LONGO DIA 1
‘Athu ana Kamba Yehowa Mbaaheta ima Yagasue Yabonga’
MUKHAPHO WA GIVO 2022 UDI EGI: ‘Athu ana kamba Yehowa mbaaheta ima yagasue yabonga.’—NGI. 34:10.
LUNGIMBO 4 “Jéhovah est mon Berger”
NDAGA JIDI MU LONGO EDI *
Davidi wataganele nu malamba, uvi wakhalele gudivua egi ‘wakhalele nu ima yagasue yabonga’ (Tala paragrafe 1-3) *
1. Ndaga itshi yalamba Davidi wataganele nayo?
DAVIDI wakhalele mulenga handaga Saula, fumu wa ngolo wa gu Isalele, wakhalele mukamba ha gumushiya. Tangua Davidi wavuile nzala, wayile mu dimbo dia Nobe, watogele egi amuhane phamba mapha thano. (1 Sam. 21:1, 3) Gungima muene nu athu enji ayile gudisuega mu wina wa seso. (1 Sam. 22:1) Mukunda natshi Davidi wakhalele mulenga?
2. Ndaga jitshi jiabola Saula wakalegele? (1 Samuele 23:16, 17)
2 Saula wakhalele muvuila Dividi ginjiongo handaga athu avula akhalele muzumba Davidi, wakhalele nji mubinga ita yavula. Saula wakhalele mujiya egi Yehowa watombele Davidi ha gukhala fumu ha fundo dienji, handaga muene watunyine gutumagela Yehowa. (Tanga 1 Samuele 23:16, 17.) Uvi Saula walanduile guhinyina gu Isalele, wakhalele nu masuta avula nu athu avula akhalele gumukuatesa, hene Davidi wakhalele mulenga ha guhuluisa monyo wenji. Saula watangijile diago egi wajiya gukanga Nzambi njila ha gubuisa Davidi fumu ba? (Yesh. 55:11) Biblia yanago guzuela ngenyi; uvi tudi mujiya egi Saula wadimbile mu gingonza. Handaga athu ana Kamba guluisa Nzambi anago gubinga nga hazonda!
3. Davidi wadivile luholo lutshi tangua diakhalele muene mutagana nu malamba?
3 Davidi wakhalele muthu wagudibulumuisa. Ishigo muene waditombele ha gukhala fumu wa Isalele, uvi Yehowa wamutombele. (1 Sam. 16:1, 12, 13) Saula wasendesele gumona Davidi gifua mbalagaji wenji wakola. Uvi Davidi gavidilego Yehowa khabu mukunda nu malamba akhalele mutagana nawo. Nga luholo gakhalelego nu ima yavula ya gudia nu luholo akhalele gudisuega mu maseso. Yajiya gukhala egi Davidi wasonegele Ngimbo 34 tangua diakhalele muene gudisuega mu wina wa seso. Mbimbi jia mukhapho wa givo egi jiazudiwa nji mu mukanda wene. Jidi muzuela egi: ‘Athu ana kamba Yehowa mbaaheta ima yagasue yabonga.’—Ngi. 34:10.
4. Mihu itshi tuza mutadila? Mukunda natshi mihu yene idi nu ndando?
4 Mangino akombeledi avula a Yehowa adi mumona lamba dia guheta ima ya gudia nu ima iko. * Avula mukatshi diawo adi mutagana nu malamba ene mu sungi eyi ya misongo ya corona virus. Luholo tudi musuena hehi nu tangua dia “lamba diakola,” mbatumona luko malamba avula. (Mat. 24:21) Henyaha tutadilenu mihu eyi nguana: Luholo lutshi Davidi ‘wahetele ima yagasue yabonga’? Mukunda natshi tudi naye gusuanguluga nu ima tudi nayo? Mukunda natshi tudi musha mutshima egi Yehowa mbawutukuatesa? Luholo lutshi tuajiya gudilonda mangino mukunda nu masugu adi muza?
‘MBANGUSHIGO MUKAMBA NGA GIMA’
5-6. Luholo lutshi Ngimbo 23:1-6 idi gutukuatesa ha gukotelesa ndaga jiatshiginyile guzuela Davidi tangua diazuelele muene egi akombeledi a Yehowa ‘mbaaheta ima yagasue yabonga’?
