1. Ha gutadila Mulongeshi 7:20, ndaga itshi ya giamatshidia Fumu Salomo wazuelele?

 FUMU Salomo wasonegele egi: ‘Gushigo nu muthu wabonga ha mavu wana kalagala phamba ndaga jiabonga uvi jiabola ndo.’ (Mulo. 7:20) Idi yadiago egi mukut’etu agasue tuana tshita gubola! (1 Yone 1:8) Hene, tuana khala nu funu egi Yehowa nu aphangi’etu atutotesele.

2. Tuana gudivua gikuatshi gula futa dietu mumoshi watutotesela?

² Yajiya gukhala egi aye muwunguluga lusugu wazuelele ndaga jiasagesele futa diaye mumoshi. Watshiginyile egi muvutule ufuta wenu, hene wayile mumona futa diaye ha gumutoga pardo nu mutshima waye wagasue. Wadivuile gikuatshi tangua futa diaye wagutotesele nu mutshima wagasue? Idi yadiago edi wadivuile muabonga nu wasuangulugile muavula!

3. Itshi tuza muzuelela mu longo edi?

³ Tuana tshigina gukhala nu ufuta wakola nu Yehowa. Uvi matangua ako tuajiya guzuela nga gukalagala ndaga jiajiya gumusagesa. Mukunda natshi tudi naye gusha mutshima egi Yehowa wana khala hehi ha gututotesela? Mukunda natshi tuajiya guzuela egi luholo Yehowa wana totesela athu gubola ludi lua gudisha nu luholo esue tuana totesela athu? Akuatshi Nzambi wajiya gutotesela?

4. Mukunda natshi tudi naye gusha mutshima egi Yehowa wana khala hehi ha gutotesela athu gubola?

⁴ Biblia yana monesa egi Yehowa wana khala hehi ha gututotesela.  Tangua Yehowa wadimonesele gudi Moize gu Mulundu wa Sinayi, wazuelele mu njila ya muanjelo egi: ‘Yehowa, Yehowa, udi Nzambi wazala pha nu khenda nu gisemo, ganago guvua khabu mu phushi nu wana monesa guzumba nu gufubidila masugu agasue, muene wana zumba diago athu a maluholo agasue, wana totesela athu gubola nu masumu awo.’ (Guz. 34:6, 7) Yehowa udi Nzambi wa gisemo nu wa khenda, wana khala hehi ha gutotesela athu masumu gula abalumuna diago mutshima.—Neh. 9:17; Ngi. 86:15.

5. Ha gutadila Ngimbo 103:13, 14, luholo Yehowa wana jiya athu muabonga, yana gumutuma ha gutshita itshi?

⁵ Yehowa udi Mufugi wetu, wana jiya ndaga jiagasue jidi gututadila. Idi diago ndaga ya gushimana ha gujiya egi Yehowa wana jiya ndaga jia muthu wagasue ha mavu! (Ngi. 139:15-17) Wana gujiya gubola guagasue tuahetele gudi mvuaji jietu. Wana jiya nji ndaga jiakalegewe mu monyo wetu jinyi jiatshitshile egi tusombegese makalegelo etu. Luholo Yehowa wana jiya athu agasue muabonga, yana gumutuma ha gutuvuila diago khenda.—Ngi. 78:39; tanga Ngimbo 103:13, 14.

6. Luholo lutshi Yehowa wamonesele egi wakhalele hehi ha gututotesela?

⁶ Yehowa wamonesele diago egi wana khala hehi ha gutotesela athu. Wana kotelesa egi mukunda nu gubola guakalegele Adama muthu wa thomo, mukut’etu agasue tuabuile enya masumu hene tuana gufua. (Roma 5:12) Esue hakhetu tuakhalelego nu luholo lua gudikatula mu gubola guene, guakhalelego nji nu muthu ha gutukatula mu gubola. (Ngi. 49:7-9) Uvi Nzambi wetu wa guzumba watuvidile khenda, hene watshitshile ndaga ha gutukatula mu gubola guene. Ndaga itshi yene Yehowa wakalegele? Gifua luholo Yone 3:16 idi guyimonesa, Yehowa wahanele Mun’enji mumoshi ha mumoshi ha gufua mukunda nu esue. (Mat. 20:28; Roma 5:19) Yesu wadihanele ha fundo dietu, wamonele lamba dia gufua ha gukatula mu gubola muthu wagasue wana sha gutshigina gudi muene. (Heb. 2:9) Yakhalele diago lamba gudi Yehowa ha gumona Mun’enji wa guzumba mufua gufua gua lamba nu gua musonyi! Idi yadiago egi Yehowa gakhalelego naye gutuma Mun’enji ha gufua gula nga gatshiginyilego gututotesela.

