Kalata yoyamba yoyenda kwa Akorinto 10:1-33
10 Manje abale, ninkufuna kuti mudziwe kuti azibereki wathu wakalekale, wose enze pasi pa ntambo ndipo wose adayambuka nyanja.
2 Wose adabatiziwa panthawe yomwe angatewera Mose, pophatisira basa ntambo na nyanja.
3 Wose angadya chakudya chauzimu cholingana.
4 Ndipo wose angamwa madzi yauzimu yolingana. Ndawa angamwa pamwala wauzimu womwe ungawatewera, ndipo mwala muyo wenze Khrisitu.
5 Podiya kuti venze teno, azinji pa wanthu mwawo Mulungu alibe kukondwera nawo ndipo adaphewa muchipululu.
6 Vinthu vimwevi ni vitsanzo kwa isepano, kuti nasembo osati timbakhale na shungu yochita vinthu voipa ninge momwe iwo adachitira.
7 Ndipo osati timbatumikire mafano ninge momwe anango pa wanthu mwawa adachitira, mobverana na vomwe Malemba yanena kuti: “Wanthu adakhala pasi ndipo adadya na kumwa. Patsogolo pake adaimirira nkuyamba kukondwa.”
8 Komasoti osati timbachite chigololo ninge momwe anango pa wanthu mwawo adachitira, nkufa wanthu 23 000 ntsiku ibodzi.
9 Ayi kuti timbamuyese pomwe Yahova,* ninge momwe anango pa wanthu mwawo adamuyesera, ndipo adalumiwa na nyoka nkufa.
10 Ayi kuti timbakonde pomwe kung’ung’uzika, ninge momwe anango pa wanthu mwawa adachitira, nkuphewa na mngelo wodzonga.
11 Vinthu vimwevi vomwe vidawachitikira ni vitsanzo kwa ise ndipo vidanembewa kuti vitichenjeze isepano omwe tinkukhala kumapeto kwa nthawe ino.
12 Ndipomwapa yemwe ankuganiza kuti aliyimirire bwinobwino asamale kuti osati agwe.
13 Palibe viyeso vomwe mwagumana navo vosiyana na vomwe wanthu anango agumana navo. Koma Mulungu ni wokhulupirika ndipo adzabvumelini kuti muyesewe mpakana pomwe mungakwaniselini kupirira, koma pomwe munkugumana na viyeso mwivo iye adzapereke njira yopulumukira kuti mukwanise kuvipirira.
14 Ndipomwapa abale wangu wapamoyo, pewani kutumikira mafano.
15 Ninkuyankhula namwe ninge wanthu wozindikira. Weruzani mwekha peno vomwe ninkunena ivi ni vazedi.
16 Ko khapu ya madaliso yomwe tiyidalisa, itanthauzalini kugawana magazi ya Khrisitu? Ko nkate womwe tiugawagawa utanthauzalini kugawana thupi ya Khrisitu?
17 Pakuti pali nkate ubodzi, isepano, podiya kuti tilipo azinji, ndise thupi ibodzi, ndawa tose tinkudya nawo nkate ubodzi muyo.
18 Ganizirani vomwe Aizirayeli achita: Ko omwe akudya vinthu paguwa yoperekera ntsembe sikuti akhala ninge ankudya na Mulungu?
19 Ko mpfundo ni iponi? Ko vinthu voperekewa ntsembe kwa mafano panango mafano chaiyo ni vofunika?
20 Neye, koma ninkutanthauza kuti vinthu vomwe wanthu anango avipereka ntsembe avipereka kwa viwanda, osati kwa Mulungu. Ndipo ninkufunalini kuti mumbachite chirichose chobverana na viwanda.
21 Vingakwanisikelini kuti mumbamwe vinthu vomwe viri mu khapu ya Yahova* komasoti vomwe viri mu khapu ya viwanda. Vingakwanisikelini pomwe kuti mumbadye “pameza ya Yahova”* komasoti pameza ya viwanda.
22 Panango ‘ko tinkufuna kuti Yahova* achite ntsanje?’ Ko mphanvu zathu zingaposhe mphanvu zake?
23 Vinthu vose ni vobvumizika, koma ni voselini vomwe vinaphindu. Vinthu vose ni vobvumizika, koma ni voselini vomwe vilimbikisa.
24 Aliyese osati ambandofuna vinthu vophindulisa iye basi, koma vophindulisa pomwe anango.
25 Mbadyani nyama iriyose yogulisiwa ku bazali muli na chikumbuntima chabwino ndipo ayi kubvunza mibvunzo.
26 Ndawa “dziko yapasi na vose viri mumo ni va Yahova.”*
27 Peno munthu yemwe atumikiralini Mulungu wakuchemerani ndipo munkufuna kuyenda, kadyeni chilichose chomwe wakupasani muli na chikumbuntima chabwino ndipo ayi kubvunza mibvunzo.
28 Koma munango akakuuzani kuti: “Ivi vaperekewa ntsembe,” ayi kudya vimwevo kuchitira yemwe wakuuzani uyo komasoti chikumbuntima.
29 Ninkunenalini chikumbuntima chako, koma cha munthu munango uyo. Ninkufunalini kuti nimbaphatise basa ufulu wangu basi patsogolo pake nkuweruziwa na chikumbuntima cha munthu munango.
30 Podi nichikhala na ufulu wakudya chakudya chimwecho nkutembeja Mulungu, ko viribwino kuchita vimwevi peno vingachitise kuti wanthu anango aninyoze?
31 Ndipomwapa peno mukudya, mukumwa, panango kuchita chirichose, mumbachite vinthu vose kuti vibwerese ulemerero kwa Mulungu.
32 Mumbapewe kukhumudwisa Ayuda, Agiriki komasoti mpingo wa Mulungu.
33 Vimwevi ni vomwe inepano ninkuyesesa kuchita. Ninkuyesesa kukondweresa wanthu wose pa vose vomwe ninkuchita. Ninkufunalini vophindulisa ine nekha, koma vophindulisa wanthu azinji kuti apulumusiwe.
Mawu ya m’nyantsi
^ Onani vakumapeto A5.
^ Onani vakumapeto A5.
^ Onani vakumapeto A5.
^ Onani vakumapeto A5.
^ Onani vakumapeto A5.
