LONGO DIA 31
Khala Muzula Gisambu nu Ndando Yavula
‘Gisambu giami gikhale gifua uhafu walondewa gutuama diaye.’—NGI. 141:2.
LUNGIMBO 47 Prie Jéhovah chaque jour
NDAGA JIDI MU LONGO EDI *
1. Luholo lutshi tudi naye gutadila luendu lua tuhanele Yehowa lua guta n’enji maga mu gisambu?
YEHOWA Mufugi wa dilu nu mavu, watuhanele luendu luakoma lua guta n’enji maga mu njila ya gisambu. Tangiza gale: Tuajiya guwambela Yehowa ndaga jiagasue jidi mu mutshima wetu ikhale mu tangua ditshi, mu zuelelo tuatshigina, ngatshima tuadivilego n’enji gutuama. Ngatshima tudi gu hôpital nga mu bologo, tuajiya gutshita gisambu gudi Yehowa nu gusha mutshima egi muene mbawututegelela. Tuana suanguluga diago nu luendu luakoma lua tuhanele Yehowa lua gutshita gisambu.
2. Luholo lutshi Fumu Davidi wamonesele egi wakhalele muzula gisambu nu ndando yavula?
2 Fumu Davidi wakhalele muzula gisambu nu ndando yavula. Wawambelele Yehowa mu lungimbo egi: ‘Gisambu giami gikhale gifua uhafu walondewa gutuama diaye.’ (Ngi. 141:1, 2) Mu masugu a Davidi, akhalele mulonda muabonga uhafu wa gijila unu nganga Nzambi jiakhalele mukalegela mukunda nu gikombelelo gia giamatshidia. (Guz. 30:34, 35) Luholo Davidi wazuelele ndaga yatadila uhafu, idi mumonesa egi wakhalele mutshigina gulonda matangi’enji gutuama ha gujiya ndaga jiakhalele naye guzuela muene mu gisambu. Esue nji tuana tshigina gutshita ngenyi. Tuana tshigina egi Yehowa asuanguluge nu isambu yetu.
3. Itshi tudi naye gutshita tangua tudi mukalagala gisambu gudi Yehowa nu mukunda natshi?
3 Tangua tudi musamba Yehowa, tudi naye gukalagala ndaga nu ginemua. Yeshaya nu Ezekiele nu Danyele nu Yone amonele vizio jia gushimana. Vizio jiene jidi jia gudisha, uvi jidi nu ndaga imoshi idi gudivua. Vizio jiene jiagasue jidi mumonesa egi Yehowa udi Fumu wakoma. Yeshaya ‘wamonele Yehowa ya gukhala ha nguasa yaleha ya ufumu.’ (Yesh. 6:1-3) Ezekiele wamonele Yehowa ya gukhala holu dia phusu-phusu ya mu dilu, yakhalele ya gujeta nu ‘kiajiji giakhalele . . . gifua gia khongolo.’ (Ezek. 1:26-28) Danyele wamonele “Mukulu wa Masugu” yagusudiga milele ya phelegeta, tshuya tuakhalele mukatuga gu nguasa yenji ya ufumu. (Dan. 7:9, 10) Yone wamonele Yehowa ya gukhala ha nguasa ya ufumu. Mu khulo ya nguasa yene muakhalele nu gima gimoshi gifua khongolo yakhalele mumonega gifua emelode. (Gumo. 4:2-4) Tangua tuana tangingiza lutumbu lua Yehowa, yana gutuwunguluisa egi watuhanele luendu luakoma lua guta n’enji maga mu gisambu nu idi nu ndando ha gumutumbuisa. Mukunda nu ndaga jitshi tudi naye gusamba?
