LONGO DIA 29
Khala Muhana Mago mu Utuameji wa Yesu
“Nzambi wanguhanele ufumu wa ndaga jiagasue mu dilu nu ha mavu.”—MAT. 28:18.
LUNGIMBO 13 Christ, notre modèle
NDAGA JIDI MU LONGO EDI *
1. Gutshigina gua Yehowa gudi itshi mangino?
MANGINO, gutshigina gua Nzambi gudi egi lukuma luabonga lua Ufumu lulongesewe ha mavu agasue. (Mako 13:10; 1 Tim. 2:3, 4) Mudimo wene udi wa Yehowa, hene watombele mun’enji wa guzumba ha guwutuameza. Luholo mudimo wa gulongesa udi mutuamezewa gudi Yesu, tudi musha mutshima egi mudimo wene mbawukalegewa diago gifua mudi gutshigina gua Yehowa gutuama egi gisugishilo gize.—Mat. 24:14.
2. Itshi tuza mulonguga mu longo edi?
2 Mu longo edi, tuza mumona luholo Yesu wana kalegela “muhiga wafubidila nu watema” ha guhana alandudi enji malongo a Biblia, nu ha guahana formasio ha gukalagala mudimo wa gulongesa ha mavu agasue. (Mat. 24:45) Tuza nji mumona, luholo mukut’etu agasue tuajiya gukuatesa Yesu nu muhiga wafubidila nu watema.
YESU WANA TUAMEZA MUDIMO WA GULONGESA
3. Ufumu utshi ahanele Yesu?
3 Yesu udi mutuameza mudimo wa gulongesa. Itshi idi gutukuatesa ha guzuela ngenyi? Gutuama egi Yesu aye mu dilu, wakhalele nu alandudi enji mu mulundu wa Galilea. Waawambelele egi: “Nzambi wanguhanele ufumu wa ndaga jiagasue mu dilu nu ha mavu.” Wazuelele luko egi: “Ndenu gudi athu a ifutshi yagasue, muaabuise alandudi ami.” (Mat. 28:18, 19) Yesu wahanewe nji ufumu wa gutuameza mudimo wa gulongesa.
4. Ndaga jitshi jidi gututshiginyisa egi Yesu yowu genji mutuameza mudimo wa gulongesa?
4 Yesu wazuelele egi mudimo wa gulongesa mbawukalegewa mu “ifutshi yagasue,” muene mbawukhala nu alandudi enji “masugu agasue uu nu gu gisugishilo gia mavu awa.” (Mat. 28:20) Ndaga eji jidi mumonesa haphelo egi, Yesu yowu genji mulandula gutuameza mudimo wa gulongesa uu nu mangino.
5. Luholo lutshi tuana hana mago ha gutagenesa mbimbi jidi mu Ngimbo 110:3?
5 Yesu gadisageselego egi mbagukhadigo nu athu avula ha gukalagala mudimo wa gulongesa gu gisugishilo gia mavu awa. Wajiyile egi mbimbi eji jiazuelele muyimbi wa ngimbo mbajitagenesewa: ‘Athu aye mbaadihana nu mutshima umoshi lusugu mbawutuameza masuta aye gu ita.’ (Ngi. 110:3) Gula tudi mulongesa lukuma luabonga, idi mumonesa egi tudi mukuatesa Yesu nu muhiga wafubidila, nu tuana hana mago ha gutagenesa profesi yene. Idi yadiago egi mudimo wa gulongesa udi muya gutuama, uvi tuana tagana nji nu malamba.
6. Lamba ditshi alongeshi a Ufumu ana tagana nadio mangino?
6 Alongeshi a lukuma luabonga lua Ufumu, ana tagana nu usageshi. Ba aposta nu mafumu a ikombelelo nu enya politike, ana wambela athu ndaga jiavula jia mambo mukunda nu mudimo wetu. Gula enya fami jietu nu athu tuana jiya nu mafuta etu a mudimo adi mulandula ndaga jiene jia mambo, ajiya gutushijinga ha gubemba gukombelela Yehowa nu gulongesa lukuma luabonga. Mu ifutshi iko, mbalagaji jietu jiana sagesa akombelegi a Yehowa, ana kuata a phangi’etu, ana guamba mu bologo nu ana kamba guavisa nji woma. Ndaga yene yanago gutuyitugisa. Yesu wazuelele egi: “Ifutshi yagasue mbayikhala n’enu umbalagaji mukunda nu jina diami.” (Mat. 24:9) Luholo tudi mutagana nu usageshi, idi mumonesa diago egi Yehowa wana suanguluga nu esue. (Mat. 5:11, 12) Diabulu, muene wana tuma mbalagaji jietu ha gutusagesa. Uvi Yesu udi nu ngolo jiavula gubalega Satana! Lukuma luabonga luana longesewa gudi athu a ifutshi yagasue, handaga Yesu wana gutukuatesa. Tutadilenu ndaga idi mumonesa egi Yesu wana gutukuatesa.
