1. Desizio ditshi dia ndando athu agasue adi naye guzula?

 MANGINO, athu adi nu desizio dia ndando adi naye guzula. Gutomba gula adi naye gukhala gukhanda ya Nzambi, nga gukhala gukhanda ya Satana Diabulu mbalagaji wa Nzambi. Athu agasue adi naye gutomba khanda itshi adi naye gukhala. Desizio mbaazula, diene mbadimonesa gula mbaaheta monyo wa ivo nu ivo nga ndo. (Mat. 25:31-33, 46) Mu tangua dia “lamba diakola,” mbaambiwa jimbu ya guhuluishiwa nga jimbu ya gufua.—Gumo. 7:14; 14:9-11; Ezek. 9:4, 6.

2. (a) Ha gutadila Hebelu 10:35-39, itshi tudi naye gutshita? (b) Luholo lutshi mukanda wa Gumonesa wajiya gutukuatesa?

² Tanga Hebelu 10:35-39. Gula watomba gukhala gukhanda ya Yehowa, wazula desizio diabonga. Henyaha, udi mutshigina gukuatesa athu ako ha guzula desizio diabonga. Ngenyi, wajiya gukalegela ndaga jidi mu mukanda wa Gumonesa ha guakuatesa. Mukanda wuwu wabonga wana zuelela ndaga mbajibuila athu ana tuna utuameji wa Yehowa. Uvi wana monesa nji gubonga mbaguheta athu ana landula utuameji wenji. Tudi naye gulonguga giamatshidia egi gia ndando. Gutshita ngenyi, mbagutuhana gikhesa gia gulandula gukombelela Yehowa. Tuajiya nji gukalegela ndaga jiene ha gukuatesa athu ako ha guzula desizio diabonga nu ha gulandula gukombelela Yehowa.

3. Itshi tuza muzuelela mu longo edi?

³ Mu longo edi tuza mutadila mihu eyi: Itshi mbayibuila athu ana landula utuameji wa Nzambi? Itshi mbayibuila athu adi mutomba gukhala gukhanda ya shitu ya mu foto yabenga inyi adi muzuelela mu mukanda wa Gumonesa?

4. Hunji ditshi Yone wamone nu Yesu mu dilu?

⁴ Mu vizio imoshi, mupostolo Yone wamonele mahunji mbadi a athu anyi ana landula utuameji wa Yehowa nu mbaaheta monyo wa mayilago. Hunji dia thomo didi nu athu 144 000. (Gumo. 7:4) Athu ene atombewe ha mavu ha gulondega guvernema nga Ufumu nu Yesu mu dilu. Mbaahinyina nu Yesu mavu agasue. (Gumo. 5:9, 10; 14:3, 4) Yone waamonele mu vizio ya gumagana nu Yesu holu dia Mulundu wa Siona mu dilu.—Gumo. 14:1.

5. Ndaga itshi mbayikalegewa mukunda nu Aklisto ambiwe maji mu nyuma anyi adi luko ha mavu?

⁵ Sendese mu tangua dia apostolo uu nu mangino, athu avula atombewe gale ha gukhala mukatshi dia hunji dia athu 144 000. (Luka 12:32; Roma 8:17) Uvi Yone wazuelele egi phamba athu azonda mukatshi dia hunji diene mbaakhala nu monyo ha mavu mu masugu a gisugishilo. Gutuama egi lamba diakola disendese, Aklisto ambiwe maji mu nyuma anyi ‘mbaasala’ ha mavu, mbaambiwa “jimbu” ya gisugishilo idi mumonesa egi Yehowa waatshigina. (Gumo. 7:2, 3; 12:17) Gungima mu tangua dia lamba diakola, Aklisto ene mbaaya mudilu ha gudibungisa nu anyi afile agujinginyina. Mbaahinyina nu Yesu mu Ufumu wa Nzambi.—Mat. 24:31; Gumo. 5:9, 10.

6-7. (a) Hunji tshi diko Yone wamonele nu itshi tuakotelesa mukunda nu hunji diene? (b) Mukunda natshi Aklisto ambiwe maji mu nyuma anyi adi luko ha mavu nu “thundu yakoma ya athu,” adi naye gulonguga ndaga jidi mu Gumonesa mukhapho 7?

