Phaula wazuelele mu 1 Kolinto 15:8 egi: “Gu gisugishilo, wamonegele nji gudi ame. Uvi ame ngudi gifua mona wa gabisu.” Mu ivo yabalega, tuakhalele mukotelesa egi yajiya gukhala egi Phaula wakhalele muzuelela ndaga jiataganele najio muene tangua wahetele vizio ya Yesu mu lutumbu luenji mu dilu. Yakhalele gifua wahetele luendu luakoma lua guvualewa nga lua gufuzumuga ha guheta monyo mu nyuma, gutuama egi gufuzumuga gua luholo elu gukalegewe. Uvi, gungima dia gulonguga luko verse eyi muabonga, tuakotelesa egi idi nu ndando ha gusombegesa ukoteleshi wa verse yene.

Idi yadiago egi mu verse eyi, Phaula udi muzuelela ndaga jiakalegewe tangua dia balumuine muene mutshima. Uvi itshi Phaula watshiginyile guzuela tangua diazuelele muene egi: “Ame ngudi gifua mona wa gabisu”? Yajiya gukotelesa ndaga jiavula.

Tangua diabalumuine muene mutshima yakhalele mu gisagumuisa nu yakhalele ndaga ya lamba. Matangua avula, mona wa gabisu wana vualewa mu gisagumuisa. Saula (munu wabuile Phaula gungima) wakhalele muya gu Damase ha gusagesa Aklisto, gakhalelego mutangiza egi wajiya gumona Yesu mu vizio. Tangua Phaula wabalumuine mutshima, yakhalele ndaga ya gudihula mukunda nu muene nu mukunda nu Aklisto anyi akhalele mutshigina muene gusagesa mu dimbo diene. Yakhalele diago ndaga ya lamba handaga meso enji afuile mukunda nu tangua diazonda.—Makal. 9:1-9, 17-19.

Wabalumuine mutshima mu “tangua diabola.” Mbimbi ya Greke ana balumuna egi “mona wa gabisu” yajiya gubalumuiwa nji egi “mona wavualewa mu tangua diabola.” Mu Bible de Jérusalem ana balumuna mbimbi jiene egi: “Yakhalele gifua ngavualewe tangua nga muthu mumoshi gakhalelego mutangiza.” Tangua Phaula wabalumuine mutshima, Yesu wakhalele wavutuga gale mu dilu. Athu anyi Phaula udi muzuelela mu verse jidi gutuama dia verse 8, amonele Yesu gungima dia gufuzumuga guenji gutuama egi akanduge mu dilu, uvi muene gamumonelego. (1 Kol. 15:4-8) Yesu wahanele Phaula luendu lua gumumona gungima dia gufuzumuga guenji, ngatshima yakhalele mumonega gifua yakhalele mu “tangua diabola.”

Wakhalele muzuelela ndaga jiamutadila nu gudibulumuisa guagasue. Enya ndunge ako ana zuela egi mbimbi yakalegele Phaula mu verse eyi, yajiya guhana matangi gifua wakhalele gudisegulula. Gula Phaula wakhalele mutangiza ngenyi, idi handaga wakhalele mujiya egi gakhalelego watagana ha gukhala mupostolo. Hene wazuelele egi: “Mukatshi dia apostolo agasue, ame ngushigo nu ndando. Ngushigo ngatagana ha gutamegewa egi mupostolo handaga ngasagesele hungu dia Nzambi. Uvi ngudi mutshita mudimo owu handaga Nzambi wanguvidile khenda jiavula.”—1 Kol. 15:9, 10.

Idi mumonega egi Phaula wakhalele muzuelela luholo Yesu wamonegele gudi muene mu gisagumuisa, nu luholo luabalumuine muene mutshima mu tangua gakhalelego mutangiza, nga luholo luamonele muene egi gakhalelego watagana ha guheta vizio eyi yagushimana. Ikhale ngenyi nga ndo, Phaula wazudile ndaga jiene nu ndano yavula. Ndaga yene yamutumile ha gutshigina diago egi Yesu wafuzumugile. Tangua diakhalele mulongesa muene athu ndaga yatadila gufuzumuga gua Yesu, wakhalele nji muzuelela ndaga eyi yagushimana yamonele muene.—Makal. 22:6-11; 26:13-18.