1. Mukunda natshi ana gutuhana malongo? Mukunda natshi mukut’etu agasue tuana khala nu funu ya malongo?

 MUKUT’ETU agasue tuakhala nu funu ya malongo tangua diagasue. Matangua ako, tuajiya gutoga malongo gudi muthu mumoshi tuana nemesa muavula. Nga ndo, phangi mumoshi wana gudisagesa mukunda nu esue wajiya gutuwambela egi tudi mutshigina guzula “desizio diabola” diajiya gutubatela malamba. (Gal. 6:1) Tuajiya nji guheta malongo ako, gula atuwambela egi ndaga tuakalagala idi yabola. Ngatshima atuhana malongo mukunda nu ndaga itshi, tudi naye guategelela. Gutshita ngenyi gudi ndaga yabonga mukunda nu esue, guajiya nji guhuluisa monyo wetu!—Ish. 6:23.

2. Ha gutadila Ishima 12:15, mukunda natshi tudi naye gutegelela malongo?

² Verse ya kuata muto wa lumene wa longo edi idi muzuela egi: ‘Tegelela mbimbi jia athu atema.’ (Ish. 22:17) Gushigo nga muthu mumoshi wana jiya ndaga jiagasue, uvi gudi nu athu ako ana khala nu ndunge nu eksperianse yavula gubalega esue. (Tanga Ishima 12:15.) Tuana monesa egi tudi athu agudibulumuisa gula tudi mutegelela malongo. Yana monesa egi tuana jiya egi gudi nu ndaga jinyi tuajiyilego gukalagala nu tuana khala nu funu ya ukuateshi ha gutagenesa mafelela etu. Nyuma ya Nzambi yakuatesele Fumu Solomo ha gusonega egi: ‘Ndaga jiana kalegewa muabonga gula ahanyi a malongo adi avula.’—Ish. 15:22.

3. Mu maluholo atshi tuajiya guheta malongo?

³ Tuajiya guheta malongo mbala imoshi gudi aphangi. Ha gufezegesa, mukulu mumoshi nga phangi muko wa gukula mu nyuma wajiya gutuhana malongo mukunda nu ndaga imoshi tudi naye gusombegesa. Gula phangi mumoshi watuhana malongo akatuga mu Biblia, idi mumonesa egi wana gutuzumba muavula. Hene tudi naye gutegelela malongo ene nu guakalegela. Uvi tuajiya nji guheta malongo mu luholo luko. Luholo lutshi? Mu njila ya Biblia nga mu mikanda yetu. Tangua tudi mutanga Biblia nga mikanda yetu  iko, tuajiya gumona ndaga imoshi adi muzuelela idi mutoga egi tutangize nu tusombegese khadilo dietu.—Heb. 4:12.

4. Ha gutadila Mulongeshi 7:9, khadilo ditshi tudi naye gutuna tangua adi gutuhana malongo?

⁴ Idi yadiago egi, yajiya gukhala lamba ha gutegelela nu gutumagela malongo adi mukatuga gudi aphangi. Matangua ako tuajiya nji guvua khabu. Mukunda natshi? Ikhale tuana jiya egi tushigo athu atagana, uvi yajiya gukhala lamba ha gutshigina malongo atuhanyi phangi mumoshi mukunda nu ndaga imoshi tuakalagala. (Tanga Mulongeshi 7:9.) Tuajiya gusendesa gudibingisa. Tuajiya nji guhula muthu watuhanyi malongo ndaga yamutumi ha gutuhana malongo ene, nga guvua khabu mukunda nu luholo luenji lua gutuhana malongo. Tuajiya gusendesa guzuela ndaga jiabola mukunda nu muthu watuhanyi malongo nga gutangiza egi: ‘Muene diago gajiyilego gunguhana malongo, handaga wana tshita nji ndaga jiabola!’ Gula tushigo musuanguluga nu malongo adi gutuhanewa, tuajiya guatuna nga gukamba muthu muko wajiya gutuhana malongo tudi mutshigina gutegelela.

