1-2. Mukunda natshi tudi naye gusuanguluga nu mukanda wa Gumonesa?

 AGUHANELE gale foto jia muthu mumoshi ha gutala ba? Yajiya gukhala egi tangua udi mutala foto jiene, wamona egi ushigo mujiya phala jia athu ako. Gungima, wamona foto imoshi wasendesa guyitala muabonga. Mukunda natshi? Handaga aye nji udi gu foto yene. Tangua udi guyitala, wawunguluga tangua muakuatele foto yene nu fundo muakhalele. Wasendesa gukamba hagujiya athu adi gu photo yene. Foto yene idi diago nu ndando mukunda nu aye.

² Mukanda wa Gumonesa udi nji gifua foto yene. Mukunda natshi? Handaga thomo, mukanda wuwu wa Biblia wasonegewe mukunda nu esue. Verse ya thomo ya Gumonesa mukhapho 1 idi muzuela egi: “Jiji ndaga jiamonesele Yesu Klisto; Nzambi wamuwambelele najio ha gumonesa ahiga enji ndaga jidi hehi ha gutagana.” (Gumo. 1:1) Ndaga jiasonegewe mu mukanda wuwu jishigo mukunda nu athu agasue, uvi jidi mukunda nu esue akombeledi a Nzambi. Luholo tudi akombeledi a Yehowa, tudi mujiya diago egi tudi muhana mago ha gutaganesa profesi jidi mu mukanda wa Gumonesa. Mu guzuela guko, idi gifua esue nji tudi “gu foto tudi mutala.”

3-4. Profesi jidi mu mukanda wa Gumonesa jiasendesele gutagenesewa tangua tshi? Ndaga yene idi gututuma ha gutshita itshi?

³ Ndaga ya mbadi, idi tangua profesi jiene jidi naye gutagenesewa. Mupostolo Yone wamonesele tangua diene hazuelele muene egi: “Mu ngolo jia nyuma ya Nzambi, ngahetele mu lusugu lua Fumu.” (Gumo. 1:10) Tangua Yone wasonegele mbimbi jiene mu givo 96 G.Y., “lusugu lua Fumu” luakhalele khenji lusendesa gale ndo. (Mat. 25:14, 19; Luka 19:12) Uvi ha  gutadila profesi ya Biblia, lusugu luene luasendesele mu givo 1914 tangua Yesu wabuile Fumu mu dilu. Profesi jidi mu mukanda wa Gumonesa jinyi jidi mutadila akombeledi a Nzambi jiasendesele gutagenesewa mu givo 1914. Idi yadiago egi mangino tudi mujinga mu “lusugu lua Fumu”!

⁴ Luholo tudi mujinga mu “lusugu lua Fumu,” tudi naye gutadila muabonga longo didi mu mukanda wa Gumonesa 1:3 udi muzuela egi: “Gusuanguluga gudi nu muthu udi mutanga mu dijui diakola nu athu adi mutegelela mbimbi idi mu profesi eyi nu athu adi mutumagela ndaga jidi jia gusonega muene, handaga tangua diatombewe diasuena hehi.” Yadiago, tudi naye ‘gutanga mu dijui diakola, gutegelela mbimbi idi mu profesi eyi,’ nu ‘gutumagela’ ndaga jiene. Ndaga tshi jiene tudi naye gutumagela?

5. Luholo lutshi mukanda wa Gumonesa udi mumonesa egi, idi nu ndando ha gukamba gujiya gula Yehowa wana suanguluga nu gukombelela guetu?