5 Tangua Davidi wazuelele egi akombeledi a Yehowa ‘mbaaheta ima yagasue yabonga,’ itshi yatshiginyile muene guzuela? Tangua diasonegele muene Ngimbo 23, wakalegele mbimbi jia luholo lumoshi jidi mu Ngimbo 34. Ngimbo 23 yajiya gutukuatesa ha gukotelesa ndaga jiatshiginyile muene guzuela. (Tanga Ngimbo 23:1-6.) Davidi wasendesele Lungimbo luene nu mbimbi eji: ‘Yehowa udi Mubambi wami. Mbangushigo mukamba nga gima.’ Mu verse jiko jia lungimbo luene, Davidi watangele ndaga jidi nu ndando yavula gifua: ima yabonga yamuhanele Yehowa handaga wamutshiginyile gifua mubambi wenji. Yehowa wamutuamezele “mu njila jiatagana,” wamukuatesele nji mu tangua dia lamba nu mu tangua dia gusuanguluga. Davidi wakhalele mujiya egi ikhale Yehowa ‘udi gumukhalesa mu muangu ula lembelembe,’ uvi mbawutagana nji nu malamba. Davidi wakhalele nu mbalagaji jiavula, matangua ako walebele nji muila. Yakhalele gifua udi muwenda ‘mu baba dilabui.’ Uvi luholo Yehowa wakhalele Mubambi wenji, Davidi ‘gavuilego woma.’
6 Henyaha tuaheta mvutu gu muhu wetu udi muzuela egi: Luholo lutshi Davidi ‘wahetele ima yagasue yabonga’? Davidi wakhalele nu ima yagasue akhalele nayo funu ha gukhala nu ufuta wabonga nu Yehowa. Gusuanguluga guenji guakhalelego mukatuga mu ima akhalele nayo. Uvi wakhalele musuanguluga nu ima yakhalele gumuhana Yehowa. Ima yakhalele nu ndando yavula gudi muene idi egi Yehowa wakhalele gumukuatesa nu gumubamba.
7. Malamba atshi Aklisto a mu siekle ya thomo a gu Yudea ataganele nawo? (Luka 21:20-24)
7 Mbimbi jiazuelele Davidi jidi gutukuatesa ha gukotelesa egi gukamba gukhala nu ima yavula-vula gushigo nu ndando. Tudi naye gusuanguluga nu ima tudi nayo. Uvi tushigo naye gusha mutshima wetu mu ima yene nga guyimona gifua idi nu ndando yavula. Aklisto a mu siekle ya thomo anyi akhalele gu Yudea akotelesele ndaga yene. (Tanga Luka 21:20-24.) Yesu waawambelele egi ‘masuta mbajieta dimbo dia Yelusalema.’ Akhalele naye ‘gulenga ha guya gu milundu.’ Henyaha gula abemba dimbo ha guya gu milundu, mbaahuluisa mionyo yawo, uvi mbaabemba nji ima yawo yavula. Inzo Yaleha ya Mutaledi ya 1 Mai 1999, diyiji 19 ya français yazuelele egi: “Abembele mahia awo nu jinzo jiawo. Ahetelego nji luholo lua gulondega nga gubungisa ima yawo. Ashile mutshima egi Yehowa mbawaabamba nu mbawaakuatesa. Ashile ndaga jia mu nyuma ha fundo dia thomo, azudile ufuta wawo nu Yehowa nu ndando yavula gubalega ima yagasue akhalele nayo.”
8. Longo ditshi dia ndando tuajiya guzula mu ndaga jiabuidile Aklisto a mu siekle ya thomo akhalele gu Yudea?
8 Ndaga jiabuidile Aklisto a mu siekle ya thomo a gu Yudea jidi gutulongesa itshi? Inzo Yaleha ya Mutaledi ya 1 Mai 1999, diyiji 19 ya français yazuelele egi: “Mu masugu adi muza, mbatutagana nu ndaga mbajimonesa diago luholo tuana tadila ima tudi nayo. Mbatumonesa gula tuana guyizula nu ndando yavula, nga ndo gima gia ndando gidi guhuluishiwa guetu handaga tudi agujinginyina gudi Yehowa. Yajiya gukhala egi mu tangua diene mbatumona malamba avula, mbatushigo mukhala nji nu ima iko tudi nayo mangino. Mbatukalagala midimo yagasue mbayimonega mu tangua diene gifua luholo luakalegele Aklisto a mu siekle ya thomo anyi akhalele gu Yudea.”
