1. Itshi yajiya gutukuatesa ha gujiya egi phangi mumoshi udi muthu wa gushila mutshima?

 MUTHU ana shila mutshima wana tagenesa ndaga jiana zuela muene nu wana zuela giamatshidia. (Ngi. 15:4) Athu ana ajiya egi udi muthu ajiya gushila mutshima. Esue nji tuana tshigina egi aphangi’etu amone egi tudi athu a luholo elu. Itshi tuajiya gutshita hagula akhale gutushila mutshima?

2. Luholo lutshi tuajiya gumonesa egi tudi athu agushila mutshima?

² Tuajiyilego gushinjiga athu ako ha gutushila mutshima. Ndaga tuana tshita jiene jiajiya guatuma ha gutushila mutshima. Tuajiya gufuanesa gushila muthu mutshima nu makuta. Ha guheta makuta yana khala lamba; uvi yana khala yaleba ha guatotesa. Yehowa udi diago muthu wa gushila mutshima. Mbagashigo mutshita ndaga yajiya gututuma ha gutuna gumushila mutshima, handaga ‘ndaga jiagasue jiana kalagala muene jiana khala jiatagana ha gushila mutshima.’ (Ngi. 33:4) Wana tshigina egi tulandule gifezegeselo gienji. (Ef. 5:1) Tutadilenu ifezegeselo ya akombeledi a Yehowa anyi alanduile gifezegeselo gienji nu amonesele egi adi athu a gushila mutshima. Tuza nji mumona makalegelo thano tudi naye gumonesa hagula athu akhale gutushila mutshima.

3-4. Luholo lutshi Danyele wamonesele egi wakhalele muthu wa gushila mutshima? Gifezegeselo gienji gidi gututuma ha gutshita itshi?

³ Profete Danyele wakhalele diago muthu wa gushila mutshima. Ngatshima wakhalele mu uhiga gu Babilona, wakalegele ndaga jiamonesele egi udi muthu ajiya gushila mutshima. Athu asendesele gumushila diago mutshima, tangua Yehowa wamukuatesele  ha guhana ukoteleshi wa nzoji ya Nebukadenezale Fumu wa gu Babilona. Lusugu lumoshi, Danyele wakhalele naye guwambela fumu egi Yehowa gashigo musuanguluga n’enji, uvi fumu gakhalelego nu funu ya gutegelela mbimbi jia luholo elu. Yakhalele mutoga gikhesa, handaga Nebukadenezale wakhalele muenya khabu jiakola! (Dan. 2:12; 4:20-22, 25) Ivo yavula gungima, Danyele wamonesele egi udi diago muthu wa gushila mutshima hakotelesele muene mbimbi jia gushimana jiazogele gu gibayi gia inzo ya fumu wa gu Babilona. (Dan. 5:5, 25-29) Gungima, Daliyuse ya gu Mede nu mafumu atombele muene akotelesele egi Danyele wakhalele nu ‘nyuma ya gushimana.’ Akhalele mujiya egi Danyele wakhalele ‘muthu wa gushila mutshima, wakhalele mutshita mudimo muabonga nu gakhalelego nga nu ndaga imoshi yabola.’ (Dan. 6:3, 4) Ikhale mafumu anyi akhalelego mukombelela Yehowa, akotelesele egi Danyele wakhalele muthu wa gushila mutshima!

⁴ Gifezegeselo gia Danyele gidi gututuma ha gudihula egi: ‘Makalegelo a luholo lutshi ngana khala nawo mukatshi dia athu anyi ashigo Matemue a Yehowa? Athu ana jiya egi ngana tagenesa inememo yami muabonga nu ngudi muthu wa gushila mutshima ba?’ Mukunda natshi idi nu ndando ha gudihula mihu eyi? Handaga gula tudi athu agushila mutshima, mbatutumbuisa Yehowa.

5. Mukunda natshi Hananiya wakhalele muthu wa gushila mutshima?

⁵ Mu 455 G.G.Y., tangua Guvelenele Nehemiya wakhalele mutunga luko ibayi ya Yelusalema, watombele athu akhalele muene mushila  mutshima ha gubamba dimbo muabonga. Nehemiya watombele Hananiya ha gukhala fumu wa inzo yakola. Biblia idi mumonesa egi Hananiya wakhalele ‘muthu wa gushila mutshima, wakhalele nji muvila Nzambi wa giamatshidia woma muavula gubalega athu ako.’ (Neh. 7:2) Wakhalele mutagenesa muabonga inemo yagasue akhalele gumuhana handaga wakhalele muzumba Yehowa nu wakhalele gumuvila woma. Makalegelo awa mbaatukuatesa nji ha gutagenesa muabonga mudimo tuana kalegela Nzambi.