7. Ifezegeselo itshi idi mu Biblia ya athu anyi Yehowa watotesele gubola guawo?

⁷ Mu Biblia mudi nu ifezegeselo ya athu avula anyi Yehowa watotesele gubola guawo. (Ef. 4:32) Gifezegeselo gia nanyi gidi gugujila mu matangi? Yajiya gukhala egi gifezegeselo gia  Fumu Manase. Muthu yowu wabola wakalegele ndaga jiavula jiabola jinyi jiasagesele Yehowa. Wakhalele mukombelela nzambi jia mambo, watumile nji athu ako ha gutshita ngenyi. Washiyile an’enji, waahanele gifua milambu gudi nzambi jia mambo. Wakalegele nji ndaga iko yabola diago, wahagele gisongo gia nzambi wa mambo mu tempelo ya Yehowa ya gijila. Biblia idi muzuela egi: ‘Manase wakalegele ndaga jiavula jiabola gu meso a Yehowa ha gumuhana khabu.’ (2 Gudi. 33:2-7) Uvi gungima, Manase wabalumuine diago mutshima, hene Yehowa wamutotesele gubola guenji. Nzambi wamuhagele luko fumu. (2 Gudi. 33:12, 13) Yajiya nji gukhala egi watangiza gifezegeselo gia Fumu Davidi. Muene nji wakalegele gubola guakoma gu meso a Yehowa, wakalegele uthambi nu washiyile muthu. Uvi gungima, Davidi wabalumuine diago mutshima nu watshiginyile gubola guenji, hene Yehowa wamutotesele. (2 Sam. 12:9, 10, 13, 14) Tudi naye gusha mutshima egi Yehowa wana khala hehi ha gututotesela. Gifua luholo tuza guyimona, gutotesela gua Yehowa gushigo luholo lumoshi nu gua athu.

8. Mukunda natshi tudi muzuela egi Yehowa udi Nzuji wabalega gubonga?

⁸ Yehowa udi ‘Nzuji ya athu agasue a ha mavu.’ (Gis. 18:25) Nzuji wabonga udi naye gukotelesa mukhuala muabonga. Hene Yehowa udi diago Nzuji wabonga, wana kotelesa mikhuala muabonga handaga muene watuhanele nayo. (Yesh. 33:22) Gushigo nga nu muthu wana jiya ndaga jiabonga nu jiabola gifua Yehowa. Ndaga itshi iko nzuji wabonga udi naye gujiya? Gutuama dia gusophesa udi naye gujiya ndaga jiagasue jiatadila mulonga wene. Yehowa udi diago Nzuji wabonga handaga wana jiya ndaga jiagasue.

9. Itshi Yehowa wana jiya tangua diana zula muene desizio dia gutotesela muthu gubola nga ndo?

⁹ Yehowa gashigo gifua manzuji a ha mavu. Muene wana jiya ndaga jiagasue jiatadila mulonga udi naye muene gusophesa. (Gis. 18:20, 21; Ngi. 90:8) Yehowa gashigo gifua athu, ganago gutadila phamba ndaga jidi mumonega nu jidi muezela athu. Yehowa wana kotelesa muabonga egi muthu wana kalagala ndaga ha gutadila makalegelo a mvuaji jienji, malongo ahetele muene, fundo didi mujinga muene, nu ndaga jiko. Yehowa wana jiya nji ndaga jidi mu mutshima wetu. Wana kotelesa diago mukunda natshi muthu udi mutshita ndaga imoshi ngenyi nu matangi enji. Gushigo nu gima giajiya gudisuega gu meso a Yehowa. (Heb. 4:13) Hene, Yehowa wana totesela muthu gubola handaga wana jiya ndaga jiagasue jia muthu muene.

10. Ha gutadila Mikhuala 32:4, mukunda natshi tudi muzuela egi Yehowa wana sophesa ndaga mu luholo luatagana?

¹⁰ Yehowa wana sophesa ndaga mu luholo luatagana. Muene gana khalago nu khadilo dia gutomba-tomba. Yehowa gana toteselago muthu handaga muthu muene udi wabonga, muenya umonyi, muenya lukuma, nga ndo udi mujiya ndaga jiavula. (1 Sam. 16:7; Yak. 2:1-4) Gushigo nga nu muthu mumoshi wajiya gumushinjiga ha gukalagala ndaga imoshi nga gumuhana gabatshi’a kano (corruption). (2 Gudi. 19:7) Nzambi ganago guzula badesizio handaga udi nu khabu nga ndo ha gusuanguluisa athu. (Guz. 34:7) Yehowa udi diago Nzuji watagana handaga wana kotelesa ndaga jiagasue jidi gututadila.—Tanga Mikhuala 32:4.

