LONGO DIA 3
Malongo Tuajiya Guzula mu Masoji a Yesu
‘Yesu wazolele masoji.’—YONE 11:35.
LUNGIMBO 17 “Je le veux”
NDAGA JIDI MU LONGO EDI *
1-3. Ndaga jitshi jiajiya gutuma akombeledi a Yehowa ha gumukombelela nu masoji gu meso?
UDI mujiya luko mbala ya suga wadidile ba? Matangua ako tuana zola masoji a gusuanguluga. Uvi mbala jiavula tuana gudila mukunda nu gikenene. Ha gufezegesa, tuana gudila gula muthu tuakhalele muzumba wafua. Phangi mumoshi wa mukhetu Lorilei wa gu États-Unis wasonegele egi: “Tangua ngafishile mun’ami wa mukhetu, matangua ako ngakhalele muvua gikenene giavula diago. Ngakhalelego mumona nga gima gimoshi giajiya gunguhana ngolo. Ngakhalelego mutangiza egi ngajiya gukolesela mu ndaga yene.” *
2 Matangua ako tuana gudila mukunda nu ndaga jiavula. Phangi muko wa mukhetu Hiromi udi muvundji wa njila gu Japon, udi muzuela egi: “Ngakhalele muvua gikenene handaga athu ngakhalele mulongesa lukuma luabonga akhalelego gawo musuanguluga nu giamatshidia. Matangua ako ngakhalele mukombelela Yehowa nu masoji gu meso hagula angukuatese ha guheta muthu wajiya gusuanguluga nu giamatshidia.”
3 Aye nji wadivuile gale gifua aphangi awa a akhetu ba? Avula mukatshi dietu ana gudivua ngenyi. (1 Phet. 5:9) Tuana tshigina ‘gukombelela Yehowa nu gusuanguluga guagasue.’ Uvi matangua ako tuana gumukombelela nu masoji gu meso gula tuafuisa muthu tuakhalele muzumba, gula muila watuleba nga gula tudi mutagana nu ndaga idi gutukanga njila ha gusala agujinginyina gudi muene. (Ngi. 6:6; 100:2) Itshi tuajiya gukalagala gula tudi mutagana nu ndaga jia luholo elu?
4. Itshi tuza mumona mu longo edi?
4 Gifezegeselo gia Yesu giajiya gutulongesa ndaga jiavula. Matangua ako muene nji wataganele nu ndaga jiamutumine ‘ha guzola masoji.’ (Yone 11:35; Luka 19:41; 22:44; Heb. 5:7) Mu longo edi, tuza mutadila ndaga jiene nu malongo tuajiya guzula gudi Yesu nu gudi Shi’enji Yehowa. Tuza mumona luko ndaga tuajiya gukalagala gula tuatagana nu malamba ajiya gututuma ha gudila.
YESU WADIDILE MUKUNDA NU MAFUT’ENJI
Kuatesa athu adi nu gikenene gifua muatshitshile Yesu (Tala paragrafe 5-9) *
5. Lumene ludi mu Yone 11:32-36 ludi gutulongesa itshi mukunda nu Yesu?
5 Mu givo 32 gungima dia guvualewa gua Yesu, Lazalo futa dia Yesu wakatele, gungima wafuile. (Yone 11:3, 14) Lazalo wakhalele nu aphangi’enji a akhetu mbadi: Madiya nu Mata. Yesu wakhalele guazumba muavula diago. Madiya nu Mata akhalele nu gikenene giavula mukunda nu gufua gua phangi’awo wa yala. Tangua diafile Lazalo, Yesu wayile gu Betaniya ha gutala Madiya nu Mata. Tangua Mata wavuile egi Yesu udi muza, wayile mu phushi ha gumutagana. Wawambelele Yesu nu gikenene giagasue egi: “Fumu, nga wakhalele haha, nga mun’etu gafilego.” (Yone 11:21) Tangua Yesu wamonele Madiya nu athu ako mudila, ‘wazolele masoji.’—Tanga Yone 11:32-36.
