PHANGI Lisa udi muzuela egi: “Aphangi a mala nu a akhetu akhalele diago nu khadilo dia gisemo, yene ndaga yangusuanguluishile muavula.” * Yene ndaga ya thomo yamutumile ha gujiya giamatshidia. Phangi Anne wataganele nji nu ndaga ya luholo lumoshi. Udi muzuela egi: “Ngasuangulugile nu giamatshidia mukunda nu gisemo gia Matemue a Yehowa, uvi ishigo mukunda nu ndaga ana longesa.” Henyaha, Lisa nu Anne ana suanguluga gutanga Biblia nu gutangigiza ndaga jiene. Uvi khadilo dia gisemo diene dia akuatesele diago ha gujiya giamatshidia.

Luholo lutshi tuajiya gumonesa khadilo dia gisemo ha gukolesa athu ako? Tuzuelelenu maluholo mbadi: Gumonesa gisemo mu ndaga tuana zuela nu mu makalegelo etu. Gungima, tuza mumona nji gula akuatshi tudi naye gumonesa gisemo.

Mukhetu watema ana zuelela mu mukanda wa Ishima mukhapho 31, wana monesa “gisemo” mu ndaga jiana zuela muene. (Ish. 31:26) “Gisemo” giana gumukuatesa ha gujiya ndaga jidi muzuela muene nu luholo lua gujizuela. Atata nji adi naye gutshita yagasue ha gumonesa “gisemo” mu ndaga ana zuela. Mvuaji jiavula jiana jiya egi gula adi mubalela an’awo, yajiya guasagesa, ngenyi ajiya gutuna gutegelela ndaga adi muzuela. Gula mvuaji jidi muzuela nu gisemo, mbayituma an’awo ha guategelela nu guatumagela.

Ikhale udi mvuaji nga ndo, itshi yajiya gugukuatesa ha guzuela nu gisemo? Mu mukanda wa Ishima 31:26, mu gisendeselo gudi nu ndaga imoshi ya ndando. Verse yene idi muzuela egi: “Muene wana zuela nu ndunge.” Tudi naye gutomba muabonga mbimbi tudi naye guzuela nu gujizuela mu luholo luabonga. Idi ndaga yabonga ha gudihula egi: ‘Ndaga ngudi mutshigina guzuela, jiza muhana athu khabu nga ndo jiza guatulula mutshima?’ (Ish. 15:1) Idi nu ndando ha gutangiza gutuama dia guzuela.

Ishima 12:18 idi muzuela egi: ‘Mbimbi jiabola jiana namenesa gifua phogo ya khusa.’ Gula tuatangiza muabonga gutuama luholo athu mbaadivua gula avua mbimbi jietu, mbayitukuatesa ha gutomba mbimbi tudi naye guzuela. Gula tudi muzuela nu “gisemo,” mbayitukuatesa ha gutuna guzuela mbimbi jiajiya gusagesa athu ako. (Ef. 4:31, 32) Mbayitukuatesa nji ha gukhala nu matangi abonga, ha gutomba mbimbi jiabonga nu gujizuela mu luholo luabonga. Yehowa wahanele gifezegeselo giabonga mu ndaga yene, tangua diakolesele muene mukombeledi wenji Eliya. Muanjelo munu Yehowa watumile wazuelele mu ‘dijui dia tuluga nu diazonda.’ (1 Maf. 19:12) Uvi gukhala nu gisemo, guana kotelesa ndo phamba guzuela mbimbi jiabonga. Tudi naye nji gumonesa gisemo mu makalegelo etu. Luholo lutshi?

Tuana landula gifezegeselo gia Yehowa tangua tuana zuela nu tuana kalagala ndaga nu gisemo. (Ef. 4:32; 5:1, 2) Lisa tuazuelela gu thunda, udi mumonesa luholo Matemue a Yehowa amumonesele gisemo. Udi muzuela egi: “Tangua atuwambelele egi tudi naye gukatuga muphushi fundo tuakhalele, aphangi a mala  mbadi nu akaji’awo atogele gu mudimo wawo ha guza gutukuatesa ha gukanga ima. Mu tangua diene, ngakhalele khenji ngusendesa ndo gulonguga Biblia.” Ndaga yene yakuatesele Lisa ha guzula desizio dia gusendesa gulonguga Biblia.

Anne tuazuelela gu thunda, wasuangulugile nji luholo Matemue a Yehowa a mumonesele gisemo. Udi muzuela egi: “Ha mavu awa athu avula ana kalegela athu ako ndaga mu luholo luabola, hene yakhalele lamba gudi ame ha gushila athu mutshima.” Udi muzuela luko egi: “Tangua ngadimonele nu Matemue a Yehowa, ngaashilego mutshima. Ngadihudile egi: ‘Mukunda natshi adi gudisagesa mukunda nu ame?’ Uvi, khadilo dia gisemo dia muthu wakhalele gungulongesa Biblia, dia ngukuatesele ha gumushila mutshima.” Ndaga itshi yakalegewe gungima? Udi muzuela egi: “Ngasendesele gutangigiza muavula ndaga ngakhalele mu longuga.”

