1. Ndaga itshi tudi naye gujiya nu mukunda natshi?

 TANGUA wana mona ndaga jia lamba jiana kalegewa ha mavu awa, wana tshigina diago egi gudi nu lusugu ndaga jiene mbajihua ba? Mangino, mu fami jiavula athu anago gudizumba luko. Athu avula adi enya khuta, ako ana kamba phamba gubonga guawo. Ako anago gushila mafumu mutshima. Uvi ndaga eji jiagasue, jiajiya gugukuatesa ha gusha mutshima egi gualeha ndo ndaga mbajisombegesa. Mukunda natshi? Handaga athu adi mukalagala diago ndaga jinyi profesi ya Biblia yadiangele guzuela mukunda nu “masugu a gisugishilo.” (2 Tim. 3:1-5) Muthu wagasue udi nu matangi abonga udi diago mumona haphelo egi profesi eyi idi mutagenesewa mangino. Gutagenesewa gua profesi eyi gudi mumonesa egi Yesu Klisto Fumu ya Ufumu wa Nzambi wasendesele gale guhinyina mu dilu. Uvi gudi nji nu profesi jiavula jiana zuelela Ufumu wa Nzambi. Guzuelela profesi jiko jidi mutagenesewa, mbagutukuatesa ha gukolesa gutshigina guetu.

2. Itshi tuza muzuelela mu longo edi nu mukunda natshi?

² Mu longo edi tuza muzuelela (1) profesi yana gutukuatesa ha gujiya tangua Ufumu wa Nzambi wasendesele guhinyina, (2) profesi jiana gutukuatesa ha gukotelesa egi Yesu wabuile gale Fumu ya Ufumu wa Nzambi mu dilu (3) nu profesi jiana monesa luholo mbalagaji jia Ufumu wa Nzambi mbajishiyiwa. Muthu wana tunga milele wana zula itshinyi ya milele ya gudisha gayitungi ibui mulele wa mudidi. Luholo lumoshi nji, profesi jia gudisha tuza muzuelela jiza gutukuatesa ha gukotelesa ndaga jidi naye gukalegewa gualeha ndo mu gutshigina gua Yehowa.

3. Itshi mukanda wa Danyele 7:13, 14, wana zuela mukunda nu Fumu ya Ufumu wa Nzambi?

³ Profesi idi mu Danyele 7:13, 14, idi mumonesa egi Klisto Yesu udi Fumu watagana ya Ufumu wa Nzambi. Athu a ifutshi yagasue ‘mbaamukalegela’ nu gusuanguluga, muene mbawukhala Fumu mayilago. Profesi iko idi mu Danyele yadiangele guzuela egi, Yesu mbawusendesa guhinyina gu gisugishilo gia sungi yana tamegewa egi matangua sambadi. Idi yaleba ha gujiya tangua Yesu wabuile Fumu?

4. Luholo lutshi mukanda wa Danyele 4:10-17 udi gutukuatesa ha gujiya tangua Yesu Klisto wabuile Fumu ya Ufumu wa Nzambi? Kotelesa. (Tala nji mbimbi goshi’a diyiji.)

⁴ Tanga Danyele 4:10-17. ‘Matangua sambadi’ adi mumonesa sungi ya ivo 2520. Sungi yene yasendesele mu givo 607 G.G.Y. tangua enya Babilone akatudile fumu yasuga ha gife gia Yehowa gia ufumu gu Yelusalema. Sungi yene yasugile mu givo 1914 G.Y. tangua Yehowa wahagele Yesu ‘muthu watagana,’ Fumu ya Ufumu wenji. *—Ezek. 21:25-27.

5. Luholo lutshi profesi yatadila ‘matangua sambadi’ yajiya gutukuatesa?

⁵ Luholo lutshi profesi eyi yajiya gutukuatesa? Gula tuakotelesa muabonga profesi yatadila ‘matangua sambadi,’ mbayitukuatesa ha gusha mutshima egi Yehowa mbawutagenesa ndaga jiagasue jiatulayele muene mu tangua diabonga. Yehowa watombele tangua dia guhaga Yesu Fumu. Hataganele tangua diene, Yehowa watagenesele ndaga jiazuelele muene. Ndaga yene idi gutukuatesa ha gujiya egi, mbawutagenesa nji profesi jiko mu tangua diatombele muene. Lusugu lua Yehowa, ‘mbalushigo mulalega!’—Hab. 2:3.

