1. Ndaga itshi Yehowa wana tshigina egi tutshite?

 GULA yala nu mukaji’enji avuala mona, ana khala nu gusuanguluga guavula diago. Ana zumba mun’awo muene muavula, uvi anago gutshigina egi asale mona wa gitebe. Ana khala diago nu gikenene giavula gula mona muene gashigo mukula. Luholo lumoshi nji, Yehowa wana suanguluga tangua tuana sendesa gulonguga giamatshidia giamutadila, uvi ganago gutshigina egi tusale luholo lumoshi. (1 Kol. 3:1) Udi gututoga ha gukhala Aklisto “agukula” mu nyuma.​—1 Kol. 14:20.

2. Ndaga jitshi tuza muzuelela mu longo edi?

² Gukhala Muklisto wagukula mu nyuma gudi mukotelesa itshi? Ndaga itshi tudi naye gutshita ha gubua Aklisto a gukula mu nyuma? Mu luholo lutshi gulonguga giamatshidia gia ndando gidi mu Biblia guajiya gukolesa ufuta wetu nu Yehowa? Mukunda natshi tushigo naye gutangiza egi tuakudile gale mu nyuma, tushigo naye luko gutshita ngolo ha gukolesa ufuta wetu nu Yehowa? Mu longo edi, tuza muheta mvutu gu mihu eyi.

GUKHALA MUKLISTO WAGUKULA MU NYUMA GUDI MUKOTELESA ITSHI?

3. Gukhala Muklisto wagukula mu nyuma gudi mukotelesa itshi?

³ Mbimbi ya Greke yabalumuiwe mu Bilbia egi “gukula” idi mukotelesa gukhala muthu “wa gukula.” a (1 Kol. 2:6) Gifua luholo mona wa gitebe wana landula gukula ha gubua mbuta, esue nji tudi naye gulandula gukula ha gukolesa ufuta wetu nu Yehowa. Ngenyi mbatubua Aklisto a gukula mu nyuma. Yadiago, ikhale tudi gale athu a gukula mu nyuma, tudi naye gukalagala ndaga jidi mumonesa egi tudi mulandula gukula. (1 Tim. 4:15) Ikhale tudi athu a gukula nga mavuala, mukut’etu agasue tudi naye gulandula  gukula mu nyuma. Uvi ndaga jitshi jiajiya gumonesa egi phangi mumoshi wabua Muklisto wa gukula mu nyuma?

4. Ndaga jitshi jiana monesa egi phangi mumoshi wabua Muklisto wa gukula mu nyuma?

⁴ Muklisto wa gukula mu nyuma wana tumagela mikhuala ya Nzambi yagasue, uvi gana tshita ndo phamba ndaga jiana tshigina muene. Idi yadiago egi luholo gashigo muthu watagana, wana jimbila nji ndaga jiko. Uvi lusugu nu lusugu wana tshita ngolo ha gutangiza nu gukalagala ndaga jidi gudivua nu gutshigina gua Yehowa. Wana sudiga umuthu uhe-uhe nu wana kalagala ngolo ha gukhala nu matangi gifua Yehowa. (Ef. 4:22-24) Ganago gukhala nu funu ya liste ya mikhuala yajiya gumuwambela ndaga jidi naye muene gutshita, handaga wana kalegela malongo nu mikhuala ya Yehowa ha guzula badesizio abonga. Gula wazula desizio, wana tshita ngolo ha guditagenesa.​—1 Kol. 9:26, 27.

5. Ndaga itshi yajiya gubuila Muklisto munu gashigo mukula mu nyuma? (Efeso 4:14, 15)

⁵ Uvi Muklisto gashigo mukula mu nyuma, wajiya gubemba egi “malongo a mambo” nu “ndunge jiabola athu adi mukalegela ha guhuiga athu ako” jimuhuige. Wajiya nji gutshigina ndaga jia mambo jiana zuele ba aposta b (Tanga Efeso 4:14, 15.) Wajiya nji guvila athu ako ginjiongo, guabambela umbalagaji, gulaba guvua khabu nga gubua mu gubola gula ndaga imoshi ya lola gutshigina guenji.​—1 Kol. 3:3.

