1. Ha gutadila Gisendeselo 3:15, ndaga itshi Yehowa wakalegele gungima tangua Adama nu Eva akalegele gubola?

 TANGUA Adama nu Eva atshitshile gubola, gungima Yehowa wahanele an’awo felela mu njila ya profesi imoshi ya ndando. Ndaga jiazuelele muene jidi mu Gisendeselo 3:15.—Tanga.

2. Mukunda natshi profesi idi mu Gisendeselo 3:15 idi nu ndando?

² Profesi yene idi mu mukanda wa thomo wa Biblia. Uvi mikanda iko yagasue ya Biblia yana gudivua nji nu profesi yene mu luholo luko. Lungonji nga shinga yana gutukuatesa ha gujitshiga khunyi fundo dimoshi. Luholo lumoshi nji mbimbi jidi mu Gisendeselo 3:15, jiana bungisa ndaga jidi mu mikanda iko yagasue ya Biblia mu lukuma lumoshi lua ndando. Lukuma luene ludi egi Nzambi mbawutuma Muhuluishi ha gushiya Diabulu nu athu agasue ana gumuhana mago. * Athu ana zumba Yehowa mbaaheta gubonga guavula!

3. Itshi tuza muzuelela mu longo edi?

³ Mu longo edi tuza muhana mvutu gu mihu yalandula yatadila profesi idi mu Gisendeselo 3:15: Akuatshi adi muzuelela mu profesi yene? Luholo lutshi profesi yene yatagenesewe? Mukunda natshi profesi yene idi nu ndando mukunda nu esue?

4. Nanyi udi “nyoga,” nu itshi yatukuatesa ha guyijiya?

⁴ Profesi idi mu mukanda wa Gisendeselo 3:14, 15 yana zuelela “nyoga,” nu ‘vungu’ dia nyoga, “mukhetu,” nu ‘vungu’ dia mukhetu. Biblia yana gutukuatesa haguajiya muabonga. * Tusendesenu thomo nu “nyoga.” Nyoga Yehowa wafugile yajiyilego gukotelesa ndaga jiazuelele muene mu gilanga gia Edene. Na ndaga Yehowa wazuelele mukunda nu usopheshi yakhalele mutadila nanyi? Mukanda wa Gumonesa 12:9 wana monesa ndaga yene haphelo. Wana zuela egi, ‘nyoga ya mualeha’ idi Satana Diabulu. Uvi akuatshi adi vungu dia nyoga?

5. Akuatshi adi vungu dia nyoga?

⁵ Tangua Biblia yana zuelela mbimbi ‘vungu,’ mu luholo lua gifuanesa, yana monesa athu ana landula diago makalegelo a muthu mumoshi. Athu ene ajiya gutamegewa egi an’enji. Hene vungu dia nyoga didi, anjelo anyi alumbugile Nzambi nu athu anyi ana lumbugila Yehowa nu ana khala nu umbalagaji nu akombeledi enji gifua Satana. Anjelo anyi abembele mudimo wawo fundo akhalele mu dilu mu masugu a Nowa nu athu abola ana kalagala ndaga gifua sh’awo Diabulu, adi nji mukatshi dia vungu dia nyoga.—Gis. 6:1, 2; Yone 8:44; 1 Yone 5:19; Yuda 6.

6. Mukunda natshi tudi muzuela egi Eva gashigo “mukhetu” adi muzuelela mu profesi?

⁶ Henyaha, tuzuelelenu giwa “mukhetu.” Mukhetu muene adi muzuelela ishigo Eva. Mukunda natshi tudi muzuela ngenyi? Handaga profesi yene yana zuela egi, vungu dia mukhetu ‘mbadidiata’ nyoga gu muto. Gifua luholo tuayimonyi, nyoga idi Satana  muanjelo walumbugile Nzambi. Hene ana a Eva, yakotelesa athu ashigo atagana ajiyilego gumudiata. Na luholo lutshi Satana mbawushiyiwa?

