1. Ndaga jitshi jiabonga Matemue a Yehowa ana kalagala?

 BIBLIA yadiangele guzuela egi akombeledi a Nzambi ‘mbaadihana nu mutshima umoshi’ mu mudimo wa Yehowa, mu utuameji wa Yesu. (Ngi. 110:3) Profesi eyi idi diago mutagenesewa mangino. Givo giagasue, Matemue a Yehowa ana balegesa matangua avula mu mudimo wa gulongesa lukuma luabonga. Anago guafuta makuta, uvi ana kalagala mudimo wene nu mutshima wagasue. Ana kuatesa nji aphangi’awo Aklisto, ana guahana ima adi nayo funu nu ana guakuatesa mu nyuma. Akulu nu akuateshi a mudimo, ana balegesa matangua avula ha gulondega gudibungisa gua mu hungu nu gutala aphangi’awo Aklisto ha guakolesa mu nyuma. Itshi yana tuma Matemue a Yehowa ha gutshita ndaga eji jiagasue? Idi guzumba guawo mukunda nu Yehowa nu athu ako.—Mat. 22:37-39.

2. Ha gutadila ndaga jidi mu Roma 15:1-3, gifezegeselo gitshi Yesu watuhanele?

² Yesu wahanele gifezegeselo giabonga luholo luakhalele muene mukamba thomo gubonga gua athu ako. Esue nji tudi naye gukalagala ngolo ha gulandula gifezegeselo gienji. (Tanga Roma 15:1-3.) Gula tuatshita ngenyi, mbatuheta gubonga guavula. Yesu wazuelele egi: “Muthu udi muhana wana khala nu gusuanguluga guavula gubalega muthu udi muzula.”—Makal. 20:35.

3. Itshi tuza mumona mu longo edi?

³ Mu longo edi, tuza mumona ndaga jiakalegele Yesu ha gukuatesa  athu ako nu luholo tuajiya gulandula gifezegeselo gienji. Tuza mumona nji luholo tuajiya gudihana muavula ha gukuatesa athu ako.

4. Luholo lutshi Yesu wamonesele egi wana kamba thomo gubonga gua athu ako?

⁴ Yesu wakuatesele athu ikhale tangua diakhalele muene waguhuila. Lusugu lumoshi Yesu wakhalele gu mulundu, yajiya gukhala egi hehi nu dimbo dia Kaphelenauma. Athu avula ajile gudi muene hagula a alongese. Yesu wakhalele wabalegesa gale phipha ya mudidi nu gukombelela Yehowa. Idi naye gukhala egi wakhalele waguhuila muavula. Uvi tangua amonele athu avula muza gudi muene, wavuile khenda mukunda nu phutu nu athu ako akhalele nu misongo. Waasagele, gungima wakalegele diskur dimoshi diabonga diago diaahanele gikhesa. Diskur diene diana tamegewa egi Diskur Holu dia Mulundu.—Luka 6:12-20.

5. Luholo lutshi atata ajiya gulandula gifezegeselo gia Yesu tangua adi aguhuila?

⁵ Luholo lutshi atata ajiya gulandula gifezegeselo gia Yesu? Tangiza gale egi tata mumoshi wakatuga gu mudimo, wavutuga gu inzo mu ngueze. Udi naye gutuameza Gukombelela gua mu Fami mu lusugu luene uvi udi waguhuila. Matangi amujila ha guyitshita mu lusugu luko, uvi watoga Yehowa ha gumukuatesa. Gungima, Yehowa wamuhana ngolo jia gukalagala Gukombelela gua mu Fami gifua luholo ana tshita phoso nu phoso. Ndaga yene yalongesa an’awo longo dimoshi dia ndando. Akotelesa egi mvuaji jiawo jiana haga ndaga jia mu nyuma ha fundo dia thomo tangua diagasue.