9. Luholo lutshi ndaga Phaula wawambelele Aklisto a gu Yudea jiagukuatesa?
9 Yakhalelego ndaga yaleba hagula Aklisto a gu Yudea abembe ima yagasue akhalele nawo, ha guya ha fundo dihe-dihe gu milundu. Akhalele naye gusha gutshigina egi Yehowa mbawaakuatesa ha guheta ima adi nayo funu. Uvi guakhualele nu gima gimoshi giakhalele naye guakuatesa. Ivo thano gutuama egi masuta a enya Roma ajiete dimbo dia Yelusalema, mupostolo Phaula wawambelele enya Yuda egi: “Mukhadigo muzumba mbongo. Suangulugenu nu ima mudi nayo, handaga muene wazuelele egi: ‘Ame mbangugutunyigo nga hazonda nu mbangugubembigo nga hazonda.’ Ngenyi tuajiya guzuela nu gikhesa giagasue egi: ‘Yehowa udi mukuateshi wami; mbangushigo muvua woma. Itshi muthu wajiya gungutshita?’” (Heb. 13:5, 6) Aklisto anyi atumagele ndaga jiazuelele mupostolo Phaula gutuama egi masuta a enya Roma ajiete dimbo, amonelego lamba dia gusuanguluga nu ima yazonda akhalele nayo. Ashile mutshima egi Yehowa mbawaakuatesa ha guheta ima adi nayo funu. Esue nji mangino tudi naye gusha mutshima egi Yehowa mbawutukuatesa ha guheta ima tudi nayo funu.
‘MBATUSUANGULUGA NU IMA TUDI NAYO’
10. Longo ditshi Phaula adi gutuhana?
10 Mupostolo Phaula wahanele nji Timote longo dia luholo elu. Longo diene didi gututadila nji esue mangino. Wasonegele egi: ‘Hene, gula tudi nu ima ya gudia nu milele, tusuanguluge naye.’ (1 Tim. 6:8) Idi mukotelesa egi tuajiyilego gudia ima yabonga nga gukhala nu inzo yawaha, nga gusumba milele ihe-ihe ba? Phaula gazuelelego ngenyi. Uvi udi muzuela egi tudi naye gusuanguluga nu ima tudi nayo. (Fili. 4:12) Yene ndaga yakhalele gumukuatesa. Mukunda nu esue Aklisto gima giabalega ndando gidi ufuta wetu nu Yehowa, uvi ishigo ima tudi nayo.—Hab. 3:17, 18.
Enya Isalele akalegele ivo 40 mu mavu a luselenga, uvi ‘akhalele nu ima yagasue yabonga.’ Esue nji tuana suanguluga nu ima tudi nayo ba? (Tala paragrafe 11) *
11. Longo ditshi tuazula mu ndaga Moize wawambelele enya Isalele?
11 Matangua ako ima tuakhala nayo funu ishigo yene Yehowa wana jiya mukunda nu esue. Tutadilenu ndaga Moize wawambelele enya Isalele gungima dia gubalegesa ivo 40 mu mavu a luselenga. Wazuelele egi: ‘Yehowa Nzambi wenu wamikuatesele mu ndaga jiagasue muakalegele. Wamibambele masugu agasue muakhalele muwenda mu temu edi diakoma. Yehowa Nzambi wenu wakhalele n’enu ivo 40, wamihanele ima yagasue muakhalele nayo funu.’ (Mikh. 2:7) Mu sungi ya ivo 40 Yehowa wahanele enya Isalele mana ha gudia. Milele akatugile nayo gu Ejipitu yatawugilego nga hazonda. (Mikh. 8:3, 4) Uvi enya Isalele ako akhalele muzuela egi ima yene yakhalelego yatagana. Moize waawambelele egi akhalele nu ima yagasue akhalele nayo funu. Ndaga eyi idi gutulongesa itshi? Egi tudi naye gusuanguluga nu ima tudi nayo. Yehowa wana tshigina egi tumuhane mersi mukunda nu ima tudi nayo ikhale ima yene idi yazonda. Tudi naye nji guyizula gifua kado gakatuga gudi muene.
