LONGO DIA 4
Mukunda Natshi Tudi Naye Guya mu Guwunguluga Gufua gua Yesu
‘Landulenu gukalagala ngenyi ha gunguwunguluga.’—LUKA 22:19.
LUNGIMBO 20 Tu as donné ton Fils bien-aimé
NDAGA JIDI MU LONGO EDI *
1-2. (a) Mu tangua ditshi diago tuana wunguluga athu tuakhalele muzumba anyi afuile gale? (b) Ndaga itshi yatshitshile Yesu mu phipha ya gisugishilo gutuama egi ashiyiwe?
TUANA landula guwunguluga athu tuakhalele muzumba anyi afile gale, ikhale masugu avula abalega gale. Tuana guawunguluga muavula gula tuaheta mu lusugu afuile.
2 Givo nu givo, tuana gudibungisa hamoshi nu bamilio a athu a ha mavu agasue ha guwunguluga gufua gua Yesu Klisto. (1 Phet. 1:8) Tuana guya ha guwunguluga luholo Yesu wahanele monyo wenji gifua gibawu ha gutukatula mu uhiga wa gubola nu gufua. (Mat. 20:28) Yesu wakhalele mutshigina egi alandudi enji alandule guwunguluga gufua guenji. Hene mu phipha ya gisugishilo gutuama egi ashiyiwe, wakalegele gudia gua fumu gua mu ngueze, gungima wawambelele alandudi enji egi: ‘Landulenu gukalagala ngenyi ha gunguwunguluga.’—Luka 22:19.
3. Ndaga jitshi tuza muzuelela mu longo edi?
3 Mukatshi dia athu ana gudibungisa ha Guwunguwuluga Gufua gua Klisto, phamba athu azonda akhala nu felela dia guya mu dilu. Uvi athu avula ana guya mu gudibungisa guene ana khala nu felela dia guheta monyo ha mavu. Mu longo edi tuza muzuelela ndaga jidi gutumonesa mukunda natshi mahunji awa mbadi ana khala nu gusuanguluga ha guya mu gudibungisa gua Guwunguluga gufua gua Yesu. Tuza mumona nji gubonga tuajiya guheta mu gudibungisa guene. Thomo tutadilenu gale mukunda natshi Aklisto ambiwe maji mu nyuma ana guya mu gudibungisa guene.
MUKUNDA NATSHI AKLISTO AMBIWE MAJI MU NYUMA ANA GUYA MU GUWUNGULUGA GUFUA GUA YESU?
4. Mukunda natshi Aklisto ambiwe maji mu nyuma ana gudia dipha nu gunua vinyo mu gudibungisa gua Guwunguluga Gufua gua Yesu?
4 Givo nu givo, Aklisto ambiwe maji mu nyuma ana guya mu gudibungisa gua Guwunguluga Gufua gua Yesu, ana gudia dipha nu ana gunua vinyo. Mukunda natshi phamba ene ana guyitshita? Ha guheta mvutu gu muhu owu, tutadilenu ndaga jiakalegewe mu phipha ya gisugishilo ya monyo wa Yesu ha mavu. Gungima dia gukalagala Wano wa Pake, Yesu wasendesesele wano wana tamegewa egi Gudia gua Fumu gua mu Ngueze. Wahanele apostolo enji kumi nu mumoshi mapha nu vinyo, waawambelele ha gudia. Yesu wazuelele nawo ndaga yatadila ikotelo mbadi: gikotelo gihe-gihe nu gikotelo mukunda nu Ufumu. * (Luka 22:19, 20, 28-30) Ikotelo yene yahanele apostolo nu athu ako azonda luendu lua gubua mafumu nu nganga-nzambi mu dilu. (Yat. 5:10; 14:1) Phamba Aklisto ambiwe maji mu nyuma anyi adi ha mavu nu adi mu ikotelo yene, ajiya gudia dipha nu gunua vinyo mu gudibungisa gua Guwunguluga Gufua gua Yesu.