6. (a) Ndaga jitshi jiana monesa egi Yesu wasendesele gale guhinyina mu dilu? (b) Luholo lutshi profesi idi mu Gumonesa 6:2-8, idi mutshiginyisa ndaga yene?

⁶ Tangua Yesu wakhalele ha mavu, gu gisugishilo gia mudimo wenji wa gulongesa, wawambelele alandudi enji ndaga mbajikalegewa jinyi mbajiakuatesa ha gujiya egi wasendesa gale guhinyina mu dilu. Mukatshi dia ndaga jiene, watangele ita, nzala nu gudigita gua mavu. Wazuelele nji egi, misongo ya gisambugila “mbayikhala khanda nu khanda.” Ha gufezegesa, mangino tudi mumona misongo ya coronavirus ha mavu agasue. Ndaga eji jidi mukatshi dia ndaga Biblia yana tamega egi “gijiyishilo” gia gumonega gua Klisto. (Mat. 24:3, 7; Luka 21:7, 10, 11) Tangua Yesu wafuile nu wavutugile mu dilu, gungima dia ivo gubalega 60 wamonesele mupostolo Yone ijiyishilo idi mumonesa egi ndaga jiazuelele muene mbajikalegewa diago. (Tanga Gumonesa 6:2-8.) Ndaga jiene jiagasue jiatagenesewe tangua Yesu wabuile Fumu mu givo 1914.

7. Mukunda natshi ndaga jiabolele diago ha mavu tangua Yesu wabuile Fumu?

⁷ Mukunda natshi ndaga jiabolele diago ha mavu tangua Yesu wabuile Fumu? Gumonesa 6:2 idi muzuelela ndaga imoshi ya ndando. Tangua Yesu wabuile Fumu ndaga ya thomo yakalegele muene yakhalele gulua ita. Waluile nu nanyi? Waluile nu Diabulu nu bademo enji. Mukanda wa Gumonesa mukhapho 12, wana zuela egi Yesu wabingile Satana nu bademo enji nu waabishidile ha mavu. Hene lamba didi “diavula ha mavu”  handaga Satana udi nu khabu jiakola nu wana luisa athu.—Gumo. 12:7-12.

8. Luholo profesi jiatadila Ufumu wa Nzambi jidi mutagenesewa, idi gutukuatesa ha gukotelesa itshi?

⁸ Luholo lutshi profesi eji jiajiya gutukuatesa? Ndaga jidi mukalegewa ha mavu nu luholo makalegelo a athu adi mulandula gubola, idi gutukuatesa ha gujiya egi Yesu wabuile gale Fumu. Tangua tudi mumona athu mukalagala ndaga jia khuta nu gukamba phamba gubonga guawo tushigo naye gudisagesa, uvi tudi naye guwunguluga egi ndaga jiene jidi mutagenesa profesi jia Biblia. Ufumu wa Nzambi wasendele gale guhinyina! (Ngi. 37:1) Luholo Alemagedona asuena hehi, ndaga mbajibola diago muavula ha mavu. (Mako 13:8; 2 Tim. 3:13) Tudi diago nu gusuanguluga luholo Tata wetu wa guzumba wana gutukuatesa ha gukotelesa mukunda natshi ndaga jiavula jia lamba jidi ha mavu.

9. Luholo lutshi profesi idi mu Danyele 2:28, 31-35 idi mumonesa ufumu wa gisugishilo wakhalele naye guhinyina mavu nu tangua ditshi wasendesele guhinyina?

⁹ Tanga Danyele 2:28, 31-35. Tudi mumona gutagenesewa gua profesi eyi mangino. Nzoji ya Nebukadenezale yamonesele ndaga jiakhalele naye gukalegewa ‘mu masugu a gisugishilo,’ tangua Klisto wasendesele guhinyina. ‘Ikanzo ya utadi nu wuma’ idi mumonesa ufumu wa gisugishilo wana hinyina mavu agasue. Ufumu wene udi mukatshi dia mbalagaji jia Yesu jinyi Biblia yadiangele guzuelela. ufumu wene, yakotelesa puissance mondiale anglo-américaine wasendesele guhinyina mu Ita ya Thomo ya ha Mavu Agasue tangua Grande-Bretagne nu États-Unis abungishile masuta awo ha gulua ita. Gisongo giakoma giamonele Nebukadenezale mu  nzoji, giamonesele nji ndaga mbadi jiatadila ufumu wa gisugishilo. Ndaga jiene jidi mutshita egi gudisha gukhale mukatshi dia ufumu wene nu ma ufumu ako adiangele guhinyina mavu.