7. Gifua luholo Gumonesa 12:1, 2, 5, 10 idi guyimonesa, nanyi udi mukhetu adi muzuelela mu Gisendeselo 3:15?

⁷ Mukanda wa Gumonesa wana gutukuatesa ha gujiya mukhetu adi muzuelela mu Gisendeselo 3:15. (Tanga Gumonesa 12:1, 2, 5, 10.) Mukhetu muene, gashigo gifua akhetu agasue! Muene udi nu ngonda goshi’a ikanzo yenji nu gipho gu muto wenji gialondewe nu themua 12. Wavualele mona mumoshi wa gushimana diago, mona muene udi: Ufumu wa Nzambi. Ufumu wene udi mu dilu, hene mukhetu nji udi naye gukhala mu dilu. Mukhetu muene udi mumonesa gitshinyi gia organizasio wa Yehowa gia mu dilu. Anjelo a Yehowa a gujinginyina adi mu gitshinyi gia organizasio wene.—Gal. 4:26.

8. Mu gudivua nu Gisendeselo 22:15-18, nanyi udi vungu dia mukhetu nu tangua ditshi ndaga yene yakalegewe?

⁸ Biblia yana gutukuatesa nji ha gujiya vungu dia mukhetu. Diakhalele naye gukhala mujigulu wa Abalahama. (Tanga Gisendeselo 22:15-18.) Gifua luholo profesi yadiangele guzuela, Yesu wakhalele mujigulu wa Abalahama. (Luka 3:23, 34) Uvi vungu dia mukhetu didi naye gukhala nu ngolo jiavula gubalega athu agasue handaga muene mbawushiya Satana Diabulu. Hene tangua Yesu watagenesele ivo 30, amumbile maji mu nyuma, wabuile mun’a Nzambi wa mu nyuma. Tangua amumbile maji mu nyuma, Yesu wabuile vungu dia mukhetu. (Gal. 3:16) Hafuile Yesu, gungima dia gufuzumuga guenji, Nzambi “wamuhanele lutumbu nu ginemua.” Wamuhanele nji “ufumu wa ndaga jiagasue mu dilu nu ha mavu” nu ngolo ha “gushiya midimo ya Diabulu.”—Heb. 2:7; Mat. 28:18; 1 Yone 3:8.

9-10. (a) Akuatshi adi nji vungu dia mukhetu nu tangua ditshi ana gubua ngenyi? (b) Itshi tuza muzuelela?

⁹ Uvi ishigo Yesu udi phamba vungu dia mukhetu. Phaula wawambelele enya Yuda nu enya ifutshi iko anyi ambiwe maji mu nyuma egi: “Gula mudi athu a Klisto, ngenyi mudi diago ajigulu a Abalahama, mbamuheta khapho dialayile Nzambi gudi Abalahama.” (Gal. 3:28, 29) Gula Yehowa wamba Muklisto maji mu nyuma mu njila ya nyuma yenji, muthu muene wana gubua nji vungu dia mukhetu. Hene vungu dia mukhetu didi Yesu Klisto nu athu 144 000 anyi mbaahinyina n’enji. (Gumo. 14:1) Mukut’awo agasue ana landula makalegelo a Yehowa Nzambi, Tata wawo.

¹⁰ Luholo tuajiya athu adi muzuelela mu Gisendeselo 3:15, henyaha tuzuelelenu mu guhihia luholo Yehowa watagenesele gale profesi yene nu luholo yana gutubatela gubonga mangino.

11. Luholo lutshi asumile vungu dia mukhetu “gu sashi”?

¹¹ Profesi idi mu Gisendeselo 3:15 yana zuela egi, nyoga mbayisuma vungu dia mukhetu “gu sashi.” Ndaga yene yatagenesewe tangua Satana wakalegele enya Yuda nu enya Roma ha gushiya mun’a Nzambi. (Luka 23:13, 20-24) Gula muthu udi nu phuta gu sashi, yajiya guzula masugu gutuama egi asendese guwenda. Luholo lumoshi nji, tangua Yesu wafile gakhalelego nu luholo lua gukalagala nga ndaga imoshi handaga watshitshile masugu thathu mu malumba.—Mat. 16:21.