6. Mukunda natshi Phaula wakhalele mushila Tishike mutshima?

⁶ Tuzuelelenu gifezegeselo gia Tishike, munu mupostolo Phaula wakhalele mushila mutshima. Tangua Phaula wakhalele mu bologo, wakhalele mushila Tishike mutshima hene wazuelele egi udi “mukuateshi wa gufubidila.” (Ef. 6:21, 22) Phaula wakhalele gumushila mutshima handaga Tishike wakhalele mubatela aphangi a gu Efeso nu a gu Kolosai mikanda nu wakhalele nji guahana gikhesa. Gifezegeselo gia Tishike gidi gutuwunguluisa aphangi tuana shila mutshima anyi ana gutuhana ima ya gudia ya mu nyuma mangino.—Kol. 4:7-9.

7. Longo ditshi wajiya guzula luholo akulu nu akuateshi a mudimo ana khala athu a gushila mutshima?

⁷ Mangino, tuana suanguluga muavula nu akulu nu akuateshi a mudimo handaga adi athu agushila mutshima. Ana tshita ngolo ha gutagenesa inemo yawo gifua muatshitshile Danyele, Hananiya nu Tishike. Ha gufezegesa tangua tuanaya mu gudibungisa gua mukatshi dia phoso, tuanago gudihula gula ba devuare agasue akhaphewe. Akulu ana suanguluga muavula gula aphangi ahanewe ba devuare adilondega muabonga nu a akalagala mu gudibungisa! Tangua tuana tamega athu tuana longesa Biblia mu gudibungisa gua musuga ya phoso, tuana jiya egi gudi nu phangi wuza mutshita diskur. Tuana sha nji mutshima egi mikanda tuana kalegela mu mudimo wa gulongesa mbayikhala guene. Tuana hana Yehowa mersi avula mukunda nu aphangi awa handaga ana gutukuatesa muavula! Itshi iko tudi naye gutshita ha gumonesa egi tudi athu a gushila mutshima?

8. Itshi tushigo naye gutshita tuangua tudi mukamba gujiya gula aphangi adi gikuatshi? (Ishima 11:13)

⁸ Tuana zumba aphangi’etu, hene tuana kamba gujiya gula adi gikuatshi. Uvi tushigo naye gukamba gujiya ndaga jiawo jiagasue. Mu hungu dia Uklisto dia mu siekle ya thomo, athu ako akhelele ‘enya lufeto, akhalele gudinginyisa mu ndaga jiangane nu guzuela ndaga ashigo naye guzuela.’ (1 Tim. 5:13) Esue tuana tshigina ndo gukhala gifua ene. Uvi tangiza gale egi muthu mumoshi watutela ndaga yamutadila nu watuwambela egi tuwambelago athu ako. Ha gufezegesa, phangi mumoshi wa mukhetu wajiya gutuwambela misongo yana kata muene nga malamba ako adi mutagana nawo, gungima watuwambela egi tutelago athu ako. Tudi naye gubamba gisuegi giene. * (Tanga Ishima 11:13.) Henyaha tutadilenu mu ndaga jitshi jiko tudi naye gubamba gisuegi.

9. Luholo lutshi enya fami ajiya gumonesa egi adi athu a gushila mutshima?

⁹ Mu fami. Muthu wagasue udi naye gubamba gisuegi gia mu fami yawo. Ha gufezegesa, phangi mumoshi wa mukhetu wajiya gukhala nu khadilo dimoshi diana lelesa mulumi’enji. Mulumi’enji wajiya guwambela athu ako ndaga  yene ha gumuvisa sonyi ba? Ndo sha! Wana zumba mukaji’enji hene gajiyilego gukalagala ndaga yajiya gumusagesa. (Ef. 5:33) Mavuala ana tshigina egi athu a akalegele ndaga mu luholo luabonga. Mvuanji ashigo naye gujimbila ndaga yene. Ashigo naye guwambela athu ako ndaga jiabola an’awo ana kalagala ha gutuna guavuisa musonyi. (Kol. 3:21) Ana nji, adi naye gubamba ndaga jia gisuegi, ashigo naye gutela athu ndaga jiajiya gusagesa athu ako mu fami yawo. (Mikh. 5:16) Gula muthu wagasue mu fami udi mutshita ngolo ha gubamba gisuegi gia mu fami yawo, mbaakhala diago gudishila mutshima.