6. Mukunda natshi tuajiya gufuanesa gukula mu nyuma nu mona wa zonda udi mukula? (Tala nji gifuanesa.)

⁶ Gifua luholo tuayimonyi gu thunda, Biblia idi mufuanesa gukula mu nyuma nu mona wa gitebe udi mukula ha gubua mbuta. Mona wazonda ganago gujiya ndaga jiavula, hene wana tshigina egi muthu wa gukula a mubambe nu a mutuameze. Ha gufezegesa, mama mumoshi wajiya guwambela mun’enji wa galenge ha gumukuata gu koko tangua adi muzawuga njila. Gula mona muene wakula, gin’enji wajiya gumubemba ha gubatula mukidi (njila) hakhenji; uvi mbawulandula gumuwunguluisa ha gutala khanda nu khanda gutuama dia gubatula mukidi. Tangua mona muene wana kula, wana jiya luholo muene hakhenji wajiya gulenga ingonza. Ana azonda ana tshigina egi athu a gukula a akuatese ha gulenga ingonza. Luholo lumoshi nji Muklisto gashigo wagukula mu nyuma, wana khala  nu funu ya ukuateshi wa phangi wa gukula mu nyuma ha gulenga ndaga yagasue yajiya gubolesa ufuta wenji nu Yehowa nu guzula badesizio abonga. Uvi gula Aklisto a gukula mu nyuma adi mutshigina guzula badesizio, ana tangigiza muavula malongo a Biblia ha gujiya matangi a Yehowa mu ndaga yene, gungima ana zula badesizio abonga.

7. Muklisto wa gukula mu nyuma wana khala nu funu ya ukuateshi wa athu ako ba?

⁷ Idi mukotelesa egi Muklisto wa gukula mu nyuma gana khala ndo nu funu ya ukuateshi nga wa muthu mumoshi ba? Ndo sha. Matangua ako wana toga ukuateshi gudi athu ako. Uvi muthu gashigo wa gukula mu nyuma, wajiya gutoga athu ako ha gumuwambela ndaga yagutshita nga gubemba egi athu ene amuzudile desizio. Uvi gula Muklisto wa gukula mu nyuma udi mutshigina guzula desizio, wana toga ukuateshi gudi aphangi adi nu ndunge nu eksperianse yavula. Uvi wana jiya egi, Yehowa wana tshigina egi muene hakhenji ‘adibatele ginemo gienji.’​—Gal. 6:5.

8. Mu ndaga jitshi Aklisto a gukula mu nyuma ana khala agudisha?

⁸ Athu agasue a gukula anago gukhala luholo lumoshi, luholo lumoshi nji Aklisto agasue agukula mu nyuma anago gukhala nu makalegelo a luholo lumoshi. Ha gufezegesa ako mukatshi diawo ajiya gukhala nu ndunge jiavula, ako nu gikhesa giavula, ako a hana muavula uvi ako ana vuila athu ako khenda jiavula diago. Luko, gula Aklisto mbadi a gukula mu nyuma atagana nu ndaga ya luholo lumoshi, ajiya gukalagala ndaga jia gudisha. Uvi ndaga jiene jiagasue jidi gudivua nu malongo a Biblia. Ndaga jia luholo elu jiana bua muavula gula idi mutoga egi Aklisto azule badesizio adi mutadila mutshima wawo. Hene gula athu ako azula badesizio agudisha nu awo anago guasophesa. Uvi ana tshita ngolo ha gukhala hamoshi mu guhuima.​—Roma 14:10; 1 Kol. 1:10.

ITSHI TUDI NAYE GUTSHITA HA GUBUA AKLISTO A GUKULA MU NYUMA?

