Ngavualewe mu 1935 mu dimbo dia Darlaston, gu Angleterre mu gitshinyi giana tamegewa egi Pays noir, asendesele gutamega gitshinyi giene ngenyi handaga ba usine avula akhalele guene akhalele muzola mishi yavula yabuita. Tangua ngakhalele nu ivo nguana, mvuaji jiami jiasendele gulonguga Biblia nu Matemue a Yehowa. Ha ngatagenesele ivo 14 nu ndambo ngasendele gusuanguluga nu giamatshidia. Mu 1952 ngabatijiwe, mu tangua diene ngakhalele nu ivo 16.

Mu tangua diene ngasendesele gulonguga mudimo gu usine imoshi yakoma yana londega ikadigilo ya mago nu ba piece a moteur wa gamiyo (mashinyi). Ngasendesele guzula formasio ha gubua sekretere mu kompanyi yene, ngakhalele musuanguluga nu mudimo wene muavula.

Ngakhalele naye guzula desizio dimoshi dia ndando tangua mutadi muwendji wangutogele ha gusendesa gutuameza Ulongugi wa Mukanda mu Hungu (étude de livre de la congrégation) mu gudibungisa gua mukatshi dia phoso mu hungu dia gu Willenhall. Yakhalele lamba ha guzula desizio handaga mu tangua diene ngakhalele muya mu gudibungisa mu mahungu mbadi. Mukatshi dia phoso ngakhalele gudibungisa nu hungu diakhalele hehi nu fundo ngakhalele mutshita mudimo gu Bromsgrove. Gula wakatuga gu dimbo diene ha guya gu Willenhall udi naye gutshita ba kilometre 32. Gu suga ya phoso, tangua ngakhalele muvutuga gumbo dietu, ngakhalele mutshita gudibungisa mu hungu dia Willenhall.

Luholo ngakhalele mutshigina guhana mago mu ulongegi wa Yehowa, ngatshiginyile ndaga mutadi muwendji wanguwambelele, ngatshima yakhalele mutoga egi ngubembe mudimo ngakhalele muzumba muavula. Nganago gudibela luholo ngazudile desizio egi Yehowa atuameze monyo wami.

Tangua ngakhalele muya mu hungu dia Bromsgrove, ngamonele phangi mumoshi wa mukhetu wabonga diago jina dienji Anne, wakhalele muzumba muavula mudimo wa Yehowa. Tuadizudile mu ulo mu 1957, tuahetele luendu lua gutshita mudimo wa avundji a njila a tangua diagasue, ba pionye spesiale, mudimo wa mutadi muwendji nu gutshita  gu Betele. Anne wangubatele diago gusunguluga guavula mu monyo wami.

Mu 1966, tuanginyile khalasa dia 42 dia Gileade. Atutumile gu Malawi, athu akhalele muzuela egi mu gifutshi giene athu ana khala nu gisemo nu khadilo dia guyamba. Tuakhalelego mutangiza egi mbatutshita ivo yavula guene.

Tuahetele gu Malawi mu 1 Fevrier 1967. Mu mbeji ya thomo tuatshitshile yagasue ha gulonguga zuelelo dia gu Malawi, gungima tuasendesele mudimo wa district. Tuakhalele muwenda mu gamiyo getu, athu ako akhalele mutangiza egi gamiyo gene gajiya guwenda mafundo agasue nga mukatshi dia muta. Uvi yakhalelego yadiago, handaga tuakhalele muwendesa gamiyo gene phamba mu mafundo anyi meya ana khala ahihia. Matangua ako, tuakhalele mukhala mu inzo ya muangu, mu sungi ya mvula tuakhalele muhaga bâche holu dia yangi. Yakhalelego yaleba tangua tuasendesele mudimo wa gimisionere, uvi tuasuangulugile nawo!

Mu mbeji ya Avril, ngakotelesele egi mbatutagana nu ndaga jia lamba mu gifutshi giene. Gungima ngalanduile diskur dia Hastings Banda, prezida wa gu malawi mu radio. Wazuelele egi Matemue a Yehowa anago gufuta gitadi nu adi mukambela guvernema milonga. Uvi ndaga yene yakhalele ya mambo. Tuakhalele mujiya egi, akhalele muzuela ngenyi handaga tuakhalelego gudinginyisa mu ndaga jia politike, nu tuatunyile gusumba ba karte a enya politike.

