LONGO DIA 22
Ndunge Jiana Gutuhana Yehowa, Jiana Gutukuatesa mu Monyo Wetu
‘Yehowa wana hana ndunge.’—ISH. 2:6.
LUNGIMBO 89 L’obéissance est bénie
NDAGA JIDI MU LONGO EDI *
1. Ha gutadila Ishima 4:7, mukunda natshi mukut’etu agasue tudi nu funu ya ndunge jiana katuga gudi Nzambi?
IDI yadiago egi tangua wakhalele mutshigina guzula desizio dimoshi dia ndando, watogele Yehowa ndunge handaga wakhalele najio funu. (Yak. 1:5) Fumu Salomo wasonegele egi: ‘Gukhala nu ndunge gudi nu ndando yavula.’ (Tanga Ishima 4:7.) Salomo gakhalelego muzuelela ndunge jia an’a athu. Wakhalele muzuelela ndunge jiana katuga gudi Yehowa Nzambi. (Ish. 2:6) Uvi ndunge jiana gutuhana Nzambi, jiajiya diago gutukuatesa ha gulua nu malamba tudi mutagana nawo mangino ba? Ayi. Yene ndaga tuza muzuelela mu longo edi.
2. Luholo lutshi tuajiya gubua nu ndunge jiavula?
2 Tuajiya gubua nu ndunge jiavula gula tudi mulonguga nu tudi mukalegela malongo a athu mbadi anyi akhalele nu ndunge jiavula. Tuza mutadila thomo gifezegeselo gia Salomo. Biblia idi muzuela egi: ‘Nzambi wahanele Salomo ndunge jiavula diago. Wakhalele nji gumukuatesa ha gukotelesa ndaga mu luholo lua gushimana.’ (1 Maf. 4:29) Gungima, tuza mutadila gifezegeselo gia Yesu, munu wakhalele nu ndunge jiavula gubalega athu agasue. (Mat. 12:42) Profesi imoshi yazuelele mukunda nu Yesu egi: ‘Nyuma ya Yehowa mbayikhala n’enji, mbayimuhana ndunge nu mbayimukuatesa ha gukotelesa ndaga muabonga.’—Yesh. 11:2.
3. Itshi tuza muzuelela mu longo edi?
3 Nzambi wahanele Salomo nu Yesu ndunge jiavula, jinyi jiaakuatesele ha guhana malongo a ndando anyi ajiya gutukuatesa mangino. Mu longo edi, tuza mumona malongo thathu adi muzuelela luholo luabonga lua gutadila makuta, mudimo wetu nu luholo tuajiya guditadila.
LUHOLO LUABONGA LUA GUTADILA MAKUTA
4. Luholo lutshi lujingu lua Salomo nu lua Yesu luakhalele lua gudisha mu ndaga yatadila umonyi?
4 Salomo wakhalele diago nu umonyi wavula, wakhalele nji nu inzo yabonga nu lujingu luabonga diago. (1 Maf. 10:7, 14, 15) Yesu gakhalelego nu makuta avula, gakhalelego nji nu inzo yenji hakhenji. (Mat. 8:20) Uvi mukut’awo agasue akhalele mutadila makuta mu luholo luabonga handaga ndunge jiawo jiakatugile gudi Yehowa Nzambi.
5. Itshi idi mumonesa egi Salomo wakhalele mutadila makuta mu luholo luabonga?
5 Salomo wazuelele egi makuta ana bata ‘ubambi.’ (Mulo. 7:12) Makuta ajiya gutukuatesa ha gusumba ima tudi nawo funu nu ima tudi mutshigina. Salomo wakhalele nu umonyi wavula, uvi wakotelesele egi gudi nu ima iko idi nu ndando yavula gubalega makuta. Ha gufezegesa, wasonegele egi: ‘Gukhala nu jina diabonga [nga nu ‘lukuma luabonga,’] gudi nu ndando yavula gubalega umonyi wavula.’ (Ish. 22:1) Salomo wakotelesele nji egi athu ana zumba makuta ana khala diago ndo nu gusuanguluga nu ima adi nayo. (Mulo. 5:10, 12) Watutemesele egi tushigo naye gusha mutshima mu makuta handaga ikhale tudi nu makuta guvula gutshi, gudi nu lusugu ajiya gutota.—Ish. 23:4, 5.
