LONGO DIA 5
Kalegela ‘Tangua Diaye mu Luholo Luabonga’
“Temienu hagula muwendjigo gifua athu aheya, uvi wendenu gifua athu atema, kalegelenu tangua dienu mu luholo luabonga.”—EF. 5:15, 16.
LUNGIMBO 8 Jéhovah est ton refuge
NDAGA JIDI MU LONGO EDI *
1. Luholo lutshi tuajiya gubalegesa tangua hamoshi nu Yehowa?
TUANA suanguluga gubalegesa tangua nu athu tuana zumba. Aphangi adizudile gale mu ulo ana suanguluga gubalegesa tangua diavula hamoshi. Mavuala ana suanguluga gubalegesa tangua nu mafut’awo. Mukut’etu agasue tuana suanguluga gubalegesa tangua nu aphangi’etu Aklisto. Ndaga ya gubalega ndando idi egi, tuana tshigina gubalegesa tangua nu Nzambi, tangua tuana tshita gisambu, tuana tanga Biblia nu tangua tuana tangigiza mafelela nu makalegelo enji abonga. Gubalegesa tangua hamoshi nu Yehowa guakhala nu ndando yavula!—Ngi. 139:17.
2. Ndaga jitshi jiajiya gutukanga njila ha gubalegesa tangua hamoshi nu Yehowa?
2 Uvi tudi naye gujiya egi gubalegesa tangua hamoshi nu Yehowa yakhala ndo tangua diagasue ndaga yaleba. Tuana khala nu ndaga jiavula jia gutshita, hene yajiya gukhala lamba ha guheta tangua dia gutshita ndaga jia mu nyuma. Midimo yetu nu inemo tudi nayo mu fami nga ndaga jiko jiajiya gutuzula tangua diavula, ngenyi tuajiya gutangiza egi tushigo nu tangua dia gutshita gisambu, gulonguga nga dia gutangigiza ndaga tudi mutanga.
3. Ndaga itshi iko yajiya gutukuya tangua?
3 Gudi nji nu ndaga iko yajiya gutukuya tangua. Gula tuatemelego, ndaga tudi mutshita ngatshima jishigo jiabola, jiajiya gutukuya tangua; ngenyi tuajiyilego guheta tangua dia gutshita ndaga jia mu nyuma. Henyaha tuzuelelenu ndaga yatadila gubalegesa tangua. Ishigo ndaga yabola ha gutshita saga jia gubalegesa tangua. Yajiya gukhala egi saga tudi mutshita jishigo jiabola, uvi gula jidi gutuzula tangua diavula, jiajiya gutukuya tangua dia gutshita ndaga jia mu nyuma. Tujimbilago egi saga jia gubalegesa tangua jishigo nu ndando yavula.—Ish. 25:27; 1 Tim. 4:8.
4. Itshi tuza mumona mu longo edi?
4 Mu longo didi tuza mumona mukunda natshi idi nu ndando ha gukalegela tangua dietu muabonga. Tuza muzuelela nji luholo tuajiya gukalegela tangua dietu mu luholo luabonga mukunda nu Yehowa nu gubonga tuajiya guheta gula tuatshita ngenyi.
ZULA BADESIZIO ABONGA; KAMBA GUJIYA NDAGA JIDI NU NDANDO YAVULA
5. Luholo lutshi Efeso 5:15-17 yajiya gukuatesa mavuala ha guzula badesizio abonga?
5 Zula badesizio abonga mu monyo waye. Mbala jiavula, yakhala lamba hagula mavuala azule badesizio abonga. Alongeshi awo nga enya fami yawo anyi ashigo matemue a Yehowa, ajiya guashinjiga ha gungina makhalasa aleha-leha ha guheta mudimo wabonga wa makuta avula. Makhalasa ene ajiya guazula tangua diavula diago. Uvi mvuaji jiawo nu mafut’awo a mu hungu ajiya guawambela ha gudihana muavula mu mudimo wa Yehowa. Itshi yajiya gukuatesa mavuala ana zumba Yehowa ha guzula badesizio abonga? Ndaga yajiya guakuatesa idi gula atanga nu atangigiza ndaga jidi mu mukanda wa Efeso 5:15-17. (Tanga.) Gula muvuala watanga verse jiji, wajiya gudihula egi: ‘“Gutshigina gua Yehowa gudi itshi”? Desizio ditshi diajiya gumusuanguluisa? Desizio ditshi diajiya gungukuatesa ha gukalegela tangua diami muabonga?’ Mujimbilago egi “masugu adi abola,” gisugishilo gia mavu awa a Satana giasuena hehi. Idi ndaga yabonga gula tudi mukalegela tangua dietu mu luholo luabonga hagula tusuene hehi nu Yehowa.
