Kalata yoyamba yoyenda kwa Akorinto 1:1-31
1 Kalata ino yachokera kwa inepano Paulo, yemwe nidachemerewa kuti nikhale ntumi wa Yesu Khrisitu mobverana na vomwe Mulungu afuna, pabodzi na Sositene m’bale wathu.
2 Ninkunembera mpingo wa Mulungu womwe uli ku Korinto. Ninkunembera imwepo omwe mwachenesewa* mwa Khrisitu Yesu, omwe mwachemerewa kuti mukhale wochena, pabodzi na wose omwe ali kulikose omwe ankuchemera padzina ya Ambuya wathu Yesu Khrisitu, Ambuya wawo komasoti wathu.
3 Kukoma ntima kukulu na ntendere vochokera kwa Mulungu Ababa wathu na Yesu Khrisitu Ambuya wathu vikhale na imwepo.
4 Nthawe zose nitembeja Mulungu wangu ndawa ya imwepo, pakuwona kukoma ntima kukulu kwa Mulungu komwe adakuwonesani kupitira mwa Yesu Khrisitu.
5 Ndawa yobverana naye, ndimwe wolemera mu vinthu vose, ndipo wakuthandizani kukhala na buya ya kuyankhula komasoti kudziwa vinthu vose,
6 pakuti umboni wonena va Khrisitu udatsimikizirika pakati panu.
7 Palibe mphaso yomwe inkushota pomwe munkudikhira mwachidwi kuululiwa kwa Ambuya wathu Yesu Khrisitu.
8 Komasoti Mulungu adzakulimbiseni mpakana kumapeto, kuti ayi kuti mukhale na chifukwa chokunenerani vinthu voipa mpakana mu ntsiku ya Ambuya wathu Yesu Khrisitu.
9 Mulungu yemwe adakuchemerani kuti mukhale wobverana na Mwana wake Yesu Khrisitu, Ambuya wathu, ni wokhulupirika.
10 Manje ninkukudandaulirani abale, mu dzina ya Ambuya wathu Yesu Khrisitu, kuti mose mumbayankhule mobverana. Pakati panu ayi kuti pawoneke m’gawikano, koma mukhale obverana maninge pakukhala na ntima ubodzi na maganizo yabodzi.
11 Ndawa wanthu anango wa m’banja ya Kuloe, aniuza va imwepo, abale wangu, kuti pagulu yanu pali m’gawikano.
12 Ninkutanthauza kuti, anango wa imwepo ankunena kuti: “Inepano ndine wa Paulo,” anango ankunena kuti: “Ine ndine wa Apolo,” anango pomwe ankunena kuti: “Ine ndine wa Kefa,”* ndipo anangombo ankunena kuti: “Ine ndine wa Khrisitu.”
13 Ko Khrisitu ni wogawanika? Ko Paulo adamanikiwa pamuti wodzudzikirapo kuti imwepo mupulumusiwe? Panango ko mudabatiziwa mudzina ya Paulo?
14 Ninkutembeja Mulungu kuti nilibe kubatizako aliyese wa imwepo kupatulapo Kirisipo na Gayo,
15 kuti osati pagumanike munthu wonena kuti adabatiziwa mudzina yangu.
16 Ni shuwadi kuti nidabatiza pomwe wanthu wa m’banja ya Sitefana. Koma va wanthu anango awa, nikudziwalini peno nidabatizako aliyese.
17 Khrisitu alibe kunituma kuti nimbabatize wanthu, koma kuti nimbalengeze ntontholo wabwino, osati mwa buya yangu ya kuyankhula, kugopera kuti muti wodzudzikirapo* wa Khrisitu ungakhale ulibe phindu.
18 Nkhani yofotokoza va muti wodzudzikirapo* muyo ni chinthu chopusa kwa wanthu omwe ankuyenda kukadzongewa, koma kwa isepano omwe tidapulumusiwa, mweyi ni mphanvu ya Mulungu.
19 Ndawa Malemba yanena kuti: “Nidzachitise wanthu wanzeru kukhala alibe nzeru ndipo nidzalambe kuchenjera kwa wanthu wanzeru.”
20 Ko wanzeru ali kuponi? Mulembi* ali kuponi? Ko wotsutsa wanthawe ino* ali kuponi? Mulungu wachitisa nzeru za dziko iyi kukhala zopusa.
21 Mwanzeru zake, Mulungu alibe kubvuma kuti dziko iphatise basa nzeru zake pakumudziwa. Koma Mulungu adawona kuti viribwino kupulumusa wokhulupirira pakuphatisira basa ntontholo womwe wanthu anango adauwona kuti ni wopusa.
22 Ayuda afuna kuwona vizindikiro ndipo Agiriki afagafaga nzeru.
23 Koma isepano tilalikira va Khrisitu yemwe adaphewa mwakuchita kumanikiwa pamuti. Ayuda awona kuti vimwevi ni vokhumudwisa ndipo wanthu anango wa makhaindi yanango awona kuti ni vopusa.
24 Olo viriteno, Ayuda na Agiriki omwe adachemerewa awona kuti Khrisitu ni mphanvu ya Mulungu komasoti nzeru za Mulungu.
25 Ndawa chinthu cha Mulungu chomwe wanthu achiwona kuti ni chopusa, ni chanzeru kuposha wanthu. Ndipo chinthu cha Mulungu chomwe wanthu achiwona kuti ni chofoka, ni champhanvu kuposha wanthu.
26 Munkuwona momwe adakuchemererani abale, kuti ni azinjilini omwe wanthu awawona kuti ni wanzeru omwe adachemerewa, ni azinjilini wamphanvu omwe adachemerewa, ni azinjilini wa m’mabanja yolemekezeka.
27 Koma Mulungu adasankhula vopusa va dziko kuti achitise manyazi wanthu anzeru, ndipo Mulungu adasankhula vinthu vilibe mphanvu va dziko kuti achitise manyazi vinthu vamphanvu.
28 Mulungu adasankhula pomwe vinthu vonyozeka va dziko na vinthu vomwe wanthu aviwona kuti vilibe na basa, vinthu vomwe palibe, kuti achitise vinthu vomwe viripo kukhala viribe mphanvu.
29 Adachita vimwevi kuti paleke kugumanika munthu wodzikwiza pamaso pa Mulungu.
30 Koma imwepo ndimwe wobverana na Khrisitu Yesu ndawa ya Mulungu muyo. Yesu muyo atiwonesa nzeru za Mulungu komasoti chilungamo cha Mulungu. Kupitira mwa Yesu, ise tinkuchenesewa, ndipo kupitira mwa ntsembe ya Yesu ankutimasula,
31 kuti vibverane na vomwe Malemba yanena kuti: “Yemwe ankudzikwiza, adzikwize mwa Yahova.”*
Mawu ya m’nyantsi
^ Panango kuti: “mwasankhuliwa.”
^ Wodziwika pomwe kuti Petulo.
^ Onani matanthauzo ya mawu yanango.
^ Onani matanthauzo ya mawu yanango.
^ Mulembi ni munthu wodziwa bwino Chilamulo.
^ Onani matanthauzo ya mawu yanango.
^ Onani matanthauzo ya mawu yanango.
