1. Ndaga jitshi jiajiya gututuma ha guvua woma?

 TUTADILENU ndaga akombeledi ako a Yehowa ataganele najio. Phangi Nestor nu mukaji’enji María akhalele mutshigina guya fundo diakhalele nu funu ya alongeshi. * Uvi ha gutshita ngenyi, yakhalele mutoga egi asombegese ndaga jiko mu monyo wawo. Uvi avuile woma egi mbaashigo mukhala diago nu gusuanguluga gula adi nu makuta azonda. Phangi Biniam wabuile Temue wa Yehowa mu gifutshi ginyi atunyishile mudimo wetu. Wakotelesele egi luholo luabuile muene mukombeledi wa Yehowa, wajiya gutagana nu usageshi. Ndaga yene yamuhuile woma. Uvi wavuile luko woma wavula mukunda nu ndaga Enya fami yenji mbaazuela tangua mbaajiya egi wabuile gale Temue wa Yehowa. Tangua awambelele phangi Valérie gu hôpital egi udi nu misongo ya cancer, wasendesele gudisagesa ha gujiya gula luholo luana nemesa muene mikhuala ya Biblia yatadila mahatshi, mbawuheta diago munganga wajiya gunemesa desizio dienji ha guphandewa uvi guvutula ndo mahatshi. Wakhalele muvua woma egi mbala jiko udi mufua genji.

2. Mukunda natshi tudi naye gutshita ngolo ha gutuna guvua woma?

² Aye nji wavuile gale woma wa luholo elu ba? Athu avula mukatshi dietu ana guvua nji woma wene. Gula tushigo mutshita ngolo ha gubinga woma, tuajiya guzula badesizio abola anyi ajiya gubolesa ufuta wetu nu Yehowa. Satana wana tshigina egi ufuta wetu nu Yehowa ubole. Wana kalegela woma wetu ha gututuma ha gutuna gutumagela mikhuala ya Yehowa gifua mukhuala watadila gulongesa lukuma luabonga. (Gumo. 12:17) Satana udi muthu wabola, ganago guvuila athu khenda nu wana  khala diago nu ngolo. Uvi luholo lutshi wajiya gudibamba hagula Satana gagukalagalago gubola?

3. Itshi yajiya gutukuatesa ha gubinga woma?

³ Gula tudi diago nu gutshigina egi Yehowa wana gutuzumba nu udi nu esue, mbatushigo mubemba egi Satana atuvuise woma. (Ngi. 118:6) Ha gufezegesa, muthu wasonegele mukanda wa Ngimbo mukhapho 118 wataganele nu ndaga jiko jiamusagesele. Wakhalele nu mbalagaji jiavula, ako mukatshi diawo akhalele enya lukuma (verse 9 nu  10). Matangua ako, wakhalele mutagana nu usageshi wakola diago (verse 13). Yehowa wamuhanele ndola yakola (verse 18). Uvi muyimbi wa ngimbo muene wazuelele egi: ‘Ngajiyilego guvua woma.’ Itshi yamukuatesele ha gudivua mu ubambi? Wakhalele mujiya egi ngatshima Yehowa wamuhanele ndola, uvi wakhalele gumuzumba muavula. Muyimbi wa ngimbo wakhalele musha mutshima egi ngatshima udi mutagana nu malamba a luholo lutshi, Yehowa Nzambi wa guzumba mbawukhala hehi ha gumukuatesa.—Ngi. 118:29.

4. Woma wa luholo lutshi tuajiya gubinga gula tudi musha mutshima egi Nzambi wana gutuzumba?

⁴ Tudi naye gusha mutshima egi Yehowa wana zumba muthu wagasue mukatshi dietu. Gutshigina gua luholo elu mbagutukuatesa ha gubinga ndaga eji thathu: (1) Guvua woma egi mbatushigo mutaganesa nzala jia enya fami yetu; (2) woma wa athu, nu (3) woma wa gufua. Aphangi tuazuelela mu paragrafe jia gu thunda, abingile woma wawo handaga akhalele musha mutshima egi Nzambi wana guazumba.

