Wana Guyijiya Ba?
Mukunda natshi Davidi watombele masuta ako mukatshi dia athu akhalelego enya Isalele?
ATHU a mu ifutshi iko Davidi watombele ha gubua masuta enji akhalele, Seleke muenya Amona, Uriya muenya Hete nu Yitema muenya Moaba. a (1 Gudi. 11:39, 41, 46) Masuta ako a Davidi akhalele enya Kerete, enya Phelete nu enya Gate.” (2 Sam. 15:18) Idi naye gukhala egi enya Kerete nu enya Phelete akhalele akuakua enya Filistiya. (Ezek. 25:16) Enya gu Gate akhalele enya Filistiya.—Yosh. 13:2, 3; 1 Sam. 6:17, 18.
Mukunda natshi Davidi watombele masuta ako mukatshi dia athu akhalelego enya Isalele? Wakhalele mujiya egi athu ene akhalele yagujinginyina gudi muene, akhalele nji nu ndando gu meso a Yehowa. Ha gufezegesa, dictionnaire dimoshi diana kotelesa Biblia didi muzuela mukunda nu enya Kerete nu enya Phelete egi: “Tangua Davidi wataganele nu lamba diakola mu uhinyinyi wenji, masuta ene akhalele yagujinginyina gudi muene.” Mu luholo lutshi? Tangua “mala agasue a gu Isalele” abembele Fumu Davidi ha gulandula “muthu mumoshi wakhalele muzola nguma, jina dienji Sheba,” enya Kerete nu enya Phelete asalele nu Davidi, amukuatesele nji ha gumanesela nguma jiazolele Sheba. (2 Sam. 20:1, 2, 7) Lusugu luko, Adoniya mun’a Fumu Davidi watshiginyile gubua fumu ha fundo dia Salomo. Uvi enya Kerete nu enya Phelete asalele yagujinginyina gudi Davidi. Amukuatesele nji ha gubuisa Salomo fumu handaga muene Yehowa watombele ha gubua fumu.—1 Maf. 1:24-27, 38, 39.
Suta muko wakhalele diago yagujinginyina gudi Davidi, idi Itayi muenya Gate. Itayi nu masuta enji 600 akuatesele Fumu Davidi ha mulumbugidile mun’enji Abasaloma. Nu tangua diahuigile muene athu ako a gu Isalele ha gumulandula. Thomo Davidi wawambelele Itayi egi, gayigo mulua handaga muene gashigo muenya Isalele. Uvi Itayi wazuelele egi: ‘Fumu, ngudi guguwambela giamatshidia mu jina dia Yehowa Nzambi wa monyo nu mu jina diaye egi, mbangugulandula fundo diagasue mbawuya; ikhale gu gufua nga gu monyo!’—2 Sam. 15:6, 18-21.
Itayi wakhalele yagujinginyina gudi Davidi handaga Yehowa wamutombele ha gubua fumu
Enya Kerete nu enya Phelete nu enya Gate akhalelego enya Isalele uvi akhalele mujiya egi Yehowa udi Nzambi wa giamatshidia. Ajiyile nji egi Yehowa watombele Davidi ha gukhala fumu. Davidi wakhalele muhana Nzambi mersi luholo luakhalele muene nu masuta asalele yagujinginyina gudi muene!
a Mukhuala wa Nzambi udi mu mukanda wa Mikhuala 23:3-6 wakhalele mumonesa egi enya Amona nu enya Moaba akhalelego naye gungina mu hungu dia enya Isalele. Uvi idi naye gukhala egi mukhuala wene wakhalele mutunyisa enya ifutshi yene ha gubua diago enya Isalele uvi wakhalelego guatunyisa ha gudibungisa nawo nga gujinga hamoshi nu akombeledi a Nzambi. Tala Étude perspicace des Écritures Volume 1 diyiji 95.