9. Tuajiya gukula mu nyuma gula tushigo mutshita gikhesa? Hana gifezegeselo.

⁹ Mona wazonda ganago gutshita nga gima gimoshi ha gukula, uvi ha gukula mu nyuma yana toga gutshita ngolo. Ha gufezegesa, aphangi a gu Kolinto atshiginyile lukuma luabonga nu abatijiwe. Gungima ahetele nyuma ya Nzambi nu a longugile ndaga jiavula gudi Phaula. (Makal. 18:8-11) Uvi gungima dia ivo yavula, Aklisto avula mukatshi diawo akhalelego mukula mu nyuma. (1 Kol. 3:2) Itshi tuajiya gutshita hagula ndaga ya luholo elu itubuilago?

10. Itshi tudi naye gutshita ha gubua Aklisto a gukula mu nyuma? (Yuda 20)

¹⁰ Ha gubua Aklisto a gukula mu nyuma, thomo esue hakhetu tudi naye gumonesa egi tudi nu nzala yakola yagukula. “Athu a heya” ana tshigina gusala gifua ana a zonda mu nyuma, mbaashigo mukula mu nyuma nga hazonda. (Ish. 1:22) Tuanago gutshigina gukhala gifua muthu wagukula udi mulenga inemo nu udi mubemba egi mvuaji jienji jimuzudila badesizio. Uvi tudi naye gubata inemo yetu nu gulandula gukolesa ufuta wetu nu Yehowa. (Tanga Yuda 20.) Gula udi mutshigina gubua Muklisto wa gukula mu nyuma, khala mutshita gisambu hagula Yehowa aguhane “nzala nu ngolo jia gutshita ndaga.”​—Fili. 2:13.

11. Itshi Yehowa watuhanele ha gutukuatesa ha gubua Aklisto a gukula mu nyuma? (Efeso 4:11-13)

¹¹ Yehowa ganago gututoga ha gukula mu nyuma mu luholo luetu hakhetu. Uvi watuhanele abambi nu alongeshi mu hungu ha gutukhuatesa ha gukhala nu ufuta wakola n’enji nu “ha gubua athu a gukula, yakotelesa egi athu a gukula diago gifua Klisto.” (Tanga Efeso 4:11-13.) Yehowa wana gutukuatesa nji mu njila ya nyuma yenji ha gukhala nu “matangi a Klisto.” (1 Kol. 2:14-16) Luko, Nzambi watuhanele ba Evanjile nguana ha gutukuatesa ha gujiya luholo Yesu wakhalele  mutangiza nu guzuela nu gutshita ndaga tangua diakhalele muene ha mavu. Gula tudi mulandula luholo Yesu wakhalele mutangiza nu gutshita ndaga, tuajiya gubua Aklisto a gukula mu nyuma.

LUHOLO GIAMATSHIDIA GIDI MU BIBLIA GIAJIYA GUTUKUATESA

12. “Malongo a thomo atadila Klisto” adi itshi?

¹² Ha gubua athu a gukula mu nyuma, tudi naye gulonguga ndaga jiavula gubalega “malongo a thomo atadila Klisto.” Malongo ako mukatshi dia malongo ene tualongugile thomo, akhalele mutadila gubalumuna mutshima, gukhala nu gutshigina, gubatijiwa nu gusha gutshigina mu longo dia gufuzumuga. (Heb. 6:1, 2) Malongo awa adi mukatshi dia malongo a thomo Aklisto agasue ana gusha gutshigina. Hene tangua mupostolo Phetelo walongesele athu mu lusugu lua Pantekote, watangele nji ndaga jiene. (Makal. 2:32-35, 38) Esue nji tudi naye gutshigina malongo awa a thomo ha gubua alandudi a Klisto. Ha gufezegesa, Phaula wazuelele egi muthu wagasue udi mutuna longo dia gufuzumuga gajiyilego gukhala mulandudi wa Klisto. (1 Kol. 15:12-14) Uvi ha gubua Aklisto a gukula mu nyuma tudi naye gulonguga ndaga jiavula gubalega malongo a thomo a Biblia.