5. Ndaga jia luholo lutshi jiajiya gutuma fumu wa fami ha gudisagesa? (Tala gifuanesa holu dia gizula.)

⁵ Fumu wa fami udi Muklisto wana zula nu ndando ginemo gienji gia gutanganesa nzala jia enya fami yenji. (1 Tim. 5:8) Gula udi fumu wa fami, yajiya gukhala egi mu sungi eyi ya misongo ya coronavirus, mudimo waye wafui. Nga ndo udi muvua woma egi mbawushigo muheta mbongo jia gusumba ima ya gudia mukunda nu enya fami yaye nga jia gufutshila inzo. Yajiya nji gukhala egi udi muvua woma egi gula mudimo waye wafua, mbawushigo muheta mudimo uko. Nga ndo gifua phangi Nestor nu mukaji’enji María tuazuelela gu thunda, wajiya gutangiza egi yajiya gukhala lamba ha gujinga nu makuta azonda. Satana wana kalegela woma wa luholo elu ha gukanga athu avula njila ha gukombelela Yehowa.

6. Satana wajiya gututuma ha gutangiza itshi?

⁶ Satana wana tshita yagasue ha gututuma ha gutangiza egi Yehowa ganago gudisagesa mukunda nu esue, mbagashigo nji gutukuatesa ha gutaganesa nzala jia enya fami yetu. Ndaga yene yajiya gututuma ha gutangiza egi tudi naye gubamba mudimo wetu ngatshima mudimo wene udi mubolesa ufuta wetu nu Yehowa.

7. Itshi Yesu watuwambelele?

⁷ Yesu wana jiya Sh’enji muabonga gubalega athu ako, hene wazuelele egi: “Tata wenu udi mujiya ima mudi nayo funu gutuama egi mumutoge nayo.” (Mat. 6:8) Yesu wana jiya egi Yehowa udi hehi ha gutuhana ima tuana khala nayo funu. Esue Aklisto tudi enya fami ya Nzambi. Luholo Yehowa udi Fumu wa fami, tudi naye gusha mutshima egi muene mbawukalegela malongo adi mu 1 Timote 5:8.

8. (a) Ha gutadila Matayo 6:31-33, itshi yajiya gutukuatesa gula tudi muvua woma egi mbatushigo mutaganesa nzala jia enya fami yetu? (b) Luholo gifuanesa gidi guyimonesa, luholo lutshi tuajiya gulandula gifezegeselo gia phangi mumoshi nu mukaji’enji anyi atamegele phangi mumoshi wa mukhetu ha gudia n’enji?

⁸ Gula tudi musha mutshima egi Yehowa wana gutuzumba nu wana zumba nji enya fami yetu, mbayitukuatesa ha gutshigina egi  mbatuheta ima tudi nayo funu. (Tanga Matayo 6:31-33.) Yehowa wana tshigina gutukuatesa, wana gutuhana ima yagasue nu guzumba! Tangua diafugile muene mavu, watuhanele ima yavula tudi nayo funu ha gujinga muabonga. Wafugile ima yavula ha mavu inyi yajiya gutusuanguluisa. (Gis. 2:9) Gula matangua ako tushigo nu ima yavula yagujingila, tudi naye gusuanguluga nu ima tudi nayo, handaga Yehowa watuhanyi ima yene. (Mat. 6:11) Tudi naye gujiya egi ima Yehowa mbawutuhana, mbayikhala yavula gubalega inyi tuatotesele. Mu masugu adi muza, mbawutuhana monyo wa ivo nu ivo. Phangi Nestor nu mukaji’enji María akotelesele ndaga yene.—Yesh. 65:21, 22.