Luholo tuana tadila makuta, luana gutuhana njila ya guhaga ndaga jia Ufumu ha fundo dia thomo ba? (Tala paragrafe 6-7) *
6. Ha gutadila Matayo 6:31-33, itshi idi mumonesa egi Yesu wakhalele mutadila makuta mu luholo luabonga?
6 Yesu nji wakhalele mutadila makuta mu luholo luabonga. Wakhalele musuanguluga nu gudia nu gunua. (Luka 19:2, 6, 7) Lusugu lumoshi, wabalumuine meya abua matombe abonga. Yene ndaga ya thomo ya gushimana yakalegele muene. (Yone 2:10, 11) Lusugu lua gufua guenji, wakhalele nu mulele wa ndando yavula ha muila. (Yone 19:23, 24) Uvi Yesu gabembelego egi makuta azule fundo dia thomo mu monyo wenji. Wawambelele alandudi enji egi: “Muthu gajiyilego gukhala muhiga wa mafumu mbadi . . . Muajiyilego gukhala ahiga a Nzambi nu a Makuta.” (Mat. 6:24) Yesu wazuelele egi gula tuakamba thomo Ufumu, Yehowa mbawutuhana ima iko yagasue tudi nayo funu.—Tanga Matayo 6:31-33.
7. Gubonga gutshi phangi Daniel wahetele luholo wakhalele mutadila makuta mu luholo luabonga?
7 Aphangi’etu avula ahetele gale gubonga handaga akalegele malongo abonga ana gutuhana Yehowa mu ndaga yatadila makuta. Tutadile gifezegeselo gia phangi Daniel, udi ndumbu. Udi muzuela egi: “Tangua ngakhalele mukula, ngazudile desizio dia guhaga ndaga jia mu nyuma ha fundo dia thomo mu monyo wami.” Daniel wasombegesele ndaga jiko mu monyo wenji, yene yamukuatesele ha gudihana muavula mu mudimo wa Yehowa. Udi muzuela luko egi: “Mu guzuela guabonga, nganago gudibela mukunda nu desizio ngazudile. Idi yadiago egi, nga ngazudile desizio dia guhaga makuta ha fundo dia thomo, nga ngaahetele diago avula. Uvi makuta ajiyilego gubalega mafuta abonga ngahetele. Nga ngahagele makuta ha fundo dia thomo, nga ngushigo nu gusuanguluga ngudi nago mangino mu mudimo wa Yehowa. Ngajiyilego gufuanesa makuta nu ishimbigo yana gunguhana Yehowa.” Yadiago, tuana heta gusuanguluga guavula gula tudi muhaga ndaga jia mu nyuma ha fundo dia thomo, uvi makuta ndo.
LUHOLO LUABONGA LUA GUTADILA MUDIMO WETU
8. Ha gutadila Mulongeshi 5:18, 19, itshi idi mumonesa egi Salomo wakhalele mutadila mudimo mu luholo luabonga?
8 Salomo watamegele gusuanguluga tuajiya guheta mu mudimo wetu egi ‘kado ga Nzambi.’ (Tangua Mulongeshi 5:18, 19.) Wasonegele egi: ‘Muthu udi mukalagala mudimo wakola mbawuheta ishimbigo.’ (Ish. 14:23) Salomo wakhalele mujiya ndaga yakhalele muzuela muene. Wakhalele mutshitshi wa mudimo wakola! Watungile jinzo, wakunyile mahia a vinyo, wakhalele nu ilanga, wakhalele nji nu ijiba (pisine). Watungile nji membo. (1 Maf. 9:19; Mulo. 2:4-6) Wakalegele diago mudimo wakola. Mudimo wene wamubatele gusuanguluga. Uvi Salomo wakhalele mujiya egi ha gukhala diago nu gusuanguluga guavula, udi naye gukalagala ndaga jiko. Hene, wakalegele ndaga jiavula mukunda nu Yehowa. Ha gufezegesa, watungile tempelo yabonga diago mukunda nu gukombelela Yehowa. Mudimo wene wazudile ivo sambadi. (1 Maf. 6:38; 9:1) Gungima dia gukalagala midimo eyi yagasue, Salomo wakotelesele egi midimo ya mu nyuma idi nu ndando yavula gubalega midimo yenji iko. Wasonegele egi: ‘Gungima dia ndaga eji, ngudi guguwambela ndaga imoshi: Ulenge Nzambi, utumagele mikhuala yenji.’—Mulo. 12:13.