⁶ Gungima dia gumona hunji dia athu mbaaya mu dilu, Yone wamonele nji “thundu yakoma ya athu.” Mu hunji edi dia mbadi, athu adi avula diago, nga muthu mumoshi gajiyilego guatanga. (Gumo. 7:9, 10) Itshi tuajiya gukotelesa mukunda nu hunji edi? Mukanda wa Gumonesa udi muzuela egi: “Ene adi athu akatuga mu lamba diakola, awevele malopho awo nu a aphelegetesele nu mahatshi a Mun’a Gimeme.” (Gumo. 7:14) Gungima dia guhuluishiwa guawo mu lamba diakola, ‘thundu eyi yakoma ya athu’ mbaakhala ha mavu nu mbaaheta gubonga guavula.—Ngi. 37:9-11, 27-29; Ish. 2:21, 22; Gumo. 7:16, 17.

⁷ Ikhale tuatombewe haguya mudilu nga mbatukhala ha mavu, tudi mumona diago egi ndaga jidi mu Gumonesa mukhapho 7 jidi nu ndando yavula mukunda nu esue. Luholo mukhapho wene udi guyimonesa, mahunji awa mbadi a akombeledi a Nzambi mbaaheta gubonga guavula. Mbatukhala diago nu gusuanguluga luholo tuazudile desizio dia gukhala gukhanda ya Yehowa. Ndaga itshi iko mukanda wa Gumonesa wana zuela mukunda nu lamba diakola?—Mat. 24:21.

8. Luholo lutshi lamba diakola mbadisendesa nu itshi athu avula mbaakalagala?

⁸ Gifua luholo tuayimonyi mu longo diabalega, mafumu a politike a ha mavu awa mbaaluisa Babilona Yakoma, yakotelesa ikombelelo yagasue ya mambo. (Gumo. 17:16, 17) Ndaga eyi mbayikhala gisendeselo gia lamba diakola. Ndaga yene mbayituma athu avula ha guzula desizio dia gusendesa gukombela Yehowa ba? Ndo sha. Handaga mukanda wa Gumonesa mukhapho 6 udi mumonesa egi mu tangua diene dia lamba, athu anago gukombelela Yehowa mbaakamba ukuateshi nu ubambi gudi enya politike nu gudi enya mungenda a ha mavu awa adi mufuanesewa nu milundu. Hene luholo athu ene mbaatuna gukhala gukhanda ya Ufumu wa Nzambi,  mbayimonesa diago egi adi mbalagaji jia Yehowa.—Luka 11:23; Gumo. 6:15-17.

9. Mu luholo lutshi akombeledi a Yehowa mbaakhala agudisha nu athu ako mu sungi ya lamba diakola? Itshi mbayibuila akombeledi a Yehowa?

⁹ Idi yadiago egi, akombeledi a Yehowa a gujinginyina mbaakhala agudisha nu athu ako mu tangua dia lamba diene diakola. Mu tangua diene, phamba akombeledi a Yehowa mbaalandula gumukombelela ha mavu nu mbaatuna guhana mago gudi “shitu ya mu foto.” (Gumo. 13:14-17) Luholo mbaasala ya gujinginyina gudi Yehowa, mbayituma mbalagaji jia Yehowa ha guavuila diago khabu. Ngenyi ifutshi mbayidibungisa ha guluisa akombeledi a Nzambi a ha mavu a mudidi. Biblia yana tamega guluisa guene egi, uluishi wa Goga wa gu Magoga.—Ezek. 38:14-16.

10. Ha gutadila Gumonesa 19:19-21, ndaga itshi Yehowa mbawutshita athu mbaaluisa akombeledi enji?

¹⁰ Uluishi wene mbawutuma Yehowa ha gutshita itshi? Udi muzuele egi: ‘Mbanguvua khabu jiavula.’ (Ezek. 38:18, 21-23) Mukanda wa Gumonesa mukhapho 19 udi mumonesa ndaga mbajibua gungima. Udi muzuela egi, Yehowa mbawutuma Mun’enji ha gubamba akombeledi enji nu ha guluisa mbalagaji jienji. Yesu mbawulua ita yene hamoshi nu “masuta a mu dilu,” yakotelesa egi anjelo a gujinginyina nu athu 144 000 ambiwe maji mu nyuma. (Gumo. 17:14; 19:11-15) Luholo lutshi ita yene mbayihua? Mbalagaji jiagasue jia Yehowa mbajishiyiwa mayilago!—Tanga Gumonesa 19:19-21.