Mu mbeji ya Septembre, tuatangele journal imoshi yakhalele muzuela egi prezida wafundile aphangi’etu egi adi muzola nguma mu mafundo agasue. Mu gudibungisa gua enya politike wazuelele egi, guvernema yenji idi naye guzula desizio muphushi ha gukanga midimo ya Matemue a Yehowa. Mu  20 octobre 1967 atunyishile midimo ya Matemue a Yehowa gu Malawi. Gungima dia matangua azonda, maphulushi nu athu ana tadila ndaga jia athu anaza mu ifutshi iko, akangele betele nu akuatele ba misionere akhalele mu gifutshi giene.

Tuatshitshile masugu thathu mu bologo, gungima atutumile gu Île Maurice, gifutshi giene giakhalele mu uhinyinyi wa Angleterre. Uvi mafumu a leta a gifutshi giene azuelele egi tushigo naye gukhala guene ha gutshita mudimo wa gimisionere. Hene atutumile gu gifutshi gia Rhodésie, mangino ana gugitamega egi Zimbabwe. Tangua tuahetele, tuayile gu biro diana tadila ndaga jia athu a ifutshi iko, atunyile egi tushigo naye gukhala mu gifutshi giawo. Azuelele egi: “Amikayi gu Malawi. Muakayewa nji gu Île Maurice, muaza haha handaga esue tuana yamba athu?” Mukaji’ami wasendesele gudila. Tuamonele gifua athu agasue akhalelego gututshigina! Mu tangua diene, ngatshiginyile guvutuga gu Angleterre. Gungima, athu akhalele gu biro diene atubembele ha gubanda mu biro diawo, tuabandele mulamba. Lusugu lua landuile tuahanele rapore gudi mafumu awo. Muila watulebele, uvi tuabembele ndaga jiagasue ha mago a Yehowa. Lusugu lua landuile, atuhanele njila ha gukhala gu Zimbabwe. Mbangushigo mujimbila luholo ngadivile lusugu luene. Ngamonele diago egi Yehowa wakhalele gututuameza.

Gu Betele ya gu Zimbabwe, ngakhalele mutshita gu biro yana tadila ndaga jia mahungu nu mudimo wa gulongesa (département pour le service) ngakhalele mutala midimo ya gifutshi gia Malawi nu Mozambique. Aphangi a gu Malawi ataganele diago nu usageshi wakola. Ngakhalele nji mubalumuna ba rapore akhalele mutuma atadi awendji a gu Malawi. Lusugu lumoshi ngakhalele mukalagala mudimo mu ngueze, ngadidile tangua ngatangele luholo aphangi akhalele mutagana nu malamba akola. * Uvi gumona luholo aphangi ene akhalele nu gutshigina, asalele ya gujinginyina nu akolesele guanguhanele gikhesa giavula.—2 Kol. 6:4, 5.

Tuatshitshile yagasue hagula aphangi asalele gu Malawi nu anyi alengele gu Mozambique akhale muheta ima ya gudia ya mu nyuma. Aphangi akhalele mubalumuna mikanda mu zuelelo dia Chichewa, zuelelo diakhalele muzuelewa muavula gu Malawi, ayile gu ferme imoshi ya phangi mumoshi gu Zimbabwe. Phangi muene waatungile jinzo nu biro. Aphangi ene alanduile gukalagala mudimo wa gubalumuna mikanda guene.

Tualondele ndaga hagula atadi a wendji a gu Malawi akhale muza givo giagasue gu asamble a masugu thathu muzuelelo dia Chichewa gu Zimbabwe. Akhalele guahana progame ya ndaga alonguga gu asamble. Tangua akhalele muheta gu Malawi, akhalele mutshita yagasue ha gula aphangi ahete programe yene. Givo gimoshi, tangua atadi a wendji ajile gu Zimbabwe, tualondele Khalasa dia Mudimo wa Ufumu ha guahana gikhesa.