10. Itshi yana monesa egi muthu udi futa diabonga? (Ishima 17:17)

¹⁰ Mafuta. Matangua ako muthu wagasue wana tshigina guwambela futa dienji wakola luholo ludi gudivua muene. Yajiya gukhala lamba ha gutshita ngenyi matangua ako. Yajiya gukhala egi yana khala lamba ha guwambela muthu ndaga jidi mu mutshima wetu. Gula tuajiya egi futa dietu mumoshi wawambela athu ako ndaga tuamutela yajiya gutusagesa muavula. Idi yadiago egi tuana suanguluga muavula nu muthu wana bamba gisuegi! Udi ‘futa diabonga.’—Tanga Ishima17:17.

11. (a) Luholo lutshi akulu nu akaji’awo ana monesa egi adi athu a gushila mutshima? (b) Longo ditshi tuajiya guzula gudi mukulu wana tuna guwambela enya fami yenji ndaga jia gisuegi jia aphangi? (Tala gifuanesa.)

¹¹ Mu hungu. Akulu anyi ana bamba gisuegi adi ‘fundo dia gudisuega ha gulenga funji, fundo dia gulengela’ mukunda nu aphangi’awo. (Yesh. 32:2) Tuajiya guwambela akulu ndaga jiagasue jidi gutusagesa nu gusha mutshima egi mbaashigo muwambela athu ako. Tushigo naye guashinjiga ha gutuwambela ndaga jia gisuegi. Tudi mushimana akaji’a akulu handaga anago gutoga alumi’awo ha guawambela ndaga jia gisuegi jia aphangi ako. Idi diago ndaga yabonga ha gujiya egi akaji’a akulu anago guzuelela ndaga jiatadila aphangi a mala nu a akhetu. Mukaji’a mukulu mumoshi udi muzuela egi: “Ngudi nu gusuanguluga handaga mulumi’ami gana gunguwambela ndo majina a  aphangi ana gumutamega ha gukamba ukuateshi wa akulu. Gana gungutela nji ndo ndaga jiawo jia gisuegi. Gutshita ngenyi guana gungukuatesa ha gutuna gudinginyisa mu mulonga ushigo gungutadila. Yana gungukuatesa nji ha guta maga nu aphangi agasue mu hungu. Ngana sha mutshima egi gula ngawambela mulumi’ami ndaga idi gungusagesa, mbawubamba gisuegi giene.” Mukut’etu agasue tuana tshigina egi tukhale athu a gushila mutshima. Henyaha tuzuelelenu ndaga thano jiajiya gutukuatesa ha gukhala athu a luholo elu.

12. Mukunda natshi tudi muzuela egi guzumba guana gutukuatesa ha gukhala athu a gushila mutshima? Hana gifezegeselo.

¹² Guzumba guana gutukuatesa ha gukhala athu a gushila mutshima. Yesu wazuelele egi guzumba Yehowa nu muthu na muku’etu idi mikhuala mbadi yabalega gukoma. (Mat. 22:37-39) Yehowa udi diago muthu wa gushila mutshima, tuana gumuzumba hene tuana tshigina gulandula gifezegelo gienji. Ha gufezegesa, tuana bamba ndaga jia gisuegi jia aphangi’etu handaga tuana guazumba. Tuana tshiginago guwambela athu ako ndaga jia aphangi’etu jinyi jiajiya guasagesa.—Yone 15:12.

13. Mu luholo lushi gudibulumuisa guajiya gutukuatesa ha gukhala athu a gushila mutshima?

¹³ Khadilo dia gudibulumuisa diana gutukuatesa ha gukhala athu a gushila mutshima. Muklisto wa gudibulumuisa ganago gukamba gukhala muthu wa thomo ha guwambela athu ako ndaga imoshi ngenyi hagula asuanguluge n’enji. (Fili. 2:3) Gana tshita ndo ndaga jiajiya gutuma athu ako ha gutangiza egi udi mujiya ndaga ya gisuegi. Gudibulumuisa mbagutukuatesa nji ha gutuna guwambela athu avula matangi’etu mu ndaga jinyi Biblia yanago guzuelela nga mikanda yetu.