11. Ndaga itshi yabalega ndando adi muzuelela mu mukanda wa Gumonesa?

¹¹ Tangiza gale luholo akombeledi a Nzambi a gujinginyina mbaadivua tangua mbalagaji jiagasue jia Yehowa mbajishiwa mayilago! Mukut’awo agasue mbaakhala nu gusuanguluga guavula lume! Ikhale gusuanguluga mbagukhala guavula mu dilu mukunda nu gushiyiwa gua Babilona Yakoma, uvi gudi nu ndaga iko mbayasuanguluisa muavula gubalega. (Gumo. 19:1-3) “Ulo wa Mun’a Gimeme,” idi diago ndaga yabalega ndando mu mukanda wa Gumonesa.—Gumo. 19:6-9.

12. Luholo Gumonesa 21:1, 2 idi guyimonesa, tangua ditshi ulo wa Mun’a Gimeme mbawukalegewa?

¹² Tangua ditshi ulo wa Mun’a Gimeme mbawukalegewa? Gutuama egi ita ya Alemagedona isendese, Aklisto agasue ambiwe maji mu nyuma 144 000 mbaabungishiwa mu dilu. Uvi ulo wa Mun’a Gimeme mbawushigo mukalegewa mu tangua diene. (Tanga Gumonesa 21:1, 2.) Mbawukalegewa gungima dia ita ya Alemagedona tangua mbalagaji jia Nzambi mbajishiyiwa.—Ngi. 45:3, 4, 13-17.

13. Ndaga itshi mbayikadigiwa gu ulo wa Mun’a Gimeme?

¹³ Ndaga itshi mbayikalegewa gu ulo wa Mun’a Gimeme? Ulo wana gubungisa yala nu mukhetu. Luholo lumoshi nji, ulo wa Mun’a Gimeme mbawubungisa Fumu Yesu Klisto nu ‘mukaji’enji,’ yakotelesa egi Aklisto 144 000 ambiwe maji mu nyuma. Ndaga yene ya ndando mbayizola guvernema ihe-ihe inyi mbayihinyina mavu mukunda nu ivo 1 000.—Gumo. 20:6.

14-15. Mukanda wa Gumonesa mukhapho 21 udi mufuanesa athu 144 000 nu itshi? (Tala gifuanesa holu dia gizula.)

¹⁴ Mukanda wa Gumonesa mukhapho 21 udi mufuanesa Aklisto 144 000 ambiwe maji mu nyuma nu “Yelusalema Ihe-ihe” dimbo diabalega gubonga. (Gumo. 21:2, 9) Dimbo diene  diakhalele nu maseso 12 a fondasio, holu dia maseso ene hakhalele ha gusonega “majina 12 a apostolo 12 a Mun’a Gimeme.” Mukunda natshi ndaga eyi yasuanguluishile Yone? Handaga wamonele jina dienji dia gusonega holu dia seso dimoshi. Yakhalele diago luendu luakoma!—Gumo. 21:10-14; Ef. 2:20.

¹⁵ Dimbo edi didi dia gudisha nu membo ako. Didi nu bala-bala diakoma dialondewe nu wolo wabonga, didi nu mifulo 12 yalondewe nu misanga ya ndando, didi nu ibayi nu fondasio jialondewe nu maseso a ndando, jiakhalele jia guthesewa muabonga diago. (Gumo. 21:15-21) Uvi Yone wamonele egi guakhalele nu gima giko giakhalelego guene. Wazuelele egi: “Ngamonelego tempelo mu dimbo diene, handaga tempelo ya dimbo diene idi Yehowa Nzambi wa Ngolo Jiagasue nu Mun’a Gimeme. Yakhalelego mutoga egi dimbo diene dikhale nu kumbi nga nu ngonda ha guzola muanya, handaga lutumbu lua Nzambi luakhalele gifua muanya wakhalele gudiphelegetesa. Muenda wa dimbo diene wakhalele Mun’a Gimeme.” (Gumo. 21:22, 23) Athu anyi adi mufuanesewa nu Yelusalema ihe-ihe adi nu luendu lua guya mukhala nu Yehowa. (Heb. 7:27; Gumo. 22:3, 4) Yehowa nu Yesu, ene adi tempelo ya dimbo diene.