6. Mukunda natshi Yesu wadidile tangua diafuile Lazalo?
6 Mukunda natshi Yesu wadidile tangua diafuile Lazalo? Mukanda Étude perspicace udi muzuela egi: “Gima giatumine Yesu ha ‘gudila nu ha guzola masoji’ gidi gufua gua futa dienji Lazalo nu luholo aphangi’a Lazalo akhalele nu gikenene.” * Yajiya gukhala egi Yesu watangijile lamba diamonele futa dienji Lazalo tangua diakhalele muene nu misongo nu luholo luadivile muene tangua ajiyile egi gualeha ndo udi mufua genji. Luko, yajiya gukhala egi Yesu wazolele masoji luholo amonele gikenene giakhalele nagio Mata nu Madiya mukunda nu phangi’awo wa yala. Gula aye nji wafuishile gale futa diaye nga phangi’aye, idi naye gukhala egi wadivuile nji ngenyi. Henyaha tutadilenu malongo thathu tuajiya guzula mu ndaga eyi.
7. Gudila gua Yesu gudi gutumonesa itshi mukunda nu Yehowa?
7 Yehowa udi mujiya gikenene giaye. Yesu udi ‘diago mumoneshi watagana wa umuthu’ wa Sh’enji. (Heb. 1:3) Gudila gua Yesu guamonesele diago luholo luana gudivua Yehowa gula muthu wafua. (Yone 14:9) Gula udi mulua nu gikenene gia gufua gua muthu wakhalele muzumba, jiya egi Yehowa udi mujiya gikenene giaye nu udi gudisagesa mukunda nu aye. Udi mutshigina nji gugukuatesa.—Ngi. 34:18; 147:3.
8. Mukunda natshi tudi nu gutshigina egi Yesu mbawufuzumuna aphangi’etu anyi afuile gale?
8 Yesu mbawufuzumuna aphangi’aye anyi afuile gale. Gutuama egi Yesu adile, wawambelele Mata egi: “Phangi’aye mbawufuzumuga.” Mata washile gutshigina mu mbimbi jia Yesu. (Yone 11:23-27) Luholo Mata wakhalele mukombeledi wa Yehowa, wakhalele mujiya egi profete Eliya nu Elisha afuzumuine athu mu tangua dikulu. (1 Maf. 17:17-24; 2 Maf. 4:32-37) Yajiya gukhala luko egi wavuile mene jia athu anyi Yesu wafuzumuine. (Luka 7:11-15; 8:41, 42, 49-56) Aye nji khala nu gutshigina egi mbawumona luko athu anyi afuile gale wakhalele muzumba. Longo ditshi tuazula luholo Yesu wadidile tangua amonele mafut’enji mudila? Yatumonesa egi Yesu udi nu nzala ya gufuzumuna athu anyi afuile gale!
9. Luholo lutshi wajiya gukuatesa athu adi nu gikenene gifua muatshitshile Yesu? Hana gifezegeselo.
9 Aye nji wajiya gukuatesa athu adi nu gikenene. Yesu wadidile hamoshi nu Mata nu Madiya, waahanele gikhesa nu waategelele muabonga. Esue nji tuajiya gukalagala ngenyi gudi athu adi nu gikenene. Phangi Dan udi mukulu gu Australie, udi muzuela egi: “Tangua diafuile mukaji’ami, ngakhalele nu funu ya ukuateshi. Aphangi avula nu akaji’awo akhalele hene tangua diagasue ha gungutegelela. Akhalelego gungutunyisa ha gumonesa gikenene giami nga ha gudila. Tangua ngakhalelego nu ngolo jia gutshita midimo, akhalele gungukuatesa ha guweva kamiyo nu gusumba nu gungukalegela ima ya gudia. Akhalele nji mukombelela hamoshi nu ame. Angumonesele diago egi akhalele mafuta nu aphangi abonga ‘avalewe mukunda nu tangua dia lamba.’”—Ish. 17:17.