14. Luholo lutshi gutema guajiya gutukuatesa ha gukhala athu a gushila mutshima?

¹⁴ Gutema guana kuatesa Aklisto ha gujiya ‘tangua dia guzuela nu dia guhena tedie.’ (Mulo. 3:7) Mu mafundo ako athu ana zuela egi: “Guzuela gudi gifua utadi wa siliva, uvi guhena tedie gudi gifua wolo.” Yakotelesa egi matangua ako yana khala yabonga ha guhena tedie ha fundo dia guzuela. Gishina giene Ishima 11:12 idi muzuela egi: “Muenya ndunge wana hena tedie.” Tutadilenu gifezegeselo gimoshi. Mukulu mumoshi udi nu eksperianse, wana tamegewa muavula ha gukuatesa mahungu ako gula adi nu ndaga jiakola jia gulondega. Mukulu muko udi muzuela mukunda nu phangi muene egi: “Wana tshita yagasue ha gutuna guzuela ndaga jia gisuegi jia mahungu ako.” Phangi muene wana kalagala ndaga nu gutema, hene akulu ako a mu hungu diawo ana gumunemesa. Ana gumushila mutshima egi mbagashigo muwambela athu ako ndaga jiawo jia gisuegi.

15. Mukunda natshi guzuela giamatshidia guajiya gukuatesa athu ako ha gugushila mutshima? Hana gifezegeselo.

¹⁵ Guzuela giamatshidia guana gutukuatesa nji ha gukhala athu a gushila mutshima. Tuana shila muthu wana zuela giamatshidia mutshima handaga tuana jiya egi tangua diagasue mbawuzuela ndaga jiadiago. (Ef. 4:25; Heb. 13:18) Ha gufezegesa, yajiya gukhala egi udi mutshigina gukudisa luholo luaye lua gulongesa. Ngenyi watoga muthu mumoshi ha gutegelela diskur diaye nu ha guguhana malongo ajiya gugukuatesa ha gujiya ndaga udi naye gulondega. Udi mumona egi nanyi mbawuguhana malongo abonga? Mbayikhala muthu munu wana guguwambela ndaga wana tshigina gutegelela nga muthu wana guguwambela giamatshidia?  Idi yadiago egi mbawutomba muthu wana guguwambela giamatshidia. Biblia idi muzuela egi: ‘Muthu udi gugubela haphelo wabalega guzumba gudi gua gusuega. Futa udi gugubela udi mudijiga gutshigina guenji gudi aye.’ (Ish. 27:5, 6) Ngatshima thomo yajiya gukhala lamba ha gutegelela ndaga jidi mukatuga gudi futa wana zuela giamatshidia, uvi jiya egi ndaga jiene mbajigubatela gubonga.

16. Luholo lutshi Ishima 10:19 idi mumonesa egi khadilo dia gudikanda didi nu ndando?

¹⁶ Gula tudi mutshigina egi athu atushile mutshima idi nu ndando ha gumonesa khadilo dia gudikanda. Khadilo diene diana gutukuatesa ha guhena tedie gula tudi muvua mutshima zagu-zagu ha guzuela ndaga imoshi ya gisuegi. (Tanga Ishima 10:19.) Yajiya gukhala lamba ha gudikanda tangua tudi mukalegela internet. Gula tuamoneselego gutema, tuajiya gumuanga ndaga ya gisuegi gudi athu avula. Gula tuatuma mesaje mu internet tuana jiyago luholo athu ako ajiya guakalegela nu malamba ajiya gutubatela. Khadilo dia gudikanda diana gutukuatesa nji ha guhena tedie gula mbalagaji jidi gutushinjiga ha guawambela ndaga jiajiya gubatela aphangi’etu malamba. Ndaga ya luholo elu yajiya gukalegewa gula maphulushi adi gutuhula mihu mu gifutshi ginyi mudimo wetu watunyishiwe. Mu ndaga jia luholo elu nu mu ndaga jiko, idi nu ndando ha gukalegela longo didi muzuela egi ‘mbangutshiginago egi kano diami dingutume ha gutshita ndaga jiabola.’ (Ngi. 39:1) Tudi naye gukhala athu a gushila mutshima gudi enya fami yetu, mafuta etu, aphangi’etu Aklisto nga athu ako. Ha gukhala athu a gushila mutshima tudi naye gukhala nu khadilo dia gudikanda.

17. Itshi tudi naye gutshita hagula tukhale gudishila mutshima mu hungu?

¹⁷ Tuana hana Yehowa mersi avula luholo watukuatesele ha gukhala mukatshi dia aphangi a gushila mutshima nu a guzumba! Tudi naye gutshita yagasue hagula aphangi’etu akhale gutushila mutshima. Gula tudi mutshita ngolo ha gukudisa guzumba nu khadilo dia gudibulumuisa, tudi mumonesa gutema, tudi muzuela giamatshidia nu tudi nu khadilo dia gudikanda, mbayitukuatesa ha gudishila mutshima mu hungu. Tudi naye gulandula gutshita ngolo ha gukhala athu a gushila mutshima. Tutshitenu yagasue ha gulandula gifezegeselo gia Yehowa nu tulandulenu gumonesa egi tudi athu a gushila mutshima.