5. Itshi Aklisto ambiwe maji mu nyuma ana jiya mukunda nu felela diawo?
5 Ndaga iko yana tuma Aklisto ambiwe maji mu nyuma ha guya mu gudibungisa gua Guwunguluga Gufua gua Yesu idi egi, guana guahana luendu lua gutangigiza felela diawo. Yehowa waahanele felela dia gukhala nu muila wajiyilego gufua nga gufukha mu dilu, dia guhinyina hamoshi nu Yesu Klisto nu athu ako 144 000, nu felela dia gukhala gutuama dia Yehowa Nzambi! (1 Kol. 15:51-53; 1 Yone 3:2) Aklisto ambiwe maji mu nyuma ana jiya egi atombewe ha guheta gubonga guene mu dilu. Uvi hagula aye mu dilu, adi naye gusala agujinginyina uu nu gufua guawo. (2 Tim. 4:7, 8) Tangua ana tangigiza felela diawo dia guya mu dilu, ana khala nu gusuanguluga. (Tito 2:13) Itshi tuajiya guzuela mukunda nu “imeme iko”? (Yone 10:16) Mukunda natshi yene nji yana guya mu gudibungisa gua Guwunguluga Gufua gua Yesu?
MUKUNDA NATSHI IMEME IKO YANA GUYA MU GUDIBUNGISA GUA GUWUNGULUGA GUFUA GUA YESU?
6. Mukunda natshi imeme iko yana guya mu gudibungisa gua Guwunguluga Gufua gua Yesu givo nu givo?
6 Imeme iko yanago guya mu gudibungisa gua Guwunguluga Gufua gua Yesu ha gudia dipha nga gunua vinyo, uvi akhala nu gusuanguluga tangua ndaga yene yana kalegewa. Aklisto akhala nu felela dia gujinga ha mavu asendesele guya mu gudibungisa gua Guwunguluga Gufua gua Yesu mu 1938. Inzo Yaleha ya Mutaledi ya 1 Mars 1938 ya Anglais yazuelele egi: “Idi ndaga yabonga egi [imeme iko] ikhale mu gudibungisa gua Guwunguluga Gufua gua Yesu ha gumona luholo ndaga jidi mubalega. . . . Idi nji tangua dia gusuanguluga mukunda nu ene.” Imeme iko yana khala nu gusuanguluga ha guya mu gudibungisa gua Guwunguluga Gufua gua Yesu, gifua luholo athu ana tamegewa gu wano wa ulo ana khala nu gusuanguluga.
7. Mukunda natshi imeme iko yana suanguluga nu diskur diana kalegewa mu Guwunguluga Gufua gua Yesu?
7 Imeme iko yana tangigiza nji felela diawo tangua ana guya mu Guwunguluga Gufua gua Yesu. Mu gudibungisa guene, ana tegelela diskur diana zuelela muavula ndaga Klisto nu athu 144 000 mbahinyina n’enji mbaakalegela athu adi nu felela dia gujinga ha mavu mu Uhinyinyi wa Ivo 1 000. Mu utuameji wa Fumu Yesu Klisto, athu mbahinyina n’enji mbakuatesa ha gubuisa mavu phaladiso, mbakuatesa nji athu ha gubua athu atagana. Athu avula adi nu felela dia gujinga ha mavu akhala nu gusuanguluga guavula mu gudibungisa gua Guwunguluga Gufua gua Yesu tangua ana tangigiza luholo profesi jia Biblia mbajitagenesewa mu masugu adi muza; ana tangigiza profesi gifua eji jidi mu Yeshaya 35:5, 6; 65:21-23; nu Yatuwuwe 21:3, 4. Tangua ana tangiza luholo ene nu athu ana zumba mbakhala mu mavu ahe-ahe, yana kolesa felela diawo mukunda nu masugu adi muza, yana kolesa nji desizio diawo dia gulandula gukombelela Yehowa.—Mat. 24:13; Gal. 6:9.