YESU WADIDILE MUKUNDA NU ATHU AKHALELE MUENE MULONGESA
10. Ndaga jitshi Biblia idi muzuela mu Luka 19:36-40?
10 Yesu wahetele gu Yelusalema mu lusugu lua 9 Nisana lua givo 33. Tangua diasuenele muene hehi nu dimbo, athu avula ajile, abambele milele yawo mu njila ha gumuyamba gifua Fumu. Yakhalele tangua dia gusuanguluga diago. (Tanga Luka 19:36-40.) Uvi alandudi enji ajiyilego ndaga iza mubalega gungima. Biblia idi muzuela egi, ‘tangua diahetele Yesu hehi nu Yelusalema, watalele dimbo, wadidile.’ Yesu wadidile handaga wamonesele malamba akhalele naye gubuila athu a gu Yelusalema.—Luka 19:41-44.
11. Mukunda natshi Yesu wadidile mukunda enya gu Yelusalema?
11 Yesu wavuile gikenene handaga wajiyile egi enya Yuda avula mbaashigo mutshigina lukuma luabonga lua Ufumu. Ngenyi dimbo dia Yelusalema diakhalele naye gushiyiwa, uvi enya Yuda anyi akhalele naye gusala nu monyo akhalele naye gubua ahiga. (Luka 21:20-24) Gifua luholo Yesu wayizuelele, avula mukatshi diawo amutunyile. Athu avula a mu dimbo dienu ana suanguluga nu lukuma luabonga lua Ufumu ba? Gula athu phamba azonda ana suanguluga nu lukuma luabonga, longo ditshi wajiya guzula mu luholo Yesu wadidile mukunda nu enya gu Yelusalema? Tutadilenu malongo awa thathu.
12. Gudila gua Yesu gudi mumonesa itshi mukunda nu Yehowa?
12 Yehowa wana gudisagesa mukunda nu athu. Gudila gua Yesu gudi mumonesa diago egi Yehowa wana gudisagesa mukunda nu athu. Biblia idi muzuela egi: ‘Yehowa ganago gutshigina egi nga muthu mumoshi afue, uvi wana tshigina egi athu agasue abalumune mutshima.’ (2 Phet. 3:9) Mangino tuana monesa egi tuana zumba athu tuana longesa gula tudi mutshita ngolo ha guakuatesa ha gujiya lukuma luabonga lua Ufumu.—Mat. 22:39. *
Khala musombegesa matangua aye a gulongesa gifua muatshitshile Yesu (Tala paragrafe 13-14) *
13-14. Luholo lutshi Yesu wakhalele muvuila athu khenda? Luholo lutshi esue nji tuajiya gutshita gifua muene?
13 Yesu wadihanele muavula mu mudimo wa gulongesa. Wamonesele egi wana zumba athu luholo luakhalele muene gualongesa mu mafundo agasue. (Luka 19:47, 48) Itshi yamutumine ha gukalagala ngenyi? Wakhalele muvuila athu khenda. Athu avula akhalele muza ha gumutegelela, hene matangua ako muene nu alandudi enji “akhalelego nga nu luholo lua gudia.” (Mako 3:20) Lusugu lumoshi, yala mumoshi wakhalele mutshigina guta nenji maga mu phipha, Yesu watshiginyile nu mutshima umoshi ha guta nenji maga. (Yone 3:1, 2) Uvi athu avula mukatshi dia athu anyi akhalele mutegelela Yesu, abuilego alandudi enji. Ikhale ngenyi, athu agasue anyi amutegelele, avuile lukuma luabonga. Mangino, esue nji tuana tshigina guhana athu agasue luendu lua guvua lukuma luabonga. (Makal. 10:42) Uvi ha guyitshita, tudi naye gusombegesa luholo luetu lua gulongesa.