9. Luholo lutshi Yesu wamonesele egi mudimo wenji wa mabaya wakhalelego nu ndando yavula gubagalega?
9 Yesu wakhalele mutshitshi wa mudimo wakola. Hakhalele muene muvuala, wakhalele mukalagala mudimo wa mabaya. (Mako 6:3) Mvuaji jienji jiakhalele mutshita mudimo wakola ha guheta ima mukunda nu fami yawo, uvi idi yadiago egi akhalele nji musuanguluga nu ukuateshi wenji. Yesu wakhalele muthu watagana, wakhalele nji mukalagala mudimo wabonga diago. Hene yajiya gukhala egi, athu avula akhalele musuanguluga nu ima yenji. Yesu wakhalele musuanguluga nu mudimo wenji. Ikhale wakhalele mukalagala mudimo wenji muavula, uvi wakhalele nji muzula tangua dia gukombelela Yehowa. (Yone 7:15) Hasendesele muene gulongesa muavula, wawambelele athu akhalele gumutegelela egi: “Mukalagalago mudimo mukunda nu ima ya gudia idi mubola. Uvi kalagalenu mudimo mukunda nu ima ya gudia idi musala mukunda nu monyo wa ivo nu ivo.” (Yone 6:27) Mu Diskur dienji Holu dia Mulundu, Yesu wazuelele egi: “Bambelenu umonyi wenu mu dilu.”—Mat. 6:20.
Itshi tuajiya gutshita ha guheta tangua dia gukalagala midimo yetu nu dia gukalagala ndaga jia mu nyuma? (Tala paragrafe 10-11) *
10. Mu muheto utshi tuajiya gubua gula tudi mukalagala muabonga mudimo wetu?
10 Ndunge jiana gutuhana Nzambi jiana gutukuatesa ha gutadila mudimo wetu mu luholo luabonga. Luholo tudi Aklisto, tudi mujiya egi tudi naye gukalagala “mudimo wakola nu wabonga.” (Ef. 4:28) Matangua avula, mafumu etu a mudimo ana jiya egi tuana kalagala mudimo wakola nu tuanago gumba mambo. Ngenyi ajiya gutuwambela egi ana suanguluga muavula nu mudimo tuana kalagala. Ndaga eyi yajiya gutshita egi tusendese gukalagala mudimo matangua avula hagula egi, fumu wetu wa mudimo alandule gusuanguluga nu Matemue a Yehowa. Uvi gula tuatshita ngenyi, mbatushigo muheta tangua dia gukhala hamoshi nu enya fami yetu nu gukalagala ndaga mukunda nu Yehowa. Hene, tudi naye gusombegesa ndaga jiko hagula tuajiya guheta tangua dia gukalagala ndaga jia ndando.
11. Longo ditshi phangi William wazudile gudi phangi wana gutadila mudimo mu luholo luabonga?
11 Phangi William wakhalele mukalegela phangi mumoshi mudimo. Gifezegeselo gia phangi muene giamukuatesele ha gutadila mudimo wenji mu luholo luabonga. William udi muzuela egi: “[Phangi muene] wana tadila mudimo wenji mu luholo luabonga, udi diago gifezegeselo kiawaha. Wana kalagala mudimo wakola, wana gudivua nji muabonga nu ba client enji handaga wana tshita mudimo wenji muabonga. Uvi mu ngueze, gula mudimo wahua, ganago guwutangiza luko. Wana kalegela tangua nu ngolo jienji mukunda nu enya fami yenji nu mukunda nu Yehowa. Ngenyi wana khala diago nu gusuanguluga guavula!” *