6. Hana gifezegeselo gidi mumonesa luholo Yesu wakambele thomo gubonga gua athu ako.

⁶ Yesu wakhalele mubalegesa tangua nu athu ikhale tangua diakhalele muene mutshigina gukhala hakhenji. Tangizenu gale luholo Yesu wadivile tangua diavile muene egi futa dienji Yone mubatiji washiyiwa. Yesu wavile gikenene giavula. Biblia idi muzuela egi: ‘Havile Yesu egi Yone washiyiwe, wakatugile ha fundo dinyi, wanginyine mu wato ha guya mukhala ha fundo diko hakhenji.’ (Mat. 14:10-13) Tuakotelesa diago mukunda  natshi Yesu watshiginyile guya mukhala hakhenji. Athu avula nji mangino ana tshigina gudikhalela hakhawo gula adi nu gikenene. Uvi Yesu gakhalelego nu luholo lua gudikhalela hakhenji, handaga athu avula adiangele guheta ha fundo diakhalele muene mutshigina guya. Itshi Yesu wakalegele? “Waavidile khenda” nu watangijile ndaga akhalele najio funu. Yesu wakotelesele egi athu ene akhalele nu funu ya ukuateshi wa Nzambi. Hene “wasendesele gualongesa ndaga jiavula.” (Mako 6:31-34; Luka 9:10, 11) Galongeselego ndaga jiazonda, uvi ndaga jiavula.

7-8. Hana gifezegeselo gidi mumonesa luholo akulu ana landula khadilo dia Yesu ha gukamba thomo gubonga gua aphangi mu hungu.

⁷ Luholo lutshi akulu ana landula gifezegeselo gia Yesu? Tuana suanguluga muavula nu mudimo wakola akulu ana kalagala mukunda nu gubonga guetu! Aphangi avula mu hungu anago gujiya midimo yavula akulu ana kalagala. Ha gufezegesa, gula phangi mumoshi udi nu funu ya ukuateshi gu hôpital, akulu ana tshita mudimo mu comité de liaison hospitalier ana guya mu phushi ha gumukuatesa. Matangua avula, ndaga eji jiana kalegewa mukatshi dia phipha! Uvi luholo ana guvuila aphangi adi mu lamba khenda, akulu awa nu enya fami jiawo ana kamba thomo gubonga gua aphangi’awo Aklisto.

⁸ Akulu ana gudihana nji muavula mu mudimo wa gutunga Jinzo jia Ufumu nu gukuatesa aphangi adi mubuila malamba. Ana balegesa nji matangua avula ha gulongesa nu gukolesa aphangi mu hungu. Tudi mushimana akulu agasue nu fami jiawo mukunda nu mudimo wakola ana kalagala. Yehowa mbawumikuatesa mukunda nu mudimo wenu wakola! Uvi akulu adi naye guhaga ndaga yagasue ha  fundo diayo. Ashigo naye gubalegesa tangua diavula mu ndaga jia mu hungu, uvi guheta ndo tangua dia gukuatesa enya fami jiawo.

9. Ha gutadila Filiphi 2:4, 5, khadilo ditshi Aklisto agasue adi naye gukhala nadio?

⁹ Tanga Filiphi 2:4, 5. Mukut’etu agasue tushigo akulu, uvi tuajiya gulandula khadilo dia Yesu dia gukuatesa athu ako. Biblia idi muzuela egi Yesu ‘wabuile gifua muhiga.’ (Fili. 2:7) Verse eyi idi gutulongesa itshi? Muhiga nga muenya mudimo wabonga wana kamba luholo lua gusuanguluisa fumi’enji. Esue nji tudi ahiga a Yehowa nu tudi enya mudimo a aphangi’etu. Hene tuana kamba maluholo a gudihana muavula mu mudimo wa Yehowa nu ha gukuatesa aphangi’etu a Aklisto. Uvi tutalenu luholo tuajiya guyikalagala.

