1-2. Luholo lutshi malongo ako a Biblia ajiya gubua nu ndando yavula gula ndaga jiasombegesa mu monyo wetu? Kotelesa.

 MU LUSUGU lua ulo, yala nu mukhetu adi gudizula ana tegelela muabonga diskur diana kalegewa mukunda nu ulo. Malongo anahanewa mu diskur diene, anakhalago ahe-ahe mukunda nu ene. Uvi mulusugu luene, malongo ene ana khala diago nu ndando yavula mukunda nu ene. Mukunda natshi? Handaga adi naye guakalegela mu ulo wawo.

² Idi nji luholo lumoshi gula athu adizudi mu ulo avuala mona. Yajiya gukhala egi sendese mualeha, ana guvua gale ba diskur ana zuelela luholo lua gusansa ana. Uvi henyaha malongo ene, adi nu ndando yavula mukunda nu ene. Handaga adi naye gusansa mona avuadi. Idi diago ginemo giakoma! Gila ndaga jiasombegesa mu monyo wetu, malongo ako a Biblia ana gubua diago nu ndando yavula. Gishina giene akombeledi a Yehowa ana gutanga Biblia, gifua luholo mafumu a gu Isalele akhalele mutanga nu gutangigiza ndaga jiene, “masugu agasue ” a monyo wawo.—Mikh. 17:19.

3. Itshi tuza muzuelela mu longo edi?

³ Mvuaji, mudi nu inemo yakoma diago, mudi naye gulongesa an’enu ndaga jiatadila Yehowa. Uvi mudi naye nji guakuatesa ha guzumba Nzambi muavula. Itshi mudi naye gutshita hagula an’enu azumbe Yehowa? Mu longo edi, tuza muzuelela malongo nguana a Biblia ajiya gumikuatesa ha gusansa an’enu. (2 Tim. 3:16) Tuza nji mumona ifezegeselo ya mvuaji jiahetele gale gubonga handaga alanduile malongo a Biblia.

4. Longo ditshi didi mu mukanda wa Yakoba 1:5, diajiya gukuatesa mvuaji ha gukuatesa an’awo ha guzumba Yehowa?

⁴ Longo dia thomo: Kamba ukuateshi wa Yehowa. Toga Yehowa aguhane ndunge udi najio funu ha gukuatesa an’aye ha gumuzumba. (Tanga Yakoba 1:5.) Muene udi watagana ha guhana malongo abonga. Mukunda natshi? Tutadilenu ndaga mbadi. Ndaga ya thomo: Yehowa udi nu eksperianse yavula gubalega mvuaji jiagasue. (Ngi. 36:9) Ndaga ya mbadi: Malongo ana hana muene ana batela athu gubonga.—Yesh. 48:17.

5. (a) Luholo lutshi ulondegi wa Yehowa wana gukuatesa mvuaji? (b) Luholo video idi guyimonesa, longo tshi wazula mu gifezegeso gia phangi Amorim nu mukaji’enji luholo asansele an’awo?

⁵ Yehowa wana hana malongo avula mu njila ya Biblia nu ulondengi wenji. Malongo ene ajiya gukuatesa mvuaji ha gulongesa an’awo ha guzumba Yehowa. (Mat. 24:45) Ha gufezegesa, wajiya guheta malongo mu gitshinyi giana zuela egi “ De l’aide pour les familles. ” Ivo yabalega gitshinyi giene giakhalele muzoga mu Réveillez-vous !, henyaha giana zoga mu jw.org. Gudi nji nu video jiavula mu jw.org, jiajiya gukuatesa mvuaji ha gukalegela malongo ana hana Yehowa ha gusansa an’awo. *—Ish. 2:4-6.

6. Itshi phangi Joe udi muzuela mukunda nu malongo ana hana Yehowa mu njila ya ulondegi wenji?

⁶ Mvuaji jiavula jiana zuela egi ana suanguluga nu malongo Yehowa wana guahana mu njila ya ulondegi wenji. Tata mumoshi jina dienji Joe udi muzuela egi: “Gusansa ana thathu mu giamatshidia ishigo ndaga yaleba. Ame nu mukaji’ami tuana samba Yehowa hagula atukuatese. Tuana mona diago egi, malongo ako nu video jiana zoga diago mu tangua tuana khala najio funu nu jiana gutukuatesa ha gubinga malamba tuana tagana nawo. Tuana sha mutshima mu malongo ana gutuhana Yehowa tangua diagasue.” Phangi Joe nu mukaji’enji amonele diago egi malongo ene ana kuatesa an’awo ha gukuata ufuta nu Yehowa.

