Kalata yoyamba yoyenda kwa Akorinto 11:1-34
11 Mumbatewedzere inepano, ninge momwe inembo nitewedzerera Khrisitu.
2 Ninkukutembejani ndawa mukunikumbukira pa vinthu vose ndipo munkutewedza miyambo ninge momwe nidayaperekerera kwa imwepo.
3 Koma ninkufuna mudziwe kuti msolo wa mwamuna aliyese ni Khrisitu. Msolo wa nkazi ni mwamuna ndipo msolo wa Khrisitu ni Mulungu.
4 Mwamuna aliyese yemwe apemphera panango kuchita uneneri ali vale chinthu kumsolo ankuchitisa manyazi msolo wake.
5 Koma nkazi yemwe apemphera panango kuchita uneneri koma alibe kuvala chinthu kumsolo achitisa manyazi msolo wake, ndawa ni chibodzibodzi na kugera mpala.
6 Ndawa peno nkazi avalalini chinthu kumsolo afunika kugera mpala. Koma pakuti kugera maninge tsitsi panango kugera mpala kuchitisa manyazi nkazi, ambavale cha kumsolo.
7 Mwamuna afunikalini kuvala chobisa kumsolo ndawa iye ni chifaniziro na ulemerero wa Mulungu, koma nkazi ni ulemerero wa mwamuna.
8 Ndawa mwamuna alibe kuchokera kwa nkazi, koma nkazi adachokera kwa mwamuna.
9 Ndipo mwamuna alibe kulengewa ndawa ya nkazi, koma nkazi adalengewa ndawa ya mwamuna.
10 Ndawa ya vimwevi komasoti ndawa ya angelo, nkazi afunika kuvala chinthu kumsolo powonesa kuti ali pasi pa ulamuliro.
11 Ndipo pagulu ya wanthu wotewera Ambuya, nkazi athemba mwamuna ndipo mwamuna athemba nkazi.
12 Ndawa ninge mwaviriri kuti nkazi adachokera kwa mwamuna, mwamunambo abadwa kuchokera kwa nkazi. Koma vinthu vose vichokera kwa Mulungu.
13 Weruzani mwekha: Ko viribwino kuti nkazi ambapemphere kwa Mulungu alibe kuvala chinthu kumsolo?
14 Ko chikhalidwe chikupfunzisanilini kuti peno mwamuna anatsitsi itali, vikhala vochitisa manyazi?
15 Koma peno nkazi anatsitsi itali alemekezeka. Viriteno ndawa adapasiwa tsitsi yake mwiyo m’malo mwa chinthu chakuti ambavale kumsolo.
16 Olo nteno, peno alipo munango yemwe atsutsa vimwevo pofuna chikhalidwe chinango, isepano na mipingo ya Mulungu, tiribe chikhalidwe chinango mwicho.
17 Koma panikukupasani malangizo mwaya, sikuti ninkukutembejani, ndawa vomwe vichitika mukasonkhana nivabwinolini, koma voipa.
18 Chakuyamba, nabva kuti mukasonkhana mu mpingo, pakukhala kugawikana, ndipo ninkudawikiza kuti vimwevi nishuwadi.
19 Pagulu yanu mweyi pakufunikadi kukhala wanthu wa mpatuko, kuti wanthu obvumizika kwa Mulungu adziwike.
20 Mukasonkhana kuti mudye Chakudya Chakumaulo cha Ambuya muchitalini vinthu vabwino.
21 Ndawa nthawe yakudya ikambafika, aliyese akhala kuti wadya kale chakudya chake, ndipomwapa munango akhala na njala ndipo munango akhala kuti waledzera.
22 Ko imwepo mulibe nyumba yomwe mungadyeremo na kumweramo? Panango ko munkunyoza mpingo wa Mulungu nkumbachitisa manyazi wanthu omwe alibe chirichose? Ko niyankhule chani kwa imwepo? Nikutembejeni? Pankhani mweyimbo ningakutembejenilini.
23 Vomwe nidabva kwa Ambuya ni vomwe inembo nidakupfunzisani, kuti Ambuya Yesu, usiku womwe adaperekewa adatenga nkate,
24 ndipo padayamika adaugawagawa nkunena kuti: “Nkate uyu unkuimira thupi yangu yomwe inkuperekewa ndawa ya imwepo. Mumbachite vimwevi pakunikumbukira.”
25 Adachita pomwe chibodzibodzi na khapu padadya chakudya chakumaulo, ndipo adati: “Khapu iyi inkuimira pangano inyowani yomwe idakhazikisiwa pakuphatisira basa magazi yangu. Mumbachite vimwevi mukambamwa va mkhapu mweyi pakunikumbukira.”
26 Ndawa nthawe iriyose yomwe mukudya mkate moyu na kumwa va mkhapu mweyi, mukhala kuti munkulengeza impfa ya Ambuya, mpakana iye adzabwere.
27 Ndipomwapa aliyese wakudya mkate moyu panango kumwa va mkhapu ya Ambuya mosayenerera, adzakhale na mulandu wa thupi na magazi ya Ambuya.
28 Munthu ambayambe wadziunguza peno ni woyenerera kudya mkate moyu na kumwa va mkhapu mweyi.
29 Ndawa peno munthu ankudya na kumwa koma ankuzindikiralini kuti vinkuimira thupi mweyo, ankudzibweresera chilango.
30 Ndipomwapa azinji pa gulu yanu ni ofoka komasoti odwala ndipo anango afa.*
31 Koma peno tingazindikire mwatiliri, tingaweruziwelini.
32 Koma olo nteno tikaweruziwa, ndiye kuti Yahova* watipfunzisa kuti osati tidzalangiriwe pabodzi na dziko.
33 Ndipomwapa abale wangu, mukasonkhana kuti mudye Chakudya Chamaulo cha Ambuya, mumbadikhirane.
34 Peno munango ananjala, adyeretu kumuyi kwake, kuti mukasonkhana ayi kuti muweruziwe. Koma nkhani zomwe niribe kuzifotokoza nidzaziwone nikadzabwera kumuko.