“MUDI NAYE GUKOMBELELA LUHOLO ELU”
4. Longo ditshi tuazula mu ndaga jiazuelele Yesu mu gisendeselo gia gisambu gidi mu Matayo 6:9, 10?
4 Tanga Matayo 6:9, 10. Mu diskur dia Yesu holu dia mulundu, walongesele alandudi enji luholo adi naye gukombelela ha gusuanguluisa Nzambi. Ngungima dia guzuela egi “mudi naye gukombelela luholo elu,” Yesu wazuelele thomo danga jidi nu ndando yavula jinyi jidi gudivua nu gutshigina gua Yehowa: gunemesa jina dia Yehowa; guza gua Ufumu wa Nzambi wunu mbawushiya mbalagaji jiagasue jia Nzambi; nu ndaga jiabonga mbajikalagala muene mukunda nu athu nu mavu. Gula tudi mukalegela ndaga eji mu isambu yetu mbatumonesa egi, gutshigina gua Yehowa gudi nu ndando mukunda nu esue.
5. Tuajiya gukombelela mukunda nu ndaga jietu akhetu ba?
5 Mu gitshinyi gialandula gia gisambu giene, Yesu wamonesele egi idi nu ndando ha gukombelela nji mukunda nu ndaga jietu akhetu. Tuajiya gutoga Yehowa ima ya gudia tudi nayo funu, ha gututotesela gubola guetu, ha gutukuatesa hagula tubuigo mu gubola nu ha gutuhuluisa ha mago a muthu wabola. (Mat. 6:11-13) Tangua tuana toga Yehowa ndaga eji jiagasue, tuana monesa egi tudi nu funu ya ukuateshi wenji nu tuana tshigina gumusuanguluisa.
Itshi yala nu mukaji’enji ajiya gutoga mu gisambu? (Tala paragrafe 6) *
6. Tudi naye gukombelela phamba mukunda nu ndaga adi muzuelela mu gisambu gia gifezegeselo ba? Kotelesa.
6 Yesu gatshiginyilego guzuela egi alandudi enji akhalele naye gukalegela phamba mbimbi jidi mu gisambu gia gifezegeselo. Mu isambu iko yatshitshile Yesu, wakombelele nji mukunda nu ndaga jiko jiakhalele gumusagesa. (Mat. 26:39, 42; Yone 17:1-26) Luholo lumoshi, esue nji tuajiya gusamba mukunda nu ndaga jidi gutusagesa. Gula tudi mutshigina guzula desizio, tuajiya gutshita gisambu ha gutoga Yehowa ndunge ha gukotelesa ndaga muabonga. (Ngi. 119:33, 34) Gula atuhana ginemo gimoshi giakola ha gutagenesa, tuajiya gutshita gisambu ha gutoga Yehowa ndunge ha gujiya luholo tuajiya gutagenesa ginemo giene muabonga. (Ish. 2:6) Mvuaji jiajiya gusamba mukunda nu an’awo, ana nji ajiya gusamba mukunda nu mvuaji jiawo, mukut’etu agasue tuajiya gusamba mukunda nu athu tuana longesa Biblia nu athu tuana longesa lukuma luabonga. Uvi tushigo naye gutshita gisambu phamba mukunda nu ima tudi nayo funu.
Mukunda nu ndaga itshi tuajiya gutumbuisa Yehowa nu gumuhana mersi mu isambu yetu? (Tala paragrafe 7-9) *
7. Mukunda natshi tudi naye gutumbuisa Yehowa mu isambu yetu?
7 Tudi naye nji gutumbuisa Yehowa mu isambu yetu. Tudi naye gumutumbuisa muavula gubalega. Yehowa udi ‘muenya gisemo nu wana khala hehi ha gututotesela.’ Wana ‘guvila athu khenda, ganago guvua khabu muphushi, udi wazala pha nu guzumba nu wana tagenesa ndaga jiana zuela muene.’ (Ngi. 86:5, 15) Ndaga jiana kalagala Yehowa jiana gututuma ha gumutumbuisa.
8. Ha gutadila Ngimbo 104:12-15, 24, mukunda natshi tudi naye guhana Yehowa mersi mu isambu yetu?
8 Tangua tudi mutshita gisambu, tudi naye nji guhana Yehowa mersi mukunda nu ima yabonga yana gutuhana muene. Ha gufezegesa, tuajiya guhana Yehowa mersi mukunda nu mikubu yabonga tuana mona gu iyaji, ima yagudia yavula yabonga, nu mafuta abonga tuana khala nawo. Tata wetu wa guzumba watuhanele ima eyi yagasue nu ima iko yavula hagula tukhale nu gusuanguluga. (Tanga Ngimbo 104:12-15, 24.) Ndaga yabalega ndando idi egi, tuana hana Yehowa mersi mukunda nu malongo avula ana gutuhana muene nu felela diabonga tudi nadio mukunda nu masugu adi muza.