5. Itshi tuza mumona mu longo edi?

⁵ Mu longo edi, tuza mumona ifezegeselo ya Biblia idi mumonesa athu atunyile malongo nu anyi atshiginyile malongo. Tuza mumona nji ndaga yajiya gutukuatesa ha gutshigina malongo nu gubonga tuajiya guheta mu malongo ene.

6. Gifezegeselo gia Fumu Lehoboama gidi gutulongesa itshi gula atuhana malongo?

⁶ Tutadilenu gifezegeselo gia Lehoboama. Tangua diabuile muene fumu wa Isalele, athu ajile gumutoga ha gulebesa mukhuala waahanele sh’enji Solomo. Lehoboama wayile mutoga malongo gudi manene a gu Isalele hagula amukuatese ha gujiya mvutu ya guhana athu ene. Manene amuwambelele ha gukalagala ndaga jiakhalele gumutoga athu, hagula akhale gumutumagela tangua diagasue. (1 Maf. 12:3-7) Idi mumonega egi Lehoboama gasuangulugilego nu malongo amuhanele manene, hene wayile mumona athu a gindongo gienji. Yajiya gukhala egi athu ene akhalele nu ivo 40 nu ndambo, akhalele nji mujiya ndaga jiavula. (2 Gudi. 12:13) Uvi amuhanelego malongo abonga. Amuwambelele ha gukolesa luko mukhuala waahanele sh’enji Solomo. (1 Maf. 12:8-11) Lehoboama wakhalele naye guhula Yehowa mu gisambu ha gujiya gula malongo atshi akhalele naye gulandula. Uvi watunyile malongo amuhanele manene, walanduile malongo a athu a gindongo gienji handaga akhalele gumusuanguluisa. Ndaga yene yabatele Lehoboama nu enya Isalele malamba avula. Idi gutulongesa itshi? Matangua ako ajiya gutuhana malongo ashigo gutusuanguluisa. Uvi gula malongo ene akatuga mu Mbimbi ya Nzambi, tudi naye guatshigina.

7. Gifezegeselo gia Fumu Oziase gidi gutulongesa itshi?

⁷ Fumu Oziase nji watunyile malongo. Wanginyile mu tempelo ya Yehowa ha guwetshia uhafu ha giwotshielo, hoho yakhalele ginemo gia nganga-nzambi. Nganga-nzambi jia Yehowa jiamuwambelele egi: ‘Oziase, ushigo naye guwetshia uhafu mukunda nu Yehowa, handaga ishigo mudimo waye! Udi mudimo wangane wa nganga-nzambi.’ Itshi yakalegele Oziase? Gula nga Oziase wavuile malongo a nganga-nzambi nu gudibulumuisa guagasue, nu wakatugile mbala imoshi mu tempelo, nga Yehowa wamutotesele. Uvi ‘Oziase . . . wavuile khabu jiavula.’ Mukunda natshi Oziase watunyile malongo a nganga-nzambi? Idi mumonega egi luholo akhalele fumu, wadivuile egi wajiya gukalagala ndaga jiagasue jiatshigina muene. Uvi Yehowa gasuangulugilego nga hazonda. Luholo Oziase wakalegele ndaga gakhalelego naye gutshita, Yehowa wamuhanele ndola, wakatele misongo ya hute. Hene wasalele ‘muenya hute uu nu gu gufua guenji.’ (2 Gudi. 26:16-21) Gifezegeselo gia Oziase gidi gutulongesa egi ikhale tudi akuatshi, gula tuatuna malongo adi mukatuga mu Biblia, Yehowa nji mbawututuna.