10. Mihu itshi tuajiya gudihula?

¹⁰ Kamba gujiya gula wakhala nu khadilo dia gukuatesa athu ako. Ha guyijiya, dihule egi: ‘Ngana gudihana nu mutshima umoshi ha gukuatesa athu ako ba? Itshi ngajiya gukalagala gula angutoga ha guya mutala phangi mumoshi wa yala wagukola, nga ha gukuatesa phangi mumoshi wa mukhetu wagukola ha guya n’enji mu gudibungisa gua mu hungu? Gula hungu dietu didi nu funu ya bavolontere ha guya gulondega nga guweva mafundo tuana kalegela asamble nga Inzo ya Ufumu, ngana tshigina nu mutshima umoshi ba?’ Tangua tuadihanele gudi Yehowa, tuamulayile egi mbatumuhana ima yetu yagasue. Hene Yehowa wana suanguluga gula tudi mukalegela tangua nu ngolo nu ima yetu iko ha gukuatesa aphangi’etu. Gula tuamona egi gudi nu ndaga tudi naye gusombegesa, itshi tuajiya gutshita?

11. Luholo lutshi gisambu giajiya gugukuatesa ha gudihana muavula ha gukuatesa athu ako?

¹¹ Wambela Yehowa ndaga jiagasue mu gisambu. Gula wamona egi gudi nu ndaga wajiya gusombegesa uvi ushigo mujiya luholo lua guyikalagala, itshi udi naye gutshita? Toga Yehowa agukuatese, muwambele ndaga jiagasue jidi mu mutshima waye nu luholo udi gudivua. Mutoge nji aguhane ‘nzala nu ngolo jia gutshita ndaga.’—Fili. 2:13.

12. Luholo lutshi aphangi a mavuala anyi abatijiwe gale ajiya gukuatesa mahungu awo?

¹² Gula udi phangi wa yala wa muvuala wabatijiwe gale, toga Yehowa agukuatese ha gukudisa nzala ya gudihana muavula ha gukuatesa aphangi mu hungu. Mu ifutshi iko, akulu adi avula gubalega akuateshi a mudimo. Uvi akuateshi avula a mudimo adi athu a gukola. Mangino alongeshi a Ufumu adi muvula, hene tudi nu funu ya akuateshi a mudimo a mavuala hagula ajiya gukuatesa akulu ha gutagenesa muabonga inemo yawo mu hungu. Mbawusuanguluga muavula gula wadihana ha guya mukuatesa fundo didi nu funu ya ukuateshi. Mukunda natshi? Handaga mbawusuanguluisa Yehowa, aphangi nji mbaamona egi udi diago mutshigina guakuatesa. Luko mbawuheta gusuanguluga guavula luholo udi mukuatesa athu ako.

13-14. Ndaga jitshi tuajiya gukalagala ha gukuatesa aphangi’etu a mala nu akhetu? (Tala gifuanesa holu dia gizula.)

¹³ Kamba gujiya muabonga aphangi adi nu funu ya ukuateshi. Mupostolo Phaula wawambelele Aklisto a gu Yudea egi: “Mujimbilago gutshita ndaga jiabonga nu gukhapha ima mudi nayo nu athu ako, handaga Nzambi wana suanguluga nu milambu ya luholo elu.” (Heb. 13:16) Waahanele longo diabonga diago! Gungima dia ivo, Aklisto anyi akhalele gu Yudea abembele jinzo jiawo nu midimo yawo nu aphangi’awo, ‘alengele ha guya gu milundu.’ (Mat. 24:16) Mu tangua diene, yakhalele diago nu ndando egi adikuatese.  Hagula Aklisto ene ajidile nu ima yazonda inyi akhalele nayo, akhalele naye gukalegela longo diahanele mupostolo Phaula dia gukhapha ima yawo nu athu ako.

¹⁴ Aphangi adi nu funu ya ukuateshi ajiyilego gutuwambela tangua diagasue ndaga adi najio funu. Ha gufezegesa, gula phangi wa yala wafuisa mukaji’enji, wana khala nu gikenene giavula. Tuajiya gudihula egi, phangi muene udi nu funu egi tumuhane ima ya gudia nga makuta a transport nga muthu wajiya gumukuatesa nu midimo iko gu inzo ba? Uvi phangi muene wajiya guvua woma egi gula watuwambela ndaga jiagasue adi najio funu, idi gifua udi gutusagesa. Wajiya gusuanguluga muavula gula esue hakhetu tuamukuatesa nu ima adi nayo funu. Tushigo naye gutangiza egi muthu muko mbawumukuatesa nga ndo muene hakhenji mbawutuwambela ndaga adi najio funu hagula tumukuatese. Dihule egi: ‘Gula nga ame ngatagana nu lamba dia luholo elu, ndaga itshi ngajiya gutshigina egi aphangi angukalegele?’