⁵ Mukhapho wa thomo wa mukanda wa Gumonesa, udi gutukuatesa ha gujiya egi Yesu wana jiya ndaga jiagasue jiana kalegewa mu mahungu a akombeledi a Nzambi. (Gumo. 1:12-16, 20; 2:1) Yesu wamonesele ndaga yene mu mbimbi jiatumine muene gudi mahungu sambadi a mu provense ya Azi. Mbimbi jiene, jiakuatesele Aklisto a mu siekle ya thomo ha gujiya ndaga akhalele naye gukalagala hagula Yehowa asuanguluge nu gukombelela guawo. Ndaga jiazuelele Yesu jidi mutadila akombeledi agasue a Nzambi mangino. Longo ditshi tuajiya guzula? Fumu wetu Yesu Klisto wana jiya diago gula tudi nu ufuta wabonga nu Yehowa nga ndo. Wana gututuameza, wana gutubamba nu wana mona ndaga jiagasue tuana kalagala. Wana jiya ndaga tudi naye gukalagala hagula Yehowa alandule gusuanguluga nu esue. Utuameji utshi wahanele muene tudi naye gutumagela mangino?

6. (a) Ha gutadila mbimbi jia Yesu jidi mu Gumonesa 2:3, 4, ndaga itshi hungu dia Efeso diakalegele? (b) Longo ditshi tuazula mu ndaga yene?

⁶ Tanga Gumonesa 2:3, 4. Tushigo naye gutotesa guzumba tuakhalele nago thomo mukunda nu Yehowa. Mbimbi jiazuelele Yesu mukunda nu hungu dia Efeso jidi mumonesa egi, aphangi ene akolesele mu malamba avula nu alanduile gukombelela Yehowa ngatshima yakhalelego yaleba. Uvi, akhalelego luko nu guzumba gunu akhalele nago thomo mukunda nu Yehowa. Akhalele naye guzumba Yehowa gifua akhalele mutshita thomo hagula Yehowa asuanguluge nu gukombelela guawo. Luholo lumoshi mangino, tushigo naye phamba gukolesela mu malamba uvi tudi naye nji gutshita ndaga jiko. Tudi naye gujiya mukunda natshi tudi mukolesela. Nzambi ganatalago phamba ndaga tuana kalagala, uvi wana kamba nji gujiya mukunda natshi tudi mutshita ndaga yene. Nzambi wana tala muavula ndaga jidi mu matangi etu. Wana tshigina egi gila tudi gumukombelela tuyitshite ha gumonesa guzumba guetu nu gusuanguluga guetu mukunda nu ndaga jiana gutukalegela muene.—Ish. 16:2; Mako 12:29, 30.

7. (a) Ha gutadila Gumonesa 3:1-3, ndaga itshi Yesu wamonele gudi aphangi a mu hungu dia Sarde? (b) Itshi tudi naye gukalagala?

⁷ Tanga Gumonesa 3:1-3. Tudi naye gulandula gumonesa gutema. Aphangi a mu hungu dia Sarde ataganele nu ndaga ya gudisha nu ya enya gu Efeso. Ngatshima thomo aphangi a mu hungu dia Sarde akhalele mukalegela Yehowa muabonga, uvi gungima akhalelego luko mutagenesa midimo ya Nzambi muabonga. Yesu wawambelele ha gumonesa  ‘gutema.’ Ndaga eyi idi gutulongesa itshi? Idi yadiago egi, Yehowa mbagashigo mujimbila midimo tudi gumukalegela. (Heb. 6:10) Uvi, tuajiyilego gutangiza egi mangino tushigo naye luko gukalegela Yehowa handaga tuamukalegele gale ivo yabalega. Yajiya gukhala egi mangino, tushigo luko nu luholo lua gukalegela Yehowa gifua ha thomo. Uvi tudi naye gulandula gutshita muavula mu “mudimo wa Fumu,” nu gulandula gumonesa gutema uu nu gugisugishilo.—1 Kol. 15:58; Mat. 24:13; Mako 13:33.

8. Longo ditshi tuazuala mu mbimbi jiazuelele Yesu mukunda nu aphangi a mu hungu dia Laodise, gifua luholo tudi guyimona mu Gumonesa 3:15-17?