14 Sombegesa tangua diaye dia gulongesa. Gula tushigo musombegesa matangua etu a gulongesa, yajiya gukhala lamba ha gudimona nu athu ako ajiya gusuanguluga nu giamatshidia. Phangi Matilda udi muvundji wa njila, udi muzuela egi: “Ame nu mulumi’ami tuana longesa athu mu matangua a gudisha. Mu gimenegena, tuana guya mulongesa mu mafundo athu ana tshita midimo. Mu midi, tuana longesa mu njila ha guhana athu mikanda. Uvi mu ngueze, tuana guya mulongesa athu gu jinzo jiawo.” Tushigo naye gulongesa phamba mu tangua dinyi tuatombele gale, uvi tudi naye gusombegesa programe yetu ha guya mulongesa mu tangua dinyi tuajiya gudimona nu athu avula. Gula tuatshita ngenyi, Yehowa mbawutukuatesa.
YESU WADIDILE MUKUNDA NU JINA DIA YEHOWA
Gula watagana nu malamba, toga ukuateshi gudi Yehowa gifua muatshitshile Yesu (Tala paragrafe 15-17) *
15. Ha gutadila Luka 22:39-44, Yesu wakombelele mukunda nu ndaga itshi mu phipha ya gisugishilo gutuama egi afue?
15 Mu ngueze ya lusugu lua 14 Nisana lua givo 33, Yesu wayile mu dihia dia Getesemane, wakombelele Yehowa ha gumuwambela ndaga jiagasue jiakhalele gumusagesa. (Tanga Luka 22:39-44.) Mu tangua diene, ‘wakombelele Nzambi, wamububidile nu gudila guakola nu masoji.’ (Heb. 5:7) Yesu wakombelele mukunda nu ndaga itshi mu phipha ya gisugishilo gutuama egi afue? Wakombelele ha guheta ngolo jia gusala wagujinginyina gudi Yehowa nu ha gukalagala gutshigina guenji. Yehowa wavuile gisambu gia Mun’enji, watumine muanjelo ha gumuhana gikhesa.
16. Mukunda natshi Yesu wakhalele gudisagesa tangua diakhalele muene mukombelela mu dihia dia Getesemane?
16 Yesu wakombelele nu masoji gu meso mu dihia dia Getesemane handaga wakhalele gudisagesa luholo akhalele naye gumonesewa lamba gifua muthu ganago gunemesa jina dia Nzambi. Luko wakhalele mujiya egi wakhalele nu ginemo gia gusala wagujinginyina gudi Sh’enji nu gunemesa jina dienji. Gula aye nji udi mutagana nu malamba mukunda nu jina dia Yehowa, malongo atshi wajiya guzula mu gifezegeselo gia Yesu? Tutadilenu malongo thathu tuajiya guzula.
17. Longo ditshi tuajiya guzula mu luholo Yehowa wahanele mvutu gu isambu ya Yesu?
17 Yehowa wana guvua gukombelela guaye. Yehowa wavuile gukombelela gua Yesu. Mukunda natshi? Handaga Yesu wakhalele gudisagesa muavula ha gusala wagujinginyina gudi Sh’enji nu ha gunemesa jina dienji. Gula esue nji tudi gudisagesa ha gusala agujinginyina gudi Yehowa nu ha gunemesa jina dienji, muene mbawuvua gukombelela guetu.—Ngi. 145:18, 19.
18. Luholo lutshi Yesu udi gifua futa diabonga?
18 Yesu wana jiya luholo wana gudivua. Gula tudi nu gikenene, tuana suanguluga muavula gula tudi nu futa dietu udi mukotelesa luholo tudi gudivua. Yesu udi diago gifua futa muene handaga wana jiya luholo tuana gudivua tangua tudi mutagana nu malamba nu tudi nu funu ya ukuateshi. Yadiago, Yesu wana jiya malamba etu, mbawutshita yagasue hagula tuhete ukuateshi “mu tangua diabonga.” (Heb. 4:15, 16) Yesu watshiginyile ukuateshi wamuhanele muanjelo mu dihia dia Getesemane. Esue nji tudi naye gutshigina ukuateshi wana gutuhana Yehowa mu njila ya mikanda yetu, bavideo, badiskur nu mu njiya ya akulu nga aphangi ako agukula mu nyuma.