9. Itshi yajiya gutukuatesa hagula tujimbilago guhana Yehowa mersi? (1 Tesalonike 5:17, 18)
9 Yajiya gukhala yaleba gudi esue ha gujimbila guhana Yehowa mersi mukunda nu ima yagasue yana gutuhana muene. Itshi yajiya gutukuatesa hagula tujimbilago? Wajiya gusonega ima udi mutshigina gutoga gudi Yehowa, gungima wajiya gutala ndaga wasonegele ha gujiya luholo Yehowa wahanele mvutu mu isambu yaye. Gungima utshitshi gisambu ha guhana Yehowa mersi mukunda nu ukuateshi wenji. (Tanga 1 Tesalonike 5:17, 18.) Tuana suanguluga diago muavula tangua athu ako ana gutuhana mersi. Luholo lumoshi nji, Yehowa wana suanguluga muavula gula tuamuhana mersi mukunda nu mvutu yatuhanyi muene mu isambu yetu. (Kol. 3:15) Uvi gudi nji nu ndaga iko ya ndando tudi naye guhanela Yehowa mersi.
KHALA MUHANA YEHOWA MERSI MUKUNDA NU MUN’ENJI WA GUZUMBA
10. Ha gutadila 1 Phetelo 2:21, mukunda natshi tudi naye guhana Yehowa mersi luholo watumile Yesu ha mavu?
10 Tanga 1 Phetelo 2:21. Tudi naye guhana Yehowa mersi luholo watumile mun’enji wa guzumba ha gutulongesa ndaga jiamutadila. Gula tualonguga ndaga jiatadila Yesu, mbayitukuatesa ha gujiya ndaga jiavula jiatadila Yehowa nu luholo tuajiya gumusuanguluisa. Gula tuasha gutshigina gu mulambu wa Klisto, mbayitukuatesa ha gukhala nu ufuta wabonga nu Yehowa nu ha gukhala mu guhuima n’enji.—Roma 5:1.
11. Mukunda natshi tudi naye gukombelela mu jina dia Yesu?
11 Tuana hana Yehowa mersi luholo tuana gumukombelela mu njila ya mun’enji. Wana kalegela Yesu ha guhana mvutu gu isambu yetu. Yehowa wana tegelela nu wana hana mvutu gu isambu yana kalegewa mu jina dia Yesu. Yesu wazuelele egi: “Ndaga yagasue mbamutoga mu jina diami, mbanguyitshita, hagula Tata atumbuishiwe mu njila ya Mona.”—Yone 14:13, 14.
12. Mukunda natshi tudi naye guhana Yehowa mersi luholo wahanele mun’enji gifua mulambu?
12 Yehowa wana gututotesela gubola guetu mu njila ya mulambu wa Yesu. Biblia yana monesa egi Yesu udi ‘nganga-nzambi wakoma udi wa gukhala gu koko dia madia dia nguasa ya ufumu ya Fumu Wakoma mu dilu.’ (Heb. 8:1) Yesu udi “mukuateshi [wetu] udi nu Tata.” (1 Yone 2:1) Tudi nu gusuanguluga guavula luholo Yehowa watuhanele Nganga-nzambi Wakoma munu wana gutuvila khenda mu gubola guetu nu wana “gutuzuelela”! (Roma 8:34; Heb. 4:15) Tushigo athu atagana, hene gula nga Yehowa gahanelego Yesu gifua mulambu tuajiyilego guta n’enji maga mu gisambu. Tudi naye guhana Yehowa mersi avula lusugu nu lusugu handaga watuhanele mun’enji wa guzumba, kado ya ndando yavula gubalega!