8. Ndaga itshi iko yana tshita egi imeme iko iye mu gudibungisa gua Guwunguluga Gufua gua Yesu?
8 Tuzuelele ndaga iko yana tshita egi imeme iko iye mu gudibungisa gua Guwunguluga Gufua gua Yesu. Ana tshigina gumonesa guzumba guawo gudi Aklisto ambiwe maji mu nyuma nu ha guakuatesa. Mbimbi ya Nzambi yadiangele guzuela egi Aklisto ambiwe maji mu nyuma nu Aklisto adi nu felela dia guheta monyo ha mavu mbaakalaga mudimo hamoshi. Luholo lutshi? Tutadilenu ifezegeselo idi guyimonesa.
9. Profesi idi mu Zakaliya 8:23 idi gutumonesa egi imeme iko yana gudivua luholo lutshi mukunda nu Aklisto ambiwe maji mu nyuma?
9 Tanga Zakaliya 8:23. Profesi eyi idi gutumonesa luholo imeme iko yana gudivua mukunda nu aphangi’awo a Aklisto anyi ambiwe maji mu nyuma. Mbimbi “muenya Yuda,” “n’enu” jidi mumonesa hunji dimoshi, yakotelesa egi Aklisto ambiwe maji mu nyuma. (Lomo 2:28, 29) ‘Athu kumi a mazuelelo agasue a mu ifutshi,’ adi mumonesa imeme iko. Ana ‘gukuata mangololo,’ yakotelesa egi ana sala agujinginyina gudi Aklisto ambiwe maji mu nyuma, ana khala nji nawo mu gikombelelo gia giamatshidia. Gishina giene, imeme iko yana guya mu gudibungisa gua Guwunguluga Gufua gua Yesu ha gumonesa egi adi agujinginyina gudi Aklisto ambiwe maji mu nyuma.
10. Itshi Yehowa wakalegele ha gutagenesa profesi idi mu Ezekiele 37:15-19, 24, 25?
10 Tanga Ezekiele 37:15-19, 24, 25. Yehowa wataganesele profesi eyi tangua diabungishile muene Aklisto ambiwe maji mu nyuma nu imeme iko hagula akhale mutshita hamoshi mu gudivua. Profesi yene idi muzuelela mabaya mbadi. Aklisto adi nu felela dia guya mu dilu adi gifua baya ‘dia Yuda’ (giphuta akhalele mutomba mafumu a enya Isalele). Uvi Aklisto adi nu felela dia guheta monyo ha mavu adi gifua baya ‘dia Efalayime.’ * Yehowa wabungishile mahunji awa mbadi ha gubua ‘baya dimoshi.’ Yakotelesa egi ana kalagala mudimo hamoshi mu utuameji wa Fumu wawo Klisto Yesu. Givo nu givo, Aklisto ambiwe maji mu nyuma nu imeme iko anago gukhala mahunji mbadi tangua ana tshita Guwunguluga Gufua gua Yesu, uvi ana khala ‘hunji dimoshi’ mu utuameji wa ‘mubambi mumoshi.’—Yone 10:16.
11. Luholo lutshi “imeme” adi muzuelela mu Matayo 25:31-36, 40 yana kuatesa Aklisto ambiwe maji mu nyuma?
11 Tanga Matayo 25:31-36, 40. “Imeme” yazuelele Yesu mu gifezegeselo gienji idi mumonesa athu ana tumagela Yehowa mu masugu a gisugishilo, anyi adi nu felela dia guheta monyo ha mavu, yakotelesa imeme iko. Ana kuatesa Aklisto ambiwe maji mu nyuma anyi adi ha mavu ha gutagenesa ginemo giakoma gia gulongesa lukuma luabonga nu gubuisa athu alandudi.—Mat. 24:14; 28:19, 20.
12-13. Mu maluholo atshi ako imeme iko yana kuatesa aphangi a Klisto?