⁸ Tanga Gumonesa 3:15-17. Tudi naye gukhala nu gikhesa nu gukombelela Yehowa nu mutshima wetu wagasue. Mbimbi jiazuelele Yesu mukunda nu aphangi a mu hungu dia Laodise jiamonesele luholo aphangi ene akhalele. Akhalele “lama-lama” mu gukombelela guawo. Luholo aphangi ene akhalelego musha matangi awo mu mudimo wa Nzambi, Yesu wawambelele egi adi ‘mu lamba, adi muhana gikenene.’ Akhalele naye gumonesa gikhesa mu mudimo wa Yehowa. (Gumo. 3:19) Longo ditshi tuazula? Gula tushigo luko nu gikhesa gifua ha thomo, tudi naye gutangigiza ndaga jiagasue jiabonga Yehowa nu ulondegi wenji ana kalagala mukunda nu esue. (Gumo. 3:18) Tushigo naye gukamba gukhala nu umonyi wavula, handaga gutshita ngenyi guajiya gutuwunganesa matangi nu gututuma ha gumona egi gukombelela Yehowa, gushigo luko ndaga yabalega ndando mu monyo wetu.

9. Mbimbi jiazuelele Yesu mukunda nu Aklisto a mu hungu dia Phelegame nu dia Tiyatile, jidi gugutuma ha gutshita itshi?

⁹ Tudi naye gutuna malongo a ba aposta. Yesu wamonesele egi aphangi ako a mu hungu dia Phelegame akhalele mubata ukhaphumunyi. (Gumo. 2:14-16) Wawambelele aphangi a gu Tiyatile anyi alanduilego malongo a “gisuegi giakoma gia Satana,” ha gukuata giamatshidia “mangololo.” (Gumo. 2:24-26) Aklisto anyi alanduile malongo awa amambo, akhalele naye gubalumuna mutshima. Longo ditshi tuajiya guzula mangino? Tudi naye gutuna malongo anyi ashigo gudivua nu gutshigina gua Yehowa. Ba aposta ajiya gumonesa “egi ana kombelela Nzambi,” uvi “makalegelo awo mbaashigo mumonesa egi ana gumukombelela.” (2 Tim. 3:5) Mbayikhala yaleba gudi esue ha gujiya malongo amambo nu guatuna gula tudi mulonguga Biblia muabonga.—2 Tim. 3:14-17; Yuda 3, 4.

10. Longo ditshi diko tuajiya guzula mu ndaga jiazuelele Yesu mukunda nu hungu dia Phelegame nu dia Tiyatile?

 ¹⁰ Tudi naye gutuna ndaga jia musonyi jia maluholo agasue. Guakhalele nu ndaga iko mu hungu dia Phelegame nu dia Tiyatile. Yesu wazuelele egi mu mahungu ene guakhalele nu athu ako akhalele mulandula gukalagala ndaga jia musonyi. (Gumo. 2:14, 20) Longo ditshi tuazula? Ngatshima tuana kalegela gale Yehowa ivo yavula yabalega, nu mangino tudi nu inemo yavula mu ulondegi wenji, muene gajiyilego gutshigina nga hazonda egi tukalagale ndaga jia musonyi. (1 Sam. 15:22; 1 Phet. 2:16) Yehowa wana tshigina egi tulandule gutumagela mikhuala yenji, ikhale mavu awa adi azala nu ndaga jiabola.—Ef. 6:11-13.

11. Itshi tualonguga gu thunda? (Tala nji galuanda “ Malongo Mukunda nu Esue Mangino.”)

¹¹ Itshi tualonguga gu thunda? Tuamona egi tudi naye gukamba gujiya gula Yehowa wana tshigina gukombelela guetu. Gula tuatshita ndaga imoshi yajiya gutshita egi Yehowa atune gukombelela guetu, tudi naye guzula desizio dia gusombegesa mu phushi. (Gumo. 2:5, 16; 3:3, 16) Uvi, Yesu wamonesele ndaga iko mu ndaga jiazuelele muene mukunda nu mahungu. Ndaga itshi yene?

12. Ha gutadila Gumonesa 2:10, longo ditshi tuajiya guzula mu ndaga jiazuelele Yesu mukunda nu aphangi a hungu dia Similene nu dia Filadelefiya?