KHALA MUTSHITA GISAMBU MUKUNDA NU APHANGI’ETU A MALA NU A AKHETU
13. Mu phipha ya gisugishilo gutuama egi Yesu afue, luholo lutshi wamonesele egi wakhalele muzumba alandudi enji?
13 Mu phipha ya gisugishilo gutuama egi Yesu afue, watshitshile gisambu mukunda nu alandudi enji, watogele Tata wenji ha guabamba “mukunda nu muthu wabola.” (Yone 17:15) Yesu wakhalele diago muzumba alandudi enji! Ngatshima wakhalele mujiya egi gualeha ndo udi naye gutagana nu lamba diakola, uvi wadisagesele mukunda nu apostolo enji.
Mukunda nu ndaga itshi tuajiya gusamba mukunda nu aphangi’etu a mala nu a akhetu? (Tala paragrafe 14-16) *
14. Luholo lutshi tuajiya gumonesa egi tuana zumba aphangi’etu?
14 Ha gulandula gifezegeselo gia Yesu, tushigo naye gukamba phamba gubonga guetu. Uvi, tudi naye gusamba muavula mukunda nu aphangi’etu a mala nu a akhetu. Gula tuatshita ngenyi, mbatumonesa egi tuana landula mukhuala wa Yesu wa guzumba athu ako nu mbatumonesa Yehowa egi tuana zumba aphangi’etu muavula. (Yone 13:34) Gula tudi musamba mukunda nu aphangi’etu ishigo mumonesa egi tudi mulaba gubalegesa tangua dietu. Mbimbi ya Nzambi yana zuela egi, “gisambu gia muthu wabonga giana khala nu ngolo jiavula.”—Yak. 5:16.
15. Mukunda natshi tudi naye gutshita gisambu mukunda nu aphangi’etu?
15 Aphangi’etu ana khala nu funu ya isambu yetu handaga ana tagana nu ndaga jiavula jia lamba. Tuajiya gutoga Yehowa ha guakuatesa ha gukolesela nu misongo, gudigita gua mavu, ita, usageshi, ba aksida nga malamba ako. Tuajiya nji gusamba mukunda nu aphangi ana gudihana ha gukuatesa aphangi adi nu funu ya ukuateshi. Gula udi mujiya phangi mumoshi udi mutagana nu malamba gifua awa tuatanga, wajiya gutanga jina dienji tangua udi mutshita gisambu. Tuana monesa egi tuana zumba diago aphangi’etu, tangua tuana toga Yehowa ha guakuatesa ha gukolesela mu malamba.
16. Mukunda natshi tudi naye gusamba mukunda nu aphangi ana gututuameza?
16 Aphangi ana tuameza midimo mu hungu ana suanguluga nu isambu aphangi ana tshita mukunda nu ene, handaga yana guakuatesa. Yakhalele diago ngenyi mukunda nu mupostolo Phaula. Wasonegele egi: “Kombelelenu nji mukunda nu ame hagula tangua ngudi mutshigina guzuela, Nzambi anguhane mbimbi jia guzuela, nu hagula nguvigo woma wa guzuelela gisuegi gia gijila giatadila lukuma luabonga.” (Ef. 6:19) Mangino nji, tudi nu aphangi avula ana tshita mudimo wakola ha gututuameza. Tuana monesa egi tuana guazumba tangua tuana toga Yehowa ha guakuatesa mu mudimo wawo.
ITSHI TUDI NAYE GUTSHITA GULA ATUTOGA HA GUKALAGALA GISAMBU?
17-18. Mu tangua ditshi ajiya gututoga ha gutshita gisambu mukunda nu athu ako nu itshi tushigo naya gujimbila?
17 Matangua ako, ajiya gututoga ha gutshita gisambu mukunda nu athu ako. Ha gufezegesa, phangi mumoshi wa mukhetu udi mutuameza ulongugi wa Biblia, wajiya gutoga phangi wa mukhetu ayi n’enji ha gutshita gisambu. Yajiya gukhala egi phangi wa mukhetu atogi ha gutshita gisambu gashigo mujiya muthu udi mulonguga Biblia muabonga, hene wajiya gutoga ha gutshita gisambu gia gisugishilo. Gutshita ngenyi guajiya gumukuatesa ha gujiya ndaga jiajiya guzuela muene mu gisambu mukunda nu muthu udi mulonguga Biblia.