7. Ha gutadila Roma 2:21, mukunda natshi mvuaji jidi naye guhana gifezegeselo giabonga?

⁷ Longo dia mbadi: Khala muhana gifezegeselo giabonga. Ana, ana tala muabonga ndaga  jiana kalagala mvuaji jiawo nu ana gualandula. Idi yadiago egi gushigo nu mvuaji udi watagana. (Roma 3:23) Ikhale ngenyi, mvuaji jidi naye gutshita ngolo ha guhana gifezegeselo giabonga. (Tanga Roma 2:21.) Mvuaji mumoshi udi muzuela egi: “Ana adi gifua eponje, yajiya gunana nga meya amvindu nga meya abonga.” Udi muzuela luko egi: “Mbaadi gutuleza, gula ndaga tudi gualongesa jishigo gudivua nu ndaga tudi mukalagala.” Gula tudi mutshigina egi an’etu azumbe Yehowa, esue hakhetu tudi naye gumonesa egi tuana gumuzumba muavula.

8-9. Longo disthi wazula mu ndaga jidi muzuela phangi Andre nu phangi Emma?

⁸ Mvuaji jiajiya gulongesa an’awo ha guzumba Yehowa mu maluholo avula. Phangi Andre udi nu ivo 17 udi muzuela egi: “Mvuaji jiami jiakhalele gunguwambela egi idi nu ndando ha gutshita gisambu. Masugu agasue gutuama dia gubanda, ngakhalele mutshita gisambu, ikhale ngenyi tata wakhalele muza tutshitshi luko n’enji gisambu. Mvuaji jietu jiakhalele gutuwambela egi: ‘Muajiya gusamba Yehowa tangua diagasue muatshigina.’ Khadilo diene dia gusamba diangukuatesele muavula. Mangino yana khalago lamba gudi eme ha gusamba Yehowa, ngana jiya egi udi Tata wa guzumba.” Mvuaji, jiyenu egi gula mudi muzumba Yehowa muavula, an’enu nji mbaadi gumuzumba muavula.

⁹ Tutadilenu gifezegeselo gia phangi Emma. Tangua sh’enji waabembele nu mama wawo, wabembele gin’awo nu mikudi yavula. Emma udi muzuele egi: “Mama wakhalele mutagana nu lamba dia makuta, uvi wakhalele mumonesa luholo Yehowa wana kuatesa akombeledi enji. Ngakhalele mumona egi wakhalele diago mushila Yehowa mutshima. Mama wakhalele mutshita ndaga jiakhalele gungulongesa muene.” Longo ditshi mvuaji jiajiya guzula? Mvuaji jiajiya guhana anawo gifezegeselo giabonga mu ndaga adi mukalagala ngatshima adi mutagana nu malamba.—Gal. 6:9.

10. Ha gutadila Mikhuala 6:6, 7, ba okazio atshi mvuaji jia gu Isalele akhalele muheta haguta maga nu an’awo?

¹⁰ Longo dia thathu: Khala muta maga nu an’aye muavula. Yehowa wawambelele enya Isalele ha gulongesa an’awo ndaga jiamutadila muene tangua diagasue. (Tanga Mikhuala 6:6, 7.) Lusugu nu lusugu, mvuaji jia gu Isalele jiakhalele nu ba okazio avula a guta maga nu an’awo nu ha gualongesa ha guzumba Yehowa. Ha gufezegesa, mona wa yala wakhalele mukuatesa sh’enji ha gukuna nga ha gukatula mbuto. Mona wa mukhetu wakhalele mukuatesa gin’enji ha gulondega nga ha gutunga milele nga mu tumidimo tuko tua monzo. Luholo mvuaji nu ana akhalele mukalagala hamoshi, akhalele muheta tangua dia guzuelela ndaga jiavula jia ndando. Ha gufezegesa, akhalele muzuelela musthima wabonga wa Yehowa nu luholo luaakuatesele gale muene mu fami yawo.