7. Itshi idi mumonesa egi ndaga jidi mu Gumonesa 14:6, 7 jidi mutagenesewa?
7 Tuana tagana nji nu lamba diko tangua tuana longesa. Ha mavu awa athu ana zuela mazuelelo avula agudisha. Mu vizio yamonele mupostolo Yone, Yesu wazuelele egi mu masugu etu, mazuelelo mbaashigo mukanga njila egi lukuma luabonga lulongesewe. (Tanga Gumonesa 14:6, 7.) Luholo lutshi? Mangino, tuana kuatesa athu avula ha gujiya lukuma luabonga lua Ufumu. Ha mavu a mudidi athu ajiya gutala bavideo nu gutanga mikanda nu ndaga jiko jiana kotelesa Biblia mu site yetu jw.org mu mazuelelo gubalega 1 000! Ahanele njila ha gubalumuna mukanda Heta Monyo wa Ivo nu Ivo! ha gubuisa athu alandudi mu mazuelelo gubalega 700. Ulondegi wa Yehowa wana zola nji ba video ana hana malongo a Biblia mukunda nu ifua matshui, nu mikanda mu braille mukunda nu ifofo. Tuana mona gutagenesewa gua profesi jia Biblia. Athu a ‘mazuelelo agasue a ha mavu’ adi mulonguga ‘zuelelo dia phelegeta.’ Zuelelo diene didi giamatshidia gidi mu Biblia. (Zak. 8:23; Sef. 3:9) Ndaga eji jiagasue, jidi mutagenesewa mu utuameji wa Yesu Klisto.
8. Mudimo wetu wa gulongesa wana kuatesa athu ha gutshita itshi?
8 Mangino athu gubalega 8 000 000 mu ifutshi 240, ana kombelela Yehowa ha moshi mu ulondegi wenji. Givo nu givo athu avula ana batijiwa! Uvi ndaga yabalega ndando idi egi, alandudi ahe-ahe ana kudisa makalegelo abonga a “umuthu uhe-uhe.” (Kol. 3:8-10) Athu avula abembele gale ndaga jia musonyi, ndaga jia khuta, gutangijila athu ndaga jiabola nu gutuna guzumba gifutshi giawo muavula gubalega. Profesi idi mu Yeshaya 2:4 yatagenesewe gale; handaga ‘anago gudilondega luko ha guya mulua ita.’ Luholo tudi mutshita yagasue ha gusudiga umuthu uhe-uhe, tuana kuatesa athu ha gulonguga giamatshidia, nu tuana monesa egi tuana landula utuameji wa Klisto Yesu. (Yone 13:35; 1 Phet. 2:12) Yesu wana gutukuatesa ha gukalagala ndaga eji jiagasue.
YESU WATOMBELE MUHIGA
9. Ha gutadila Matayo 24:45-47, ndaga itshi Yesu wadiangele guzuela mukunda nu masugu a gisugishilo?
9 Tanga Matayo 24:45-47. Yesu wadiangele guzuela egi mu masugu a gisugishilo mbawutomba “muhiga wafubidila nu watema,” ha guhana akombeledi a Nzambi malongo adi mukatuga mu Biblia. Ndaga yazuelele Yesu ya monesele egi muhiga mbawukalagala mudimo wakola mu masugu etu. Yene tudi mumona diago mangino. Yesu mutuameji wetu wana kalegela hunji diazonda dia Aklisto ambiwe maji mu nyuma ha guhana akombeledi a Nzambi, nu athu ana longuga Biblia “ima ya gudia [ya mu nyuma] mu tangua diatagana.” Aklisto ene anago gudimona egi adi mafumu a gutshigina gua aphangi ako. (2 Kol. 1:24) Ana jiya egi Yesu Klisto muene udi ‘fumu nu mutuameji’ wa alandudi enji.—Yesh. 55:4.