12 Givo nu givo, phoso jiazonda gutuama egi gudibungisa gua Guwunguluga Gufua gua Yesu gukalegewe, imeme iko yana kuatesa aphangi a Klisto ha gutamega athu ha guza mu gudibungisa guene ha mavu a mudidi. (Tala galuanda “ Ndaga Wajiya Gutshita mu Sungi ya Guwunguluga Gufua gua Yesu”) Ana gudilondega ha gukalagala gudibungisa gua Guwunguluga Gufua gua Yesu, ikhale mu hungu diawo ashigo nu Muklisto wambiwe maji mu nyuma. Ana khala nu gusuanguluga ha gukuatesa aphangi a Klisto. Ana jiya egi ndaga ana kalegela Aklisto ambiwe maji mu nyuma, Yesu wana gujimona gifua adi gumukalegela muene.—Mat. 25:37-40.
13 Gudi nu ndaga jiko jiana gututuma mukut’etu agasue ha guya mu gudibungisa gua Guwunguluga Gufua gua Yesu, ikhale tudi nu felela dia guheta monyo ha mavu nga dia guya mu dilu.
MUKUNDA NATSHI MUKUT’ETU AGASUE TUANA GUYA MU GUDIBUNGISA GUENE?
14. Luholo lutshi Yehowa nu Yesu amonesele egi ana gutuzumba muavula?
14 Tuana guya ha guhana mersi gudi Yehowa nu Yesu mukunda nu guzumba guawo. Yehowa wana gutuzumba mu maluholo avula. Uvi luholo luabalega ndando ludi luholo luatumile muene Mun’enji ha gumona malamba nu ha gufua mukunda nu esue. (Yone 3:16) Tuana jiya egi Yesu nji wamonesele guzumba guakoma handaga watshiginyile ha guhana monyo wenji mukunda nu esue. (Yone 15:13) Tushigo nu luholo lua gufuta Yehowa nu Yesu mukunda nu guzumba guawo atumonesele; uvi tuajiya guahana mersi avula mu makalegelo etu a lusugu nu lusugu. (Kol. 3:15) Hene tuana guya mu gudibungisa gua Guwunguluga Gufua gua Yesu ha gutangigiza luholo atumonesele guzumba guawo nu ha guamonesela nji guzumba guetu.
15. Mukunda natshi Aklisto ambiwe maji mu nyuma nu imeme iko ana zula gibawu nu ndando yavula?
15 Tuana guya handaga tuana zula gibawu nu ndando yavula diago. (Mat. 20:28) Aklisto ambiwe maji mu nyuma ana zula gibawu nu ndando yavula handaga giana guakuatesa ha guheta felela dia guya mu dilu. Yehowa wana guatamega egi athu abonga gu meso enji nu wana guabuisa an’enji, handaga ana gusha gutshigina mu mulambu wa Klisto. (Lomo 5:1; 8:15-17, 23) Imeme iko yana hana nji mersi avula mukunda nu gibawu. Luholo ana sha gutshigina mu mulambu wa Klisto, ana khala atagana ha gumagana gutuama dia Nzambi, ana gumukalegela mudimo wa gijila nu ana khala nu felela dia gukhala mukatshi dia ‘athu mbaahuluishiwa mu lamba diakola.’ (Yat. 7:13-15) Aklisto ambiwe maji mu nyuma nu imeme iko ana hana mersi mukunda nu gibawu tangua ana guya mu gudibungisa gua Guwunguluga Gufua gua Yesu givo nu givo.
16. Ndaga itshi iko yana gututuma ha guya mu gudibungisa gua Guwunguluga Gufua gua Yesu?
16 Tuana guya mu gudibungisa gua Guwunguluga Gufua gua Yesu handaga tuana tshigina gumutumagela. Ikhale tudi nu felela dia guya mu dilu nga dia guheta monyo ha mavu, mukut’etu agasue tuana tumagela mukhuala wahanele Yesu egi: ‘Landulenu gukalagala ngenyi ha gunguwunguluga.’—1 Kol. 11:23, 24.
GUBONGA GUTSHI TUANA HETA MU GUDIBUNGISA GUA GUWUNGULUGA GUFUA GUA YESU?