11. Mukunda natshi tuajiya guzuela egi luholo Yehowa wana gutotesela athu guakhala gua gudisha nu gua athu?

¹¹ Athu asonegele ndaga jidi mu Gitshinyi gia Biblia Giasonegewe mu Hebelu, akotelesele egi Yehowa wana totesela athu gubola mu luholo luatagana. Hene mu mafundo ako, akalegele mbimbi imoshi ya Hebelu. Mukanda umoshi wana kotelesa Biblia udi muzuela egi: “Ana kalegela mbimbi yene phamba ha gumonesa luholo Yehowa wana totesela athu. Uvi anago guyikalegela  ha gumonesa luholo athu ana totesela athu n’ako.” Phamba Yehowa wana totesela diago muthu gubola, gula muthu muene wabalumuna diago mutshima. Ndaga itshi yana kalegewa gula Yehowa watutotesela?

12-13. (a) Gubonga gutshi muthu wajiya guheta gula Yehowa wamutotesela? (b) Gubonga tuana heta gula Yehowa watutotesela guana khala mukunda nu masugu guvula gutshi?

¹² Tangua tuana tshigina diago egi Yehowa wana gututotesela, muene wana gutuhana “sungi jia guhuima,” yakotelesa egi tuana khala nu gusuanguluga mu mutshima nu tuana khala nji nu mutshima waphelegeta. Tuajiya guheta guhuima gua luholo elu phamba gula ‘Yehowa muene hakhenji’ watutotesela. (Makal. 3:19) Gula Yehowa watutotesela gubola, tuana vutula luko ufuta wetu n’enji; ngenyi yana monega gifua tuakalegelego gubola nga hazonda.

¹³ Gula Yehowa watutotesela gubola, muene mbagashigo gutuhana luko ndola mukunda nu gubola guene. (Yesh. 43:25; Yel. 31:34) Yehowa wana khaphumuna gubola guetu gualeha nu esue ‘gifua luholo khanda ya mazogelo a kumbi yakhala gualeha nu khanda ya mayilo a kumbi.’ * (Ngi. 103:12) Gutangiza luholo Yehowa wana gututotesela diago nu mutshima wenji wagasue, guana gutusuanguluisa diago nu yana gututuma ha gumutumbuisa. (Ngi. 130:4) Nanyi Yehowa wajiya gutotesela?

14. Itshi yana kuatesa Yehowa ha guzula desizio dia gutotesela muthu nga ndo?

¹⁴ Gifua luholo tuayimonyi, ha guzula desizio dia gutotesela muthu nga ndo, Yehowa ganago gutala gula gubola gua muthu muene gudi guakoma nga guazonda. Tuamonyi nji egi muene Mufugi wetu, Muhanyi wa mikhuala nu wana jiya ndaga jietu jiagasue. Hene, wajiya guzula desizio dia gututotesela nga ndo. Ndaga jitshi Yehowa wana tadila gutuama dia guzula desizio dia gutotesela muthu gubola nga ndo?

15. Ha gutadila Luka 12:47, 48, ndaga itshi Yehowa wana gutadila gutuama dia guzula desizio dia gutotesela muthu nga ndo?

¹⁵ Thomo, Yehowa wana kamba gujiya gula muthu watshitshi gubola wakhalele mujiya egi ndaga idi mukalagala muene idi yabola. Yesu wamonesele ndaga yene haphelo gifua luholo tudi guyimona mu mukanda wa Luka 12:47, 48. (Tanga.) Gula muthu udi mujiya egi ndaga imoshi  ishigo musuanguluisa Nzambi uvi muene wazula desizio dia gukalagala ndaga yene, ngenyi watshitshi gubola guakoma. Yehowa wajiya gutuna gutotesela muthu wa luholo elu. (Mako 3:29; Yone 9:41) Uvi tudi naye gutshigina egi matangua ako tuana jiya egi ndaga tudi mukalagala idi yabola. Gula idi ngenyi, Yehowa wajiya gututotesela ba? Ayi! Henyaha tuzuelelenu ndaga iko Yehowa wana tadila gutuama dia guzula desizio dia gutotesela muthu nga ndo.