10. Mukanda utshi wagukuatesele ha gujiya giamatshidia?
10 Sendese mu 1919, muhiga wafubidila nu watema wana zola mikanda yana kuatesa athu ahe-ahe ana suanguluga nu giamatshidia ha gulonguga ndaga jidi mu Biblia. Mu givo 1921, muhiga wazolele mukanda La Harpe de Dieu ha gukuatesa athu ana suanguluga nu giamatshidia ha gulonguga malongo a thomo a Biblia. Gungima, azolele mikanda iko. Mukanda utshi wa gukuatesele ha gujiya Tata wetu wa mu dilu nu ha gumuzumba? Yakhalele mukanda “Que Dieu soit reconnu pour vrai!,”La vérité qui conduit à la vie éternelle, Vous pouvez vivre éternellement sur une terre qui deviendra un paradis, La connaissance qui mène à la vie éternelle, Qu’enseigne réellement la Bible?, Itshi Biblia Yajiya Gutulongesa?, nga Heta Monyo wa Ivo nu Ivo!, mukanda wetu uhe-uhe? Mikanda eyi yagasue yana gutukuatesa ha gubuisa athu alandudi nu yana zolewa mutangua diabonga.
11. Mukunda natshi idi nu ndando egi mukut’etu agasue tulonguge ndaga jiavula jiatadila Yehowa nu Biblia?
11 Ishigo phamba athu ahe-ahe ana longuga Biblia ana khala nu funu ya gujiya ndaga jiavula jiatadila Yehowa nu Biblia. Mukut’etu agasue tudi naye gutshita ngenyi. Mupostolo Phaula wasonegele egi: “Ima ya gudia yakola idi mukunda nu athu a gukula.” Phaula wazuelele luko egi gula athu adi mukalegela ndaga ana longuga mu Biblia, mbajiakuatesa ha gujiya “gudisha gudi mukatshi dia ndaga jiabonga nu jiabola.” (Heb. 5:14) Yajiya gukhala lamba ha gutumagela mikhuala ya Yehowa mangino, handaga athu avula ana kalagala ndaga jia musonyi. Uvi Yesu wana jiya egi ndaga tuana longuga jiana gutukuatesa ha gukhala nu gutshigina guakola. Ndaga jiene jiana katuga mu Biblia, Mbimbi ya Nzambi. Mu utuameji wa Yesu, muhiga wafubidila wana londega malongo a Biblia nu wana guahana gudi akombeledi a Nzambi.
12. Gifua Yesu, luholo lutshi tuana tumbuisa jina dia Nzambi?
12 Tuana tumbuisa jina dia Yehowa gifua muatshitshile Yesu. (Yone 17:6, 26) Ha gufezegesa, mu 1931 tuazudile jina dia Matemue a Yehowa didi mu Biblia. Ngenyi tuamonesele egi jina dia Nzambi didi diago nu ndando gu meso etu. Tuana tshigina egi athu agasue ajiye egi tudi Matemue a Yehowa. (Yesh. 43:10-12) Sendese mu Octobre ya givo giene, jina dia Nzambi diasendesele gusonegewa holu dia gizula gia Inzo Yaleha ya Mutaledi. Mu La Bible. Traduction du monde nouveau, avutudile jina dia Nzambi mu mafundo didi naye gukhala mu Mbimbi yenji. Uvi, enya ikombelelo ya mambo akatudile jina dia Yehowa mu Biblia jiawo jiavula!
YESU WALONDELE ULONDEGI MUKUNDA NU ALANDUDI ENJI
13. Itshi idi gugutshiginyisa egi mangino Yesu udi mukalegela “muhiga wafubidila nu watema”? (Yone 6:68)
13 Mu njila ya “muhiga wafubidila nu watema,” Yesu walondele ulondegi umoshi wa gushimana ha mavu, ha guhana mago gu gikombelelo gia giamatshidia. Luholo lutshi wana gudivua mukunda nu ulondegi wene? Yajiya gukhala egi udi gudivua gifua muadivuile mupostolo Phetelo yago wawambelele Yesu egi: “Fumu, tuya gudi nanyi? Aye udi nu mbimbi jia monyo wa ivo nu ivo.” (Yone 6:68) Gula nga tushigo mu ulondegi wa Yehowa nga gui tudi mangino? Klisto wana tshita yagasue hagula tuhete ima yagasue tudi nayo funu ha gusala ya gujinginyina gudi Nzambi. Wana gutuhana formasio ha gukalagala mudimo wa gulongesa muabonga. Wana gutukuatesa nji ha gusudiga “umuthu uhe-uhe,” ha gusuanguluisa Yehowa.—Ef. 4:24.
