Watangele muabonga malongo a Inzo Yaleha ya Mutaledi a givo egi ba? Gula idi ngenyi, wajiya guhana mvutu gu mihu eyi:

Yakoba 5:11 idi mumonesa egi Yehowa udi ‘wazala pha nu guzumba guakola’ nu udi Nzambi wa ‘khenda.’ Mbimbi jiene jidi gututuma ha gusha mutshima mu ndaga itshi?

Tudi mujiya egi Yehowa wana gutumonesela khenda jienji tangua ana gututosela gubola guetu. Yakoba 5:11 idi muzuela nji egi Yehowa wana gutukuatesa nu guzumba guagasue. Tuana tshita ngolo ha gulandula gifezegeselo gienji.—w21.01, diyiji 21.

Mukunda natshi Yehowa wahanele athu ako ginemo gia gutuameza?

Guzumba guamutumine ha gutshita ngenyi. Watshitshile ngenyi hagula fami yenji ikhale mu guhuima, nu ituamezewe mu luholo luabonga. Muthu wagasue mu fami ya Yehowa udi mutshita ndaga mu gudivua nu utuameji owu, wana jiya muthu udi naye guzula desizio dia gisugishilo. Wana jiya nji muthu wana zula fundo dia thomo ha gutadila ba desizio ene.—w21.02, diyiji 3.

Mukunda natshi Aklisto adi naye gumonesa gutema tangua adi mukalegela Internet nga ba application ako ha gutuma ba mesaje?

Gula muthu watshigina gukalegela ba application a luholo elu, udi naye gutomba athu a gubalegesa nawo tangua nu gutema guagasue. Yajiya gukhala lamba ha gutomba mafuta nu gutema gula tudi mu groupe ya athu avula. (1 Tim. 5:13) Yajiya nji gukhala gingonza ha gumuanga ba mesaje anyi tushigo mujiya diago muabonga, nga ndo guwambela aphangi tudi nawo mu groupe ima tudi musumbisa.—w21.03, diyiji 31.

Mukunda natshi Nzambi wahanele njila egi Yesu amone malamba nu afue?

Thomo, Yesu wakhalele naye gushiyiwa ha mutshi wa lamba ha gukula enya Yuda gu mukumbu atewe. (Gal. 3:10, 13) Ya mbadi, Yehowa wakhadile muhana Yesu formasio ha gukhala Nganga-nzambi Wakoma. Ya thathu, luholo Yesu wasalele wagujinginyina uu nu gugufua, idi mumonesa egi athu ajiya gusala yagujinginyina nga atagana nu malamba akola. (Yobo 1:9-11)—w21.04, diyiji 16-17.

Itshi wajiya gutshita gula idi lamba ha guheta athu mu mudimo wa gulongesa?

Wajiya gulongesa mu tangua dinyi athu ajiya gukhala gumbo diawo. Nga ndo wajiya gulongesa mu mafundo agudisha. Wajiya nji gukalegela ba metode ako gifua gusonegela athu mikanda.—w21.05, diyiji 15-16.

Itshi mupostolo Phaula watshiginyile guzuela tangua wazuelele egi: ‘Luholo ngakhalele mutumagela mukhuala, ngafuile mu ndaga yatadila mukhuala’? (Gal. 2:19)

Mukhuala wa Moize wamonesele gubola gua athu haphelo. Wakuatesele nji enya Isalele ha gusha gutshigina gudi Klisto. (Gal. 3:19, 24) Ndaga yene yakuatesele Phaula ha gutshigina Klisto. Ngenyi Phaula ‘wafuile mu ndaga yatadila mukhuala;’ yakotelesa egi mukhuala wakhalelego luko gumutuameza.—w21.06, diyiji 31.

Mukunda natshi tudi muzuela egi Yehowa udi diago gifezegeselo giabonga mu ndaga yatadila gukolesela?

Yehowa udi gifezegeselo giabonga handaga wana kolesela mu ndaga jiavula: jina dienji diaseguluiwe, athu ana lumbugila utuameji wenji, an’enji ako alumbugile, Satana wana gumumbila mambo, akombeledi’enji ana mona malamba, mafut’enji ana gufua, athu abola ana monesa athu ako lamba, athu adi mubolesa nji ima yafugile muene.—w21.07, diyiji 9-12.

Gifezegeselo gitshi giabonga Yozefe wabembele mu ndaga yatadila guhuiminyina?

Yozefe wakolesele mu ndaga jiabola jiamukalegele aphangi’enji. Amusumbishile gu Ejipitu, hahetele muene guene, amumbidile mambo hene gambiwe mu bologo ivo yavula.—w21.08, diyiji 12.

Ndaga itshi Hagai 2:6-9, 20-22 yazuelele mukunda nu mudimo wa gunyigisa mu luholo lua gifuanesa?

Enya ifutshi yavula anago gutshigina lukuma luabonga lua Ufumu, uvi athu avula ana tshigina giamatshidia. Gualeha ndo ifutshi mbayinyigishiwa luko tangua mbayishiyiwa.—w21.09, diyiji 15-19.

Mukunda natshi tudi naye gulandula gutshita mudimo wetu wa gulongesa?

Yehowa wana mona ngolo jietu, wana suanguluga nji nu ndaga tuana tshita. Gula tudi mulandula gukalagala mudimo wa gulongesa, mbatuheta monyo wa ivo nu ivo.—w21.10, diyiji 25-26.

Luholo lutshi Levi mukhapho 19 yajiya gutukuatesa ha gukalegela longo didi muzuela egi: ‘Mudi naye gukhala athu a gijila mu makalegelo enu agasue’? (1 Phet. 1:15)

Idi naye gukhala egi mbimbi jidi mu verse eyi jiazudiwe mu Levi 19:2. Mukhapho 19 wa mukanda wa Levi udi mumonesa maluholo avula tuajiya gukalegela ndaga jidi mu 1 Phetelo 1:15.—w21.12, diyiji 3-4.