17. Luholo lutshi Guwunguluga Gufua gua Yesu guana gutukuatesa ha gusuena hehi nu Yehowa?
17 Tuana suena hehi nu Yehowa. (Yak. 4:8) Gifua luholo tuayimonyi, Guwunguluga Gufua gua Yesu guana gutuhana luendu lua gutangigiza felela diatuhanele Yehowa nu guzumba guenji guavula. (Yel. 29:11; 1 Yone 4:8-10) Gutshita ngenyi guana gutukuatesa ha gukolesa ufuta wetu nu Yehowa nu ha gumuzumba muavula.—Lomo 8:38, 39.
18. Gutangigiza ndaga jiakalegele Yesu guana gututuma ha gukalagala itshi?
18 Tuana landula gifezegeselo gia Yesu. (1 Phet. 2:21) Mu sungi ya Guwunguluga Gufua gua Yesu, tuana tanga verse jiana zuelela masugu enji a gisugishilo ha mavu, gufua nu gufuzumuga guenji. Mu ngueze ya Guwunguluga Gufua gua Yesu, tuana landula diskur diana gutuwunguluisa luholo Yesu watuzumbile. (Ef. 5:2; 1 Yone 3:16) Tangua tuana tanga nu tuana tangigiza ndaga jiakalegele Yesu mukunda nu esue, yana gututuma ha ‘gukalagala ndaga gifua muakalegele muene.’—1 Yone 2:6.
19. Luholo lutshi tuajiya gulandula gukhala mu guzumba gua Nzambi?
19 Tuana zula desizio dia gulandula gukhala mu guzumba gua Nzambi. (Yuda 20, 21) Tuana landula gukhala mu guzumba gua Nzambi tangua tuana tshita yagasue ha gumutumagela, ha gutumbuisa jina dienji nu ha gumusuanguluisa. (Ish. 27:11; Mat. 6:9; 1 Yone 5:3) Guwunguluga Gufua gua Yesu guana gutukuatesa ha gukhala nu makalegelo adi mumonesa egi ‘tudi mutshigina gukhala mu guzumba gua Yehowa mayilago!’
20. Ndaga jitshi jiana gututuma ha guya mu Gudibungisa gua Gufua gua Yesu?
20 Ikhale felela dietu didi dia guya mu dilu nga dia guheta monyo wa ivo nu ivo ha mavu, tudi nu ndaga jiavula jiana gututuma ha guya mu gudibungisa gua Guwunguluga Gufua gua Yesu. Givo nu givo, tuana gudibungisa ha Guwunguluga Gufua gua Yesu Klisto handaga tuana gumuzumba. Tuana guwunguluga nji guzumba guakoma guatumonesele Yehowa luholo luahanele muene Mun’enji gifua gibawu. Mu givo egi Gudibungisa gua Guwunguluga Gufua gua Yesu mbagukalegewa mu Lusugu lua Thano 15 Avril 2022 mu ngueze. Tuana zumba Yehowa nu Mun’enji. Yadiago, guya mu gudibungisa guene gudi nu ndando yavula gubalega ndaga jiagasue tuajiya gukalagala mu lusugu luene.
LUNGIMBO 16 Louez Jéhovah et son Fils, l’Oint
^ par. 5 Tuana guya mu gudibungisa gua Guwunguluga Gufua gua Yesu givo nu givo, ikhale tudi nu felela dia guya mu dilu nga dia guheta monyo mu phaladiso ha mavu. Mu longo edi, tuza mumona ndaga jiana zuela Biblia jidi gutumonesa ishina tuana guyila mu gudibungisa gua Guwunguluga Gufua gua Yesu nu gubonga tuana guheta.
^ par. 4 Ha gujiya ndaga jiavula jiatadila gikotelo gihe-gihe nu gikotelo mukunda nu Ufumu, tala longo “Vous deviendrez ‘un royaume de prêtres’” didi mu Inzo Yaleha ya Mutaledi ya 15 Octobre 2014, diyiji 15-17 ya français.
^ par. 10 Ha gujiya ndaga jiavula jiatadila profesi eyi ya mabaya mbadi idi mu Ezekiele mukhapho 37, tala mukanda Le culte pur de Jéhovah enfin rétabli!, diyiji 130-135, par. 3-17.