14. Luholo udi mu ulondegi wa Yehowa, gubonga gutshi wahetele mu sungi ya misongo ya coronavirus?
14 Yesu wana gutuhana utuameji wabonga mu tangua dia lamba. Tuamonele diago gubonga gua utuamaji wene tangua misongo coronavirus yasendesele. Mu tangua diene, athu avula akhalelego mujiya ndaga ya gutshita, uvi Yesu watshitshile yagasue hagula tuajiya guheta malongo abonga ajiya gutukuatesa ha gudibamba. Atuhanele malongo ha gudibamba, gifua gusudiga maske nu gutuna gukhala hehi-hehi nu athu ako. Awambelele akulu ha guta maga muavula nu aphangi agasue a mu hungu, ha gujiya ima adi nayo funu ha gudibamba, ha gukhala nu sante yabonga nu ha guakuatesa ha gukhala nu ufuta wabonga nu Yehowa. (Yesh. 32:1, 2) Tuahetele nji malongo ako nu gikhesa mu njila ya Mbimbi jia Hunji dia Akulu Atuameji.
15. Utuameji utshi tuahetele mukunda nu gudibungisa nu mudimo wa gulongesa mu sungi ya misongo ya coronavirus? Gubonga gutshi tuahetele mu utuameji wene?
15 Mu sungi ya misongo ya coronavirus, tuahetele nji utuameji mukunda nu gudibungisa gua mu hungu nu luholo lua gulongesa lukuma luabonga. Tuasendesele gutshita gudibungisa gua mu hungu nu ba asamble a lusugu lumoshi nu a masugu thathu mu vidéoconférence mu njila ya internet. Tuasendesele nji gusonega mikanda nu gutshitshila telefone ha gulongesa lukuma luabonga. Yehowa watukuatesele diago muavula. Ba betele avula ahanele rapore yamonesele egi alongeshi alanduile gudivudisa. Aphangi avula ahetele ba eksperianse avula mu sungi ya misongo yene.—Tala galuanda “ Yehowa Wana Shimbiga Mudimo Wetu wa Gulongesa.”
16. Mu ndaga itshi tudi naye gusha mutshima?
16 Yajiya gukhala egi athu ako atangijile egi ulondegi wa Yehowa wakhalele gudisagesa muavula gubalega mukunda nu coronavirus. Uvi gungima, tuakotelesele egi malongo atuhanele muhiga akhalele diago nu ndando. (Mat. 11:19) Tangua tuana tangigiza luholo Yesu wana gututuameza nu guzumba guagasue, yana gutukuatesa ha gusha mutshima egi ngatshima mu masugu adi muza tuatagana nu ndaga ya luholo lutshi, Yehowa nu mun’enji wa guzumba mbaakhala nu esue.—Tanga Hebelu 13:5, 6.
17. Luholo lutshi udi gudivua tangua wajiya egi Yesu udi mutuameji wetu?
17 Tudi nu gusuanguluga guavula luholo tuana tshita mudimo mu utuameji wa Yesu! Mu ulondegi wa Yehowa tuana khalago nu ukhaphumunyi, ikhale tudi athu a mafundo a gudisha, a ifutshi ya gudisha nu a mazuelelo a gudisha. Tuana heta malongo adi mukatuga mu Mbimbi ya Nzambi nu tuana heta formasio ha gutshita muabonga mudimo wa gulongesa. Mukut’etu agasue ana gutulongesa ha gusudiga umuthu uhe-uhe nu ha guzumba athu ako. Hene tudi naye gusuanguluga handaga Yesu udi mutuameji wetu!
LUNGIMBO 16 Louez Jéhovah et son Fils, l’Oint
^ Mangino athu avula mala nu akhetu nu ana, ana longesa lukuma luabonga nu gikhesa giagasue. Aye nji udi mukatshi dia athu ene ba? Gula idi ngenyi, jiya egi udi mutshita mudimo wene mu utuameji wa Fumu wetu Yesu Klisto. Mu longo edi, tuza muzuelela ndaga jidi mumonesa egi Yesu udi mutuameza mudimo wa gulongesa mangino. Gutangigiza ndaga jiene, mbayitukuatesa ha gulandula gukalegela Yehowa mudimo mu utuameji wa Klisto.