6. Desizio ditshi diazudile Madiya? Mukunda natshi tudi muzuela egi diakhalele desizio diabonga?
6 Kamba gujiya ndaga jidi nu ndando yavula. Matangua ako ha guzula desizio diabonga, yana toga egi tutombe ha gutshita ndaga imoshi mukatshi dia ndaga mbadi ikhale ndaga jiene jishigo jiabola. Ha gujiya ndaga yene muabonga, tutadilenu lumene lua Yesu tangua diayile muene mutala Madiya nu Mata. Mata wasuangulugile ha guyamba Yesu gumbo diawo, hene wazudile tangua dia gutelega ima ya gudia. Uvi phangi’enji Madiya wayile mukhala hehi nu Yesu ha gumutegelela. Mata gatshitshilego ndaga yabola luholo luatombele muene ha gulonda ima ya gudia. Uvi, Madiya ‘watombele khapho diabonga.’ (Luka 10:38-42, mbimbi goshi’a diyiji.) Yajiya gukhale egi gungima dia masugu, Madiya wajimbidile ima adile lusugu luene, uvi gajimbidilego malongo alongesele Yesu. Wasuangulugile muavula ha gubalegesa tangua nu Yesu. Esue nji tudi naye gusuanguluga ha gubalegesa tangua nu Yehowa. Luholo lutshi tuajiya gukalegela tangua dietu mu luholo luabonga?
KALEGELA TANGUA DIAYE MUABONGA MUKUNDA NU YEHOWA
7. Mukunda natshi idi nu ndando ha gusamba, gulonguga nu gutangigiza?
7 Mujimbilago egi gisambu, gulonguga, nu gutangigiza gudi mukatshi dia ndaga tuana tshita ha gukombelela Yehowa. Tangua tuana kombelela, tuana guta maga nu Tata wetu wa mu dilu munu wana gutuzumba muavula. (Ngi. 5:7) Tangua tuana longuga Biblia, tuana heta “ujiyi wa Nzambi,” muhanyi wa ndunge. (Ish. 2:1-5) Tangua tuana tangigiza ndaga tuana longuga mukunda nu Yehowa, tuana mona makalegelo enji abonga nu ndaga jiabonga mbajitshita muene mukunda nu athu agasue. Idi diago luholo luabonga lua gukalegela tangua dietu. Uvi itshi yajiya gutukuatesa ha gukalegela tangua diene muabonga?
Kamba fundo dishigo nu matululu ha gulonguga Biblia (Tala paragrafe 8-9)
8. Longo ditshi tuazula mu luholo Yesu wakalegele tangua dienji mu mavu a luselenga?
8 Khala mutomba fundo dishigo nu matululu. Tutadilenu gifezegeselo gia Yesu. Gutuama egi Yesu asendese mudimo wa gulongesa, wabalegesele masugu 40 mu mavu a luselenga. (Luka 4:1, 2) Fundo diayile muene diakhalelego nu matululu, hene wakhalele musamba Yehowa nu gutangigiza ndaga mbajikalagala Tata wenji mukunda nu muene. Gutshita ngenyi guamukuatesele ha gubinga malamba akhalele naye gumubuila. Malongo atshi tuajiya guzula mu gifezegeselo gia Yesu? Gula mudi athu avula mu fami yenu, matangua ako yajiya gukhala lamba ha guheta fundo dishigo nu matululu gumbo dienu. Gula idi ngenyi, wajiya guya mukamba fundo diko dishigo nu matululu. Idi ndaga phangi Julie wakalegele ha guta maga nu Yehowa mu gisambu. Muene nu mulumi’enji ana khala gu France, ana jinga mu inzo imoshi yakhala nu athu avula. Yakhala lamba hagula muthu akhale hakhenji matululu ndo. Phangi Julie udi muzuela egi: “Nganaya gu Park lusugu nu lusugu. Gu Park ngana heta fundo ngajiya gukhala hakhami, ha guta maga nu Yehowa.”
