1. Ha gutadila mukanda wa Gumonesa, itshi Satana wana tshita akombeledi a Yehowa?

 MUKANDA wa Gumonesa udi mumonesa egi Ufumu wa Nzambi wasendesele gale guhinyina mu dilu nu Satana wabishidiwe ha mavu. (Gumo. 12:1-9) Gubishidiwa guenji guabatele guhuima mu dilu nu guatubatele malamba ha mavu. Mukunda natshi? Handaga Satana wana vua khabu nu wana luisa akombeledi a Yehowa a gujinginyina adi ha mavu.—Gumo. 12:12, 15, 17.

2. Itshi yajiya gutukuatesa ha gukhala ya gujinginyina gudi Yehowa?

² Luholo lutshi tuajiya gusala ya gujinginyina ngatshima Satana udi gutuluisa? (Gumo. 13:10) Ndaga imoshi yajiya gutukuatesa idi gujiya ndaga mbajikalegewa mu masugu adi muza. Ha gufezegesa, mu mukanda wa Gumonesa mupostolo Yone wamonesele gubonga mbatuheta mu masugu adi muza. Mukatshi dia gubonga guene, tuajiya gutanga gushiyiwa gua mbalagaji jia Nzambi. Henyaha, tutadilenu luholo mukanda wa Gumonesa wana monesa mbalagaji jiene jia Nzambi nu ndaga mbajiaabuila.

3. Tanga ndambo ya ijiyishilo idi mu mukanda wa Gumonesa.

³ Verse ya thomo ya mukanda wa Gumonesa idi muzuela egi ndaga jidi mu mukanda wa Gumonesa jiamonesewe mu “ijiyishilo,” yakotelesa egi mu luholo lua gufuanesa. (Gumo. 1:1) Mukanda wene udi muzuelela mbalagaji jia Nzambi mu luholo lua gufuanesa. Udi guatamega egi shitu jia mu foto. Ha gufezegesa,  udi muzuelela ‘shitu ya mu foto imoshi yazogele mu kianga, yakhalele nu mbinga kumi nu mito sambadi.’ (Gumo. 13:1) Gungima, ‘shitu iko ya mu foto yazogele mu mavu,’ shitu yene yakhalele muzuela gifua dragona, yakhalele “mutshita nji egi tshuya tukatuge mu dilu tubulumuge ha mavu.” (Gumo. 13:11-13) Mukanda wa Gumonesa udi muzuelela nji “shitu ya mu foto yabenga” idi ya gudisha nu shitu jiko. Udi mumonesa egi mukhetu mumoshi wa thambi udi holu dia shitu yene. Shitu eji thathu, jidi mumonesa mbalagaji jiana luisa Yehowa Nzambi nu Ufumu wenji sendese mualeha. Hene idi nu ndando egi tujiye mbalagaji jiene.—Gumo. 17:1, 3.

4-5. Luholo tshi ndaga jidi mu Danyele 7:15-17 jidi gutukuatesa ha gukotelesa ijiyishilo idi mu mukanda wa Gumonesa?

⁴ Gutuama dia gujiya mbalagaji jiene, tukambenu thomo gujiya gula shitu jia mu foto nu mukhetu wa thambi idi mumonesa itshi. Biblia yajiya gutukuatesa ha gukotelesa ijiyishilo yene muabonga diago. Mikanda iko ya Biblia yakotelesele gale ijiyishilo yavula idi mu mukanda wa Gumonesa. Ha gufezegesa, profete Danyele wamonele mu nzoji ‘shitu nguana jiakoma muzoga mu kianga.’ (Dan. 7:1-3) Danyele udi mumonesa egi, shitu jiene nguana jidi mumonesa “mafumu” nga ba guvernema nguana. (Tanga Danyele 7:15-17.) Ndaga eyi idi gutukuatesa ha gukotelesa egi, idi naye gukhala nji egi shitu jia mu foto adi muzuelela mu mukanda wa Gumonesa jidi mumonesa ba guvernema.