18 Ajiya gutoga phangi mumoshi wa yala ha gutshita gisambu mu gudibungisa gua mudimo wa gulongesa nga mu gudibungisa gua mu hungu. Phangi muene gashigo naye gujimbila mukunda natshi tuana tshita gudibungisa guene. Tuanago gutshita gisambu ha guhana aphangi a mu hungu malongo nga ha guzuelela ndaga imoshi ngenyi. Mu gudibungisa gua mu hungu, lungimbo nu gisambu ishigo naye gubalega minuta thano. Hene phangi udi mutshita gisambu gashigo naye guzuela “mbimbi jiavula.” Yana khala diago nu ndando ha gutshita ngenyi mu gisendeselo gia gudibungisa.—Mat. 6:7.
KHALA MUZULA GISAMBU NU NDANDO YAVULA MU MONYO WAYE
19. Itshi mbayitukuatesa ha gukhala ya gudilondega tangua lusugu lua usopheshi wa Yehowa mbaluza?
19 Tudi naye guzula gisambu nu ndando yavula mu monyo wetu handaga lusugu lua usopheshi wa Yehowa lua suena hehi. Yesu wazuelele egi: “Khalenu nu gikolekole, kombelelenu tangua diagasue hagula mbamumone luholo lua gulenga ndaga jiagasue jidi muza.” (Luka 21:36) Gula tudi mukombelela tangua diagasue, mbayitukuatesa ha gukhala nu gutshigina guakola nu mbatukhala ya gudilondega tangua lusugu lua usopheshi wa Yehowa mbaluza.
20. Luholo lutshi isambu yetu yajiya gukhala gifua uhafu udi muzola vumba diabonga?
20 Ndaga itshi tualonguga? Tudi naye guzula nu ndando yavula luendu lua tuhanele Yehowa lua gutshita gisambu. Idi nu ndando ha gukombelela thomo mukunda nu ndanga jidi gudivua nu gutshigina gua Yehowa. Tudi naye nji guhana Yehowa mersi mukunda nu mun’enji, mukunda nu Ufumu wenji nu gukombelela mukunda nu aphangi’etu. Tuajiya nji gukombelela mukunda nu ima tudi nayo funu nu gutoga ukuateshi ha gulandula gukolesa gutshigina guetu. Gula tudi mutangigiza muabonga ha gujiya ndaga tudi naye guzuela mu gisambu, mbatumonesa egi tuana zula gisambu nu ndando. Mbimbi jietu mbajikhala gifua uhafu udi muzola vumba diabonga gutuama dia Yehowa ha ‘gumusuanguluisa.’—Ish. 15:8.
LUNGIMBO 45 “La méditation de mon cœur”
^ Tuana suanguluga muavula luholo Yehowa watuhanele luendu lua guta n’enji maga mu gisambu. Tuana tshigina egi isambu yetu ikhale gifua uhafu udi muzola vumba diabonga ha gumusuanguluisa. Mu longo edi, tuza muzuelela ndaga tudi naye gutoga Yehowa mu gisambu. Tuza nji mumona ndaga tushigo naye gujimbila gula atutoga ha gutshita gisambu.
^ UKOTELESHI WA IFUANESA: Phangi mumoshi wa yala nu mukhaji’enji adi mutshita gisambu hagula mun’awo akhale mu ubambi tangua adi gu khalasa, mukunda nu phangi mumoshi wa gukola udi mukata nu hagula muthu ana longesa Biblia akule mu nyuma.
^ UKOTELESHI WA IFUANESA: Muvuala mumoshi wa yala udi muhana Yehowa mersi mukunda nu mulambu wa Yesu, mukunda nu mavu abonga atuhanele muene nu mukunda nu ima ya gudia yabonga.
^ UKOTELESHI WA IFUANESA: Phangi mumoshi wa mukhetu udi mutoga Yehowa hagula akuatese Hunji dia Akulu nu nyuma yenji nu hagula akuatese aphangi adi mutagana nu malamba gifua gudigita gua mavu nu usageshi.