10. (a) Itshi tudi mumona mu uhinyinyi wa puissance mondiale anglo-américaine inyi profesi ya Danyele yadiangele guzuelela? (b) Mu ndaga itshi tudi naye gumonesa gutema? (Tala galuanda, “ Monesenu Gutema Mukunda nu Wuma!”)

¹⁰ Thomo, puissance mondiale anglo-américaine idi ya gudisha nu ma ufumu ako anyi vizio ya monesele handaga ufumu wuwu wa gisugishilo wamonesewe mu utadi udi wagubungisa nu wuma, uvi ndo mu utadi wakola gifua wolo nga siliva. Wuma udi mumonesa athu. (Dan. 2:43) Mangino tuana mona diago egi ndaga athu ana kalagala mu tangua dia ba eleksio, ba marche ana tshitshiwa nu ba organizasio ana tadila ndaga jia enya midimo ana tshita egi ikhale lamba gudi puissance mondiale anglo-américaine ha gutagenesa ndaga ana tshigina.

11. Luholo lutshi uhinyinyi wa puissance mondiale anglo-américaine udi gutukuatesa ha gutshigina egi tudi mujinga mu masugu a gisugishilo?

¹¹ Ya mbadi, puissance mondiale anglo-américaine yana monesewa gu ikanzo ya gisongo giakoma, idi ufumu wa gisugishilo wana hinyina mavu agasue unu Biblia yadiangele guzuelela. Gushigo nu ufumu uko mbawuhinyina gungima dia ufumu wene. Uvi mu Alemagedona, Ufumu wa Nzambi mbawushiya ufumu wene nu ba guverma agasue a ha mavu. *—Gumo. 16:13, 14, 16; 19:19, 20.

12. Ndaga itshi iko profesi ya Danyele ya monesele idi gutuhana gikhesa nu felela?

¹² Luholo lutshi profesi eyi yajiya gutukuatesa? Profesi ya Danyele idi muzuelela ndaga iko idi mumonesa egi tudi mujinga diago mu masugu a gisugishilo. Ivo 2 500 nu holu yabalega gale, Danyele wadiangele guzuela egi gungima dia Babilona, gudi nu ma ufumu ako nguana mbaahinyina mavu agasue nu mbaasagesa akombeledi a Nzambi. Wamonesele nji egi puissance mondiale anglo-américaine, mbawukhala ufumu wa gisugishilo mbawuhinyina mavu agasue. Ndaga eyi idi gutuhana gikhesa nu idi gututuma ha gusha mutshima egi, gualeha ndo Ufumu wa Nzambi mbawushiya ba guvernema agasue a ha mavu, phamba wene mbawuhinyina mavu a mudidi.—Dan. 2:44.

13. “Fumu wa nage” nu “mafumu kumi” adi muzuelela mu Gumonesa 17:9-12 adi mumonesa itshi? Luholo lutshi profesi yene yatagenesewe?

¹³ Tanga Gumonesa 17:9-12. Luholo Ita ya Thomo ya ha Mavu agasue yabolesele ima yavula, yatagenesele profesi iko ya Biblia yatadila masugu a gisugishilo. Mafumu a ha mavu atshitshile yagasue hagula athu akhale mu guhuima. Hene mu Janvier 1920, ahagele Société des Nations, gungima mu Octobre 1945 yabuile Organisation des Nations unies (ONU). Organisation wene wana tamegewa egi, “fumu wa nage.” Uvi ushigo ufumu wana hinyina mavu agasue. Ngolo jienji jiana katuga gudi ba guvernema. Biblia yana tamega ba guvernema ene mu luholo lua gufuanesa egi, “mafumu kumi.”

14-15. (a) Itshi mukanda wa Gumonesa 17:3-5 wana zuela mukunda nu “Babilona Yakoma”? (b) Athu ana hana mago gu ikombelelo ya mambo itshi adi mutshita mangino?

