LONGO DIA 39
Jina Diaye Didi mu “Mukanda wa Monyo” ba?
‘Mukanda wa giwungulugilo wasonegewe gutuama dienji mukunda nu athu ana guvila Yehowa woma.’—MAL. 3:16.
LUNGIMBO 61 Témoins, en avant !
NDAGA JIDI MU LONGO EDI *
Sendese mualeha, Yehowa wana lezela majina a athu mu “mukanda wa monyo” (Tala paragrafe 1-2)
1. Ha gutadila Malaki 3:16, mukanda utshi Yehowa wana sonegega nu itshi idi mu mukanda wene?
SENDESE mualeha, Yehowa wana sonega mukanda umoshi wa ndando yavula. Mukanda wene udi nu majina a athu. Udi musendesa nu jina dia Abele muthu wa thomo wasalele ya gujinginyina gudi Nzambi. * (Luka 11:50, 51) Mangino mukanda wene udi nu majina avula mukatshi handaga Yehowa wana lezela majina a athu. Biblia yana tamega mukanda wene egi “mukanda wa giwungulugilo,” “mukanda wa monyo,” nu “rulo ya monyo.” Mu longo edi tuza mukalegela mbimbi “mukanda wa monyo.”—Tanga Malaki 3:16; Gumo. 3:5; 17:8.
2. Majina a akuatshi adi mu mukanda wa monyo nu itshi tuajiya gutshita hagula majina etu asonegewe?
2 Mukanda wene wa ndando udi nu majina a akombeledi a Yehowa anyi ana gumuvila woma nu ana gumuzumba. Adi nu luendu lua guheta monyo wa ivo nu ivo. Mangino majina etu ajiya gusonegewa mu mukanda wene gula tudi mutshita ngolo ha gukolesa ufuta wetu nu Yehowa mu njila ya mulambu wa mun’enji Yesu Klisto. (Yone 3:16, 36) Mukut’etu agasue tuana tshigina egi majina etu asonegewe mu mukanda wene ikhale tudi nu felela dia guya mu dilu nga dia gujinga ha mavu.
3-4. (a) Gula jina dietu didi mu mukanda wa monyo mangino, idi mukotelesa egi mbatuheta monyo wa mayilago? Kotelesa. (b) Itshi tuza muzuelela mu longo edi nu mu longo dialandula?
3 Idi mukotelesa egi athu agasue adi nu majina mu mukanda wene mbaaheta monyo wa mayilago ba? Ha guheta mvutu, tutadilenu mbimbi jiazuelele Yehowa mu Guzoga 32:33. Wazuelele egi: ‘Muthu yago wangutshitshile gubola, mbangukatula jina dienji mu mukanda wami.’ Majina adi mu mukanda wene mangino ajiya gukatudiwa nga gumuangewa. Idi gifua Yehowa wana sonega majina ene nu crayon. (Gumo. 3:5) Tudi naye gutshita yagasue hagula jina dietu disale mu mukanda wene uu nu tangua mbadisonegewa nu bic yakotelesa mayilago.
4 Ndaga yene yajiya gututuma ha gudihula mihu yavula. Ha gufezegesa, itshi Biblia yana zuela mukunda nu athu anyi majina awo adi agusonega mu mukanda wa monyo nu anyi majina ashigo mu mukanda wene? Athu anyi majina mbaasala mu mukanda wene, mbaaheta monyo wa ivo nu ivo tangua ditshi? Itshi mbayikalegewa mukunda nu athu anyi a hetelego luendu lua gujiya Yehowa gutuama egi afue? Majina awo ajiya gusonegewa nji mu mukanda wene ba? Tuza muheta mvutu mu longo edi nu mu longo dialandula.
MAJINA A AKUATSHI ADI MU MUKANDA WA MONYO?
5-6. (a) Luholo Filiphi 4:3 idi guyimonesa, majina a akuatshi adi nji mu mukanda wa monyo? (b) Tangua ditshi majina awo mbaasonegewa mayilago mu mukanda wene?