9. Ngatshima Yesu wakhalele nu ndaga jiavula, luholo lutshi wamonesele egi wana zula ufuta wenji nu Yehowa nu ndando?
9 Yesu wakhalele nu ndaga jiavula jia gutshita mu monyo wenji. Hakhalele muene mulongesa, athu avula akhalele gumulandula ma fundo agasue akhalele muya muene. Akhalele gumutoga egi a akuatese. Lusugu lumoshi, “athu agasue a mu dimbo akhalele agudibungisa gutuama dia mufulo wa inzo” ha gumumona. Ikhale ngenyi, Yesu watshitshile yagasue ha gukolesa ufuta wenji nu Yehowa. Mu gimenegena, hakhalele gosa khenji gutema gutshia, wayile “fundo dimoshi diakhalelego nu matululu” hagula ate maga nu Tata wenji mu gisambu.—Mako 1:32-35.
10-11. Ha gutadila Matayo 26:40, 41, longo ditshi Yesu wahanele alandudi enji mu diahia dia Getesemane, uvi itshi yabuile gungima?
10 Mu phipha ya gisugishilo gia monyo wenji ha mavu, ngatshima mudimo wenji wa gulongesa wasugile, uvi Yesu wakambele fundo diakhalele tedie ha gusamba nu gutangigiza. Wahetele fundo diabonga mu dihia dia Getesemane. (Mat. 26:36) Mu tangua diene, Yesu wahanele alandudi enji malongo atadila gisambu.
11 Tutadilenu ndaga yabuile gungima. Tangua ahetele mu dihia dia Getesemane, yajiya gukhale egi yakhalele diago mukatshi dia phipha. Yesu wawambelele alandudi enji egi “landulenu gutala.” Gungima muene wayile mukombelela. (Mat. 26:37-39) Uvi, tangua Yesu wakhalele musamba ene ambandele gawo tulo. Tangua diaasangele muene agumbada, waawambelele luko egi “landulenu gutala, landulenu gukombelela tangua diagasue.” (Tanga Matayo 26:40, 41.) Yesu wakotelesele egi alandudi enji akhalele muvua gikenene, akhalele nji aguhuila. Wajiyile nji egi “muila udi waleba.” Yesu wayile ha gukombelela mahugo mbadi; tangua diakhalele muene muvutuga, wakhalele musanga alandudi enji adi mubanda tulo, akhalelego gawo mukombelela.—Mat. 26:42-45.
Khala mukombelela tangua ushigo waguhuila (Tala paragrafe 12)
12. Itshi tuajiya gutshita gula gikenene nga ndaga iko idi gutulebesa muila nu idi gutukanga njila ha gukombelela?
12 Khala mutomba tangua diabonga. Matangua ako gikenene nga guhuila guajiya gutukanga njila ha gusamba. Tudi mujiya egi ndaga eyi yana buila athu avula. Itshi wajiya gutshita gula yagubuila? Athu akhala nu khadilo dia gutshita gisambu mu ngueze ana zuela egi, idi ndaga yabonga ha guyitshita tangua ngueze idi musendesa, handaga mu tangua diene tuanago gukhala aguhuila muavula. Athu ako ana mona egi idi ndaga yabonga ha gukombelela Yehowa ya gufugama nga ya gukhala hashi. Itshi wajiya gutshita gula gikenene nga ndaga iko idi gugulebesa muila nu idi gugukanga njila ha gukombelela? Wambela Yehowa luholo udi gudivua. Jiya egi Yehowa Tata wa khenda jiagasue wana gujiya luholo udi gudivua.—Ngi. 139:4.