12. Tangua ditshi nu luholo lutshi muto wa nyoga mbawudiatewa?

¹² Hagula profesi idi mu Gisendeselo 3:15 yitagenesewe, Yesu gakhalelego naye gushipha mu malumba. Mukunda natshi? Handaga profesi yana zuela egi vungu dia mukhetu  mbadidiata muto wa nyoga. Idi mukotelesa egi Yesu wakhalele naye gufuzumuga. Yakalegewe diago ngenyi! Tangua Yesu wafuile, mu lusugu lua thathu wafuzumugile ha guya mujinga mu dilu nu muila wajiyilego gufua. Yesu mbawushiya Satana mu tangua dia tombele Nzambi. (Heb. 2:14) Klisto nu athu mbaahinyina n’enji, mbaashiya mbalagaji jia Nzambi jiagasue ha mavu, yakotelesa vungu dia nyoga.—Gumo. 17:14; 20:4, 10. *

13. Luholo lutshi gutagenesewa gua profesi eyi guana gutubatele gubonga?

¹³ Gula udi mukombeledi wa Nzambi, wana heta gubonga mukunda nu gutagenesewa gua profesi yene. Tangua diakhalele Yesu ha mavu, walanduile diago makalegelo a Sh’enji. (Yone 14:9) Watukuatesele ha gujiya Yehowa Nzambi nu ha gumuzumba. Luholo Yesu wana tuameza hungu dia Uklisto mangino, tuana heta gubonga mu malongo nu mu utuameji wenji. Watulongesele ha gujiya ndaga tuajiya gukalagala ha gusuanguluisa Yehowa. Tuahetele gubonga guavula tangua asumile Yesu gu sashi, yakotelesa gufua guenji. Luholo lutshi? Tangua Yesu wafuzumugile, wahanele mahatshi enji gifua mulambu watagana ha ‘guphelegetesa gubola guetu guagasue.’—1 Yone 1:7.

14. Luholo lutshi tudi mujiya egi ndaga jiazuelele Yehowa mu gilanga gia Edene jiakhalelego naye gutagenesewa mu tangua diene? Kotelesa.

¹⁴ Mbimbi jiazuelele Yehowa mu gilanga gia Edene, jidi mumonesa egi tangua diakhalele naye gubalega gutuama egi profesi yene yitagenesewe yagasue. Yakhalele naye guzula tangua hagula mukhetu ahete vungu diatendelele Yehowa, hagula Diabulu abungise athu enji nu hagula umbalagaji usendese mukatshi dia mahunji awa mbadi. Gukotelesa profesi eyi guana gutukuatesa muavula, handaga yana gututemesa egi mavu awa adi mutuamezewa gudi Satana mbaakhala nu umbalagaji nu akombeledi a Yehowa. Yesu watemesele nji alandudi enji luholo lumoshi. (Mako 13:13; Yone 17:14) Idi yadiago egi mu ivo 100 yabalega, tuamonele gutagenesewa gua ndaga jiko jia profesi yene. Luholo lutshi?

15. Mukunda natshi enya ha mavu awa ana sagesa akombeledi a Nzambi muavula? Mukunda natshi tushigo naye guvuila Satana woma?

¹⁵ Tangua Yesu wabuile Fumu mu givo 1914, gungima dia tangua diazonda Satana wakayewe mu dilu. Amubishidile ha mavu nu udi munengena gushiyiwa guenji. (Gumo. 12:9, 12) Uvi sendese mu tangua diene, wana kalagala ndaga jiavula. Satana wana khala nu khabu jiakola nu wana luisa akombeledi a Nzambi. (Gumo. 12:13, 17) Hene enya ha mavu awa a Satana, ana sagesa akombeledi a Nzambi mavuala diago. Uvi tushigo naye guvuila Satana nu athu enji woma. Tudi naye gukhala nu gutshigina gifua gua mupostolo Phaula, wasonegele egi: “Gula Nzambi udi nu esue, nanyi mbawutuluisa?” (Roma 8:31) Tudi naye gushila Yehowa mutshima handaga gifua luholo tuayimonyi, ndaga jiavula jiatadila profesi idi mu Gisendeselo 3:15 jiatagenesewe gale.