¹² Henyaha, tutadilenu ndaga jiazuelele Yesu mukunda nu hungu dia Similene nu dia Filadelefiya. Wawambelele Aklisto ene egi avuigo woma mukunda nu usageshi, handaga gula asala ya gujinginyina Yehowa mbawashimbiga. (Tanga Gumonesa 2:10; 3:10) Longo ditshi tuajiya guzula mangino? Tudi naye gujiya egi tuajiya gutagana nu usageshi, hene tudi naye gukhala hehi ha gukolesela mu usageshi wene. (Mat. 24:9, 13; 2 Kol. 12:10) Mukunda natshi ndaga eyi idi nu ndando?

13-14. Itshi yabuidile a kombeledi a Nzambi tangua ndaga jidi mu Gumonesa mukhapho 12 jiakalegewe?

¹³ Mukanda wa Gumonesa udi gutukuatesa ha gujiya egi akombeledi a Yehowa mbatagana nu usageshi mu masugu tudi mujinga, yakotelesa “lusugu lua Fumu.” Gumonesa mukhapho 12 udi muzuela egi tangua Yesu wabuile Fumu, gungima ita yazogele mu dilu. Mikaele nu anjelo enji aluishile Satana nu ba demo enji. (Gumo. 12:7, 8) Mikaele nu anjelo enji abingile Satana nu ba demo enji nu a abishidile ha mavu, hene asendesele gubatela athu malamba ha mavu. (Gumo. 12:9, 12) Uvi ndaga itshi yabuidile akombeledi a Nzambi?

¹⁴ Mukanda wa Gumonesa udi gutukuatesa ha gujiya luholo Satana wakalegele ndaga. Satana gakhalelego luko nu luholo lua guvutuga mu dilu, hene wasendesele guluisa Aklisto ambiwe maji mu nyuma anyi akhalele ha  mavu. Aklisto ene akhalele amoneshi a Ufumu wa Nzambi ha mavu nu akhalele “nu mudimo wa gulongesa lukuma luatadila Yesu.” (Gumo. 12:17; 2 Kol. 5:20; Ef. 6:19, 20) Luholo lutshi profosi eyi yatagenesewe?

15. “Matemue mbadi” adi muzuelela mukanda wa Gumonesa mukhapho 11 adi mumonesa akhuatshi nu itshi yaabuidile?

¹⁵ Satana wasendesele guluisa aphangi akhalele mutuameza mudimo wa gulongesa lukuma luabonga lua Ufumu. Aphangi ene adi mumonesewa mu mukanda wa Gumonesa gifua ‘matemue mbadi’ anyi ashiyiwe. * (Gumo. 11:3, 7-11) Mu givo 1918, afundile aphangi 8 anyi akhalele mutuameza ulondegi wa Nzambi, a asophesele, gungima a ambile mu bologo mukunda nu ivo yavula. Athu avula, akhalele mutangiza egi mudimo wakhalele mukalagala Aklisto ambiwe maji mu nyuma wakhalele naye “gufua.”

16. Ndaga itshi ya gushimana yakalegewe mu givo 1919? Itshi Satana walanduile gukalagala sendese mu tangua diene?

¹⁶ Profesi idi mu mukanda wa Gumonesa mukhapho 11 yazuelele egi, ‘matemue ene mbadi’ mbaazuga gungima dia matangua azonda. Tangua aphangi ene ambiwe mu bologo, givo gialanduile profesi yene yatagenesewe mu luholo lua gushimana. Mu mars 1919 aphangi ene azolewe mu bologo handaga mazunji amonele egi aphangi awa atshitshilego gubola. Tangua azogele asendesele diago gukalagala mudimo wa gulongesa lukuma luabonga. Uvi, Satana gabembelego gusagesa akombeledi a Nzambi. Sendese mu tangua diene Satana wasagesele akombeledi agasue a Nzambi. Usageshi wene wakhalele gifua “muta.” (Gumo. 12:15) Mukut’etu agasue tudi naye “gukolesela nu gukhala nu gutshigina.”—Gumo. 13:10.