SHA MUTSHIMA EGI YEHOWA MBAWUGUKUATESA
12. Itshi idi mumonesa egi Davidi washile mutshima gudi Yehowa uvi mu ngolo jienji hakhenji ndo?
12 Davidi wakhalele mujiya egi Yehowa udi Nzambi wagujinginyina, wana gudisagesa muavula mukunda nu athu ana gumuzumba. Tangua diasonegele muene Ngimbo 34, wakhalele mutagana nu malamba. Uvi wakhalele nu gutshigina guakola egi ‘muanjelo wa Yehowa’ wana bamba “athu agasue” ana gumutumagela. (Ngi. 34:7) Yajiya gukhala egi Davidi wafuanesele muanjelo wa Yehowa nu suta udi mubamba luphango ha gutala gula mbalagaji jidi muza. Davidi wakhalele suta diakola dia ita, Yehowa wamulayile nji egi mbawumubuisa fumu. Ikhale ngenyi, Davidi gadishidilego mutshima handaga wakhalele mujiya gusonona maseso nga gulua nu phogo ha gushiya mbalagaji. (1 Sam. 16:13; 24:12) Washile mutshima gudi Yehowa egi muanjelo wenji wana ‘huluisa athu ana gumutumagela.’ Mangino tuanago gunenga egi Yehowa atuhuluise mu luholo lua gushimana. Uvi tudi mujiya egi athu agasue ana gushila Yehowa mutshima mbaaheta monyo wa mayilago ikhale mangino afua gawo.
Mu tangua dia lamba diakola, Goga wa gu Magoga mbawuza gutuluisa mu jinzo jietu. Uvi tudi naye gujiya egi mu tangua diene Yesu nu anjelo enji mbaamona luholo Goga adi gutuluisa, hene mbaaza ha gutukuatesa (Tala paragrafe 13)
13. Tangua Goga wa gu Magoga mbawutuluisa, mukunda natshi mbatumonega gifua tushigo nu ngolo? Uvi mukunda natshi tushigo naye guvua woma? (Tala gifuanesa holu dia gizula.)
13 Mu masugu adi muza, mbatutagana nu ndaga jiajiya gutuhana woma egi Yehowa gajiyilego gutubamba. Tangua Goga wa gu Magoga, yakotelesa egi gudibungisa gua ifutshi, mbaluisa akombeledi a Nzambi, mbatukhala gifua tushigo nu muthu wagutukuatesa. Uvi tudi naye gusha mutshima egi Yehowa mbawutuhuluisa. Enya ifutshi mbaatumona gifua imeme ishigo nu muthu wa guyibamba. (Ezek. 38:10-12) Mbatushigo mukhala nu mata, khenji tuahetele nji formasio ha gulua ita. Enya ifutshi mbaatangiza egi ajiya gutushiya diago. Mbaashigo mujiya egi anjelo a Yehowa adi guene ha gutuluila. Uvi esue tudi mujiya ndaga yene handaga tudi nu gutshigina. Enya ifutshi anago gusha gutshigina gudi Nzambi. Hene mbaadihula muavula tangua mbaamona masuta a mu dilu mulua ha gutuhuluisa!—Yat. 19:11, 14, 15.
DILONDEGE MANGINO MUKUNDA NU MASUGU ADI MUZA
14. Ndaga jitshi tuajiya gutshita mangino ha gudilondega mukunda nu masugu adi muza?
14 Ndaga jitshi tuajiya gutshita mangino ha gudilondega mukunda nu masugu adi muza? Thomo, tushigo naye gutangiza egi ima tudi nayo idi nu ndando yavula, handaga gudi nu lusugu mbatushigo mukhala luko nu ima yene. Ya mbadi, tudi naye gusuanguluga nu ima tudi nayo. Ya thathu, tudi naye gukolesa ufuta wetu nu Yehowa, handaga yene ndaga yana gutusuangulusa muavula. Gula tuajiya Yehowa muabonga, mbatumushila diago mutshima egi mbawutubamba gula Goga wa gu Magoga watuluisa.
