MU TANGUA dikulu, fami ya yala yakhalele muhana ima gudi fami ya mukhetu gula fami jiene mbadi jiatshigina egi an’awo adizule mu ulo. Akhalele muhana ima ya ndando, shitu nga makuta. Uvi matangua ako mala akhalele mukalegela mvuaji jia mukhetu mudimo ha guzula mukhetu mu ulo. Ha gufezegesa, Yakobo watshiginyile gutshita mudimo ivo sambadi ha guzula Lashele mu ulo. (Gis. 29:17, 18, 20) Mukunda natshi yakhalele mutoga egi ahane ima nga gutshita mudimo gutuama dia guzula mukhetu mu ulo?

Muenya ndunge mumoshi, jina dienji Carol Meyers udi muzuela egi: “Mu tangua dikulu, mudimo wa mahia wakhalele nu ndando yavula. Ana akhetu akhalele nji mutshita mudimo wa mahia. Hene, akhalele muhana ima ya ulo gudi fami ya mukhetu handaga mun’awo wakhalele guatshitshila mudimo wa mahia wakhalele muya gudi mulumi’enji.” Guhana ima ya ulo guakhalele mukuatesa nji fami ya yala nu ya mukhetu ha gukhala nu gudivua guabonga. Ngenyi gula fami imoshi yabuila malamba, akhalele gudikuatesa. Luko, ima akhalele muhana yakhalele mumonesa egi mukhetu wazudiwa mu ulo, gashigo luko mu utuameji nu mu ubambi wa sh’enji uvi wa mulumi’enji.

Uvi guhana ima ha guzula mukhetu mu ulo gushigo mukotelesa egi mukhetu wakhalele gifua gima gia gusumbisa. Mukanda Les institutions de l’Ancien Testament udi muzuela egi: “Luholo yala wakhalele naye guhana makuta nga ima iko ha guzula mukhetu mu ulo, guabuishile ulo wa enya Isalele gifua akhalele musumba akhetu. Uvi yajiya gukhala egi ima akhalele muhana, yakhalele kado akhalele muhana mu fami ya mukhetu, uvi akhalelego guyihana ha gusumba mukhetu.”

Mangino mu ifutshi yavula, athu ana landula guhana ima ha guzula mukhetu mu ulo. Gula Aklisto atshigina gulomba ima ya ulo, adi naye “gumonesa gudi athu agasue egi ashigo enya ndaga jiakola-kola.” Ashigo naye gutoga ima yavula-vula. (Fili. 4:5; 1 Kol. 10:32, 33) Gula atshita ngenyi, mbaamonesa egi anago “guzumba makuta,” nu ashigo nu nzala yakola ya ima. (2 Tim. 3:2) Hene, gula Aklisto ashigo mutoga ima yavula ya ulo, mbayishigo mutuma phangi wa yala ha guzula tangua diavula dia gukamba makuta nu ima iko ya ulo. Yajiyilego nji gumutuma ha gubemba mudimo wenji wa muvundji wa njila, ha gutshita mudimo tangua diagasue hagula ahete makuta atagana ha gusumba ima yavula ya ulo.

Mu ifutshi iko, mafumu a leta ana guhaga ndando ya makuta athu adi naye guhana ha guzula mukhetu mu ulo. Gula mu gifutshi gienu nji idi ngenyi, Aklisto adi naye gutumagela mukhuala wene. Mukunda natshi? Handaga Mbimbi ya Nzambi yana gutoga Aklisto ha “gutumagela mafumu a leta” nu mikhuala inyi yanago gushiya mikhuala ya Nzambi.—Roma 13:1; Makal. 5:29.