11. Mu okazio utshi, mvuaji jiajiya guta maga nu an’awo?

¹¹ Mangino, ndaga jishigo gifua mu tangua dia enya Isalele. Mu ifutshi yavula mvuaji nu ana, anago guheta tangua diagukhala hamoshi mu lusugu. Yajiya gukhala egi, mvuaji jiana guya gu midimo, uvi ana ana guya gu khalasa. Hene, mvuaji jiana tshita yagasue ha guheta tangua dia guta maga nu an’awo. (Ef. 5:15, 16; Fili. 1:10) Ajiya guheta tangua diene, tangua adi mukalagala gukombelela gua mu fami. Phangi Alexander udi muzuele egi: “Tata wakhalele mulondega gukombelela gua mu fami gutuama. Wakhalele nji mutshita yagasue hagula nga gima gimoshi gitukangigo njila ha gutshita gukombelela guene gua mu fami. Gungima dia gutshita gukombelela gua mu fami, tuakhalele muta maga.”

12. Itshi fumu wa fami gashigo naye gutshita tangua adi mukalagala gukombelela gua mu fami?

 ¹² Gula udi fumu wa fami, itshi wajiya gutshita hagula an’aye asuanguluge nu gukombelela gua mu fami? Wajiya gulonguga nu an’aye mukanda uhe-uhe, Heta Monyo wa Ivo nu Ivo! Mukanda wene, wajiya gumikuatesa ha guta maga muabonga nu an’enu. Muana tshigina gujiya ndaga jiana tangiza an’enu nu ndaga jiana guasagesa. Uvi mushigo naye gukalegela tangua dia gukombelela gua mu fami ha guzuelela ndaga yene nga guabalela. Khalenu mutshita ngolo ha gutuna guvua khabu, gula an’enu azuela ndaga jishigo gudivua nu Biblia. Mudi naye gusuanguluga gula ashigo muvua woma ha gumiwambela ndaga jiagasue adi mutangiza nu khalenu guakolesa ha gutshita ngenyi. Muajiya gukuatesa an’enu muabonga phamba gula mudi mujiya diago ndaga jidi mu mitshima yawo.

13. Mu ba okazio tshi ako, mvuaji jiajiya gukuatesa an’awo ha gukolesa ufuta wawo nu Yehowa?

¹³ Mvuaji, khalenu mukamba ba okazio mu lusugu, ha gukuatesa an’enu ha gukolesa ufuta wawo nu Yehowa. Mushigo naye gunengena phamba tangua mudi gualongesa Biblia ha guakuatesa ha guzumba Nzambi. Phangi Lisa udi muzuela egi: “Tuakhalele mukalegela ima yafugiwe ha gulongesa an’etu ndaga jiatadila Yehowa. Ha gufezegesa, gula imbua yetu yatshita ndaga imoshi yalelesa an’etu, tuakhalele guawambela egi ndaga eyi idi mumonesa egi Yehowa udi Nzambi wa gusuanguluga nu watshitshile ima ya luholo elu hagula esue nji tukhale nu gusuanguluga.”

14. Ha gutadila Ishima 13:20, mukunda natshi mvuaji jidi naye gukuatesa an’awo ha gukuata mafuta abonga?

¹⁴ Longo dia nguana: Kuatesenu an’enu ha gukuata mafuta abonga. Mbimbi ya Nzambi yana monesa diago egi, mafuta etu ajiya gututuma ha gutshita ndaga jiabonga nga jiabola. (Tanga Ishima 13:20.) Mvuaji, mudi mujiya mafuta a an’enu ba? Muaamonele gale nu muatele gale nawo maga? Itshi muajiya gutshita ha gukuatesa an’enu ha gukuata ufuta nu athu ana zumba Yehowa? (1 Kol. 15:33) Gula mudi mutamega aphangi adi nu ufuta wabonga nu Yehowa ha gutshita ndaga imoshi ngenyi nu an’enu, mbamuakuatesa ha gutomba mafuta abonga.—Ngi. 119:63.