15. Ndaga jitshi Davidi wataganele najio jiamukuatesele ha gusha mutshima egi Yehowa mbagashigo gumubemba?
15 Tutadilenu ndaga iko yakuatesele Davidi. Ndaga yene yajiya nji gutukuatesa ha gudilondega mukunda nu malamba adi muza. Davidi wazuelele egi: ‘Phagenu hagula mumone egi Yehowa udi muthu wabonga. Muthu wana zegemena gudi muene, wakhala nu gusuanguluga.’ (Ngi. 34:8) Mbimbi eji jidi mumonesa ndaga yatumine Davidi ha gusha mutshima mu ukuateshi wa Yehowa. Davidi wakhalele nu khadilo dia gushila Yehowa mutshima, Yehowa gamubembelego nga hazonda. Tangua Davidi wakhalele muvuala, waluile ita nu Goliyata. Goliyata wakhalele muenya Filistiya, gingunji gia muthu, mului wakola wa ita. Uvi Davidi wamuwambelele egi: ‘Mangino Yehowa udi guguhana ha mago ami.’ (1 Sam. 17:46) Gungima, Davidi wabuile muenya mudimo wa fumu Saula. Uvi Saula wakambele gumushiya mbala jiavula. ‘Yehowa wakhalele nu’ Davidi. (1 Sam. 18:12) Davidi wamonele luholo Yehowa wamukuatesele mu masugu abalega, hene washile diago mutshima egi mbawumukuatesa luko mu malamba akhalele mutagana nawo.
16. Luholo lutshi tuajiya “guphaga” ha gumona egi Yehowa udi muthu wabonga?
16 Gula tudi nu khadilo dia gushila Yehowa mutshima mangino, mbatumushila nji mutshima muavula egi mbawutukuatesa mu masugu adi muza. Tudi naye gukhala nu gutshigina ha gushila Yehowa mutshima hagula tutoge fumi’etu wa mudimo atuhane njila ha guya gu asamble, nga gumulomba atubembele tangua dia guya mu gudibungisa guagasue gua mu hungu nu ha gulongesa muavula. Henyaha gula fumi’etu wa mudimo watuna nga ndo watukatula gu mudimo, mbatukhala diago nu gutshigina egi Yehowa mbagashigo gutubemba nu mbawutuhana ima tudi nayo funu ba? (Heb. 13:5) Aphangi avula anyi adi mu mudimo wa tangua diagasue amonele gale luholo Yehowa waakuatesele ha guheta ima akhalele nayo funu. Yadiago, Yehowa udi Nzambi wagujinginyina.
17. Mukhapho wa givo 2022 udi muzuela itshi? Mukunda natshi mukhapho wene udi diago watagana?
17 Tushigo naye guvua woma mukunda nu ndaga mbajibua mu masugu adi muza handaga Yehowa udi nu esue. Gula tudi musha ndaga jia mu nyuma ha fundo dia thomo, Yehowa mbagashigo gutubemba nga hazonda. Hunji dia Akulu Atuameji diatombele Ngimbo 34:10 ha gukhala mukhapho wa givo 2022. Udi muzuela egi: ‘Athu ana kamba Yehowa mbaaheta ima yagasue yabonga.’ Mukunda natshi? Handaga yana gutukuatesa ha gudilondega mukunda nu malamba mbatubuila mu masugu adi muza, nu ha gushila Yehowa mutshima egi mbagashigo gutubemba nga hazonda.
LUNGIMBO 38 Jéhovah te rendra fort
^ par. 5 Mukhapho wetu wa givo 2022 wazudiwa mu Ngimbo 34:10 idi muzuela egi: ‘Athu ana kamba Yehowa mbaaheta ima yagasue yabonga.’ Akombeledi avula a Yehowa akhalago nu mbongo jiavula nga ima iko adi nayo funu. Luholo lutshi giwa tudi muzuela egi “adi nu ima yagasue yabonga”? Luholo lutshi gukotelesa verse eyi muabonga guajiya gutukuatesa ha gudilonda mukunda nu malamba mbatubuila mu masugu adi muza?
^ par. 4 Tala “Mihu Yana Guhula Athu Ana Gutanga Mikanda Yetu,” mu Inzo Yaleha ya Mutaledi ya 15 Septembre 2014, ya français.
^ par. 53 UKOTELESHI WA IFUANESA: Davidi wakhalele gudisuega mu wima wa seso ha gulenga Fumu Saula, uvi wakhalele muhana Yehowa mersi mukunda nu ima akhalele gumuhana.
^ par. 55 UKOTELESHI WA IFUANESA: Tangua enya Isalele akatugile gu Ejipitu, Yehowa waahanele mana ha gudia, wakalegele nji hagula milele yawo itawugago.