TANGUA enya Hebelu akhalele mu Mavu a Gutendelela, givo giakhalele musendesa tangua akhalele mukuna mbuto. Mangino sungi yene idi mbeji ya Septembre nu ya Octobre.

Givo ginyi giakhale nu mbeji 12, mbeji jia givo giene jiakhalele nu masugu 29 nga 30. Athu a mu tangua dikulu akhalele mutanga masugu a mbeji gula ngonda ya zoga gosa uu nu tangua mbayitota. Givo ginyi akhalele mutanga ha gutadila ngonda, giakhalele giahihia gubalega givo ginyi akhalele mutanga ha gutadila kumbi. Akhelele mutshita yagasue hagula ba metode ene mbadi a gutanga masugu adivue. Ha gutshita ngenyi, akhalele mulezela masugu nga mbeji gutuama egi givo giko gisendese. Ngenyi yakhalele guakuatesa hagula kalandriye gadivue nu sungi akhalele mukuna mbuto nga sungi ya gukatula mbuto.

Uvi mu tangua dia Moize, Nzambi wawambelele enya Isalele egi givo giawo gidi naye gusendesa mu mbeji ya Abibe nga Nisana. (Guz. 12:2; 13:4) Mangino mbeji yene yajiya gukhala Mars nga Avril. Mu mbeji ya Nisana, enya Isalele akhalele mutshita wano wa gukatula mbuto jia orje.—Guz. 23:15, 16.

Muenya ndunge mumoshi mu jina dia Emil Schürer, wazuelele egi: “Yakhalele yaleba ha gujiya tangua dia gulezela mbeji mu kalandriye.” Udi muzuela luko egi: “Akhalele mutshita wano wa Pake tangua ngonda yakhelele ya mudidi mu mbeji ya Nisana (14 Nisana). Matangua avula, lusugu luene luakhalele mubua gungima dia lusugu phipha yana khala guleha gumoshi nu muanya (équinoxe) . . . Gu gisugishilo gia givo, gula akotelesa egi Pake mbayibua gutuama dia lusugu phipha yana khala guleha gumoshi nu muanya, akhalele mulezela mbeji imoshi gutuama dia mbeji ya Nisana.”

Matemue a Yehowa ana kalegela metode ene ha gujiya lusugu adi naye gukalagala Guwunguluga Gufua gua Yesu. Lusugu luene luana gubua mu mbeji ya Mars nga Avril, yana gudivua nu lusugu lua 14 Nisana ya kalandriye ga enya Hebelu. Ana diangela guwambela mahungu a ha mavu a mudidi lusugu luene. *

Luholo lutshi enya Hebelu akhalele mujiya tangua mbeji yakhalele muhua nu tangua mbeji ihe-ihe yakhalele musendesa? Mangino, yana khala yaleba gudi esue handaga tuana tala gu kalandriye nga mu telefone jietu. Uvi, mu tangua dikulu yakhalelego ndaga yaleba.

Mu tangua dia Nowa, mbeji yakhalele nu masugu 30. (Gis. 7:11, 24; 8:3, 4) Gungima, mu kalandriye ga enya Hebelu mbeji yakhalelego phamba nu masugu 30. Mu kalandriye gene, mbeji yakhalele musendesa tangua ngonda yakhalele muzoga gosa. Yakhalele muzula masugu 29 nga 30 gutuama egi mbeji iko isendese.

Lusugu lumoshi Davidi nu Yonatana azuelele mukunda nu mbeji egi: ‘Hamene idi mbeji ihe-ihe.’ (1 Sam. 20:5, 18) Hene idi mumonega egi mu tangua diawo, akhalele mutanga mbeji gutuama. Luholo lutshi enya Isalele akhalele mujiya tangua mbeji ihe-ihe yakhalele musendesa? Mukanda umoshi (Mishna) wana zuelela mikhuala nu kutime jia enya Yuda, wene udi gutukuatesa ha gujiya ndaga jiko. Udi mumonesa egi tangua enya Yuda azogele mu uhiga gu Babilone, tribinale ya Sanedrene yakhalele nji guakuatesa ha gujiya gisendeselo gia mbeji. Mu mbeji sambadi jinyi akhalele mutshita mawano, manzuji akhalele gudibungisa mu lusugu lua 30 mu mbeji jiene. Akhalele nu ginemo gia gukotelesa tangua mbeji ihe-ihe mbayisendesa. Itshi yakhalele guakuatesa?

Akhalele mutuma athu mu milundu ya Yelusalema ha gutala gosa mu phipha gula ngonda ihe-ihe yazogi gale. Gula ayimona, akhalele muwambela enya Sanedrene mu phushi. Gula enya Sanedrene amona egi adi nu ijiyishilo idi mumonesa egi ngonda ihe-ihe yazogi gale, akhalele muwambela athu egi mbeji ihe-ihe yasendesa. Uvi itshi akhalele mutshita gula matuta adi gosa nu athu atumiwe mu milundu ya Yelusalema ashigo mumona gosa muabonga ha gujiya gula ngonda ihe-ihe yazogi gale?  Ngenyi akhalele muzuela egi mbeji adi, idi nu masugu 30 nu mbeji ihe-ihe idi naye gusendesa.

Ha gumonesa egi mbeji ihe-ihe yasendesa, enya Sanedrene akhalele mutuma athu ha guhaga tshuya holu dia Mulundu wa Mitshi ya Olive hehi nu Yelusalema. Akhalele nji muhaga tshuya mu milundu iko ya gu Isalele ha gumuanga lukuma luene. Gungima akhalele mutuma athu ha guya nu guwambela athu ndaga yene. Hene, enya Yuda akhalele gu Yelusalema nu mu mafundo ako, akhalele mujiya tangua mbeji ihe-ihe yakhalele musendesa. Ngenyi mukut’awo agasue akhalele mutshita mawano akhalele mutshitshiwa mu sungi jia gudisha mu tangua dimoshi.

Ha gukotelesa muabonga mbeji, mawono nu sungi jiagudisha jia mu tangua dia enya Hebelu, wajiya gutala tablo didi mumonesa kalandriye ga enya Hebelu.