9. Longo ditshi tuajiya guzula mu gifezegeselo gia phangi Nestor nu mukaji’enji María?

⁹ Phangi Nestor nu mukaji’enji María akhalele nu inzo nu midimo yabonga gu Colombie. Adi muzuela egi: “Tuakhalele mutshigina gusombegesa ndaga jiko mu monyo wetu ha gudihana muavula mu mudimo wa gulongesa, uvi tuakhalele muvua woma egi mbatushigo mukhala nu gusuanguluga gula tudi nu makuta azonda.” Itshi yaakuatesele ha gubinga woma wene? Azudile tangua dia gutangigiza luholo Yehowa waakuatesele gale mu monyo wawo. Ashile mutshima egi Yehowa mbawaakuatesa, abembele midimo yawo yabonga. Asumbishile inzo yawo nu ayile fundo diakhalele nu funu ya alongeshi avula a Ufumu. Luholo lutshi adivuile mukunda nu desizio azudile? Phangi Nestor udi muzuela egi: “Tuamonele diago gutagenesewa gua ndaga jidi mu Matayo 6:33. Tuana khala nu ima yagasue tudi nayo funu. Henyaha tudi nu gusuanguluga guavula.”

10. Mukunda natshi athu ana guvuila athu ako woma?

¹⁰ Sendese tangua Adama nu Eva alumbugidile Yehowa, athu ana gusagesa athu n’ako. (Mulo. 8:9) Ha gufezegesa, athu ana kalegela ufumu wawo muabola ha gusagesa athu n’ako, mbundudi jiana kalagala ndaga jia khuta, gu khalasa ana ako ana gusagesa mafuta awo a khalasa, athu ako nji ana gukalegela enya fami jiawo ndaga nu khuta yagasue. Hene athu ana guvuila athu ako woma! Luholo lutshi Satana wana gukalegela woma wene ha gutulebesa muila?

11-12. Luholo lutshi Satana wana kalegela woma wa athu ha gutulebesa muila?

¹¹ Satana wana tshita yagasue hagula tuvue athu woma hagula tubembe mudimo wa gulongesa. Mu utuameji wa Satana, baguvernema ana tunyisa mudimo wetu nu ana gutusagesa.  (Luka 21:12; Gumo. 2:10) Ha mavu awa a Satana, athu avula ana guzuela ndaga jiavula jia mambo mukunda nu Matemue a Yehowa. Athu ana tegelela mambo ene ajiya gutulela nga gutusagesa. (Mat. 10:36) Ndaga jiana kalagala Satana jiajiya gututuma ha gudihula ba? Ndo sha. Handaga wakalegele nji ndaga jia luholo lumoshi mu siekle ya thomo.—Makal. 5:27, 28, 40.

¹² Satana ganago gukalegela phamba mafumu a leta ha gutuvuisa woma, wana kalegela nji ndaga jiko. Athu ako ana guvua woma mukunda nu ndaga enya fami yawo ajiya guzuela gula abua Matemue a Yehowa; matangua ako ana guavuila woma gubalega usageshi wagasue ajiya gutagana nawo. Ana guzumba fami jiawo muavula, ana tshigina egi ene nji ajiye Yehowa nu amuzumbe. Hene ana guvua lamba diavula gula fami jiawo adi muzuela ndaga jiabola mukunda nu Nzambi wa giamatshidia nu akombeledi enji. Uvi athu ako anyi akhalele musagesa enya fami jiawo, abuile gale Matemue a Yehowa. Tangiza egi enya fami yetu atutuna handaga tuabua Matemue a Yehowa, itshi tuajiya gukalagala?

13. Ha gutadila Ngimbo 27:10, luholo lutshi gusha mutshima egi Yehowa wana gutuzumba guajiya gutukuatesa gula enya fami yetu atutuna?

¹³ Tuajiya guheta gikhesa mu mbimbi jiabonga jidi mu Ngimbo 27:10. (Tanga.) Gula tuatangigiza luholo Yehowa wana gutuzumba, yana gutukuatesa ha gudivua mu ubambi ngatshima tudi mutagana nu usageshi. Tudi diago musha mutshima egi muene mbawutushimbiga luholo tuana kolesela. Phamba Yehowa mbawutuhana ima yagasue tudi nayo funu ha gujinga muabonga. Mbawutukuatesa ha gukhala mu guhuima nu gusuanguluga, mbawutukuatesa nji ha gukhala nu ufuta wabonga n’enji! Phangi Biniam tuazuelela gu thunda wataganele nji nu ndaga ya luholo elu.