Tuakotelesa egi, Lisa nu Anne asuangulugile muavula luholo aphangi a mu hungu a akalegele ndaga nu gisemo, yene yaakuatesele ha gusendesa gulonguga Biblia. Khadilo dia gisemo dia aphangi ene, diakuatesele Lisa  nu Anne ha gushila Yehowa nu athu ako mutshima.

Yajiya gukhala egi athu ako ana zuela nu gisemo handaga mafundo akudile akhalele guamonesela gisemo. Idi diago ndaga yabonga gula athu ako adi mutshita ngenyi. Uvi gula tuana monesa gisemo phamba handaga fundo tuakudile akhalele mumonesa gisemo, yajiya gumonesa egi tushigo mulandula gifezegeselo gia Nzambi.—Fuanesa nu Makalegelo 28:2.

Khadilo dia gisemo diana khala mukatshi dia mabundu a nyuma ya Nzambi. (Gal. 5:22, 23) Hene, tudi nu funu ya nyuma ya Nzambi ha gutukuatesa ha gukudisa khadilo diene. Gula tuatshita ngenyi, mbatulandula gifezegeselo gia Yehowa nu gia Yesu. Esue Aklisto, tuana gudisagesa diago mukunda nu athu ako. Tuana tshita ngenyi handaga tuana zumba Yehowa nu athu ako. Gisemo gia giamatshidia giana katuga mu mutshima, Nzambi nji wana suanguluga nu khadilo diene.

Yajiya gukhala yaleba ha gumonesa gisemo gudi athu anyi ana gutumonesela nji gisemo nga gudi athu tudi mujiya. (2 Sam. 2:6) Luholo lumoshi lua guyitshita idi guhana mersi. (Kol. 3:15) Uvi, itshi tudi naye gutshita gula tudi mumona egi tushigo naye gumonesela muthu mumoshi gisemo?

Tutadilenu gale ndaga eyi: Yehowa wana monesa khenda jiavula. Biblia yana gutuhana malongo a ndando mukunda nu khadilo diene. Mbimbi “khenda jiavula,” jiakalegewa muavula mu Gitshinyi gia Biblia Giasonegewe mu Greke. Luholo lutshi Nzambi wana gutumonesela gisemo?

Yehowa wana monesa gisemo gudi athu agasue, hene wana guahana ima adi nayo funu ha gujinga. (Mat. 5:45) Gutuama egi athu ajiye Yehowa, muene wadiangele guamonesela gisemo. (Ef. 2:4, 5, 8) Ha gufezegesa, wahanele mun’enji mumoshi ha mumoshi mukunda nu athu agasue. Mupostolo Phaula wa sonegele egi, Yehowa wahanele mulambu “mu khenda jienji jiavula.” (Ef. 1:7) Tangua tuana kalagala gubola tuana sagesa Yehowa, uvi muene wana landula gutuhana malongo nu gutulongesa. Malongo enji nu mbimbi jienji jidi gifua “mame” adi munosa. (Mikh. 32:2) Gushigo diago nu gima tuajiya guhana Yehowa mukunda nu gisemo giatumonesele muene. Tudi mujiya egi gula Yehowa gatumoneselego khenda jiavula, tuajiyilego gukhala nu felela mukunda nu masugu adi muza.—Fuanesa nu 1 Phetelo 1:13.

Khadilo dia gisemo diana gutumonesela Yehowa diana gutusuanguluisa nu diana gututuma ha gulandula gifezegeselo gienji. Hene, tushigo naye gutomba athu tudi naye gumonesela gisemo. Tudi naye gulandula gifezegeselo gia Yehowa ha gumonesela athu gisemo lusugu nu lusugu. (1 Tes. 5:15) Gula tudi mulandula gumonesa gisemo, mbatukhala gifua tshuya mu lusugu lua guhuma. Ngenyi mbatukolesa enya fami yetu, aphangi’etu mu hungu, mafuta etu a mudimo, mafuta etu a khalasa nu athu ana jinga hehi nu esue.

Tangiza athu anyi ajiya guheta gubonga mu fami yenu nga mu hungu dienu, gula wazuela nu wakalagala ndaga nu gisemo. Yajiya gukhala egi mu hungu dienu gudi nu muthu mumoshi udi nu funu ya ukuateshi ha gulondega inzo yenji nga gumukuatesa gu midimo iko. Gula watagana nu muthu mumoshi mu mudimo wa gulongesa udi nu funu ya ukuateshi mu ndaga imoshi ngenyi, wajiya gumukuatesa ba?

Ha gulandula gifezegeselo gia Yehowa, tudi naye gumonesa “gisemo” mu mbimbi jietu nu mu makalegelo etu.