LUHOLO LUABONGA LUA GUDITADILA
12. Luholo lutshi Salomo wamonesele egi wakhalele guditadila mu luholo luabonga? Uvi itshi yakalegele muene gungima?
12 Tangua Salomo wakhalele mukombeledi wagujinginyina wa Yehowa, wakhalele guditadila mu luholo luabonga. Hakhalele muene muvuala, wakhalele mujiya egi gudi nu ndaga jiko gashigo mujiya. Hene, wakambele utuameji wa Yehowa. (1 Maf. 3:7-9) Gu gisendeselo gia uhinyinyi wenji, Salomo wakhalele nji mujiya egi gukhala muenya lulendo gudi gingonza. Wasonegele egi: ‘Gutuama egi muthu abue, wana khala nu lulendo, gudihala nji guana tuameza muthu ha gubua mu gubola.’ (Ish. 16:18) Uvi gungima, Salomo hakhenji gakalegelego longo diene. Tangua dimoshi ngenyi, wabuile muenya lulendo nu watunyile gutumaga mikhuala ya Nzambi. Ha gufezegesa, mukhuala umoshi wakhalele muzuela egi fumu wa Isalele gashigo naye ‘guzula akhetu avula, handaga yajiya gumutuma ha gulumbugila Nzambi.’ (Mikh. 17:17) Salomo watunyine gutumagela mukhuala wene, wazudile akhetu 700 nu bamakangu 300, avula mukatshi diawo akhalelego akombeledi a Yehowa! (1 Maf. 11:1-3) Yajiya gukhala egi wakhalele mutangiza egi ndaga yene ishigo diago gingonza. Uvi gungima, Salomo wataganele nu malamba avula luholo luatunyile muene gutumagela Yehowa.—1 Maf. 11:9-13.
13. Malongo atshi tuajiya guzula gula tudi mutangigiza khadilo dia Yesu dia gudibulumuisa?
13 Yesu walanduile guditadila mu luholo luabonga, wakhalele nji nu khadilo dia gudibulumuisa. Gutuama egi aze ha mavu, wakalegele ndaga jiavula jiabonga mu mudimo wa Yehowa. “Ima idi mu dilu nu ima idi ha mavu,” yafugiwe mu njila ya Yesu. (Kol. 1:16) Yajiya gukhala egi mu tangua dia gubatijiwa guenji, Yesu wawungulugile ndaga jiakalegele muene hakhalele muene mu dilu nu Sh’enji. (Mat. 3:16; Yone 17:5) Uvi ndaga jiene jiamutuminego ha gubua nu lulendo. Gakhalelego nji gudihala egi wabalega athu ako. Wawambelele alandudi egi gajilego ha mavu “hagula athu amukalegele mudimo, uvi wajile ha gukalegela athu mudimo nu guhana monyo wenji gifua gibawu mukunda nu athu avula.” (Mat. 20:28) Wazuelele nji egi gajiyilego gutshita nga ndaga imoshi mu gutshigina guenji hakhenji. (Yone 5:19) Yesu wakhalele diago muthu wa gudibulumuisa! Watuhanele gifezegeselo giabonga gia gulandula.
14. Gula tudi mutangiza egi tushigo nu ndando, longo ditshi tuajiya guzula mu ndaga jiazuelele Yesu?
14 Yesu walongesele alandudi enji ha guditadila mu luholo luabonga. Lusugu lumoshi waawambelele egi: “Sanga dia mu mito yenu, muene wana guditanga diagasue.” (Mat. 10:30) Mbimbi eji jiajiya gutuhana gikhesa gula tuasendesa gutangiza egi tushigo nu ndando. Jidi nji gutumonesa egi Tata wetu wa dilu, wana gudisagesa mukunda nu esue handaga tuana khala nu ndando gu meso enji. Gula Yehowa watuhana njila ha gumukombelela nu watangiza egi tudi tuatagana ha guheta monyo mu mavu ahe-ahe, tushigo naye gutangiza egi wadihuigi.