¹⁴ Tanga Gumonesa 17:3-5. Mu ukuateshi wa nyuma ya Nzambi, mupostolo Yone wamonele mu vizio mukhetu wa thambi, “Babilona Yakoma” yakotelesa ikombelelo yagasue ya mambo. Luholo lutshi vizio yene  yatagenesewe? Sendese mualeha ikombelelo yene ya mambo yana gudivua nu ba guvernema a ha mavu nu yana guahana mago. Uvi gualeha ndo, Nzambi mbawumba matangi mu mitshima ya mafumu a politike “hagula atagenese gutshigina guenji.” Itshi mbayikalegewa? Mafumu ene, yakotelesa “mafumu kumi” mbaaluisa ikombelelo yagasue ya mambo nu mbaayishiya.—Gumo. 17:1, 2, 16, 17.

¹⁵ Luholo lutshi tudi mujiya egi gisugishilo gia Babilona Yakoma giasuena hehi? Ha guhana mvutu gu muhu wuwu, idi nu ndando ha guwunguluga egi muta wa Efrata wakhalele mubamba dimbo dia Babilona. Mukanda wa Gumonesa wana fuanesa athu avula anyi ana kuatesa Babilona Yakoma nu “mita.” (Gumo. 17:15) Uvi mukanda wene udi nji muzuela egi mita yene ‘mbayimigina.’ Ndaga yene idi mumonesa egi athu avula mbaashigo luko muhana mago gu ikombelelo yagasue ya mambo. (Gumo. 16:12) Mangino, profesi yene idi mutagenesewa, handaga athu avula ana tuna ikombelelo yene ya mambo nu ana kamba ukuateshi gu milonga yawo mu mafundo ako.

16. Luholo lutshi gukotelesa muabonga profesi jiatadila guzoga gua Organisation des Nations unies nu gushiyiwa gua Babilona Yakoma guajiya gutukuatesa?

 ¹⁶ Luholo lutshi profesi eji jiajiya gutukuatesa? Guzoga gua Organisation des Nations unies nu luholo athu avula ashigo muhana luko mago gu ikombelelo ya mambo, idi mumonesa diago egi tudi mu masugu a gisugishilo. Ngatshima athu avula ashigo mukuatesa luko Babilona Yakoma, uvi ishigo mukotelesa egi yene ndaga mbayishiya ikombelelo yagasue ya mambo. Gifua luholo tuayimonyi guthunda, Yehowa mbawumba matangi mu mitshima ya “mafumu kumi,” yakotelesa mafumu a politike anyi ana hana mago gudi Organisation des Nations unies “hagula atagenese gutshigina guenji.” Mafumu a politike ene mbaashiya Babilona Yakoma mu gisagumuisa, athu avula mbaayituga diago. * (Gumo. 18:8-10) Gushiyiwa gua Babilona Yakoma, mbagusagesa athu ha mavu agasue nu mbagubata malamba avula. Uvi akombeledi a Nzambi mbaakhala nu gusuanguluga mukunda nu ndaga mbadi. Babilona Yakoma, mbalagaji wa Nzambi mbayikhadigo luko nu mbatukatuga mu uhiga wa mavu awa abola!—Luka 21:28.

17-18. (a) Luholo lutshi tuajiya gulandula gukolesa gutshigina guetu? (b) Itshi mbatuzuelela mu longo dialandula?

¹⁷ Danyele wazuelele egi, ‘ujiyi wa giamatshidia mbawudivudisa.’ Ndaga yene idi diago giamatshidia! Mangino tuana heta ukoteleshi wa profesi jiatadila masugu etu. (Dan. 12:4, 9, 10) Profesi jiene jiana tagenesewa diago, jiana gutukuatesa ha gunemesa diago Yehowa nu Mbimbi yenji. (Yesh. 46:10; 55:11) Hene, khalenu mutanga Biblia muabonga ha gulandula gukolesa gutshigina guenu nu gukuatesa athu ako ha gukuata ufuta nu Yehowa. Muene mbawubamba athu ana gumushila diago mutshima nu mbawakuatesa ha gukhala ‘mu guhuima tangua diagasue.’—Yesh. 26:3.

¹⁸ Mu longo dialandula, mbatuzuelela profesi jiatadila hungu dia Uklisto mu masugu a gisugishilo. Gifua luholo mbatuyimona, profesi jiene jiana gudivua diago nu profesi jiko jiana monesa egi tudi mujinga mu masugu a gisugishilo. Mbatumona nji ndaga jidi mumonesa egi Yesu Fumu wetu udi mutuameza alandudi enji a gujinginyina.