17. Ukuateshi utshi akombeledi a Yehowa ana heta ngatshima Satana wana gualuisa?

¹⁷ Mukanda wa Gumonesa mukhapho 12 udi mumonesa egi, akombeledi a Nzambi mbaaheta ukuateshi mu luholo akhalelego mutangiza. Mukanda wene udi mumonesa egi, “mavu” aminyile “muta” wa usageshi, yakotelesa egi usageshi wakola. (Gumo. 12:16) Ndaga eyi yakalegewe diago ngenyi. Ha gufezegesa, mazunji ako ana sophesa gu ba tribinale  ana gukuatesa akombeledi a Nzambi. Matangua avula akombeledi a Yehowa ana binga gu ba tribinale, ngenyi ana guahana njila ha gukombelela Yehowa mu guhuima. Luholo lutshi ana gukalegela sungi yene ya guhuima? Ana kalegela tangua diene ha gudihana muavula mu mudimo waahanele Yehowa. (1 Kol. 16:9) Mudimo tshi wene?

18. Mudimo utshi wabalega ndando tudi naye gutshita mu masugu awa a gisugishilo?

¹⁸ Yesu walayele egi alandudi enji mbaalongesa “lukuma luabonga lua Ufumu wa [Nzambi]” ha mavu agasue gutuama egi gisugishilo gize. (Mat. 24:14) Tangua ana tshita mudimo wene ana heta ukuateshi wa anjelo, gifua luholo mukanda wa Gumonesa wana zuela egi muanjelo wakhalele nu “lukuma luabonga lua ivo nu ivo ha gulongesa athu a ha mavu, a ifutshi yagasue, a iphuta yagasue, a mazuelelo agasue nu a ilema yagasue.”—Gumo. 14:6.

19. Lukuma tshi luko akombeledi a Yehowa ana longesa?

¹⁹ Akombeledi a Nzambi ana longesa ndo phamba lukama luabonga lua Ufumu. Adi naye nji guhana mago mu mudimo wa anjelo adi muzuelela mu mukanda wa Gumonesa mukhapho 8 uu nu mu 10. Anjelo ene adi muzuelela malamba mbaabuila athu adi mutuna Ufumu wa Nzambi. Akombeledi a Yehowa ana longesa lukuma ludi mufuanesewa nu “may’a nzaza nu tshuya,” lukuma luene luana monesa luholo Nzambi mbawusophesa itshinyi ya gudisha ya ulondegi wa Satana. (Gumo. 8:7, 13) Athu adi naye gujiya egi gisugishilo giasuena hehi, ngenyi ajiya gusombegesa makalegelo awo, hagula mbaahuluishiwe mu lusugu lua khabu jia Yehowa. (Sef. 2:2, 3) Uvi athu avula anago gujiya lukuma luene. Tudi naye gukhala nu gikhesa ha gulongesa lukuma luene. Mu sungi ya lamba diakola, mbayikhala diago lamba ha gulongesa lukuma lua usopheshi wa gisugishilo.—Gumo. 16:21.

20. Itshi mbatuzuelela mu malongo mbadi adi mulandula?

²⁰ Tudi naye gutumagela “mbimbi idi mu profesi eyi” handaga esue nji tudi muhana mago ha gutagenesa ndaga jidi jiagusonega mu mukanda wa Gumonesa. (Gumo. 1:3) Uvi luholo lutshi tuajiya gukolesela mu usageshi nu gulandula gulongesa nu gikhesa? Ndaga mbadi mbajituhana ngolo: Thomo, ndaga mukanda wa Gumonesa udi muzuela mukunda nu mbalagaji jia Nzambi nu ya mbadi, gubonga mbatuheta gula tuasala ya gujinginyina gudi Nzambi. Mbatuzuelela ndaga jiene mu malongo mbadi adi mulandula.