8. Yobo wakalegele itshi tangua amuhanele malongo?

⁸ Tuakatuga gumona ifezegeselo ya athu atunyine malongo. Henyaha tutalenu ifezegeselo ya athu ahetele gubonga handaga atshiginyine malongo. Tudi musendesa nu Yobo. Yobo gakhalelego muthu watagana, uvi wakhalele muzumba Nzambi nu gumuvuila woma. Tangua diakhalele muene mumona malamba akola, wazuelele mbimbi jiko jiabola. Hene wahetele malongo gudi Elihu nu gudi Yehowa. Yobo wazuelele itshi mukunda nu malongo ene? Waatshinyile nu gudibulumuisa guagasue. Wazuelele egi: ‘Ngakhalelego mujiya ndaga ngakhalele muzuela . . . Ngudi muvua musonyi mukunda nu ima ngakhalele muzuela. Ngaditumbiga mu fuphi nu mu uto ha gumonesa egi ngabalumuna mutshima.’ Yehowa wakuatesele Yobo handaga wakhalele muthu wa gudibulumuisa.—Yobo 42:3-6, 12-17.

9. Moize wakalegele itshi tangua amuhanele malongo? Gifezegeselo gienji gidi gutulongesa itshi?

⁹ Moize nji udi gifezegeselo giabonga handaga watshiginyile malongo amuhanele tangua akalegele ndaga jiabola. Lusugu lumoshi, Moize wavuile khabu nu gatumbuishilego Yehowa. Mukunda nu ndaga yene, Moize ganginyinego mu Mavu a Gutendelela. (Lutang. 20:1-13) Tangua Moize watogele Yehowa ha gutadila luko desizio dienji, Yehowa wamulezele egi: ‘Unguwambelago luko nga ndaga imoshi mukunda nu mulonga owu.’ (Mikh. 3:23-27) Uvi Moize gavuilego khabu, watshiginyile desizio dia Yehowa. Hene Yehowa walanduile gumukalegela ha gutuameza enya Isalele. (Mikh. 4:1) Gula atuhana malongo, tudi naye gulandula gifezegeselo gia Yobo nu gia Moize handaga atshiginyile malongo nu gudibulumuisa guagasue. Yobo wasombegesele matangi enji, gakambelego gudibingisa. Moize wamonesele egi watshiginyile malongo a Yehowa, handaga wasalele wagujinginyina gudi muene ikhale gakhalelego luko nu luendu lua gungina mu Mavu a Gutendelela.

10. (a) Ha gutadila Ishima 4:10-13, gubonga gutshi tuajiya guheta gula tuatshigina malongo? (b) Khadilo ditshi diamonesele aphangi tangua a ahanele malongo?

¹⁰ Gula tualandula gifezegeselo gia Yobo nu gia Moize, mbatuheta gubonga guavula. (Tanga Ishima 4:10-13.) Mangino tudi nji nu aphangi avula a mala nu a akhetu ana tshigina malongo nu gudibulumuisa guagasue. Tutalenu ndaga yakalegele phangi Emmanuel, wa gu Congo Kinshasa, tangua amuhanele malongo. Udi muzuela egi: “Aphangi a mu hungu dietu a gukula mu nyuma amonele egi ngakhalele muleba mu nyuma, hene ajile gungukuatesa. Ngatshiginyile malongo awo, angukuatesele muavula diago.” * Phangi mumoshi wa mukhetu jina dienji Megan, udi muvundji wa njila gu Canada. Udi muzuela mukunda nu malongo egi: “Gula anguhana malongo, matangua avula ana khalago diago anyi ngana tshigina guvua. Uvi mu guzuela guabonga, ene ngana khala nawo funu.” Phangi Marko wa gu Croatie udi muzuela egi: “Ngatotesele ginemo ngakhalele nagio mu hungu. Uvi tangua ngana tangiza ndaga yene, ngana kotelesa egi malongo anguhanele aphangi angukuatesele ha gukolesa luko ufuta wami nu Yehowa.”