16-18. Luholo lutshi gukotelesa profesi idi mu Gisendeselo 3:15, yakuatesele phangi Curtis, Ursula nu Jessica?

¹⁶ Ndaga jiazuelele Yehowa mu Gisendeselo 3:15, jiajiya gutukuatesa ha gukolesela ngatshima tudi mutagana nu malamba a luholo lutshi. Phangi Curtis, udi misionere gu Guam, udi muzuela egi: “Matangua ako, ngana tagana nu malamba ana tshita egi ikhale  lamba ha gusala ya gujinginyina gudi Yehowa. Uvi gutangigiza profesi idi mu Gisendeselo 3:15, yangukuatesele ha gulandula gushila Yehowa mutshima.” Phangi Curtis wana nengenena nu guhuiminyina guagasue lusugu Yehowa mbawukatula malamba agasue tuana tagana nawo.

¹⁷ Phangi wa mukhetu Ursula gu Bavière udi muzuela egi gukotelesa profesi idi mu Gisendeselo 3:15, guamukuatesele ha gutshigina egi Biblia yasonegewe mu ukuateshi wa nyuma ya Nzambi. Wana mona diago luholo profesi jiko jiagasue jiana gudivua nu profesi eyi, ndaga yene yana gumuyitugisa muavula. Udi muzuela luko egi: “Tangua ngalongugile egi Yehowa watshitshile ndaga muphushi ha gutuhana felela, yangutumile ha gumuzumba muavula.”

¹⁸ Phangi Jessica gu Micronésie udi muzuela egi: “Ngudi muwunguluga luko luholo ngadivile lusugu lua thomo ngakotelesele egi ngaheta giamatshidia! Profesi idi mu Gisendeselo 3:15 yatagenesewe gale. Yangukuatesele ha gujiya egi gutshigina gua Yehowa guakhalelego egi tutagane nu malamba tudi mumona mangino. Profesi yene yangukuatesele nji hagusha mutshima egi gukombelela Yehowa, mbagungukuatesa ha gukhala nu gusuanguluga mangino, mu masugu adi muza mbangukhala nji nu lujingu luabonga diago.”

19. Mukunda natshi tudi naye gusha mutshima egi gitshinyi gia suga gia profesi idi mu gisendeselo 3:15 mbayitagenesewa?

¹⁹ Gifua luholo tuayimonyi, profesi idi mu Gisendeselo 3:15 idi mutagenesewa. Tuakotelesa muabonga nanyi udi vungu dia mukhetu nu vungu dia nyoga. Yesu udi vungu dia mukhetu. Amusumile gu sashi uvi phuta yenji yakolele, mangino udi Fumu wa ngolo jiavula munu gajiyilego gufua. Gualeha ndo, mutango wa athu ana tombewa ha guhinyina nu Yesu mu dilu mbawutagana. Athu ene adi nji vungu dia mukhetu. Luholo gitshinyi gia thomo gia profesi yene giatagenesewe gale, tudi naye gusha mutshima egi gitshinyi gia suga gidi muzuelela gudiatewa gua muto wa nyoga mbayitagenesewa nji. Mbayikhala diago ndaga ya gusuanguluga mukunda nu akombeledi a Nzambi, tangua Satana mbawushiyiwa! Hatudi munengena tangua diene, tulebigo muila. Nzambi wetu wana tagenesa ndaga jiagasue jiana laya muene. Yehowa mbawubatela “athu a mu ifutshi yagasue” gubonga guavula mu njila ya vungu dia mukhetu.—Gis. 22:18.