Itshi yajiya gubua gula tushigo guditadila mu luholo luabonga? (Tala paragrafe 15) *
15. (a) Inzo Yaleha ya Mutaledi imoshi yamonesele egi tudi naye guditadila luholo lutshi? (b) Gula tudi gudihana muavula mu ndaga jietu, ndaga jitshi jiabonga tuajiya gudifula? (Tala gifuanesa gidi ha diyiji 24)
15 Ivo 15 yabalega gale, Inzo Yaleha ya Mutaledi imoshi yamonesele luholo tudi naye guditadila. Idi muzuela egi: “Yadiago, tushigo naye gutangiza egi tudi nu ndando yavula gubalega athu ako, nga gutangiza egi tushigo nu ndando nga hazonda. Uvi tudi naye guzula desizio dia guditadila mu luholo luabonga, yakotelesa egi tudi naye gujiya egi gudi nu ndaga tuana kalagala muabonga nu jinyi tuajiyilego gutshita muabonga. Phangi mumoshi wa mukhetu udi muzuela egi: ‘Ngushigo diago muthu wabola, uvi ngushigo nji muthu wabonga gubalega. Gudi nu ndaga ngana kalagala muabonga nu jinyi ngajiyilego gutshita muabonga, idi nji luholo lumoshi nu athu agasue.’” * Tuamona diago mukunda natshi idi nu ndando egi tukhale guditadila mu luholo luabonga.
16. Mukunda natshi Yehowa wana gutuhana malongo abonga?
16 Yehowa wana gutuhana malongo abonga mu njila ya Biblia. Wana gutuzumba nu wana tshigina egi tukhale nu gusuanguluga. (Yesh. 48:17, 18) Gukalagala ndaga jiana suanguluisa Yehowa, idi desizio diabalega ndando tuajiya guzula mu monyo wetu nu mbaditubatela gusuanguluga guavula. Gula tuatshita ngenyi, mbatushigo mutagana nu malamba ana gubuila athu anyi ana tadila makuta nu midimo yawo mu luholo luabola nga anyi ana gudimona egi abalega athu ako. Mukut’etu agasue tuzulenu desizio dia gukhala athu atema nu ha gusuanguluisa mutshima wa Yehowa!—Ish. 23:15.
LUNGIMBO 94 Merci, Jéhovah, pour ta Parole
^ Salomo nu Yesu akhalele nu ndunge jiavula diago. Yehowa Nzambi waahanele ndunge jiene. Mu longo edi, tuza mumona malongo tuajiya guzula mu ndaga jiazuelele Salomo nu Yesu mu ndaga yatadila luholo luabonga lua gutadila makuta, mudimo wetu nu luholo tuajiya guditadila. Tuza nji mumona luholo aphangi’etu ako akalegele malongo a Biblia mu ndaga eji nu gubonga ahetele.
^ Tala longo “Comment prendre plaisir à travailler dur” mu Inzo Yaleha ya Mutaledi ya 1 Fevrier 2015.
^ Tala longo “La Bible peut vous aider à trouver la joie” mu Inzo Yaleha ya Mutaledi ya 1 Aout 2005.
^ UKOTELESHI WA IFUANESA: Phangi John nu phangi Tom akhala mu hungu dimoshi. John udi mubalegesa tangua diavula ha guweva gamiyo genji. Uvi Tom udi mukalegela gamiyo genji ha gukuatesa aphangi ako ha guya mu mudimo wa gulongesa nu mu gudibungisa gua mu hungu.
^ UKOTELESHI WA IFUANESA: John udi mukalagala mudimo wenji uu nu phipha handaga udi mutshigina gusuanguluisa fumu wenji wa mudimo. Hene tangua diagasue fumu wana gumutoga ha gutshita mudimo, wana tshigina genji. Mu nguenze yene imoshi, Tom udi mukuateshi wa mudimo, waya mutuala mukulu mumoshi ha gutala phangi mumoshi wa mukhetu. Tom wawambelele fumu wenji wa mudimo egi nguenze jiavula, wana kalagala ndaga jia mu nyuma, ngenyi gajiyilego gutshita mudimo uko mu matangua ene.
^ UKOTELESHI WA IFUANESA: John wana gudihana muavula mu ndaga jienji. Uvi Tom wana haga ndaga jia mu nyuma ha fundo dia thomo. Waheta mafuta avula tangua diaya muene mulondega Salle d’assemblée.