11. Itshi yazuelele phangi Karl Klein mu ndaga yatadila gutshigina malongo?

¹¹ Tutadilenu gifezegeselo gia phangi Karl Klein wakhalele mu Hunji dia Akulu Atuameji. Phangi Karl watshiginyile malongo nu gudibulumuisa guagasue. Wakhalele futa diakola dia phangi Joseph Rutherford. Mu lumene luenji ludi mu Inzo Yaleha ya Mutaledi, Phangi Klein wazuelele egi lusugu lumoshi, phangi Rutherford wamuhanele longo dimoshi diakola. Wazuelele egi: “Thomo ngasuangulugilego nu longo diene. Uvi mu lusugu lualanduile, phangi Rutherford wangumonele, wanguwambelele nu gusuanguluga guagasue egi, ‘Moyo Karl!’ Uvi luholo ngakhalele nu khabu mukunda nu longo anguhanele, ngatayelego moyo wenji muabonga. Wanguwambelele egi, ‘Karl,  kangula meso! Diabulu udi mukamba gugukuata ha muheto!’ Ngavuile musonyi, ngamuvutudile egi, ‘Udisagesa ndo phangi Rutherford, ngushigo naye nu mulonga.’ Uvi muene wakhalele mujiya egi ngamuvidile khabu, hene wanguwambelele egi, ‘Gima ndo Karl, uvi khala watema. Diabulu udi mukamba gugukuata ha muheto wenji.’ Phangi Rutherford wakhalele muzuela giamatshidia! Gula tuabambela phangi’etu khabu mu mutshima handaga watuwambela ndaga yabola tuakalagala . . . , idi gifua tudi muhana Diabulu njila ya gutukuata ha muheto wenji.” * (Ef. 4:25-27) Phangi Klein watshiginyine longo diamuhanele phangi Rutherford. Asalele nji mafuta akola.

12. Luholo lutshi gudibulumuisa guajiya gutukuatesa ha gutshigina malongo? (Ngimbo 141:5)

¹² Itshi yajiya gutukuatesa ha gutshigina malongo? Tudi naye gukhala athu a gudibulumuisa. Tudi naye nji gujiya egi tushigo athu atagana, matangua ako tuana kalagala ndaga jiabola. Gifua luholo tuayimonyi mu paragrafe jiabalega, Yobo wazuelele mbimbi jiko jiabola. Uvi gungima, wasombegesele matangi enji, hene Yehowa wamukuatesele. Mukunda natshi? Handaga wakhalele muthu wa gudibulumuisa. Yobo wamonesele egi wakhalele muthu wa gudibulumuisa tangua diatshiginyile muene malongo amuhanele Elihu, ikhale Elihu wakhalele galenge genji. (Yobo 32:6, 7) Idi gutulongesa itshi? Gudibulumuisa guajiya gutukuatesa ha gutshigina malongo ikhale tudi mutangiza egi ashigo gututadila, nga ndo gula muthu udi gutuhana nawo udi galenge getu. Mukulu mumoshi wa gu Canada udi muzuela egi: “Tuanago gudimona gifua luholo athu ako ana gutumona. Hene idi lamba ha gusombegesa makalegelo etu gula muthu muko gatuhanelego malongo.” Idi nu ndando yavula handaga mukut’etu agasue tuana tshigina gukudisa makalegelo abonga nu gukhala alongeshi awaha a lukuma luabonga.—Tanga Ngimbo 141:5.

13. Gula atuhana malongo, luholo lutshi tudi naye guatadila?

¹³ Khala mujiya egi malongo ana gutuhanewa ana monesa egi Nzambi wana gutuzumba. Yehowa wana kalagala ndaga mukunda nu gubonga guetu. (Ish. 4:20-22) Wana monesa egi wana gutuzumba tangua diana gutuhana muene malongo mu njila ya Biblia, ya mikanda yetu nu ya aphangi’ etu Aklisto. Hebelu 12:9, 10 idi muzuela egi Nzambi wana gutuhana malongo ‘mukunda nu gubonga guetu.’