5 Majina a akuatshi adi agusonega mu mukanda wa monyo? Ha guheta mvutu, tuza muzuelela mahunji thano agudisha. Mukatshi dia mahunji hene, athu ako majina awo adi mu mukanda wa monyo uvi ako ndo.
6 Hunji dia thomo didi athu atombewe ha guhinyina nu Yesu mu dilu. Majina awo adi agusonega mu mukanda wa monyo ba? Ewa. Ndaga jiazuelele mupostolo Phaula mukunda nu ‘mafut’enji a mudimo’ a gu Filiphi, jidi mumonesa egi mangino majina a athu mbaahinyina nu Yesu, adi mu mukanda wa monyo. (Tanga Filiphi 4:3.) Hagula majina awo asale mu mukanda wene wa gifuanesa, adi naye gusala agujinginyina gudi Yehowa. Gula ambiwa njimbu ya gisugishilo, majina awo mbaasonegewa mayilago mu mukanda wene. Ndaga yene mbayikalegewa gutuama egi afue nga gutuama egi lamba diakola disendese.—Gumo. 7:3.
7. Ha gutadila Gumonesa 7:16, 17, tangua ditshi majina a thundu yakoma ya athu mbaasonegewa mayilago mu mukanda wa monyo?
7 Hunji dia mbadi didi thundu yakoma ya athu. Majina awo adi agusonega mu mukanda wa monyo ba? Ewa. Gungima dia guhuluishiwa guawo mu Alemagedona majina ene mbaasala mu mukanda wa monyo ba? Ayi. (Gumo. 7:14) Yesu wazuelele egi athu ene “mbaheta monyo wa mayilago.” (Mat. 25:46) Uvi athu awa mbaahuluishiwa mu Alemagedona, mbaashigo muheta monyo wa mayilago mu tangua diene. Majina awo mbaasala agusonega mu mukanda wa monyo nu crayon. Mu Uhinyinyi wa Ivo 1000, Yesu “mbawukhala mubambi wawo nu mbawaatuameza gu ito ya meya a monyo.” Athu anyi mbaalandula utuameji wa Klisto nu mbaasala yagujinginyina gudi Yehowa mu gulolewa gua gisugishilo, majina awo mbaasonegewa mayilago mu mukanda wa monyo.—Tanga Gumonesa 7:16, 17.
8. Akuatshi majina awo ashigo mu mukanda wa monyo nu itshi mbayabuila?
8 Hunji dia thathu didi khombo, athu anyi mbaashiyiwa mu Alemagedona. Majina awo ashigo mu mukanda wa monyo. Yesu wazuelele egi: “Mbaafua gufua gua mayilago.” (Mat. 25:46) Mu ukuateshi wa nyuma ya Nzambi, Phaula wazuelele egi: “Fumu wetu mbawusophesa athu wawa, mbaaheta ndola ya gufua gua mayilago.” (2 Tes. 1:9; 2 Phet. 2:9) Idi nji luholo lumoshi nu athu ana kalagala ndaga jiabola mukunda nu nyuma ya Nzambi. Athu ene mbaashigo mujinga ivo nu ivo, uvi mbaafua gufua gua mayilago. Idi yadiago egi mbaashigo mufuzumuga. (Mat. 12:32; Mako 3:28, 29; Heb. 6:4-6) Henyaha tuzuelelenu mahunji mbadi a athu anyi mbaafuzumuga ha mavu.
ATHU MBAAFUZUMUGA
9. Ha gutadila Makalegelo 24:15, akuatshi mbaafumuzumuga ha mavu? Gudisha gutshi gudi mukatshi dia athu ene?
9 Biblia yana zuelela mahunji mbadi a athu mbaafuzumuga nu felela dia gujinga mayilago ha mavu, “athu abonga nu athu abola.” (Tanga Makalegelo 24:15.) “Athu abonga” adi athu anyi akalegele Yehowa nu gujinginyina guagasue uu nu gu gufua. Uvi, “athu abola” akalegelego Yehowa gutuama egi afue. Makalegelo awo akhalelego diago abonga. Luholo mahunji awa mbadi mbaafuzumuga, tuajiya guzuela egi majina awo adi nji mu mukanda wa monyo ba? Ha guheta mvutu, tuzuelelenu ndaga yatadila mahunji ene.