19. Luholo lutshi wajiya guheta ngolo gula udi mutagana nu ndaga idi gugusagesa? Hana gifezegeselo.
19 Yehowa mbawuguhana ‘guhuima guenji.’ Luholo lutshi Yehowa wana gutuhana ngolo? Gula tuakombelela Nzambi, muene ‘mbawutuhana guhuima guabalega ndaga jiagasue athu ajiya gukotelesa.’ (Fili. 4:6, 7) Guhuima guana gutuhana Yehowa, guana tulula mitshima yetu nu guana gutukuatesa ha gutangiza muabonga. Tutalenu luholo ndaga yene yakuatesele phangi wa mukhetu Luz. Udi muzuela egi: “Matangua avula ngakhalele gudivua hakhami. Matangua ako ngana tangiza egi Yehowa ganago gunguzumba gami. Uvi gula matangi a luholo elu angujila, ngana wambela Yehowa mbala imoshi mu gisambu. Gisambu giana gungukuatesa ha gudivua kiawaha.” Lumene lua phangi Luz ludi gutumonesa egi gisambu giajiya gutukuatesa ha gukhala nu guhuima.
20. Malongo atshi a ndando tuajiya guheta mu luholo Yesu wadidile?
20 Malongo atshi a ndando tuajiya guheta mu luholo Yesu wadidile? Mu longo edi tuamonyi egi tudi naye gukuatesa aphangi adi nu gikenene, tudi naye nji gusha mutshima egi gula muthu tuakhalele muzumba wafua Yehowa nu Yesu mbaatukuatesa. Tuamonyi nji egi tangua tudi mulongesa athu, tudi naye guavila khenda nu guamonesela gisemo handaga Yehowa nu Yesu ana monesa makalegelo awa abonga. Tuasuanguluga muavula ha gujiya egi Yehowa nu Mun’enji ana gujiya luholo tuana gudivua, ana gutuvila khenda mukunda nu guleba guetu, adi nji mutshigina gutukuatesa ha gukolesela. Tulandulenu gukalegela ndaga tualonguga mu longo edi uu nu tangua Yehowa mbawutagenesa laji dialayile muene egi ‘mbawukukumuna masoji agasue gu meso etu’!—Yat. 21:4.
LUNGIMBO 120 Imitons la douceur du Christ
^ par. 5 Biblia idi mumonesa egi gudi nu ndaga jiko jiakhalele mutuma Yesu ha guzola masoji. Mu longo edi tuza muzuelela ndaga thathu jiatumine Yesu ha guzola masoji, nu malongo tuajiya guzula mu gifezegeselo gienji.
^ par. 1 Mu longo edi, majina ako asombegesewe.
^ par. 6 Tala mukanda Étude perspicace, Volume 2, diyiji 34.
^ par. 12 Mbimbi ya Greke yabalumuiwe mu Matayo 22:39 ha guzuelela “muthu na muku’enu,” ishigo muzuelela phamba athu tuakhala nawo hehi, uvi idi muzuelela nji muthu wagasue tuajiya gutagana nenji.
^ par. 58 UKOTELESHI WA IFUANESA: Yesu udi muhana Madiya nu Mata gikhesa. Esue nji tudi naye gukuatesa aphangi adi mufuisa athu akhalele ene muzumba.
^ par. 60 UKOTELESHI WA IFUANESA: Yesu watshiginyile gulongesa Nikodemo mu phipha. Esue nji tudi naye gulongesa athu Biblia mu tangua didi diabonga mukunda nu ene.
^ par. 62 UKOTELESHI WA IFUANESA: Yesu wakombelele Yehowa hagula amukuatese asale yagujinginyina gudi muene. Esue nji tudi naye gukombelela Yehowa tangua tudi mutagana nu usageshi.