16. Gubalumuna mutshima gudi mukotelesa itshi? Mukunda natshi tudi naye gubalumuna mutshima hagula Yehowa atutotesele?

¹⁶ Ndaga iko Yehowa wana gutadila idi gukamba gujiya gula muthu wakalagala gubola wabalumuna diago mutshima. Gubalumuna mutshima gudi mukotelesa itshi? Gudi mukotelesa “gusombegesa matangi, makalegelo nga desizio tuazudi.” Guana kotelesa nji egi muthu udi naye gudibela, guvua diago gikenene mukunda nu ndaga yabola yakalegele muene. Muthu wana balumuna diago mutshima, ganago guvua gikenene phamba mukunda nu ndaga yakalegele muene, uvi wana guvua nji gikenene mukunda nu ufuta wenji wabolele nu Yehowa. Tudi mujiya egi Fumu Manase nu Fumu Davidi akalegele gubola guakoma; uvi Yehowa waatotesele handaga abalumuine diago mutshima. (1 Maf. 14:8) Yehowa wana totesela muthu gubola guenji phamba gula muthu muene wabalumuna diago mutshima. Uvi tushigo naye guvua gikenene phamba mukunda nu gubola tuakalegele. Gudi nu ndaga iko tudi naye gukalagala. * Henyaha tuzuelelenu ndaga iko Yehowa wana tadila ha guzula desizio dia gutotesela muthu nga ndo.

17. Ha gutadila Yeshaya 55:7, gubemba gukalagala ndaga jiabola gudi mukotelesa itshi? Mukunda natshi gutuna guvutugila masumu tuakalegele mu masugu abalega gudi nu ndando yavula?

¹⁷ Ndaga iko ya ndando Yehowa wana tadila idi, gubemba ndaga jiabola. Yakotelesa egi muthu udi naye gusombegesa, gubemba gukalagala ndaga jiabola nu gusendesa gukalagala ndaga jiana suanguluisa Yehowa. (Tanga Yeshaya 55:7.) Muthu udi naye gusombegesa matangi enji hagula Yehowa amutuameze. (Roma 12:2; Ef. 4:23) Udi naye guzula desizio dia gubemba  matangi enji abola nu gubemba gukalagala ndaga jiabola. (Kol. 3:7-10) Idi yadiago egi gutshigina guetu mu mulambu wa Klisto, guene guana tshita egi Yehowa atutotesele gubola guetu nu aphelegetese masumu etu. Yehowa mbawututotesela mu njila ya mulambu wene gula tudi mutshita diago ngolo ha gusombegesa makalegelo etu.—1 Yone 1:7.

18. Ndaga jitshi tuazuelela jidi mumonesa luholo Yehowa wana gututotesela?

¹⁸ Henyaha tuzuelelenu mu guhihia ndaga jia ndando tuamona mu longo edi. Gushigo nga nu muthu wana totesela athu gubola guawo gifua Yehowa. Mukunda natshi tudi muzuela ngenyi? Thomo, Yehowa wana khala hehi ha gutotesela athu gubola guawo. Ya mbadi, wana jiya ndaga jiagasue jidi gututadila. Luholo Yehowa wana jiya ndaga jietu jiagasue, udi watagana ha gujiya gula tuabalumuna diago mutshima nga ndo. Ndaga ya thathu idi egi, gula Yehowa watutotesela, gu meso enji yana khala gifua tuakalegelego gubola. Ndaga yene yana gutukuatesa ha gukhala nu mutshima waphelegeta nu ha gumusuanguluisa.

19. Mukunda natshi tuajiya gukhala nu gusuanguluga ngatshima tushigo athu atagana nu tuana kalagala gubola?

¹⁹ Luholo tushigo athu atagana, tuajiya gulandula gukalagala ndaga jiabola. Uvi tuajiya guheta gikhesa mu mbimbi jidi mu Étude perspicace des Écritures, Volume 2 diyiji 765 jidi muzuela egi: “Yehowa udi Nzambi wa khenda jiavula, wana jiya nji egi akombeledi enji adi athu aleba, ene ashigo naye gulandula gudisagesa mukunda nu gubola guawo gunu ahetele gudi mvuaji jiawo jia thomo. (Ngi 103:8-14; 130:3) Gula alandula gutshita ngolo ha gutumagela Nzambi, mbaakhala nu gusuanguluga. (Fili 4:4-6; 1Yn 3:19-22).” Mbimbi eji jidi muhana diago gikhesa!

20. Itshi mbatuzuelela mu longo dialandula?

²⁰ Tudi diago nu gusuanguluga guavula ha gujiya egi Yehowa wana khala hehi ha gututotesela gula tuabalumuna diago mutshima mu ndaga jiabola tuakalegele. Na henyaha, luholo lutshi tuajiya gulandula gifezegeselo gia Yehowa mu ndaga yatadila gutotesela? Mu maluholo atshi tuajiya gutotesela athu gifua Yehowa? Mu maluholo atshi luholo luetu lua gutotesela athu ludi lua gudisha nu lua Yehowa? Mukunda natshi gujiya gudisha guene gudi nu ndando? Mbatuheta mvutu gu mihu eyi mu longo dialandula.