16. Gubonga gutshi athu mbaaheta mu Uhinyinyi wa Ivo 1 000 wa Ufumu wa Nzambi?

¹⁶ Idi ndaga yabonga gudi Aklisto ambiwe maji mu nyuma ha gutangigiza dimbo diene. Uvi athu adi nu felela dia gukhala ha mavu, adi naye nji gutangigiza mukunda nu dimbo diene. Yelusalema ihe-ihe mbayibatela athu nu ima yagasue ya ha mavu ishimbigo yavula mu Uhinyinyi wa Ivo 1 000 wa Ufumu wa Nzambi. Mupostolo Yone wamonele ishimbigo yene mubulumuga gifua “muta wa meya a monyo.” Guakhalele nu “mitshi ya monyo” gukhanda nu khanda ya muta wene, “mayiji a mitshi yene akhalele mukunda nu gusaga ifutshi.” (Gumo. 22:1, 2) Athu agasue mbaakhala nu monyo mu tangua diene, mbaaheta gubonga guavula. Athu ana gutumagela Yehowa mbaabuishiwa mage-mage athu atagana. Misongo nu malamba nu masoji a gikenene mbayikhadigo luko.—Gumo. 21:3-5.

17. Ha gutadila Gumonesa 20:11-13, akuatshi mbaaheta gubonga mu Uhinyinyi wa Ivo 1 000?

¹⁷ Akuatshi mbaaheta gubonga guene? Athu a thomo mbaakhala thundu yakoma mbayihuluishiwa mu Alemagedona nu ana mbaavualewa  mu mavu ahe-ahe. Uvi Gumonesa mukhapho 20 udi gutulaya egi nu athu agasue afuile gale mbaafuzumuga. (Tanga Gumonesa 20:11-13.) “Athu abonga” anyi afuile nu “athu abola” anyi afuile uvi ahetelego luendu lua gulonguga ndaga jia Yehowa, mukut’awo agasue mbaafuzumuga ha mavu. (Makal. 24:15; Yone 5:28, 29) Ndaga eyi idi mutshigina gukotelesa egi athu agasue afuile gale mbaafuzumuga mu Uhinyinyi wa Ivo 1 000 ba? Ndo sha. Athu atunyile diago gukombelela Yehowa mbaashigo mufuzumuga nga hazonda. Ahetele luendu lua gulonguga ndaga jia Yehowa uvi ene atunyile gawo. Ngenyi amonesele egi ashigo atagana ha gukhala nu monyo mu phaladiso.—Mat. 25:46; 2 Tes. 1:9; Gumo. 17:8; 20:15.

18. Ndaga itshi mbayikalegewa ha mavu gusuga ya ivo 1 000?

¹⁸ Gu gisugishilo gia ivo 1 000, athu agasue ha mavu mbaakhala abui gale athu atagana. Gushigo nu muthu mbawutagana nu malamba mukunda nu gubola guakalegele Adama. (Roma 5:12) Mukumbu wa gubola gua Adama mbawukatudiwa mayilago. Ngenyi athu mbaakhala ha mavu ‘mbaafuzumuga,’ yakotelesa egi mbaabuishiwa athu atagana gu gisugishilo gia ivo 1 000.—Gumo. 20:5.

19. Mukunda natshi athu mbaalolewa gulolewa gua gisugishilo?

¹⁹ Tudi mujiya egi Yesu wasalele wagujinginyina gudi Yehowa tangua Satana wamulolele. Uvi athu anyi mbaabuishiwa athu atagana, mbaasala nji agujiginyina gudi Yehowa tangua Satana mbawalola ba? Muthu wagasue mbawuhana mvutu gu muhu owu tangua Satana mbawuzolewa mu wina dishigo nu gisugishilo, gusuga ya ivo 1 000. (Gumo. 20:7) Athu mbaasala ya gujiginyina mu gulolewa gua gisugishilo, mbaaheta monyo wa ivo nu ivo nu mbaakudiwa diago mu uhiga. (Roma 8:21) Uvi athu anyi mbaalumbugila Yehowa, mbaashiyiwa mayilago hamoshi nu Diabulu nu bademo enji.—Gumo. 20:8-10.

20. Luholo lutshi udi gudivua mukunda nu profesi jidi mu mukanda wa Gumonesa?

²⁰ Ha tuatadila ndaga eji jidi mu mukanda wa Gumonesa, luholo lutshi udi gudivua? Yajiya gukhala egi udi muvua mutshima zagu-zagu egi ngawamona gale gutagenesewa gua profesi eji. Idi yadiago egi ndaga eji, jidi gugutuma ha gutamega athu ako ha guza mukombelela Yehowa mu luholo luatagana. (Gumo. 22:17) Ndaga jiagasue tuazuelela jinyi mbajikalegewa mu masugu adi muza, jiatuhana diago gikhesa. Tudi nji nu gusuanguluga ha guzuela gifua mupostolo Yone egi: “Amen! Fumu Yesu, iza.”—Gumo. 22:20.