Kalata yoyamba yoyenda kwa Akorinto 12:1-31
12 Manje abale, ponena va mphaso zauzimu, ninkufunalini kuti mukhale wosadziwa.
2 Munkudziwa kuti mukanati kukhala atumiki wa Mulungu, mumbatsogolerewa na kusokeresewa na mafano yomwe yayankhulalini.
3 Koma manje ninkufuna mudziwe kuti palibe munthu yemwe mzimu wa Mulungu unkumutsogolera yemwe anganene kuti: “Yesu ni wotembererewa!” Palibe pomwe yemwe anganene kuti: “Yesu ni Ambuya!” Peno alibe kutsogolerewa na mzimu uchena.
4 Pali mphaso zosiyanasiyana, koma pali mzimu ubodzi.
5 Ndipo pali mautumiki yosiyanasiyana, koma Ambuya ni m’bodzi.
6 Basa zilipo zosiyanasiyanambo, koma pali Mulungu m’bodzi yemwe apereka mphanvu zophatira basa mwizo kwa munthu aliyese.
7 Koma thandizo ya mzimu uchena iwonekera kwa munthu aliyese, ndipo Mulungu apereka mzimu muyo na chakulinga chakuti munthu muyo ambathandize anango.
8 Mwakulinganiza, mzimu uthandiza munthu kuyankhula mawu yanzeru, ndipo mzimu muyo uthandiza munthu munango kuyankhula mawu yozindikira.
9 Mzimu ubodzibodzi muyo uthandiza munthu munango kukhala na chikhulupiriro, ndipo uthandiza pomwe munango kukhala na mphaso yopolesa,
10 munango umupasa mphaso yochita basa zamphanvu, munango kuchita uneneri, munango kuzindikira mawu yochita kuuziriwa, munango kuyankhula viyankhulo vosiyanasiyana ndipo munango kutsumbudzulira viyankhulo.
11 Koma vose vimwevi vikwanisika na mzimu muyo, ndipo munthu aliyese apasiwa mphaso zimwezi motsogolerewa na mzimu muyo.
12 Thupi ni ibodzi, koma inavidzo vizinji ndipo vidzo vose va thupi, podiya kuti ni vizinji, vikonza thupi ibodzi. Ndimo mwaviririmbo na Khrisitu.
13 Tose isepano tidabatiziwa na mzimu ubodzi kuti tikhale thupi ibodzi. Peno ndise Ayuda panango Agiriki, akapolo panango womasuka, tose tidatambira mzimu ubodzi.
14 Thupi ikhalalini na chidzo chibodzi, koma vizinji.
15 Peno phazi inganene kuti: “Pakuti ndinelini djanja, ndiye kuti nililini mbali ya thupi,” vimwivo vingachitiselini kuti phazi mwiyo ileke kukhala mbali ya thupi.
16 Ndipo peno dzitu inganene kuti: “Pakuti ndinelini diso, nililini mbali ya thupi,” vimwevo vingachitiselini kuti dzitu mweyo ileke kukhala mbali ya thupi.
17 Thupi yose idakakhala diso, ko sembe tikubva na chani? Ndipo thupi yose idakakhala dzitu, ko sembe tinunkhiza na chani?
18 Koma Mulungu adaikha vidzo vose va thupi, chirichose pamalo yake, momwe iye adafunira.
19 Vidzo vose vidakakhala chidzo chibodzi, ko thupi idakakhalako?
20 Ndipomwapa panavidzo vizinji koma thupi ni ibodzi.
21 Diso ingauzelini djanja kuti: “Nilibe nawe basa,” ndipo msolo ungauzelini minyendo kuti: “Nilibe namwe basa.”
22 Ndipo vidzo vomwe viwoneka ninge vofoka, ni vofunika.
23 Ndipo vidzo vomwe tiviwona ninge vonyozeka, ni vomwe tivilemekeza maninge. Ndipomwapa vidzo va thupi yathu vomwe viwonekalini bwino ni vomwe tivisamalira maninge,
24 koma vidzo vathu vomwe ni vowoneka kale bwino vifunikalini kusamaliriwa teno. Koma olo nteno Mulungu adalumatidza bwino thupi yose, kuti vidzo vomwe viremekezewalini maninge, vimbasamaliliwe maninge.
25 Adachita vimwevi kuti thupi ayi kuti ikhale yogawikana, koma vidzo vake vimbasamalirane.
26 Ndipo chidzo chibodzi chikabonera, vidzo vinango vose vibonera nacho pabodzi, komasoti chidzo chinango chikalemekezewa, vidzo vinango vose vikondwa nacho pabodzi.
27 Ndimwe thupi ya Khrisitu ndipo aliyese wa imwepo ni chidzo cha thupi mwiyo.
28 Mulungu wapereka vochita kwa munthu aliyese mu mpingo. Choyamba atumi, chachiwiri aneneri, chachitatu apfunzisi, patsogolo pake basa zamphanvu, mphaso zopolesa, utumiki wothandiza wanthu, luso yofambisa vinthu komasoti mphaso zoyankhula viyankhulo vosiyanasiyana.
29 Sikuti wose angakhale atumi. Ndipo vingakwanisikelini kuti wose akhale aneneri. Ko wose angakhale apfunzisi? Ko wose angambachite basa zamphanvu?
30 Komasoti ni woselini womwe anamphaso zopolesa. Ni woselini omwe ayankhula viyankhulo vosiyanasiyana. Ndipo wose angakhalelini wotsumbudzulira.
31 Ndipomwapa yesesani* kuti mutambire mphaso zikuluzikulu. Koma olo nteno, nikuwoneseni njira yabwino maninge.
Mawu ya m’nyantsi
^ Panango kuti: “chitani khama.”