15. Itshi mvuaji jidi naye gutshita ha gukuatesa an’awo ha gukuata mafuta abonga?

 ¹⁵ Tutadilenu eksperianse ya phangi Tony. Udi mumonesa ndaga muene nu mukaji’enji akalegele ha gukuatesa an’awo ha gukuata mafuta abonga. Udi muzuela egi: “Ivo yavula, ame nu mukaji’ami tuakhalele mutamega aphangi a mala nu akhethu a gudisha, mavuala nu mambuta ha guza gumbodietu. Tuakhalele mudia nawo nu tuakhalele mutshita gukombelela gua mu fami hamoshi. Yene ndaga yatukuatesele ha gujiya aphangi ana zumba Yehowa nu ana gumukombelela nu gusuanguluga. Tuakhalele muyamba atadi awendji nu ba misionere nu aphangi ako gumbodietu. Eksperianse yawo nu gikhesa giawo nu luholo akhalele gudihana mu mudimo wa Yehowa, yakuatesele an’etu ha gukolesa ufuta wawo nu Yehowa.” Mvuaji, khalenu mutshita yagasue ha gukuatesa an’enu ha gukuata mafuta abonga.

16. Itshi wajiya gutshita gula mun’aye mumoshi gashigo mutshigina gukombelela Yehowa?

¹⁶ Itshi wajiya gutshita gula mun’aye mumoshi gashigo mutshigina gukombelela Yehowa, ngatshima wana tshita ngolo ha gualongesa ndaga jiamutadila? Uzuedigo egi ushigo mvuaji wabonga. Yehowa wahanele athu agasue ikhale mun’aye, luendu luagutomba ene hakhawo gula adi mutshigina gumukombelela nga ndo. Gula mun’aye wambemba gukombelela Yehowa, ulebigo muila, khala nu felela egi lusugu mbawudimuvutuga. Wunguluga gifezegeselo gia mona watotele. (Luka 15:11-19, 22-24) Muvuala muene wakalegele ndaga jiavula jiabola, uvi gungima wasombegesele. Athu ako ajiya guzuela egi: “Idi phamba lumene. Ndaga yene yajiya gukalegewa diago mu monyo wetu ba?” Ayi, yajiya gukalegewa! Ndaga yene yabuidile nji muvuala mumoshi, jina dienji Elie.

17. Longo ditshi wazula mu eksperianse ya Elie?

¹⁷ Elie udi muzuela egi: “Mvuaji jiami jiatshitshile yagasue ha gungukuatesa ha guzumba Yehowa nu mbimbi yenji Biblia. Uvi tangua ngatagenesele ivo 15, ngasendesele gulumbugila mvuaji.” Elie wasendesele gukalagala ndaga jiabola. Gakhalelego luko mulandula malongo a mvuaji jienji, ngatshima akhalele mutshita ngolo ha gumukuatesa ha gukolesa  ufuta wenji nu Yehowa. Gungima, walengele inzo, wabuile nu makalegelo abola diago. Uvi matangua ako, wakhalele muta maga a Biblia nu futa dienji mumoshi. Elie udi muzuela egi: “Luholo ngakhalele muta maga avula a Yehowa nu futa diami, yatshitshile egi ngusendese gutangigiza ndaga jiatadila Yehowa. Mage-mage, giamatshidia gia Biblia giangulongesele mvuaji jiami sendese mualeha, giasendesele gukula mu mutshima wami gifua luholo mbuto jiana kula.” Elie wasombegesele nu wasendesele luko gukombelela Yehowa. * Tangiza gusuanguluga guakhalele nago mvuaji jienji, luholo atshitshile ngolo ha gumulongesa ha guzumba Yehowa tangua diakhalele muene mona wa zonda!—2 Tim. 3:14, 15.

18. Itshi wajiya guzuela mukunda nu mvuaji jidi mutshita ngolo ha gulongesa an’awo ha guzumba Yehowa?

¹⁸ Mvuaji, Yehowa wamihanele ginemo giakoma. Mudi nu luendu lua gusansa an’enu anyi mbaakhala akombeledi a Yehowa mu masugu adi muza. (Ngi. 78:4-6) Uvi, ishigo yaleba ha gutagenesa ginemo giene. Hene tudi gumishimana luholo muana tshita ngolo ha gukuatesa an’enu! Gula mualandula gutshita ngolo ha gukuatesa an’enu ha guzumba Yehowa, nu mudi gualongesa ha gumutumagela, jiyenu egi Yehowa Tata wetu wa guzumba udi mu dilu mbawusuanguluga muavula.—Ef. 6:4.