Yesu wakhalele mulongesa athu ha gukhala mu guhuima nu athu ako. Lusugu lumoshi wawambelele apostolo enji egi: “Mutangizago egi ngajile ha gubata guhuima ha mavu; ngajilego ha gubata guhuima, uvi ngajile ha gubata phogo ya khusa. Handaga ngajile ha gukhaphumuna mon’a yala nu sh’enji, mon’a mukhetu nu gin’enji, mon’a mukhetu nu giwaji gienji gia mukhetu.” (Mat. 10:34, 35) Ndaga yazuelele Yesu idi mukotelesa itshi?

Yesu gakhalelego mutshigina gukhaphumuna enya fami, uvi wakhalele mujiya egi malongo enji mbaanginyisa ukhaphumunyi mu fami jiko. Hene, athu anyi akhalele mutshigina gubua alandudi a Klisto nu gubatijiwa, akhalele naye gujiya egi matangua ako enya fami jiawo mbashigo musuanguluga nu desizio diawo. Matangua ako alumi’awo nga akaji’awo nu enya fami anyi ashigo Matemue a Yehowa ajiya guasagesa, ngenyi yajiya gukhala lamba gudi ene hagusala ya gujinginyina mu malongo a Klisto.

Biblia yana toga Aklisto ha gukhala “mu guhuima nu athu agasue.” (Roma 12:18) Uvi mu fami jiko malongo a Yesu ajiya gukhala gifua “phogo ya khusa.” Yana khala ngenyi gula mu fami muthu mumoshi watshigina malongo a Yesu uvi athu ako atuna malongo ene. Gula ndaga yene yakalegewa ngenyi, enya fami ako ana gubua “mbalagaji” jia muthu munu udi mulonguga giamatshidia.—Mat. 10:36.

Aklisto anyi ana khala inzo imoshi nu enya fami yawo anyi ashigo Matemue a Yehowa, matangua ako ana tagana nu ndaga jiana tshita egi ikhale lamba ha gusuanguluisa Yehowa nu Yesu. Ha gufezegesa, enya fami jiawo ajiya guashinjiga ha gutshita fete jia aphagano. Gula atagana nu ndaga ya luholo elu adi naye gutomba gula nanyi adi naye gusuanguluisa. Yesu wazuelele egi: “Muthu wagasue udi muzumba sh’enji nga gin’enji muavula gungubalega ame, gashigo watagana ha gukhala mulandudi wami.” (Mat. 10:37) Yesu gazuelelego egi alandudi enji ashigo naye guzumba luko mvuaji jiawo muavula. Uvi waakuatesele ha gujiya ndaga yabalega ndando mu monyo wawo. Gula enya fami yetu ashigo mutshigina egi tukombelele Yehowa, tudi naye gulandula guazumba, uvi tudi naye guzumba Nzambi muavula gubalega.

Usageshi wa enya fami yetu wajiya gutuhana lamba diavula. Hene alandudi a Yesu ashigo naye gujimbila mbimbi eji jiazuelele muene egi: “Muthu wagasue watuna mutshi wenji wa lamba nu gashigo gungulandula ame, muene gashigo watagana ha gukhala mulandudi wami.” (Mat. 10:38) Mu guzuela guko, Aklisto adi naye gutshigina nu gukolesela mu usageshi wagasue wa enya fami yawo, gifua luholo ana kolesela mu ndaga jiko. Adi naye gusha mutshima egi, gula adi nu makalegelo abonga ajiya gukuatesa enya fami yawo ha gusombegesa matangi awo nu ha gulonguga Biblia.—1 Phet. 3:1, 2.