ATHU avula ana jiya egi Yesu washiyiwe holu dia mutshi nu wahagewe hakatshi dia nzangi mbadi. (Mat. 27:35-38) Uvi athu ako anago gutshigina egi, Biblia yana zuela giamatshidia tangua yana zuela egi kimbi gia Yesu yalondewe muabonga nu yafundiwe mu malumba.—Mako 15:42-46.

Athu ako anyi ana tuna ndaga jidi mu ba Evanjile anago gutshigina egi athu akhalele mushiyiwa holu dia mutshi akhalele mufundiwa mu malumba gifua athu agasue. Ana zuela egi athu a luholo elu akhalele guakalegela ndaga mu luholo lua gudisha. Journaliste mumoshi mu jina dia Ariel Sabar, wasonegele mu zulunalu Smithsonian ha gukotelesa mukunda natshi athu ana khala nu matangi a luholo elu. Wasonegele egi: “Akhalele mukhokha athu abola holu dia mutshi wa gudikikisa (croix) ha guahana ndola. Enya ndunge ako ana zuela egi, idi ndaga ya musonyi ha gutangiza egi enya Roma akhalele mufunda athu a luholo elu mu malumba.” Enya Roma akhalele mushiya athu abola luholo elu ha guahana musonyi, hene akhalele mubemba kimbi jia athu ene holu dia mutshi hagula shitu jidie mila yawo. Gungima akhalele muzula itshinyi ya muila yakhalele musala ayifundji fundo dimoshi nu athu anyi ashiyiwe luholo lumoshi.

Uvi ba Archéologue amonesele ndaga iko ya gudisha mukunda nu ifuwa yasalele ya enya Yuda ako anyi ashiyiwe. Mu givo 1968, amonele ifuwa ya muthu mumoshi washiyiwe mu siekle ya thomo. Ayimonele mu malumba a fami imoshi ya enya Yuda hehi nu Yelusalema. Ifuwa yaselele yakhalele mu malumba nga mu mushete wa ifuwa. Mukatshi dia ifuwa yene guakhalele nu gifuwa gia gidiatelo (sasangu). Akhokhele gifuwa giene nu musumadi gu gitshinyi gia baya. Musumadi wene wakhalele nu ulehelo wa ba santimetre 11,5. Journaliste Sabar udi muzuela egi: “Gidiatelo giene giakhalele gia yala mumoshi, jina dienji Yehochanan. Giakuatesele ha gukotelesa muabonga mukunda natshi lumene lua gufundjiwa gua Yesu mu malumba ludi mu ba Evanjile ludi lua giamatshidia.” Hene, “gidiatelo gia Yehochanan gidi gifezegeselo gia muthu mumoshi wa mu tangua dia Yesu wakhokhewe holu dia mutshi wa gudikikisa (croix) munu enya Roma ahanele njila ha gumufunda gifua akhalele mufunda enya Yuda.”

Mangino ha gutadila gidiatelo gia Yehochanan, athu ana khala nu matangi a gudisha mu ndaga yatadila luholo Yesu wakhokhewe holu dia mutshi. Idi yadiago egi, mbundudi jiko jinyi ashiyile ajifundjile uvi abishidilego. Ndaga Biblia yazuelele mukunda nu gufundjiwa gua Yesu idi ya giamatshidia. Ndaga eji jiamonesele ba Archéologue jidi gudivua nu ndaga jiana zuela Biblia.

Ndaga ya ndando idi egi, Yehowa wadiangele guzuela egi Yesu mbawufundjiwa mu malumba a muenya umonyi. Gushigo nga muthu wajiya gukanga Yehowa njila ha gutagenesa ndaga jiana zuela muene.—Yesh. 53:9; 55:11.