⁵ Henyaha tutadilenu ndambo ya ijiyishilo adi muzuelela mu mukanda wa Gumonesa, ha gumona luholo Biblia idi gutukuatesa ha gukotelesa ijiyishilo yene muabonga. Tuza muzuelela thomo shitu jia mu foto ha gujiya gula jidi mumonesa itshi. Tuza mumona nji ndaga jiabuidile shitu jiene. Gungima tuza mumona gula ndaga eji jidi mukotelesa itshi mukunda nu esue.

6. Shitu ya mu foto yakhalele nu mito sambadi adi muzuelela mu Gumonesa 13:1-4 idi mukotelesa itshi?

⁶ Shitu ya mu foto yakhalele nu mito sambadi idi mukotelesa itshi? (Tanga Gumonesa 13:1-4.) Shitu yene yakhalele gifua gisupha, malu enji akhalele gifua malu a shitu ya urse, kano dienji diakhalele gifua kano dia khoshi, yakhalele nu mbinga kumi. Shitu nguana adi muzuelela mu mukanda wa Danyele mukhapho 7 jiakhalele nu ima eyi yagasue tuatanga. Uvi mu mukanda wa Gumonesa ima yiyi yagasue yakhalele gudi shitu imoshi. Shitu yene ishigo mumonesa phamba guvernema nga uhinyinyi umoshi wa ha mavu. Mupostolo Yone udi mumonesa egi, shitu yene idi muhinyina “iphuta yagasue nu athu a ilema yagasue, a mazuelelo agasue nu ifutshi yagasue.” Ndaga yiyi idi mumonesa egi shitu yene, idi nu ufumu wavula gubalega guvernema imoshi. (Gumo. 13:7) Shitu yene ya mu foto idi mumonesa ba guvernema agasue atuamezele gale mavu sendese mualeha uu nu mangino. *—Mulo. 8:9.

7. Mito sambadi ya shitu yene idi mukotelesa itshi?

⁷ Mito sambadi ya shitu yene idi mukotelesa itshi? Mukanda wa Gumonesa mukhapho 17 udi muhana ukoteleshi wa shitu adi muzuelela mu mukhapho 13. Gumonesa 17:10, idi muzuela egi: “Mafumu adi sambadi: Mutano abui gale, mungoshi yowu guene, muko udi naye guza, uvi tangua mbadiza muene, udi naye gusala phamba mukunda nu tangua diazonda.” Ma ufumu awa sambadi adi mu utuameji wa Satana, ana tamegewa egi “mito” handaga akhalele nu ngolo jiavula. Ma ufumu ene ahinyinyile nji akombeledi a Nzambi nu a aluishile. Tangua mupostolo Yone wakhalele nu monyo, ma ufumu thano akhalele  ahinyina gale mavu agasue. Yakhalele, Ejipitu, Asiliya, Babilona, Mede nu Phelese nu Grece. Roma yakhalele Ufumu wa samano wakhalele muhinyina mavu agasue, tangua Yone wamonele vizio idi mu mukanda wa Gumonesa. Ufumu utshi wakhalele naye gubua ufumu wa sambadi nga ngolo jia gisugishilo jiakhalele naye guhinyina mavu agasue?

8. Muto wa sambadi wa shitu ya mu foto udi mumonesa itshi?

⁸ Profesi idi mukanda wa Danyele, iza gutukuatesa ha gukotelesa ufumu wa sambadi. Ufumu utshi udi muhinyina mu masugu awa a gisugishilo nga mu “lusugu lua Fumu”? (Gumo. 1:10) Idi Royaume-Uni nu Etats-unis d’Amerique, nga Puissance mondiale anglo-américaine. Tuajiya guzuela egi yene idi muto wa sambadi wa shitu ya mu foto adi muzuelela mu mukanda wa Gumonesa 13:1-4.