Mu Fevrier 1975, ngayile mutala aphangi a gu Malawi anyi akhalele gu camp ya Mozambique. Aphangi ene akhalele mulandula ndaga jiagasue jiakhalele guawambele ulondegi wa Yehowa nu ndaga akulu akhalele guawambela. Akulu ahe-ahe akhalele mukalagala ndaga jiavula jia mu nyuma, gifua gutshita ba diskur, guzuelela mukhapho wa lusugu, gutuameza Inzo Yaleha Ya Mutaledi, nu gutshita ba asamble. Aphangi ene alondele ndaga gu camp gifua ha fundo dia asamble, alondele departema ya gukatula mvindu, gukhaphela athu ima ya gudia, nu gubamba athu nu ima. Yehowa wakuatesele diago aphangi awa a gujinginyina ha gukalagala ndaga eji jiagasue, ndaga yene yanguhanele diago gikhesa.

Gu gisugishilo gia givo 1970, betele ya gu Zambie yasendesele gutuameza midimo ya gu Malawi. Uvi, ngalanduile gutangiza ndaga aphangi akhalele mutagana najio gu Malawi, ngakhalele musamba mukunda nu ene, aphangi ako nji akhalele mutshita ngenyi. Tangua ngakhalele mu Komite ya Filiale ya gu Zimbabwe, mbala jiavula ame nu aphangi akhalele mutadila mudimo gu Malawi, gu Afrique du sud nu a gu Zambie tuadimonele nu aphangi akhalele mukatuga gu biro diakoma dia Matemue a Yehowa (siège mondial). Matangua avula tuakhalele gudihula egi: “Itshi tuajiya gutshita luko mukunda nu aphangi’etu a gu Malawi?”

 Gungima dia ivo yavula, usageshi wakhalelego luko wavula. Aphangi anyi alengele mu ifutshi iko asendesele guvutuga gu Malawi, anyi asalele guene akhalelego luko musagesewa muavula. Mu ifutshi yakhalele hehi nu Malawi ahanele Matemue a Yehowa njila ya gukalagala midimo yawo. Mu 1991 gu Mozambique asendesele nji gusagesa Matemue a Yehowa. Uvi tuakhalele gudihula egi, ‘Tangua ditshi mafumu a leta mbaabemba gusagesa Matemue a Yehowa gu Malawi?’

Ndaga jia politike jia sombegesele gu Malawi, hene mu 1993 guvernema yahanele Matemue a Yehowa njila ya guvutugila midimo yawo. Gungima, tuatele maga nu phangi mumoshi wakhalele misionere, wanguhudile egi: “Mbawuvutuga luko gu Malawi?” Ngakhalele nu ivo 59, hene ngamuvutudile egi, “Ndo sha, ngabui gale muthu wagukola!” Uvi, lusugu luene lumoshi Hunji dia Akulu Atuameji a ngutumine mukanda egi tuvutuge gu Malawi.

Tuakhalele muzumba mudimo wetu gu Zimbabwe, hene yakhalele lamba gudi esue ha guzula desizio. Tuakhalele nu gusuanguluga mu gifutshi giene, tuakhalele nji nu mafuta abonga diago. Hunji dia Akulu Atuameji atuwambelele nu gisemo giagasue egi gula tuatshigina tuajiya gulandula gutshita mudimo wetu gu Zimbabwe. Tuakhalele naye guzula desizio esue akhetu dia gusala gu Zimbabwe nga ndo. Uvi ngatangijile luholo Abalahama nu Sara abembele dimbo diawo diabonga ha gutumagela Yehowa ngatshima akhalele athu agukola.—Gis. 12:1-5.

Tuazudile desizio dia gutumagela utuameji wa ulondegi wa Yehowa nu mu 1 Fevrier 1995 tuavutugile gu Malawi. Lusugu luene tuatagenesele ivo 28 sendese tangua tuajile mu gifutshi giene mbala ya thomo. Mu komite ya filiale yalondewe tuakhalele ame nu aphangi ako mbadi, tuasendesele gulondega midimo yavula mukunda nu akombeledi a Yehowa.

Yehowa watukuatesele diago muavula! Mu 1993 mutango wa alongeshi wakhalele 30 000 uvi mu 1998 abuile 42 000. * Luholo mutango wa alongeshi wakhalele gudivudisa, Hunji dia Akulu Atuameji ahanele njila ha gutunga betele iko. Tuasumbile luphango luakhalele nu ulehelo wa ba hectare 12 gu Lilongwe, angutombele ha gutshita mu komite yakhalele mutuameza midimo ya gutunga.