14. Longo ditshi tuajiya guzula mu gifezegeselo gia phangi Biniam?

¹⁴ Phangi Biniam wabuile Temue wa Yehowa ikhale wakhalele mujiya egi wajiya gutagana nu usageshi wakola. Wakhalele mujiya egi Yehowa wana gumuzumba muavula, hene watunyile guvua woma wa athu. Udi muzuela egi: “Ngataganele nu usageshi wakola diago unu ngakhalelego mutangiza. Usageshi wa enya fami yetu wanguhuile woma wavula gubalega usageshi wa mafumu a leta. Ngakhalele muvua woma egi desizio diami dia gubua Temue wa Yehowa mbadisagesa tata handaga muene gakhalelego Temue wa Yehowa, enya fami yetu nji mbaatangiza egi ngazudi desizio diabola.” Uvi phangi Biniam washile mutshima egi Yehowa  wana kuatesa athu anyi ana gumuzumba. Udi muzuela luko egi: “Ngatangijile luholo Yehowa wakuatesele gale athu ako ha gukolesela tangua ataganele nu lamba dia falanga, tangua athu akhalele guatangijila ndaga jiabola nu tangua ataganele nu ndaga jia khuta. Ngakhalele mujiya egi gula ngasala yagujinginyina gudi Yehowa, muene mbawungushimbiga. Ngakuatewe mahugo avula, angubetele nji muavula, uvi ngakotelesele egi tangua tuana sala agujinginyina gudi Yehowa muene wana gutukuatesa.” Yehowa wakhalele diago Tata mukunda nu phangi Biniam, akombeledi enji nji amonesele egi adi enya fami yenji.

15. Mukunda natshi ishigo ndaga yabola gula tuavua woma wa gufua?

¹⁵ Biblia yana zuela egi gufua gudi mbalagaji. (1 Kol. 15:25, 26) Gula esue nga enya fami yetu anyi tuana zumba tudi mukata muavula, tuajiya guvua gikenene nga gutangiza egi tuajiya gufua. Mukunda natshi tuana guvua woma wa gufua? Handaga Yehowa watufugile nu matangi a gujinga ivo nu ivo. (Mulo. 3:11) Uvi matangua ako, woma wa gufua wajiya gutukuatesa ha gubamba monyo wetu. Ha gufezegesa, wajiya gutukuatesa ha guzula badesizio abonga mu ndaga yatadila ima tudi naye gudia, gukalagala saga jia gukolesa muila, nu gukamba ukuateshi wa minganga nu ihemba gula tudi mukata, nu gutuna gumba monyo wetu mu gingonza.

16. Satana wana kalegela woma wa gufua ha gututuma ha gutshita itshi?

¹⁶ Satana wana jiya egi tuana zula monyo wetu nu ndando. Wazuelele egi mbatubemba ima yetu yagasue nu wene ufuta wetu nu Yehowa ha gubamba monyo wetu. (Yobo 2:4, 5) Satana udi diago muenya mambo! Muene “wana bata gufua,” hene wana kalegela woma wa gufua hagula tuajiya gubemba gukombelela Yehowa. (Heb. 2:14, 15) Matangua ako, athu ana tuamezewa gudi Satana ana kamba gushiya akombeledi a Yehowa agujinginyina. Gula tudi mutshigina gusagewa, Satana wajiya nji gukalegela ndaga yene hagula tutune gutumagela mikhuala ya Nzambi. Minganga nu enya fami yetu anyi ashigo Matemue a Yehowa, ajiya gututuma egi atuvutule mahatshi. Uvi gutshita ngenyi guana shiya mukhuala wa Nzambi. Nga ndo muthu mumoshi wajiya gututuma ha gutshigina egi atusage mu luholo ludi mushiya mikhuala ya Biblia.