15. Itshi tudi naye gukalagala ha gukhala hehi ha gukuatesa athu ako?

¹⁵ Khala hehi ha gukuatesa athu ako. Idi yadiago egi mu hungu dienu, mudi nu aphangi ana khala hehi ha gukuatesa athu ako. Tangua tuana guatoga ukuateshi, aphangi ene anago gutangiza egi tuana guashinjiga. Uvi ana gutukuatesa diago nu mutshima umoshi. Tuana tshigina gulandula gifezegeselo giawo! Phangi Alan udi mukulu mu hungu, udi nu ivo gubalega 40, wana khala hehi ha gukuatesa athu ako gifua muatshitshile Yesu. Udi muzuela egi: “Yesu wakhalele nu ndaga jiavula jia gukalagala. Uvi athu a maluholo agasue akhalele guya gudi muene; akhalelego muvua woma ha gumutoga ukuateshi handaga akhalele gumumona egi wakhalele diago hehi ha guakuatesa. Ame nji ngana tshigina gulandula  gifezegeselo gia Yesu gia gukhala hehi ha gukuatesa athu ako nu gudisagesa mukunda nu ene.”

16. Luholo lutshi ndaga jidi mu Ngimbo 119:59, 60 jiajiya gutukuatesa ha gulandula muabonga gifezegeselo gia Yesu?

¹⁶ Tushigo naye guleba muila gula tushigo mulandula muabonga gifezegeselo gia Yesu. (Yak. 3:2) Ha gufezegesa, mona wa khalasa gajiyilego gubalega mulongeshi wenji. Uvi gula wakalagala ngolo ha gujiya ndaga jiajimbila muene nu walandula kiawaha gifezegeselo gia mulongeshi wenji, mbawubua gifua mulongeshi wenji. Esue nji gula tudi mutumagela ndaga tudi mulonguga mu Biblia nu tushigo muleba muila gula tuakalagala gubola, mbatulandula muabonga gifegeselo gia Yesu.—Tanga Ngimbo 119:59, 60.

17-18. Gula tuakalagala ngolo ha gulandula khadilo dia Yesu dia gukuatesa athu ako, gubonga gutshi mbatuheta?

¹⁷ Gula tudi nu khadilo dia gukuatesa athu, mbayituma nji athu ako ha gulandula gifezegeselo gietu. Mukulu mumoshi jina dienji Tim, udi muzuela egi: “Tudi nu aphangi ako mu hungu dietu abuile akuateshi a mudimo tangua diakhalele ene mavuala. Ndaga iko yaatumine ha gudihana ha gubua akuateshi a mudimo idi egi alanduile gifezegeselo gia aphangi anyi akhalele gudihana ha gukuatesa athu ako. Aphangi ene a mavuala ana kuatesa muavula aphangi a mu hungu nu akulu.”

¹⁸ Athu avula mangino ana kamba phamba gubonga guawo. Uvi akombeledi a Yehowa akhala a gudisha nu athu agasue. Tuasuanguluga ha gumona luholo Yesu wakhalele mukuatesa athu ako. Esue nji tudi naye gulandula gifezegeselo gienji. Tuajiyilego gukalagala ndaga jiagasue gifua muatshitshile Yesu, handaga tushigo athu atagana. Uvi tuajiya “gulandula nganyo jienji muabonga.” (1 Phet. 2:21) Gula tuakalagala ngolo ha gulandula khadilo dia Yesu dia gukuatesa athu ako, mbatukhala nu gusuanguluga handaga tudi musuanguluisa Yehowa.