10. Mukunda natshi “athu abonga” mbaafuzumuga? Luendu lutshi athu ako mukatshi diawo mbaaheta? (Tala nji “Mihu Yana Guhula Athu Ana Gutanga Mikanda Yetu” idi muzuelela gufuzumuga gua athu ha mavu mu Inzo Yaleha ya Mutaledi eyi)
10 Hunji dia nguana didi “athu abonga.” Gutuama egi afue, majina awo asonegewe mu mukanda wa monyo. Majina ene akatudiwe mu mukanda wene tangua afile ba? Ndo sha, handaga mu matangi a Yehowa wawa gawo nu “monyo.” Yehowa “gashigo Nzambi wa athu a gufua, uvi Nzambi wa athu a monyo, handaga gu meso enji mukut’awo agasue adi nu monyo.” (Luka 20:38) Idi mukotelesa egi tangua athu abonga mbaafuzumuga, majina awo mbaakhala mu mukanda wa monyo, uvi mbaakhala agusonega thomo “nu crayon.” (Luka 14:14) Athu ako mukatshi diawo mbaaheta luendu lua gukalagala gifua ‘mafumu ha mavu agasue.’—Ngi. 45:16.
11. Itshi “athu abola” mbakhala nayo funu gutuama egi majina awo asonegewe mu mukanda wa monyo?
11 Hunji dia suga idi “athu abola.” Yajiya gukhala egi akalegele ndaga jiabola gutuama egi afue handaga jiyilego mikhuala ya Yehowa. Hene majina awo asonegewego mu mukanda wa monyo. Yehowa mbawafuzumuna nu mbawaahana luendu hagula majina awo ajiya gusonegewa mu mukanda wene. “Athu [awa] abola” mbaakhala diago nu funu ya ukuateshi. Gutuama egi afue, ako mukatshi diawo akalegele ndaga jiabola diago. Mbaalongesewa ha gujiya luholo lua gujinga mu gudivua nu mikhuala ya Yehowa. Ha guakuatesa, Ufumu wa Nzambi mbawutuameza mudimo wakoma wa gulongesa ha mavu agasuee.
12. (a) Akuatshi mbaalongesa athu abola? (b) Itshi mbayibuila athu mbaatuna gukalegela ndaga mbaalonguga?
12 Akuatshi mbaalongesa athu abola? Thundu yakoma ya athu nu athu abonga anyi mbaafuzumuga. Gutuama egi majina a athu abola asonegewe mu mukanda wa monyo, mbaakhala thomo nu funu ya gukolesa ufuta wawo nu Yehowa nu gudihana gudi muene. Yesu Klisto nu athu mbaahinyina n’enji, mbaatala muabonga ha gujiya gula athu abola mbaatumagela ndaga mbaalongesewa. (Gumo. 20:4) Muthu wagasue mbawutuna ukuateshi wene mbawushiyiwa ngatshima udi nu ivo 100. (Yesh. 65:20) Yehowa nu Yesu ana mona ndaga jidi mu mitshima ya athu, mbaashigo mubemba egi nga muthu mumoshi atshite gubola mu mavu ahe-ahe.—Yesh. 11:9; 60:18; 65:25; Yone 2:25.
ATHU MBAAFUZUMUGA HA GUHETA MONYO NU ANYI MBAASOPHESEWA
13-14. (a) Mu ivo yabalega, luholo lutshi tuakhalele mukotelesa mbimbi jiazuelele Yesu mu Yone 5:29? (b) Itshi tudi naye gujiya mukunda nu mbimbi jiene?
13 Yesu wazuelele nji ndaga yatadila athu anyi mbaafuzumuga ha gujinga ha mavu. Ha gufezegesa, wazuelele egi: “Tangua didi muza, athu agasue adi mu malumba mbaavua dijui dienji nu mbaazoga. Athu anyi akalegele ndaga jiabonga, mbaafuzumuga ha guheta monyo. Uvi anyi akalegele ndaga jiabola, mbaafuzumuga ha gusophesewa.” (Yone 5:28, 29) Itshi Yesu watshiginyile guzuela?