17. Mu gudivua nu Roma 8:37-39, mukunda natshi tushigo naye guvua woma wa gufua?

¹⁷ Tuanago gutshigina gufua, tuana jiya egi Yehowa mbawulandula gutuzumba ngatshima tuafua getu. (Tanga Roma 8:37-39.) Gula mafuta a Yehowa afua, muene wana guabamba mu matangi enji, handaga gudi muene idi gifua adi nu monyo. (Luka 20:37, 38) Mbawudiguafuzumuna. (Yobo 14:15) Yehowa “wahanele Mun’enji mumoshi ha mumoshi hagula . . . [tuajiya guheta] monyo wa ivo nu ivo.” (Yone 3:16) Tudi mujiya muabonga egi Yehowa wana gutuzumba nu wana gutukuatesa. Gula tudi mukata nga tuatagana nu ndaga jiajiya gutubata gu gufua, ha fundo dia gubemba gukombelela Yehowa, tuana gumutoga gikhesa nu ndunge nu ngolo. Phangi Valérie nu mulumi’enji akalegele diago ngenyi.—Ngi. 41:3.

18. Malongo atshi tuajiya guzula mu lumene lua phangi Valérie?

¹⁸ Tangua phangi Valérie wakhalele nu ivo 35, wakatele misongo yakola ya cancer. Luholo lutshi guzumba guamukuatesele ha gubinga woma wa gufua? Udi muzuela egi: “Tangua atuwambelele egi ngudi nu cancer, ndaga yene yatusagesele diago. Yakhalele mutoga egi hagula ngukhale nu monyo, adi naye gunguphanda. Ngatele maga nu ba docteur avula, uvi mukut’awo agasue akhalele muzuela egi ashigo naye gunguphanda gula ngatuna gumbiwa  mahatshi. Ngavuile woma wavula, uvi luholo ngana nemesa mukhuala wa Nzambi mu ndaga yatadila mahatshi, ngatunyile gumbiwa mahatshi! Mu monyo wami wagasue Yehowa wangumonesele gale guzumba mu maluholo avula. Hene mu tangua diene ame nji ngamonesele egi ngana gumuzumba. Tangua diagasue ana gunguwambela ndaga jiabola, ngana tshita yagasue ha gusuanguluisa Yehowa hagula Satana gabingigo. Anguphandele muabonga diago, angumbilego mahatshi. Ngatshima ame gami mukata, uvi Yehowa wana landula gutukuatesa. Ha gufezegesa, gutuama egi nguye ngumone minganga, mu gudibungisa guetu gua mu hungu gua mu lubingo, tualongugile longo dimoshi diakhalele muzuela egi ‘ Affrontons les difficultés de la vie avec courage. ’ * Longo diene diatuhanele gikhesa giavula. Tuana guditanga muavula. Gutanga malongo ako a luholo elu nu gukalagala ndaga jia mu nyuma, yatuhanele guhuima nu yatukuatesele ha gusala agujinginyina nu ha guzula badesizio abonga.”

19. Itshi mbayikalegewa gualeha ndo?

¹⁹ Yehowa wana kuatesa akombeledi enji a ha mavu agasue ha gubinga ndaga jiavula jia lamba nu usageshi wa Diabulu. (1 Phet. 5:8, 9) Aye nji wajiya gubinga. Gualeha ndo, Yehowa mbawutuma Yesu nu athu 144 000 ambiwe maji mu nyuma ha “gushiya midimo ya Diabulu.” (1 Yone 3:8) Gungima dia ndaga eji, akombeledi a Nzambi adi ha mavu ‘mbaashigo muvua luko woma nga wa gima gimoshi, mbagukhadigo nga nu gima mbagiavuisa woma.’ (Yesh. 54:14; Mika 4:4) Hatudi munengena ndaga jiene, tudi naye gutshita ngolo ha gubinga woma.

20. Itshi mbayitukuatesa ha gubinga woma?

²⁰ Tudi naye gusha mutshima egi Yehowa wana zumba nu wana bamba akombeledi enji. Hene gula tudi muzula tangua dia gutangigiza nu guwambela athu ako luholo Yehowa wakuatesele akombeledi enji a mu tangua dikulu mbayitukuatesa ha gutuna guvua woma. Tudi naye nji gutangigiza luholo Yehowa watukuatesele ha gubinga ndaga jia gikenene tuataganele najio. Yadiago, Yehowa mbawutukuatesa ha gubinga woma!—Ngi. 34:4.