Ukhadigo musonegela athu ba mesaje tangua udi mu gudibungisa gua mu hungu (Tala paragrafe 13-14)
13. Luholo lutshi ba apareyi ajiya gutuwunganesa matangi ha tudi mutshigina guta maga nu Yehowa?
13 Katula ima yajiya guguwunganesa matangi tangua udi mulonguga. Ishigo phamba gusamba guajiya gutukuatesa ha gukolesa ufuta wetu nu Yehowa. Gulonguga Biblia nu guya mu gudibungisa gua mu hungu guajiya gutukuatesa nji ha gusuena hehi nu Nzambi. Gudi nu ndaga iko wajiya gutshita ha gukalegela tangua diaye muabonga tangua udi mulongunga nga tangua wanaya mu gudibungisa gua mu hungu ba? Wajiya gudihula egi: ‘Itshi yana gunguwunganesa matangi tangua ngudi mu gudibungisa gua mu hungu nga tangua ngana longuga?’ Wana guta maga nu athu gu telefone, nga gutanga bamesaje ba? Mangino athu avula adi nu ba apareyi. Enya ndunge ana zuela egi, tangua tuana kamba gutshita gima gimoshi ngenyi, gula tudi nu telefone hehi, yana gutuwunganesa matangi. Mulongeshi mumoshi wa psychologie udi muzuela egi: “Gula udi nu telefone, wajiyilego guhaga matangi gu ndaga udi mutshita. Matangi aye mbaakhala gu gima giko.” Tangua tuana gudibungisa gu asamble, ana gututoga ha gulondega ba apareyi etu hagula awunganesago matangi a athu ako. Tuajiya nji gutshita luholo lumoshi gula tudi mutshigina guta maga nu Yehowa hagula ba apareyi etu atuwunganesago matangi.
14. Ha gutadila Filiphi 4:6, 7, luholo lutshi Yehowa wajiya gugukuatesa ha gutuna guwunganesa matangi?
14 Toga Yehowa agukuatese ha gutuna guwunganesa matangi. Gula wamona egi matangi aye ashigo fundo dimoshi tangua udi mulonguga nga tangua udi mu gudibungisa gua mu hungu, toga ukuateshi gudi Yehowa. Gula gudi nu ndaga idi gugusagesa nga idi guguhana woma, yajiya gukhala lamba ha gubemba guyitangiza ha gusha matangi mu ndaga jia mu nyuma. Uvi ujimbilago egi gusha matangi mu ndaga jia mu nyuma gudi nu ndando. Toga Yehowa hagula aguhane guhuima guajiya gubamba mutshima waye nu ‘mantangi aye.’—Tanga Filiphi 4:6, 7.
GUBALEGESA TANGUA NU YEHOWA GUANA BATA GUBONGA
15. Gubonga gutshi mbawuheta gula udi mubalegesa tangua nu Yehowa?
15 Gula wazula tangua dia guta maga nu Yehowa, dia gumutegelela nu gutangigiza ndaga jiamutalela, mbawuheta gubonga guavula. Luholo lutshi? Thomo, mbawuzula badesizio abonga. Biblia idi muzuela egi: “Muthu udi mukuata ufuta nu muenya ndunge mbawubua muenya ndunge.” (Ish. 13:20) Gula udi mubalegesa tangua nu Yehowa muhanyi wa ndunge, mbawubua diago muenya ndunge. Mbawujiya luholo wajiya gumusuanguluisa, nu mbawushigo mutshita ndaga yajiya gumuhana gikenene.
16. Mukunda natshi gubalegesa tangua hamoshi nu Yehowa mbagutukuatesa ha gubua alongeshi abonga?
16 Ya mbadi, mbawubua mulongeshi wabonga. Tangua tuana longesa athu Biblia, tuana kamba ha guakuatesa hagula akuate ufuta wakola nu Yehowa. Gula tudi muta maga muavula nu Tata wetu wa mu dilu, mbayitukuatesa ha gumuzumba muavula nu mbatukhala atagana ha gulongesa athu ako ha gumuzumba. Yesu wakalegele nji ngenyi. Hakhalele muene muzuelela Sh’enji, wakalegele mbimbi jiakhalele mumonesa egi wana gumuzumba muavula; hene alandudi enji asendesele nji guzumba Yehowa muavula.—Yone 17:25, 26.