9. Shitu ya mu foto idi nu “mbinga mbadi gifua jia mun’a gimeme” idi mumonesa itshi?

⁹ Mukanda wa Gumonesa mukhapho 13 udi gutuwambela egi muto wene wa sambadi, yakotelesa egi Puissance mondiale anglo-américaine, wana kalagala ndaga gifua shitu ya mu foto idi nu ‘mbinga mbadi gifua jia mun’a gimeme, uvi idi muzuela gifua dragona.’ Shitu yene “idi mutshita ndaga jiakoma jia gushimana, idi mutshita nji egi tshuya tukatuge mu dilu tubulumuge ha mavu ha meso a athu.” (Gumo. 13:11-15) Mukanda wa Gumonesa mukhapho 16 nu 19 yana tamega shitu yene ya mu foto egi “profete wa mambo.” (Gumo. 16:13; 19:20) Danyele wazuelele nji ndaga ya luholo lumoshi egi Puissance mondiale anglo-américaine ‘mbayibolesa ima yavula diago.’ (Dan. 8:19, 23, 24.) Ndaga eyi yakalegewe diago ngenyi mu tangua dia Ita ya Mbadi ya ha Mavu agasue. Enya ndunge a gu Royaume-Uni nu Etats-unis alondele bombe mbadi jiakoma jinyi jiabolesele ima yavula nu jiakalegele egi ita yene ihue gu membo adi mu Océan Pacifique. Luholo Puissance mondiale anglo-américaine yalondele bombe jiene, yakalegele egi “tshuya tukatuge mu dilu tubulumuge ha mavu.”

10. “Gifuanesa gia shitu ya mu foto” gidi mumonesa itshi? (Gumonesa 13:14, 15; 17:3, 8, 11)

¹⁰ Henyaha tuzuelelenu shitu iko ya mu foto. Shitu yene idi luholo lumoshi nu shitu ya mu foto yakhalele nu mito sambadi. Uvi gudisha gudi egi yene idi yabenga. Idi mutamegewa egi “gifuanesa gia shitu ya mu foto” nu adi guyimonesa gifua “fumu wa nage.” * (Tanga Gumonesa 13:14, 15; 17:3, 8, 11.) Mukanda wa Gumonesa udi muzuela egi “Fumu” muene wakhalele, uvi watotele, gungima wajile muzoga. Idi mumonesa diago egi idi Organisation des Nations unies, inyi yana kuatesa mafumu a politike a ha mavu. Thomo akhalele guyitamega egi Société des Nations. Gungima yatotele mu tangua dia Ita ya Mbadi ya ha Mavu agasue. Uvi yajile luko muzoga mu jina dia Organisation des Nations unies.

11. Itshi shitu jia mu foto nga ba guvernema adi mukalagala? Mukunda natshi tushigo naye guavua woma?

¹¹ Shitu jia mu foto nga ba guvernema adi mutuma athu ha guluisa Yehowa nu akombeledi enji. Yone wazuelele egi idi gifua adi mubungisa “mafumu a ha mavu agasue” mukunda nu ita ya Alemagedona, yakotelesa “lusugu luakoma lua Nzambi wa Ngolo Jiagasue.” (Gumo. 16:13, 14, 16) Uvi tushigo naye guvua woma. Handaga Yehowa Nzambi wa ngolo jiagasue mbawukalagala ndaga mu phushi ha guhuluisa akombeledi enji a gujinginyina.—Ezek. 38:21-23.

12. Itshi mbayibuila shitu jiagasue jia mu foto?

¹² Itshi mbayibuila shitu jiagasue? Mukanda wa Gumonesa 19:20 udi muzuela egi: “Akuatele shitu ya mu foto nu profete wa mambo munu wakhalele mukalagala ndaga jia gushimana ha  meso ayo, ha guhuiga athu anyi ambiwe njimbu ya shitu ya mu foto nu athu anyi akhalele mukombelela gifuanesa gia shitu yene. Mukut’awo agasue mbadi abishidiwe nu monyo mu kianga gia tshuya gia sufre.” Ngatshima mafumu awa apolitike adi mbalagaji jia Nzambi, adi mulandula guhinyina mangino, uvi mbaashiyiwa mayilago.