14 Mu ivo yabalega, tuakhalele mukotelesa egi Yesu wakhalele muzuelela ndaga mbajikalagala athu gungima dia gufuzumuga guawo; yakotelesa egi athu ako anyi mbaafuzumuga, mbakalagala ndaga jiabonga uvi ako mbakalagala ndaga jiabola. Yesu gazuelelego egi athu anyi mbaafuzumuga mbakalagala ndaga jiabonga nga ndo mbakalagala ndaga jiabola. Uvi wakhalele muzuelela athu “akalegele ndaga jiabonga” nu anyi “akalegele ndaga jiabola.” Idi mumonega egi athu ene akalegele ndaga jiene gutuama egi afue. Idi diago ukoteleshi wabonga handaga mbaashigo mubemba nga muthu mumoshi ha gukalagala ndaga jiabola mu mavu ahe-ahe. Idi naye gukhala egi athu abola akalegele ndaga jiene jiabola gutuama egi afue. Na mbimbi jiazuelele Yesu mukunda nu ‘gufuzumuga ha guheta monyo’ nu ‘gufuzumuga ha gusophesewa,’ jidi mukotelesa itshi?
15. Akuatshi “mbaafuzumuga ha guheta monyo”? Mukunda natshi?
15 Athu akalegele ndaga jiabonga gutuama egi afue “mbaafuzumuga ha guheta monyo,” handaga majina awo mbaakhala agusonega mu mukanda wa monyo. Idi mukotelesa egi gufuzumuga gua “athu anyi akalegele ndaga jiabonga” ana zuelela mu Yone 5:29 gudi luholo lumoshi nu gufuzumuga gua “athu abonga” ana zuelela mu Makalegelo 24:15. Ukoteleshi owu udi gudivua nu mbimbi jidi mu Roma 6:7 idi muzuela egi: “Gula muthu wafua, wana futa mukudi wa gubola guenji.” Tangua athu abonga ana gufua, Yehowa wana guatotesela gubola guawo uvi wana wunguluga ndaga jiabonga akalegele tangua akhalele nu monyo. (Heb. 6:10) Hagula majina a athu abonga anyi mbafuzumuga asale mu mukanda wa monyo, adi naye gusala yagujinginyina gudi Yehowa.
16. ‘Gufuzumuga ha gusophesewa’ gudi mukotelesa itshi?
16 Isthi mbayikalegewa mukunda nu athu anyi akalegele ndaga jiabola gutuama egi afue? Ngatshima tangua afile afutshile mukudi wa gubola guawo, akalegelego Yehowa tangua akhalele nu monyo. Majina awo asonegewego mu mukanda wa monyo. Hene gufuzumuga gua “athu anyi akalegele ndaga jiabola,” gudi luholo lumoshi nu gufuzumuga gua “athu abola” ana zuelela mu Makalegelo 24:15. Athu ene “mbaafuzumuga ha gusophesewa.” * Yakotelesa egi Yesu mbawutala muabonga ha gujiya gula athu abola mbatumagela mikhuala ya Nzambi nga ndo. (Luka 22:30) Mbayizula tangua ha gujiya gula athu ene adi atagana hagula majina awo asonegewe mu mukanda wa monyo. Majina awo mbaasonegewa mu mukanda wene phamba gula abemba makalegelo awo abola nu adihana gudi Yehowa.
17-18. Itshi athu agasue anyi mbaafuzumuga adi naye gutshita? “Makalegelo” atshi adi muzuelela mu Gumonesa 20:12, 13?
17 Athu anyi mbafuzumuga, ikhale akalegele ndaga jiabonga nga jiabola gutuama egi afue, adi naye gutumagela mikhuala mbayikhala mu rulo jihe-jihe jinyi mbajikangudiwa mu uhinyinyi wa ivo 1000. Mupostolo Yone wazuelele egi: “Ngamonele athu a gufua akoma nu azonda, a gumagana gutuama dia nguasa ya ufumu, rulo jiakangudiwe. Uvi rulo iko yakangudiwe; idi rulo ya monyo. Athu a gufua asophesewe mu gudivua nu ndaga jidi jia gusonega mu rulo jiene ha gutadila makalegelo awo.”—Gumo. 20:12, 13.