17. Mukunda natshi gusamba nu gulonguga guana gutukuatesa ha gukolesa gutshigina guetu?
17 Ya thathu, gutshigina guaye mbagukola. Tutadile ndaga yanabua gula watoga Yehowa utuameji, gikhesa nga ukuateshi. Tangua Yehowa wana hana mvutu gu isambu yaye, gutshigina guaye mukunda nu muene guana kola. (1 Yone 5:15) Ndaga itshi iko yajiya gugukuatesa ha gukolesa gutshigina guaye? Gulonguga guaye hakhaye. Tujimbilago egi, “gutshigina guana guza mu ndaga jidi muvua muthu.” (Lomo 10:17) Uvi ha gukolesa gutshigina, tushigo naye phamba gulonguga nga gujiya ndaga jidi mu Biblia. Na itshi iko tudi naye gutshita giwa?
18. Mukunda natshi tudi naye gutangigiza?
18 Tudi naye gutangigiza ndaga tudi mulonguga. Tutadilenu ndaga jiatagenele najio muthu wasonegele mukanda wa Ngimbo 77. Wakhalele nu gikenene handaga watangijile egi Yehowa gakhalelego luko musuanguluga n’enji nu enya Isalele ako. Mu phipha gakhalelego mubanda mukunda nu ndaga yene. (Verse 2-8) Watshitshile itshi? Wawambelele Yehowa egi: “Mbanguwunguluga ndaga jiakoma jiwatshitshile, mbangutangigiza ndaga jiabonga jiwatshitshile gungima.” (Verse 12) Muthu wasonegele lungimbo elu wakhalele mujiya muabonga ndaga jiakalegele Yehowa mukunda nu akombeledi enji a mu masugu abalega. Uvi wakhalele gudihula egi: ‘Nzambi wajimbidile gale ha guvila athu khenda ba? Nga ndo, khabu jienji jiana gumukanga njila ha guvua khenda ba?’ (Verse 9) Gungima muyimbi wa ngimbo watangijile ndaga jiakalegele gale Yehowa nu luholo luavidile muene athu khenda mu masugu abalega. (Verse 11) Gutangigiza ngenyi guamukuatesele diago, handaga washile gutshigina egi Yehowa gajiyilego gutuna akombeledi enji. (Verse 15) Aye nji gutshigina guaye mbagukola gula udi mutangigiza ndaga jiakalegele gale Yehowa mukunda nu akombeledi enji nu mukunda nu aye.
19. Gubonga tshi guko mbatuheta gula tudi mubalegesa tangua nu Yehowa?
19 Ndaga ya nguana yabalega ndando idi egi, guzumba guaye mukunda nu Yehowa mbagukola. Guzumba mbagugukuatesa ha gutumagela Yehowa nu ha gukalagala ngolo ha gumusuanguluisa, mbagugukuatesa nji ha gukolesela mu malamba. (Mat. 22:37-39; 1 Kol. 13:4, 7; 1 Yone 5:3) Ufuta wetu wakola nu Yehowa udi diago ndaga yabalega ndando!—Ngi. 63:1-8.
20. Itshi tudi naye gutshita ha gukalegela tangua dietu muabonga mukunda nu Yehowa?
20 Jiya egi gusamba, nu gulonguga, nu gutangigiza gudi mukatshi dia ndaga tuana kalagala ha gukombelela Yehowa. Hene, khala mukamba fundo dishigo nu matululu ha gubalegesa tangua nu Yehowa gifua muatshitshile Yesu. Katula ima yajiya guguwunganesa matangi. Toga Yehowa agukuatese ha gutuna guwunganesa matangi tangua udi mutshita ndaga jia mu nyuma. Gula udi mukalegela tangua diaye muabonga, Yehowa mbawuguhana monyo wa ivo nu ivo mu mavu ahe-ahe.—Mako 4:24.
LUNGIMBO 28 Ô Jéhovah, qui sera ton ami?
^ par. 5 Yehowa udi futa dietu diabonga. Tuana zula ufuta wetu n’enji nu ndando yavula, tuana tshigina nji gumujiya muabonga. Ha gujiya muthu muabonga, yana zula tangua. Luholo lumoshi nji, ha gukuata ufuta wakola nu Yehowa yana zula tangua. Mangino tuakhala nu ndaga jiavula jia gutshita, na luholo lutshi tuajiya guheta tangua dia gusuena hehi nu Yehowa? Gubonga gutshi mbatuheta gula tuatshita ngenyi?