Mu Mai 2001 phangi Guy Pierce ya gu Hunji dia Akulu Atuameji watshitshile diskur dia  gukangudiwa gua betele ihe-ihe. Aphangi gubalega 2 000 a gu Malawi alanduile diskur diene, avula mukatshi diawo akhalele atshitshi gale ivo 40 mu giamatshidia. Aphangi awa asalele ya gujinginyina nu akolesele ivo yavula tangua atagenele nu usageshi wakola. Akhalelego nu makuta avula, uvi akhalele nu gutshigina nu ufuta wakola nu Yehowa. Mangino ana khala nu gusuanguluga ha guya mutala Betele yawo ihe-ihe. Tangua anaya mutala Betele, mukut’awo agasue ana yimba ngimbo jia Ufumu mu luholo enya gu Afrique ana yimba. Idi mukatshi dia ndaga jiangusuanguluishile gale muavula mu monyo wami. Yamonegele diago egi, Yehowa wana kuatesa athu ana sala yagujinginyina gudi muene tangua ana tagana nu malamba.

Tangua amanesele gutunga betele, ngasendesele guheta inemo ya gukalagala ba diskur a gukangudiwa gua Jinzo jia Ufumu. Aphangi a gu Malawi ahetele gubonga luholo ulondegi wa Yehowa wazudile desizio dia gutunga mu phushi Jinzo jia Ufumu, mu ifutshi inyi aphangi anago gukhala nu makuta avula. Thomo, aphangi ako akhalele mutshita gudibungisa gua mu hungu ha mishin’a mitshi. Akhalele mutunga mayangi a muangu nu akhalele mukhala ha ibasa (banc). Mangino aphangi ana tshita ngolo ha gulondega ba brike ha gutunga Jinzo jiabonga jia Ufumu. Uvi aphangi ana tshigina gukalegela ibasa mu Jinzo jia Ufumu ha fundo dia gukalegela ife handaga ha ibasa athu ajiya gukhala avula!

Ngamonele diago luholo Yehowa wakuatesele athu ha gukula mu nyuma. Ngayitugile muavula luholo mavuala a mala a gu Afrique akhalele gudihana mu midimo ya Ufumu nu luholo akhalele mukalegela mu phushi ndaga ulondegi wa Yehowa wakhalele gualongesa. Ahetele inemo yavula gu Betele nu mu mahungu. Atadi awendji ahe-ahe anyi atombewe akuatesele mahungu muavula, avula mukatshi diawo akhalele nu akhetu. Aphangi ene nu akhaji’awo atombele gukalegela Yehowa muavula ha fundo dia guvuala ana gifua luholo athu avula ana tshita, enya fami jiawo nji akhalele mutshigina egi avuale ana.

Ngatshitshile ivo 52 gu Afrique, gungima ngasendesele gukata. Komite ya filiale yatogele Hunji dia Akulu Atuameji hagula tuye gu Angleterre, atshinginyile egi tuye. Yakhalele lamba ha gubemba mudimo wetu tuakhalele muzumba muavula, tuabui gale athu agukola uvi aphangi a gu Betele ya Angleterre ana gutukuatesa muavula diago.

Ngudi diago nu gutshigina egi ngazudile desizio diabonga luholo ngabembele egi Yehowa angutuameze mu monyo wami. Gula nga ngatshitshile ndaga ngakhalele mutshigina mu monyo wami, nga ngushigo nu gusuanguluga ngudi nago mangino. Yehowa wakhalele mujiya ndaga ngakhalele najio funu ha ‘gujiya njila ngakhalele naye gulandula.’ (Ish. 3:5, 6) Tangua ngakhalele muvuala, ngakhalele musuanguluga ha gulonguga ndaga jiavula jiatadila midimo yana kalegewa mu companyi imoshi yakoma. Uvi organizasio wa Yehowa wanguhanele okazio wa gutshita mudimo wabonga wunu wakhalele gungusuanguluisa muavula. Mukunda nu ame gukalegela Yehowa guana kuatesa ha gukhala nu lujingu luabonga diago!