13. Ndaga itshi ya lamba ba guvernema ana tshigina egi Aklisto akalagale?

¹³ Ndaga yene idi mukotelesa itshi mukunda nu esue? Esue Aklisto, tudi naye gukhala ya gujinginyina gudi Nzambi nu gu Ufumu wenji. (Yone 18:36) Ha gutshita ngenyi, tudi naye gutuna gudinginyisa mu ndaga jia politike jia ha mavu awa. Uvi, yajiya gukhala diago lamba ha gutuna gudinginyisa mu ndaga jia politike, handaga ba guvernema ana tshigina egi tuahane mago mu ndaga tuana zuela nu ndaga tuana tshita. Athu anyi ana guahana mago, shitu ya mu foto yana guahaga njimbu. (Gumo. 13:16, 17) Athu ene ana hagewa njimbu, anago suanguluisa Yehowa nu mbaashigo muheta monyo wa ivo nu ivo. (Gumo. 14:9, 10; 20:4) Idi diago nu ndando egi, tulandule gutuna gudinginyisa mu ndaga jia politike, ngatshima ba guvernema adi mushinjiga athu ha guahana mago.

14. Ndaga itshi ya gushimana mupostolo Yone wamonele gifua luholo mukanda wa Gumonesa 17:3-5 udi guyimonesa?

¹⁴ Mupostolo Yone udi muzuela egi ‘wadihudile muavula’ mukunda nu ndaga iko yamonele muene. Ndaga itshi yene? Mukhetu mumoshi wakhalele holu dia shitu imoshi ya mu foto. (Gumo. 17:1, 2, 6) Mukhetu muene udi “thambi yakoma ya mukhetu,” wana tamegewa egi “Babilona Yakoma.” Udi mukalagala “uthambi” nu “mafumu a ha mavu.”—Tanga Gumonesa 17:3-5.

15-16. Nanyi udi “Babilona Yakoma,” nu luholo lutshi tuayijiya?

¹⁵ Nanyi udi “Babilona Yakoma”? Mukhetu yowu gajiyilego gumonesa ulondegi wa politike, handaga mukanda wa Gumonesa udi muzuela egi mukhetu muene udi mukalagala uthambi nu mafumu a politike a ha mavu awa. (Gumo. 18:9) Luholo mukhetu muene udi holu dia shitu ya mu foto, idi mumonesa egi muene udi mutshita yagasue ha gutuameza mafumu ene. Gajiyilego nji gumonesa itshinyi ya mungenda idi mu ulondegi wa mavu awa a Satana. Itshinyi yene ya mungenda adi guyizuelela mu mukanda wa Gumonesa nu ana guyitamega egi “enya mungenda a ha mavu.”—Gumo. 18:11, 15, 16.

¹⁶ Mu Biblia mbimbi “thambi,” yajiya gumonesa athu anyi ana zuela egi ana kombelela Nzambi uvi ene ana kalagala ndaga jidi mumonesa egi ana kombelela isongo nu ana gukuata ufuta nu mavu awa. (1 Gudi. 5:25; Yak. 4:4) Uvi, Biblia yana zuela egi akombeledi a Nzambi a gujinginyina adi gifua ‘tundongo’ nga ndo “abungishilego muila nga nu muthu mumoshi.” (2 Kol. 11:2; Gumo. 14:4) Gu Babilona guene guakhalele ikombelelo yavula ya mambo. Hene, idi yadiago egi Babilona Yakoma, idi ikombelelo yagasue ya mambo.—Gumo. 17:5, 18; Tala longo “ Qu’est-ce que Babylone la Grande? ” didi mu jw.org