13. Itshi tudi naye gutshita ha guheta gubonga gua ima ya gudia yakola idi muzuelewa mu Hebelu 5:14? (Tala nji gifuanesa.)

¹³ Uvi ima ya gudia yakola idi yagudisha nu malongo a thomo. Handaga yana monesa mikhuala nu malongo a Yehowa ana gutukuatesa ha gukotelesa matangi enji. Ha guheta gubonga gua malongo ene, tudi naye gulonguga Biblia nu gutangigiza mu ndaga tuatangi nu gutshita ngolo ha gukalegela ndaga jiene. Gula tuatshita ngenyi, mbayitukuatesa ha guzula badesizio adi musuanguluisa Yehowa. c​—Tanga Hebelu 5:14.

14. Luholo lutshi Phaula wakuatesele Aklisto a gu Kolinto ha gukula mu nyuma?

¹⁴ Gula Biblia yazuelelego ndaga imoshi haphelo, yana khala lamba gudi Aklisto ashigo a gukula mu nyuma ha guzula desizio diabonga. Gula gushigo nu mukhuala wa Biblia udi muzuelela ndaga imoshi ngenyi, athu ako ajiya gutshita ndaga yagasue adi mutshigina. Ako ana hula gula gudi nu mukhuala wana zuelela ndaga yene. Ha gufezegesa, yajiya gukhala egi Aklisto a gu Kolinto ahudile Phaula gula guakhalele  nu mukhuala wakhalele guahana njila ha gudia ima yahanewe mulambu gudi nzambi jia isongo. Phaula gaawambelelego ndaga akhalele naye gutshita. Uvi wamonesele egi muthu wagasue mukatshi diawo, wakhalele naye “gutshita” ndaga inyi mutshima wenji wakhalele gumutuma ha gutshita. Waawambelele malongo akhalele naye gukuatesa muthu wagasue ha gukhala nu mutshima waphelegeta nu ha gutuna gubuisa athu ako mu gubola. (1 Kol. 8:4, 7-9) Phaula wakuatesele Aklisto a gu Kolinto ha gukula mu nyuma, ngenyi ajiya gukalegela ndunge jiawo jinyi alongele gale ha fundo dia gubemba egi athu ako a azudile badesizio nga gukamba mikhuala mu ndaga jiagasue.

15. Luholo lutshi Phaula wakuatesele enya Yuda abuile Aklisto ha gulandula gukula mu nyuma?

¹⁵ Tuajiya guzula longo diko dia ndando mu ndaga Phaula wasonegele enya Yuda abuile Aklisto. Ako mukatshi diawo akhalelego luko mukula mu nyuma; uvi akhalele “muvutuga luko munua mele ha fundo dia gudia ima yakola” ya mu nyuma. (Heb. 5:12) Akhalelego luko mulonguga nu gutshigina malongo ahe-ahe Yehowa wakhalele gualongesa mu njila ya hungu. (Ish. 4:18) Ha gufezegesa, mulambu wa Klisto wakhalele wahanewe gale ivo 30 yabalega; uvi enya Yuda avula akhalele mulandula guzuela egi athu adi naye gutumagela Mukhuala wa Moize, ikhale Mukhuala wene wakhalele wakatudiwe gale. (Roma 10:4; Tito 1:10) Ivo yene 30 yakhalele yavula hagula enya Yuda akotelese egi akhalelego naye luko gulandula gutumagela Mukhuala wa Moize! Muthu wagasue watangele mukanda wasonegele Phaula mu ukuateshi wa nyuma ya Nzambi gudi enya Yuda abuile Aklisto, wakhalele mutshigina egi mukanda wene udi diago nu giamatshidia gia ndando. Mukanda wene waakuatesele ha gumona egi luholo luhe-luhe lua gukombelela Yehowa mu njila ya Yesu luakhalele luabonga diago. Waahanele nji gikhesa ha gulandula gulongesa ikhale akhalele mutagana nu usageshi wa enya Yuda.​—Heb. 10:19-23.

