phangi Joshua wazuelele egi: “Ngakhalele mulongesa mu mafundo athu ana sumbisa ima nu mu mafundo a athu avula.” Muene nu mukaji’enji Bridget, akhalele musanga athu avula gu jinzo jiawo tangua akhalele muya guatala mu ngueze nu mu lusugu lua Lubingo gungima dia midi.​—Ef. 5:15, 16.

12. Itshi yajiya gutukuatesa ha gujiya ndaga athu ana gusha gutshigina nga ndaga jidi guasagesa?

¹² Gula wamona egi athu ashigo musuanguluga nu lukuma luabonga, kamba gujiya mu ndaga jitshi ana sha gutshigina nga ndaga jidi guasagesa. Phangi Joshua nu Bridget akhalele  mukalegela muhu wana khala holu dia trakte ha gusendesa guta maga nu athu. Ha gufezegesa, akhalele mukalegela trakte Luholo Lutshi Udi Mumona Biblia? gungima akhalele muzuela egi: “Athu ako ana mona Biblia gifua mukanda wa Nzambi uvi ako diago ndo. Aye udi mutangiza itshi?” Mihu ya luholo elu yana kuatesa ha gusendesa guta maga nu athu.

13. Mukunda natshi tuajiya gukhala nu gusuanguluga mu mudimo wa gulongesa ikhale athu ashigo gututegelela? (Ishima 27:11)

¹³ Ikhale athu ashigo gututegelela tangua tudi gualongesa, uvi esue tuana landula gulongesa lukuma luabonga. Mukunda natshi? Handaga tuana kalagala mudimo Yehowa nu Mun’enji ana tshigina egi tutshite, yakotelesa egi gulongesa lukuma luabonga. (Makal. 10:42) Ikhale tuasangelego nga muthu mumoshi wa guta n’enji maga nga ndo athu atuna lukuma luetu, uvi tuajiya gukhala nu gusuanguluga handaga tudi mujiya egi tuana suanguluisa Tata wetu wa mu dilu.​—Tanga Ishima 27:11.

14. Mukunda natshi tuajiya gusuanguluga gula mulongeshi mumoshi waheta muthu watshigina giamatshidia?

¹⁴ Tuajiya nji gukhala nu gusuanguluga, gula mulongeshi muko waheta muthu udi musuanguluga nu giamatshidia. Inzo Yaleha ya Mutaledi imoshi yafuanesele mudimo wa gulongesa nu athu adi mukamba mona watotshi. Ana toga athu avula ha guya mu mafundo a gudisha ha gukamba mona muene. Uvi gula wamonega, athu agasue ana suanguluga ikhale phamba muthu mumoshi wamumonyi. Luholo lumoshi nji, muthu wagasue mu hungu wana kuatesa ha gubuisa athu alandudi a Yesu. Alongeshi agasue adi nu ndando ha gulongesa athu agasue a mu terituare. Hene gula muthu mumoshi wasendesa guza mu gudibungisa, mukut’etu agasue tuana suanguluga.

KHALA MUTANGIGIZA GUZUMBA GUAYE MUKUNDA NU YEHOWA NU ATHU AKO

15. Luholo lutshi gukalegela ndaga jidi mu Matayo 22:37-39 guajiya gutukuatesa ha gukolesela mu mudimo wa gulongesa? (Tala nji holu dia gizula.)

¹⁵ Tuana kolesela mu mudimo wa gulongesa handaga tuana zumba Yehowa nu athu ako. (Tanga Matayo 22:37-39.) Tangiza luholo Yehowa wana suanguluga tangua tuana tshita mudimo wa gulongesa, nu luholo athu ako ana suanguluga tangua ana sendesa gulonguga Biblia! Tangiza nji luholo athu ana tshigina lukuma luabonga nu adi muzula desizio dia gukombelela Yehowa ajiya guheta monyo wa ivo nu ivo.​—Yone 6:40; 1 Tim. 4:16.

16. Luholo lutshi tuajiya guheta gusuanguluga mu mudimo wa gulongesa gula tushigo nu luholo lua guzoga gumbo dietu? Hana gifezegeselo.

 ¹⁶ Gudi nu ndaga yana gugukanga njila ha gutuna guzoga gumbo diaye ba? Gula idi ngenyi, tangiza ndaga wajiya gukalagala ha gumonesa egi wana zumba Yehowa nu athu ako. Mu sungi ya misongo ya coronavirus, phangi Samuel nu mukaji’enji Dania akhalelego nu luholo lua guzoga gumbo diawo. Yakhalele lamba mu sungi yene ha gulongesa uvi aphangi ene alongesele muavula nu telefone nu gusonegela athu mikanda, akhalele nji mulonguga Biblia nu athu mu Zoom. Tangua phangi Samuel wakhalele muya gu opitale hagula amusage misongo ya cancer, wakhalele mulongesa athu akhalele mutagana nawo guene. Phangi muene wazuelele egi: “Malamba tuakhalele mutagana nawo atulebesele muila, alolele nji gutshigina guetu. Tuakhalele nu funu ya guheta gusuanguluga mu mudimo wa Yehowa.” Tangua Samuel wakhalele khenji avua muabonga ndo, Dania wabuile, watshitshile mbeji thathu gakhalelego muzuga ha gitanda (giphona). Hene amuhanele chaise roulante ha guwenda nayo mbeji 6. Wazuelele egi: “Ngakhalele mutshita phamba ndaga jinyi sante yami yakhalele gunguhana njila. Ngakhalele mulongesa munganga wakhalele gungusaga nu athu akhalele muza mubemba ima gu inzo ngakhalele. Ngakhalele nji muta maga gu telefone nu mumoneshi wa minganga wa opitale yene.” Phangi Samuel nu Dania akhalelego luko mukalagala mudimo wawo gifua luholo akhalele mutshita thomo, uvi akhalele mutshita ndaga jinyi sante yawo yahanele njila ha gutshita, hene akhalele nu gusuanguluga.

17. Gubonga gutshi wajiya guheta gula udi mukalegela ndaga tuamonyi mu longo edi?

¹⁷ Tshita ngolo ha gukalegela ndaga jiagasue thano tuazuelela mu longo edi. Ndaga yagasue mukatshi dia ndaga eji thano, idi gifua mulungo (ingrédient) mu ima ya gudia. Gula abungisa milungo yene yagasue, yana fudisa diago ima. Luholo lumoshi nji, gula tudi mukalegela ndaga eji jiagasue, mbatushigo muleba muila gula tuatagana nu ndaga ya lamba mu mudimo wa gulongesa nu mbatuheta gusuanguluga guavula.