17. Itshi mbayibuila Babilona Yakoma?

¹⁷ Itshi mbayibuila Babilona Yakoma? Mukanda wa Gumonesa 17:16, 17 udi muzuela egi: “Mbinga kumi wamonyi nu shitu ya mu foto mbajituna mukhetu ya thambi, mbajimutambula ima yenji yagasue nu mbajimubemba thowa; mbajidia misunyi ya muila wenji nu mbajimukonda diago tshuya. Handaga Nzambi wambi matangi mu mitshima yawo.” Idi yadiago egi Yehowa mbawutshita egi ifutshi yikalegele shitu ya mu foto yabenga, yakotelesa Organisation des Nations unies haguluisa ikombelelo yagasue ya mambo nu mbayishiwa diago.—Gumo. 18:21-24.

18. Luholo lutshi tuajiya gumonesa egi tushigo gudibungisa nu Babilona Yakoma?

 ¹⁸ Ndaga yene idi mukotelesa itshi mukunda nu esue? Tudi naye gulandula gubamba “gukombelela guaphelegeta nu gushigo nu usala gu meso a Nzambi Tata wetu.” (Yak. 1:27) Tushigo naye gulandula malongo a mambo, gutshita fete jia aphagano, gulandula makalegelo a athu ana tuna gutumagela mikhuala ya Nzambi, nu ndaga jia wanga jia Babilona Yakoma. Tudi naye gulandula gutamega athu ha guzoga “mukatshi dienji,” hagula adibungisago mugubola guenji.—Gumo. 18:4.

19. Nanyi udi “dragona yakoma yabenga gifua tshuya”?

¹⁹ Mukanda wa Gumonesa wana zuelela nji “dragona yakoma yabenga gifua tshuya.” (Gumo. 12:3) Dragona yene yaluishile Yesu nu anjelo enji. (Gumo. 12:7-9) Yana luisa akombeledi a Nzambi nu yana hana ngolo gudi shitu jia mu foto nga mafumu a politike. (Gumo. 12:17; 13:4) Nanyi udi dragona yene? Idi “nyoga ya mualeha, yana tamegewa egi Diabulu nu Satana.” (Gumo. 12:9; 20:2) Muene wana tuameza mbalagaji jiagasue jia Yehowa.

20. Itshi mbayibuila dragona?

²⁰ Itshi mbayibuila dragona? Mukanda wa Gumonesa 20:1-3 udi mukotelesa egi muanjelo mumoshi mbawubishila Satana mu wina ushigo nu gisugishilo. Mbayikhala gifua bologo mukunda nu Satana. Mu tangua diene, Satana ‘mbagahuigigo luko ifutshi uu nu tangua ivo 1 000 mbayibalega.’ Gungima, Satana nu bademo enji mbaabishidiwa mu “kianga gia tshuya nu gia sufre,” yakotelesa egi mbaashiyiwa mayilago. (Gumo. 20:10) Tangiza gale luholo mavu mbaakhala tangua Satana nu bademo enji mbaashiyiwa! Mbayikhala diago tangua diabonga lume!

21. Mukunda natshi tudi naye gukhala nu gusuanguluga mu ndaga tuamona mu mukanda wa Gumonesa?

²¹ Gukotelesa ijiyishilo eyi idi mu mukanda wa Gumonesa, idi gutusuanguluisa nu gutuhana gikhesa. Tuakotelesa akhuatshi adi mbalagaji jia Yehowa nu itshi mbayaabuila. Yadiago, “gusuanguluga gudi nu muthu udi mutanga mu dijui diakola nu athu adi mutegelela mbimbi idi mu profesi eyi”! (Gumo. 1:3) Uvi, tangua mbalagaji jia Nzambi mbajishiyiwa, gubonga gutshi akombeledi a Nzambi agujinginyina mbaaheta? Mbatuzuelela ndaga yene mu longo dialandula didi muzuelela nji mukanda wa gumonesa.