TUKHADIGO MUTANGIZA EGI TUAKUDILE GALE MU NYUMA

16. Ndaga itshi iko tudi naye gutshita ha gubua Aklisto a gukula mu nyuma?

¹⁶ Tudi naye gutshita ngolo ha gubua Aklisto a gukula mu nyuma nu gulandula gukula. Hene tudi naye gumonesa gutema ha gutuna gutangiza egi tuakudile gale mu nyuma, handaga matangi ene ajiya gutukanga njila ha gukolesa ufuta wetu nu Yehowa. (1 Kol. 10:12) Tudi naye nji  “guditala muabonga” ha gujiya gula tudi mulandula gukula mu nyuma.​—2 Kol. 13:5.

17. Luholo lutshi mukanda Phaula wasonegele Aklisto a gu Kolosai udi mumonesa egi idi nu ndando ha gulandula gukula mu nyuma?

¹⁷ Mu mukanda Phaula wasonegele Aklisto a gu Kolosai, wazuelele nji egi tudi naye gulandula gukula mu nyuma. Ikhale Aklisto ene akhalele athu a gukula mu nyuma, uvi Phaula waatemesele hagula abembigo egi matangi a athu a ha mavu awa a ahuige. (Kol. 2:6-10) Yajiya gukhala egi Epafrase wakhalele mujiya aphangi mu hungu muabonga, wakhalele mukombelela muavula hagula ajiya “gukhala athu a gukula,” nga gubua Aklisto a gukula mu nyuma. (Kol. 4:12) Ndaga yene idi gutulongesa itshi? Phaula nu Epafrase akotelesele egi hagula muthu abue Muklisto wa gukula mu nyuma, udi naye gutshita ngolo nu gutoga ukuateshi gudi Nzambi. Akhalele mutshigina egi Aklisto ene alandule gukula mu nyuma ngatshima akhalele mutagana nu malamba.

18. Ndaga itshi yajiya gubuila Muklisto wa gukula mu nyuma? (Tala nji gifuanesa.)

¹⁸ Phaula wawambelele enya Yuda abuile Aklisto egi, Muklisto wa gukula mu nyuma wajiya nji gutotesa ufuta wenji nu Yehowa mayilago. Gula Muklisto mumoshi gashigo mutumagela Yehowa, yajiya gukhala diago lamba gudi muene ha gubalumuna mutshima. Ngenyi, yajiya nji gukhala lamba gudi Yehowa ha gumutotesela. Ndaga ya gusuanguluga idi egi enya Yuda anyi abuile Aklisto akalegelego ndaga ya luholo elu. (Heb. 6:4-9) Itshi tuajiya guzuela mukunda nu aphangi ako a mu masugu etu alebele mu nyuma nga azolewe mu hungu uvi gungima abalumuina mutshima? Luholo ana balumuna mutshima nu gudibulumuisa guagasue, ana monesa egi adi yagudisha nu athu anyi Phaula wazuelediele. Yadiago, tangua ana vutuga gudi Yehowa, ana monesa egi adi nu funu ya ukuateshi wenji. (Ezek. 34:15, 16) Akulu ajiya gutoga phangi mumoshi wa gukula mu nyuma ha guakuatesa ha gukolesa luko ufuta wawo nu Yehowa.

19. Felela ditshi tudi naye gudishila?

¹⁹ Gula udi mutshita ngolo ha gubua Muklisto wa gukula mu nyuma, mbawutagenesa felela diaye! Landula gulonguga giamatshidia gia ndando gidi mu Biblia nu gutshita ngolo ha gukhala nu matangi abonga gifua Yehowa. Uvi gula wabuile gale Muklisto wa gukula mu nyuma, tshita yagasue ha gulandula luko gukula.