18 Athu anyi mbaafuzumuga mbaasophesewa mukunda nu ndaga jitshi? Mbayikhala mukunda nu makalegelo akhalele nawo gutuama egi afue? Ndo sha! Handaga afutshile mukudi wa gubola guawo tangua afile. Hene, “makalegelo” adi muzuelela haha ishigo anyi akhalele nawo gutuama egi afue. Uvi, idi makalegelo anyi mbaamonesa tangua mbalongesewa mu mavu ahe-ahe. Ikhale akombeledi a Yehowa a gujinginyina gifua Nowa nu Samuele nu Davidi nu Danyele mbaalonguga ndaga jiatadila Yesu nu gusha gutshigina mu mulambu wenji. Idi yadiago egi athu abola mbakhala nu ndaga jiavula jiagulonguga!
19. Itshi mbayibuila athu mbaatuna gutumagela ndaga mbaalonguga?
19 Itshi mbayibuila athu mbaatuna gutumagela ndaga mbaalonguga? Gumonesa 20:15 idi muzuela egi: “Muthu yagasue yonu jina dienji diakhalelego dia gusonega mu mukanda wa monyo wabishidiwe mu kianga gia tshuya.” Ayi, mbaashiyiwa mayilago. Hene tudi naye gutshita yagasue hagula jina dietu disonegewe mu mukanda wa monyo nu disale muene!
Phangi mumoshi wa yala udi mutshita mudimo wakoma wa gulongesa unu mbawukalegewa mu uhinyini wa ivo 1000 (Tala paragrafe 20)
20. Mudimo utshi mbawukalegewa mu Uhinyinyi wa Ivo 1000? (Tala gifuanesa holu dia gizula.)
20 Mu Uhinyinyi wa Ivo 1000 mbayikhala diago tangua diagusuanguluga! Mbatukalagala mudimo wakoma wa gulongesa ha mavu. Mbayikhala nji tangua mbaatadila makalegelo a athu abonga nu a athu abola. (Yesh. 26:9; Makal. 17:31) Luholo lutshi mudimo wene wa gulongesa mbawukalegewa? Longo dialandula mbaditukuatesa ha gukotelesa nu ha gusuanguluga nu mudimo wene.
LUNGIMBO 147 La promesse de la vie éternelle
^ Mu longo edi tuza mumona usombegeshi mu luholo tuakhalele mukotelesa mbimbi ‘gufuzumuga ha guheta monyo’ nu ‘gufuzumuga ha gusophesewa’ jiazuelele Yesu mu Yone 5:28, 29. Tuza mumona gula gufuzumuga guene mbadi gudi mukotelesa itshi nu akuatshi mbaafuzumuga ha guheta monyo nu akuatshi mbaasophesewa.
^ Asendesele gusonega majina a athu mu mukanda wene “sendese gu gisendeselo gia mavu,” yakotelesa athu adi nu luendu lua guheta gubonga gua mulambu wahanele Yesu. (Mat. 25:34; Gumo. 17:8) Idi mumonega egi Abele udi muthu wa thomo wasonegewe mu mukanda wa monyo.
^ Thomo tuakhalele muzuela egi mbimbi “gusophesa” adi muzuelela mu Yone 5:29 yana kotelesa desizio ana zula ha guhana muthu ndola. Mangino, mbimbi “gusophesa” yajiya nji gukhala nu ukoteleshi wa luholo lumoshi. Uvi mu verse eyi, idi mumonega egi Yesu wakalegele mbimbi “gusophesa” ha guzuelela ndaga yana kalegewa ha gutala gula muthu udi mutshita ndaga imoshi muabonga nga ndo, gifua luholo mukanda umoshi wana kotelesa Biblia (Greek lexicon) udi muzuela egi: “Gutadila muabonga makalegelo a muthu.”