14. Gula atuhana malongo, itshi tudi naye gutala?

¹⁴ Suanguluga nu malongo, uvi utadigo luholo malongo ene aguhanewa. Matangua ako tuajiya gumona egi atuhanelego malongo mu luholo luabonga. Idi yadiago egi muthu udi muhana malongo, udi naye guahana mu luholo luabonga  hagula athu a atshigine. * (Gal. 6:1) Uvi gula atuhana malongo, tudi naye gutala phamba luholo malongo ene ajiya gutukuatesa, ikhale tudi mutangiza egi muthu muene gatuhanelego nawo mu luholo luabonga. Hene tuajiya gudihula egi: ‘Ikhale muthu wanguhana malongo mu luholo luabola, uvi ndaga jiko jiazuedi muene jidi jia giamatshidia ba? Ngajiya gubuita mutshima mu luholo luanguhanyi muene malongo ha gutala phamba gubonga ngajiya guheta mu malongo ene ba?’ Gula tudi mutala phamba gubonga tuajiya guheta mu malongo agasue adi gutuhanewa, mbatumonesa egi tudi athu atema.—Ish. 15:31.

15. Mukunda natshi tudi naye gutoga malongo?

¹⁵ Biblia idi gutumonesa egi tudi naye gutoga malongo. Ishima 13:10 idi muzuela egi: ‘Muthu wana toga malongo, udi muenya ndunge.’ Ndaga eyi idi ya giamatshidia, handaga athu anyi ana toga malongo ana gukula muabonga mu nyuma gubalega athu ana nengena egi athu aze guahana malongo. Hene ukhadigo munengena egi athu aze guguhana malongo, aye hakhaye udi naye gutoga malongo.

16. Tuajiya gutoga malongo mukunda nu ndaga jitshi?

¹⁶ Tangua ditshi tuajiya gutoga malongo gudi aphangi’etu Aklisto? Tutadilenu ifezegeselo eyi. (1) Phangi mumoshi wa mukhetu watoga phangi muko wa gukula mu nyuma ha guya n’enji mu mudimo wa gulongesa. Gungima wamutoga malongo ha gujiya ndaga ajiya gukalagala ha gubua mulongeshi wabonga. (2) Phangi mumoshi wa mukhetu udi undumbu, udi mutshigina gusumba milele, hene watoga malongo gudi phangi muko wa mukhetu wa gukula mu nyuma ha gujiya gula milele adi mutshigina gusumba idi yabonga. (3) Phangi mumoshi wa yala waheta luendu lua gukalagala diskur dienji dia thomo. Watoga phangi muko wana tshita badiskur muabonga hagula ategelele diskur dienji, gungima amuhane malongo ajiya gumukuatesa ha gukalagala badiskur muabonga. Aphangi anyi ana kalagala badiskur sendese mualeha, ajiya nji gutoga malongo gudi aphangi ako ana kalagala badiskur muabonga. Gungima, adi naye gukalegela malongo ene.

17. Itshi tuajiya gukalagala ha guheta gubonga gula atuhana malongo?

¹⁷ Mu masugu adi muza, mukut’etu agasue mbatuhanewa malongo gudi aphangi’etu; mbatuheta nji malongo adi mukatuga mu Biblia nga mu mikanda yetu. Hene gula atuhana malongo, tudi naye gukalegela ndaga tuamona mu longo edi. Tudi naye gukhala athu agudibulumuisa; tudi naye gutala phamba luholo malongo ene ajiya gutukuatesa, ikhale muthu muene gatuhanelego nawo mu luholo luabonga. Luko, tudi naye gukalegela malongo ene. Gushigo nga muthu wavualewe watema. Uvi Biblia idi muzuela egi gula ‘tuategelela malongo nu tuatshigina ndola, mbatubua athu atema.’—Ish. 19:20.